காமாவசரகுஸலம் த்³வாரகதா²

காயகம்மத்³வாரகதா²

இமஸ்ஸ பனத்த²ஸ்ஸ பகாஸனத்த²ம் இமஸ்மிம் டா²னே மஹாஅட்ட²கதா²யம் த்³வாரகதா² கதி²தா. தத்த² தீணி கம்மானி, தீணி கம்மத்³வாரானி, பஞ்ச விஞ்ஞாணானி, பஞ்ச விஞ்ஞாணத்³வாரானி, ச² ப²ஸ்ஸா, ச² ப²ஸ்ஸத்³வாரானி, அட்ட² அஸம்வரா, அட்ட² அஸம்வரத்³வாரானி, அட்ட² ஸம்வரா, அட்ட² ஸம்வரத்³வாரானி, த³ஸ குஸலகம்மபதா², த³ஸ அகுஸலகம்மபதா²தி, இத³ம் ஏத்தகம் த்³வாரகதா²ய மாதிகாட²பனம் நாம.

தத்த² கிஞ்சாபி தீணி கம்மானி பட²மம் வுத்தானி, தானி பன ட²பேத்வா ஆதி³தோ தாவ தீணி கம்மத்³வாரானி பா⁴ஜேத்வா த³ஸ்ஸிதானி. கதமானி தீணி? காயகம்மத்³வாரம், வசீகம்மத்³வாரம், மனோகம்மத்³வாரந்தி.

தத்த² சதுப்³பி³தோ⁴ காயோ – உபாதி³ன்னகோ, ஆஹாரஸமுட்டா²னோ, உதுஸமுட்டா²னோ, சித்தஸமுட்டா²னோதி. தத்த² சக்கா²யதனாதீ³னி ஜீவிதிந்த்³ரியபரியந்தானி அட்ட² கம்மஸமுட்டா²னரூபானிபி, கம்மஸமுட்டா²னானேவ சதஸ்ஸோ தா⁴துயோ வண்ணோ க³ந்தோ⁴ ரஸோ ஓஜாதி அட்ட² உபாதி³ன்னககாயோ நாம. தானேவ அட்ட² ஆஹாரஜானி ஆஹாரஸமுட்டா²னிககாயோ நாம. அட்ட² உதுஜானி உதுஸமுட்டா²னிககாயோ நாம. அட்ட² சித்தஜானி சித்தஸமுட்டா²னிககாயோ நாம.

தேஸு காயகம்மத்³வாரந்தி நேவ உபாதி³ன்னககாயஸ்ஸ நாமம் ந இதரேஸம். சித்தஸமுட்டா²னேஸு பன அட்ட²ஸு ரூபேஸு ஏகா விஞ்ஞத்தி அத்தி², இத³ம் காயகம்மத்³வாரம் நாம. யம் ஸந்தா⁴ய வுத்தம் – ‘‘கதமம் தம் ரூபம் காயவிஞ்ஞத்தி? யா குஸலசித்தஸ்ஸ வா, அகுஸலசித்தஸ்ஸ வா, அப்³யாகதசித்தஸ்ஸ வா, அபி⁴க்கமந்தஸ்ஸ வா படிக்கமந்தஸ்ஸ வா, ஆலோகேந்தஸ்ஸ வா விலோகேந்தஸ்ஸ வா, ஸமிஞ்ஜேந்தஸ்ஸ வா பஸாரேந்தஸ்ஸ வா, காயஸ்ஸ த²ம்ப⁴னா ஸந்த²ம்ப⁴னா ஸந்த²ம்பி⁴தத்தம், விஞ்ஞத்தி விஞ்ஞாபனா விஞ்ஞாபிதத்தம், இத³ம் தம் ரூபம் காயவிஞ்ஞத்தீ’’தி (த⁴. ஸ. 720). ‘அபி⁴க்கமிஸ்ஸாமி படிக்கமிஸ்ஸாமீ’தி ஹி சித்தம் உப்பஜ்ஜமானம் ரூபம் ஸமுட்டா²பேதி. தத்த² யா பத²வீதா⁴து ஆபோதா⁴து தேஜோதா⁴து வாயோதா⁴து தன்னிஸ்ஸிதோ வண்ணோ க³ந்தோ⁴ ரஸோ ஓஜாதி இமேஸம் அட்ட²ன்னம் ரூபகலாபானம் அப்³ப⁴ந்தரே சித்தஸமுட்டா²னா வாயோதா⁴து, ஸா அத்தனா ஸஹஜாதம் ரூபகாயம் ஸந்த²ம்பே⁴தி ஸந்தா⁴ரேதி சாலேதி அபி⁴க்கமாபேதி படிக்கமாபேதி.

தத்த² ஏகாவஜ்ஜனவீதி²யம் ஸத்தஸு ஜவனேஸு பட²மசித்தஸமுட்டி²தா வாயோதா⁴து அத்தனா ஸஹஜாதம் ரூபகாயம் ஸந்த²ம்பே⁴தும் ஸந்தா⁴ரேதும் ஸக்கோதி, அபராபரம் பன சாலேதும் ந ஸக்கோதி. து³தியாதீ³ஸுபி ஏஸேவ நயோ. ஸத்தமசித்தேன பன ஸமுட்டி²தா வாயோதா⁴து ஹேட்டா² ச²ஹி சித்தேஹி ஸமுட்டி²தம் வாயோதா⁴தும் உபத்த²ம்ப⁴னபச்சயம் லபி⁴த்வா அத்தனா ஸஹஜாதம் ரூபகாயம் ஸந்த²ம்பே⁴தும் ஸந்தா⁴ரேதும் சாலேதும் அபி⁴க்கமாபேதும் படிக்கமாபேதும் ஆலோகாபேதும் விலோகாபேதும் ஸம்மிஞ்ஜாபேதும் பஸாராபேதும் ஸக்கோதி. தேன க³மனம் நாம ஜாயதி, ஆக³மனம் நாம ஜாயதி, க³மனாக³மனம் நாம ஜாயதி. ‘யோஜனம் க³தோ த³ஸயோஜனம் க³தோ’தி வத்தப்³ப³தம் ஆபஜ்ஜாபேதி.

யதா² ஹி ஸத்தஹி யுகே³ஹி ஆகட்³டி⁴தப்³பே³ ஸகடே பட²மயுகே³ யுத்தகோ³ணா யுக³ம் தாவ ஸந்த²ம்பே⁴தும் ஸந்தா⁴ரேதும் ஸக்கோந்தி, சக்கம் பன நபவட்டேந்தி; து³தியாதீ³ஸுபி ஏஸேவ நயோ; ஸத்தமயுகே³ பன கோ³ணே யோஜேத்வா யதா³ சே²கோ ஸாரதி² து⁴ரே நிஸீதி³த்வா யோத்தானி ஆதா³ய ஸப்³ப³புரிமதோ பட்டா²ய பதோத³லட்டி²யா கோ³ணே ஆகோடேதி, ததா³ ஸப்³பே³வ ஏகப³லா ஹுத்வா து⁴ரஞ்ச ஸந்தா⁴ரேந்தி சக்கானி ச பவட்டேந்தி. ‘ஸகடம் க³ஹேத்வா த³ஸயோஜனம் வீஸதியோஜனம் க³தா’தி வத்தப்³ப³தம் ஆபாதே³ந்தி – ஏவம்ஸம்பத³மித³ம் வேதி³தப்³ப³ம்.

தத்த² யோ சித்தஸமுட்டா²னிககாயோ ந ஸோ விஞ்ஞத்தி, சித்தஸமுட்டா²னாய பன வாயோதா⁴துயா ஸஹஜாதம் ரூபகாயம் ஸந்த²ம்பே⁴தும் ஸந்தா⁴ரேதும் சாலேதும் பச்சயோ ப⁴விதும் ஸமத்தோ² ஏகோ ஆகாரவிகாரோ அத்தி², அயம் விஞ்ஞத்தி நாம. ஸா அட்ட² ரூபானி விய ந சித்தஸமுட்டா²னா. யதா² பன அனிச்சாதி³பே⁴தா³னம் த⁴ம்மானம் ஜராமரணத்தா, ‘‘ஜராமரணம், பி⁴க்க²வே, அனிச்சம் ஸங்க²த’’ந்திஆதி³ (ஸம். நி. 2.20) வுத்தம், ஏவம் சித்தஸமுட்டா²னானம் ரூபானம் விஞ்ஞத்திதாய ஸாபி சித்தஸமுட்டா²னா நாம ஹோதி.

விஞ்ஞாபனத்தா பனேஸா விஞ்ஞத்தீதி வுச்சதி. கிம் விஞ்ஞாபேதீதி? ஏகம் காயிககரணம். சக்கு²பத²ஸ்மிஞ்ஹி டி²தோ ஹத்த²ம் வா பாத³ம் வா உக்கி²பதி, ஸீஸம் வா ப⁴முகம் வா சாலேதி, அயம் ஹத்தா²தீ³னம் ஆகாரோ சக்கு²விஞ்ஞேய்யோ ஹோதி. விஞ்ஞத்தி பன ந சக்கு²விஞ்ஞேய்யா மனோவிஞ்ஞேய்யா ஏவ. சக்கு²னா ஹி ஹத்த²விகாராதி³வஸேன விப்ப²ந்த³மானம் வண்ணாரம்மணமேவ பஸ்ஸதி. விஞ்ஞத்திம் பன மனோத்³வாரிகசித்தேன சிந்தேத்வா ‘இத³ஞ்சித³ஞ்ச ஏஸ காரேதி மஞ்ஞே’தி ஜானாதி.

யதா² ஹி அரஞ்ஞே நிதா³க⁴ஸமயே உத³கட்டா²னே மனுஸ்ஸா ‘இமாய ஸஞ்ஞாய இத⁴ உத³கஸ்ஸ அத்தி²பா⁴வம் ஜானிஸ்ஸந்தீ’தி ருக்க²க்³கே³ தாலபண்ணாதீ³னி ப³ந்தா⁴பேந்தி, ஸுராபானத்³வாரே த⁴ஜம் உஸ்ஸாபேந்தி, உச்சம் வா பன ருக்க²ம் வாதோ பஹரித்வா சாலேதி, அந்தோஉத³கே மச்சே² சலந்தே உபரி பு³ப்³பு³ளகானி உட்ட²ஹந்தி, மஹோக⁴ஸ்ஸ க³தமக்³க³பரியந்தே திணபண்ணகஸடம் உஸ்ஸாரிதம் ஹோதி. தத்த² தாலபண்ணத⁴ஜஸாகா²சலனபு³ப்³பு³ளகதிணபண்ணகஸடே தி³ஸ்வா யதா² சக்கு²னா அதி³ட்ட²ம்பி ‘ஏத்த² உத³கம் ப⁴விஸ்ஸதி, ஸுரா ப⁴விஸ்ஸதி, அயம் ருக்கோ² வாதேன பஹதோ ப⁴விஸ்ஸதி, அந்தோஉத³கே மச்சோ² ப⁴விஸ்ஸதி, ஏத்தகம் டா²னம் அஜ்ஜோ²த்த²ரித்வா ஓகோ⁴ க³தோ ப⁴விஸ்ஸதீ’தி மனோவிஞ்ஞாணேன ஜானாதி, ஏவமேவ விஞ்ஞத்திபி ந சக்கு²விஞ்ஞேய்யா மனோவிஞ்ஞேய்யாவ. சக்கு²னா ஹி ஹத்த²விகாராதி³வஸேன விப்ப²ந்த³மானம் வண்ணாரம்மணமேவ பஸ்ஸதி. விஞ்ஞத்திம் பன மனோத்³வாரிகசித்தேன சிந்தேத்வா ‘இத³ஞ்சித³ஞ்ச ஏஸ காரேதி மஞ்ஞே’தி ஜானாதி.

ந கேவலஞ்சேஸா விஞ்ஞாபனதோவ விஞ்ஞத்தி நாம. விஞ்ஞேய்யதோபி பன விஞ்ஞத்தியேவ நாம. அயஞ்ஹி பரேஸம் அந்தமஸோ திரச்சா²னக³தானம்பி பாகடா ஹோதி. தத்த² தத்த² ஸன்னிபதிதா ஹி ஸோணஸிங்கா³லகாககோ³ணாத³யோ த³ண்ட³ம் வா லேட்³டு³ம் வா க³ஹேத்வா பஹரணாகாரே த³ஸ்ஸிதே ‘அயம் நோ பஹரிதுகாமோ’தி ஞத்வா யேன வா தேன வா பலாயந்தி. பாகாரகுட்டாதி³அந்தரிகஸ்ஸ பன பரஸ்ஸ அபாகடகாலோபி அத்தி². கிஞ்சாபி தஸ்மிம் க²ணே அபாகடா ஸம்முகீ²பூ⁴தானம் பன பாகடத்தா விஞ்ஞத்தியேவ நாம ஹோதி.

சித்தஸமுட்டா²னிகே பன காயே சலந்தே திஸமுட்டா²னிகோ சலதி ந சலதீதி? ஸோபி ததே²வ சலதி. தம்க³திகோ தத³னுவத்தகோவ ஹோதி. யதா² ஹி உத³கே க³ச்ச²ந்தே உத³கே பதிதானி ஸுக்க²த³ண்ட³கதிணபண்ணாதீ³னிபி உத³கக³திகானேவ ப⁴வந்தி, தஸ்மிம் க³ச்ச²ந்தே க³ச்ச²ந்தி, திட்ட²ந்தே திட்ட²ந்தி – ஏவம்ஸம்பத³மித³ம் வேதி³தப்³ப³ம். ஏவமேஸா சித்தஸமுட்டா²னேஸு ரூபேஸு விஞ்ஞத்தி காயகம்மத்³வாரம் நாமாதி வேதி³தப்³பா³.

யா பன தஸ்மிம் த்³வாரே ஸித்³தா⁴ சேதனா யாய பாணம் ஹனதி, அதி³ன்னம் ஆதி³யதி, மிச்சா²சாரம் சரதி, பாணாதிபாதாதீ³ஹி விரமதி, இத³ம் காயகம்மம் நாம. ஏவம் பரவாதி³ம்ஹி ஸதி காயோ த்³வாரம், தம்ஹி த்³வாரே ஸித்³தா⁴ சேதனா காயகம்மம் ‘குஸலம் வா அகுஸலம் வா’தி ட²பேதப்³ப³ம். பரவாதி³ம்ஹி பன அஸதி ‘அப்³யாகதம் வா’தி திகம் பூரேத்வாவ ட²பேதப்³ப³ம். தத்த² யதா² நக³ரத்³வாரம் கதட்டா²னேயேவ திட்ட²தி, அங்கு³லமத்தம்பி அபராபரம் ந ஸங்கமதி, தேன தேன பன த்³வாரேன மஹாஜனோ ஸஞ்சரதி, ஏவமேவ த்³வாரே த்³வாரம் ந ஸஞ்சரதி, கம்மம் பன தஸ்மிம் தஸ்மிம் த்³வாரே உப்பஜ்ஜனதோ சரதி. தேனாஹு போராணா –

த்³வாரே சரந்தி கம்மானி, ந த்³வாரா த்³வாரசாரினோ;

தஸ்மா த்³வாரேஹி கம்மானி, அஞ்ஞமஞ்ஞம் வவத்தி²தாதி.

தத்த² கம்மேனாபி த்³வாரம் நாமம் லப⁴தி, த்³வாரேனாபி கம்மம். யதா² ஹி விஞ்ஞாணாதீ³னம் உப்பஜ்ஜனட்டா²னானி விஞ்ஞாணத்³வாரம் ப²ஸ்ஸத்³வாரம் அஸம்வரத்³வாரம் ஸம்வரத்³வாரந்தி நாமம் லப⁴ந்தி, ஏவம் காயகம்மஸ்ஸ உப்பஜ்ஜனட்டா²னம் காயகம்மத்³வாரந்தி நாமம் லப⁴தி. வசீமனோகம்மத்³வாரேஸுபி ஏஸேவ நயோ. யதா² பன தஸ்மிம் தஸ்மிம் ருக்கே² அதி⁴வத்தா² தே³வதா ஸிம்ப³லிதே³வதா பலாஸதே³வதா புசிமந்த³தே³வதா ப²ந்த³னதே³வதாதி தேன தேன ருக்கே²ன நாமம் லப⁴தி, ஏவமேவ காயத்³வாரேன கதம் கம்மம்பி காயகம்மந்தி த்³வாரேன நாமம் லப⁴தி. வசீகம்மமனோகம்மேஸுபி ஏஸேவ நயோ. தத்த² அஞ்ஞோ காயோ, அஞ்ஞம் கம்மம், காயேன பன கதத்தா தம் காயகம்மந்தி வுச்சதி. தேனாஹு அட்ட²கதா²சரியா –

காயேன சே கதம் கம்மம், காயகம்மந்தி வுச்சதி;

காயோ ச காயகம்மஞ்ச, அஞ்ஞமஞ்ஞம் வவத்தி²தா.

ஸூசியா சே கதம் கம்மம், ஸூசிகம்மந்தி வுச்சதி;

ஸூசி ச ஸூசிகம்மஞ்ச, அஞ்ஞமஞ்ஞம் வவத்தி²தா.

வாஸியா சே கதம் கம்மம், வாஸிகம்மந்தி வுச்சதி;

வாஸி ச வாஸிகம்மஞ்ச, அஞ்ஞமஞ்ஞம் வவத்தி²தா.

புரிஸேன சே கதம் கம்மம், புரிஸகம்மந்தி வுச்சதி;

புரிஸோ ச புரிஸகம்மஞ்ச, அஞ்ஞமஞ்ஞம் வவத்தி²தா.

ஏவமேவம்.

காயேன சே கதம் கம்மம், காயகம்மந்தி வுச்சதி;

காயோ ச காயகம்மஞ்ச, அஞ்ஞமஞ்ஞம் வவத்தி²தாதி.

ஏவம் ஸந்தே நேவ த்³வாரவவத்தா²னம் யுஜ்ஜதி, ந கம்மவவத்தா²னம். கத²ம்? காயவிஞ்ஞத்தியஞ்ஹி ‘‘த்³வாரே சரந்தி கம்மானீ’’தி வசனதோ வசீகம்மம்பி பவத்ததி, தேனஸ்ஸா காயகம்மத்³வாரந்தி வவத்தா²னம் ந யுத்தம். காயகம்மஞ்ச வசீவிஞ்ஞத்தியம்பி பவத்ததி, தேனஸ்ஸ காயகம்மந்தி வவத்தா²னம் ந யுஜ்ஜதீ’தி. ‘நோ ந யுஜ்ஜதி. கஸ்மா? யேபு⁴ய்யவுத்திதாய சேவ தப்³ப³ஹுலவுத்திதாய ச. காயகம்மமேவ ஹி யேபு⁴ய்யேன காயவிஞ்ஞத்தியம் பவத்ததி ந இதரானி, தஸ்மா காயகம்மஸ்ஸ யேபு⁴ய்யேன பவத்திதோ தஸ்ஸா காயகம்மத்³வாரபா⁴வோ ஸித்³தோ⁴. ப்³ராஹ்மணகா³மஅம்ப³வனனாக³வனாதீ³னம் ப்³ராஹ்மணகா³மாதி³பா⁴வோ வியாதி த்³வாரவவத்தா²னம் யுஜ்ஜதி. காயகம்மம் பன காயத்³வாரம்ஹியேவ ப³ஹுலம் பவத்ததி அப்பம் வசீத்³வாரே. தஸ்மா காயத்³வாரே ப³ஹுலம் பவத்திதோ ஏதஸ்ஸ காயகம்மபா⁴வோ ஸித்³தோ⁴, வனசரகது²ல்லகுமாரிகாதி³கோ³சரானம் வனசரகாதி³பா⁴வோ வியாதி. ஏவம் கம்மவவத்தா²னம்பி யுஜ்ஜதீ’தி.

காயகம்மத்³வாரகதா² நிட்டி²தா.

வசீகம்மத்³வாரகதா²

வசீகம்மத்³வாரகதா²யம் பன சேதனாவிரதிஸத்³த³வஸேன திவிதா⁴ வாசா நாம. தத்த² ‘‘சதூஹி, பி⁴க்க²வே, அங்கே³ஹி ஸமன்னாக³தா வாசா ஸுபா⁴ஸிதா ஹோதி நோ து³ப்³பா⁴ஸிதா, அனவஜ்ஜா ச அனனுவஜ்ஜா ச விஞ்ஞூன’’ந்தி (ஸம். நி. 1.213); அயம் சேதனாவாசா நாம. யா ‘‘சதூஹி வசீது³ச்சரிதேஹி ஆரதி விரதி…பே… அயம் வுச்சதி ஸம்மாவாசா’’தி (விப⁴. 206), அயம் விரதிவாசா நாம. ‘‘வாசா கி³ரா ப்³யப்பதோ² உதீ³ரணம் கோ⁴ஸோ கோ⁴ஸகம்மம் வாசா வசீபே⁴தோ³’’தி (த⁴. ஸ. 850), அயம் ஸத்³த³வாசா நாம. தாஸு வசீகம்மத்³வாரந்தி நேவ சேதனாய நாமம் ந விரதியா. ஸஹஸத்³தா³ பன ஏகா விஞ்ஞத்தி அத்தி², இத³ம் வசீகம்மத்³வாரம் நாம. யம் ஸந்தா⁴ய வுத்தம் – ‘‘கதமம் தம் ரூபம் வசீவிஞ்ஞத்தி? யா குஸலசித்தஸ்ஸ வா அகுஸலசித்தஸ்ஸ வா அப்³யாகதசித்தஸ்ஸ வா வாசா கி³ரா ப்³யப்பதோ² உதீ³ரணம் கோ⁴ஸோ கோ⁴ஸகம்மம் வாசா வசீபே⁴தோ³, அயம் வுச்சதி வாசா. யா தாய வாசாய விஞ்ஞத்தி விஞ்ஞாபனா விஞ்ஞாபிதத்தம், இத³ம் தம் ரூபம் வசீவிஞ்ஞத்தீ’’தி (த⁴. ஸ. 636).

‘இத³ம் வக்கா²மி ஏதம் வக்கா²மீ’தி ஹி விதக்கயதோ விதக்கவிப்பா²ரஸத்³தோ³ நாம உப்பஜ்ஜதி. அயம் ந ஸோதவிஞ்ஞேய்யோ மனோவிஞ்ஞேய்யோதி மஹாஅட்ட²கதா²யம் ஆக³தோ. ஆக³மட்ட²கதா²ஸு பன ‘விதக்கவிப்பா²ரஸத்³த³’ந்தி விதக்கவிப்பா²ரவஸேன உப்பன்னம் விப்பலபந்தானம் ஸுத்தப்பமத்தாதீ³னம் ஸத்³த³ம்; ‘ஸுத்வா’தி தம் ஸுத்வா, யம் விதக்கயதோ தஸ்ஸ ஸோ ஸத்³தோ³ உப்பன்னோ; தஸ்ஸ வஸேன ‘ஏவம்பி தே மனோ, இத்த²ம்பி தே மனோ’தி ஆதி³ஸதீதி வத்வா வத்தூ²னிபி கதி²தானி. பட்டா²னேபி ‘‘சித்தஸமுட்டா²னம் ஸத்³தா³யதனம் ஸோதவிஞ்ஞாணஸ்ஸ ஆரம்மணபச்சயேன பச்சயோ’’தி ஆக³தம். தஸ்மா வினா விஞ்ஞத்திக⁴ட்டனாய உப்பஜ்ஜமானோ அஸோதவிஞ்ஞேய்யோ விதக்கவிப்பா²ரஸத்³தோ³ நாம நத்தி². ‘இத³ம் வக்கா²மி ஏதம் வக்கா²மீ’தி உப்பஜ்ஜமானம் பன சித்தம் பத²வீதா⁴து ஆபோதா⁴து தேஜோதா⁴து வாயோதா⁴து வண்ணோ க³ந்தோ⁴ ரஸோ ஓஜாதி அட்ட² ரூபானி ஸமுட்டா²பேதி. தேஸம் அப்³ப⁴ந்தரே சித்தஸமுட்டா²னா பத²வீதா⁴து உபாதி³ன்னகம் க⁴ட்டயமானாவ உப்பஜ்ஜதி. தேன தா⁴துஸங்க⁴ட்டனேன ஸஹேவ ஸத்³தோ³ உப்பஜ்ஜதீதி. அயம் சித்தஸமுட்டா²னஸத்³தோ³ நாம. அயம் ந விஞ்ஞத்தி. தஸ்ஸா பன சித்தஸமுட்டா²னாய பத²வீதா⁴துயா உபாதி³ன்னகக⁴ட்டனஸ்ஸ பச்சயபூ⁴தோ ஏகோ ஆகாரவிகாரோ அத்தி², அயம் வசீவிஞ்ஞத்தி நாம. இதோ பரம் ஸா அட்ட² ரூபானி விய ந சித்தஸமுட்டா²னாதிஆதி³ ஸப்³ப³ம் ஹேட்டா² வுத்தனயேனேவ வேதி³தப்³ப³ம்.

இதா⁴பி ஹி ‘திஸ்ஸ, த³த்த, மித்தா’தி பக்கோஸந்தஸ்ஸ ஸத்³த³ம் ஸுத்வா விஞ்ஞத்திம் மனோத்³வாரிகசித்தேன சிந்தேத்வா ‘இத³ஞ்சித³ஞ்ச ஏஸ காரேதி மஞ்ஞே’தி ஜானாதி. காயவிஞ்ஞத்தி விய ச அயம்பி திரச்சா²னக³தானம்பி பாகடா ஹோதி. ‘ஏஹி, யாஹீ’தி ஹி ஸத்³த³ம் ஸுத்வா திரச்சா²னக³தாபி ‘இத³ம் நாமேஸ காரேதி மஞ்ஞே’தி ஞத்வா ஆக³ச்ச²ந்தி சேவ க³ச்ச²ந்தி ச. திஸமுட்டா²னிககாயம் சாலேதி ந சாலேதீதி, அயம் பன வாரோ இத⁴ ந லப்³ப⁴தி. புரிமசித்தஸமுட்டா²னாய உபத்த²ம்ப⁴னகிச்சம்பி நத்தி². யா பன தஸ்மிம் வசீத்³வாரே ஸித்³தா⁴ சேதனா, யாய முஸா கதே²தி, பேஸுஞ்ஞம் கதே²தி, ப²ருஸம் கதே²தி, ஸம்ப²ம் பலபதி, முஸாவாதா³தீ³ஹி விரமதி, இத³ம் வசீகம்மம் நாம. இதோ பரம் ஸப்³ப³ம் கம்மவவத்தா²னஞ்ச த்³வாரவவத்தா²னஞ்ச ஹேட்டா² வுத்தனயேனேவ வேதி³தப்³ப³ந்தி.

வசீகம்மத்³வாரகதா² நிட்டி²தா.

மனோகம்மத்³வாரகதா²

மனோகம்மத்³வாரகதா²யம் பன காமாவசராதி³வஸேன சதுப்³பி³தோ⁴ மனோ மனோ நாம. தத்த² காமாவசரோ சதுபஞ்ஞாஸவிதோ⁴ ஹோதி, ரூபாவசரோ பன்னரஸவிதோ⁴, அரூபாவசரோ த்³வாத³ஸவிதோ⁴, லோகுத்தரோ அட்ட²விதோ⁴தி ஸப்³போ³பி ஏகூனனவுதிவிதோ⁴ ஹோதி. தத்த² அயம் நாம மனோ மனோத்³வாரம் ந ஹோதீதி ந வத்தப்³போ³. யதா² ஹி அயம் நாம சேதனா கம்மம் ந ஹோதீதி ந வத்தப்³பா³, அந்தமஸோ பஞ்சவிஞ்ஞாணஸம்பயுத்தாபி ஹி சேதனா மஹாபகரணே கம்மந்த்வேவ நித்³தி³ட்டா², ஏவமேவ அயம் நாம மனோ மனோத்³வாரம் ந ஹோதீதி ந வத்தப்³போ³.

ஏத்தா²ஹ – கம்மம் நாமேதம் கிம் கரோதீதி? ஆயூஹதி, அபி⁴ஸங்க²ரோதி, பிண்ட³ம் கரோதி, சேதேதி, கப்பேதி, பகப்பேதீதி. ஏவம் ஸந்தே பஞ்சவிஞ்ஞாணசேதனா கிம் ஆயூஹதி, அபி⁴ஸங்க²ரோதி, பிண்ட³ம் கரோதி, சேதேதி, கப்பேதி, பகப்பேதீதி?. ஸஹஜாதத⁴ம்மே. ஸாபி ஹி ஸஹஜாதே ஸம்பயுத்தக்க²ந்தே⁴ ஆயூஹதி அபி⁴ஸங்க²ரோதி பிண்ட³ம் கரோதி சேதேதி கப்பேதி பகப்பேதீதி. கிம் வா இமினா வாதே³ன? ஸப்³ப³ஸங்கா³ஹிகவஸேன ஹேதம் வுத்தம். இத³ம் பனேத்த² ஸன்னிட்டா²னம் – தேபூ⁴மககுஸலாகுஸலோ ஏகூனதிம்ஸவிதோ⁴ மனோ மனோகம்மத்³வாரம் நாம. யா பன தஸ்மிம் மனோத்³வாரே ஸித்³தா⁴ சேதனா யாய அபி⁴ஜ்ஜா²ப்³யாபாத³மிச்சா²த³ஸ்ஸனானி சேவ அனபி⁴ஜ்ஜா²அப்³யாபாத³ஸம்மாத³ஸ்ஸனானி ச க³ண்ஹாதி, இத³ம் மனோகம்மம் நாம. இதோ பரம் ஸப்³ப³ம் கம்மவவத்தா²னஞ்ச த்³வாரவவத்தா²னஞ்ச ஹேட்டா² வுத்தனயேனேவ வேதி³தப்³ப³ந்தி. இமானி தீணி கம்மத்³வாரானி நாம.

மனோகம்மத்³வாரகதா² நிட்டி²தா.

கம்மகதா²

இதா³னி யானி தீணி கம்மானி ட²பேத்வா இமானி கம்மத்³வாரானி த³ஸ்ஸிதானி, தானி ஆதி³ம் கத்வா அவஸேஸஸ்ஸ த்³வாரகதா²ய மாதிகாட²பனஸ்ஸ வித்தா²ரகதா² ஹோதி. தீணி ஹி கம்மானி – காயகம்மம் வசீகம்மம் மனோகம்மந்தி. கிம் பனேதம் கம்மம் நாமாதி? சேதனா சேவ, ஏகச்சே ச சேதனாஸம்பயுத்தகா த⁴ம்மா. தத்த² சேதனாய கம்மபா⁴வே இமானி ஸுத்தானி –

‘‘சேதனாஹம், பி⁴க்க²வே, கம்மம் வதா³மி, சேதயித்வா கம்மம் கரோதி காயேன வாசாய மனஸா’’ (அ. நி. 6.63; கதா². 539). ‘‘காயே வா ஹி, ஆனந்த³, ஸதி காயஸஞ்சேதனாஹேது உப்பஜ்ஜதி அஜ்ஜ²த்தம் ஸுக²து³க்க²ம், வாசாய வா, ஆனந்த³, ஸதி வசீஸஞ்சேதனாஹேது உப்பஜ்ஜதி அஜ்ஜ²த்தம் ஸுக²து³க்க²ம்; மனே வா, ஆனந்த³, ஸதி மனோஸஞ்சேதனாஹேது உப்பஜ்ஜதி அஜ்ஜ²த்தம் ஸுக²து³க்க²ம்’’ (ஸம். நி. 2.25; அ. நி. 4.171). ‘‘திவிதா⁴, பி⁴க்க²வே, காயஸஞ்சேதனா அகுஸலம் காயகம்மம் து³க்கு²த்³ரயம், து³க்க²விபாகம்; சதுப்³பி³தா⁴, பி⁴க்க²வே, வசீஸஞ்சேதனா…பே… திவிதா⁴, பி⁴க்க²வே, மனோஸஞ்சேதனா அகுஸலம் மனோகம்மம் து³க்கு²த்³ரயம் து³க்க²விபாகம் திவிதா⁴, பி⁴க்க²வே, காயஸஞ்சேதனா குஸலம் காயகம்மம் ஸுகு²த்³ரயம் ஸுக²விபாகம் சதுப்³பி³தா⁴, பி⁴க்க²வே, வசீஸஞ்சேதனா…பே… திவிதா⁴, பி⁴க்க²வே, மனோஸஞ்சேதனா, குஸலம் மனோகம்மம் ஸுகு²த்³ரயம் ஸுக²விபாகம்’’ (கதா². 539; அ. நி. 10.217 தோ²கம் விஸதி³ஸம்). ‘‘ஸசாயம், ஆனந்த³, ஸமித்³தி⁴ மோக⁴புரிஸோ பாடலிபுத்தஸ்ஸ பரிப்³பா³ஜகஸ்ஸ ஏவம் புட்டோ² ஏவம் ப்³யாகரேய்ய – ஸஞ்சேதனியம், ஆவுஸோ பாடலிபுத்த, கம்மம் கத்வா காயேன வாசாய மனஸா, ஸுக²வேத³னீயம் ஸுக²ம் ஸோ வேத³யதி…பே… அது³க்க²மஸுக²வேத³னீயம் அது³க்க²மஸுக²ம் ஸோ வேத³யதீதி; ஏவம் ப்³யாகரமானோ கோ², ஆனந்த³, ஸமித்³தி⁴ மோக⁴புரிஸோ பாடலிபுத்தஸ்ஸ பரிப்³பா³ஜகஸ்ஸ ஸம்மா ப்³யாகரமானோ ப்³யாகரேய்யா’’தி (ம. நி. 3.300; கதா². 539).

இமானி தாவ சேதனாய கம்மபா⁴வே ஸுத்தானி. சேதனாஸம்பயுத்தத⁴ம்மானம் பன கம்மபா⁴வோ கம்மசதுக்கேன தீ³பிதோ. வுத்தஞ்ஹேதம் –

‘‘சத்தாரிமானி, பி⁴க்க²வே, கம்மானி மயா ஸயம் அபி⁴ஞ்ஞா ஸச்சி²கத்வா பவேதி³தானி. கதமானி சத்தாரி? அத்தி², பி⁴க்க²வே, கம்மம் கண்ஹம் கண்ஹவிபாகம், அத்தி², பி⁴க்க²வே, கம்மம் ஸுக்கம் ஸுக்கவிபாகம், அத்தி², பி⁴க்க²வே, கம்மம் கண்ஹஸுக்கம் கண்ஹஸுக்கவிபாகம், அத்தி², பி⁴க்க²வே, கம்மம் அகண்ஹம் அஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததி (அ. நி. 4.232-233).… கதமஞ்ச, பி⁴க்க²வே, கம்மம் அகண்ஹம் அஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததி? யதி³த³ம் ஸத்த போ³ஜ்ஜ²ங்கா³ – ஸதிஸம்போ³ஜ்ஜ²ங்கோ³…பே… உபேக்கா²ஸம்போ³ஜ்ஜ²ங்கோ³, இத³ம் வுச்சதி, பி⁴க்க²வே, கம்மம் அகண்ஹம் அஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததி (அ. நி. 4.238).… கதமஞ்ச, பி⁴க்க²வே, கம்மம் அகண்ஹம் அஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததி? அயமேவ அரியோ அட்ட²ங்கி³கோ மக்³கோ³ – ஸேய்யதி²த³ம், ஸம்மாதி³ட்டி² …பே… ஸம்மாஸமாதி⁴. இத³ம் வுச்சதி, பி⁴க்க²வே, கம்மம் அகண்ஹம் அஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததீ’’தி (அ. நி. 4.237).

ஏவம் இமே போ³ஜ்ஜ²ங்க³மக்³க³ங்க³ப்பபே⁴த³தோ பன்னரஸ த⁴ம்மா கம்மசதுக்கேன தீ³பிதா. அபி⁴ஜ்ஜா², ப்³யாபாதோ³, மிச்சா²தி³ட்டி², அனபி⁴ஜ்ஜா², அப்³யாபாதோ³, ஸம்மாதி³ட்டீ²தி இமேஹி பன ச²ஹி ஸத்³தி⁴ம் ஏகவீஸதி சேதனாஸம்பயுத்தகா த⁴ம்மா வேதி³தப்³பா³.

தத்த² லோகுத்தரமக்³கோ³ ப⁴ஜாபியமானோ காயகம்மாதீ³னி தீணி கம்மானி ப⁴ஜதி. யஞ்ஹி காயேன து³ஸ்ஸீல்யம் அஜ்ஜா²சரதி, தம்ஹா ஸம்வரோ காயிகோதி வேதி³தப்³போ³. யம் வாசாய து³ஸ்ஸீல்யம் அஜ்ஜா²சரதி, தம்ஹா ஸம்வரோ வாசஸிகோதி வேதி³தப்³போ³. இதி ஸம்மாகம்மந்தோ காயகம்மம், ஸம்மாவாசா வசீகம்மம். ஏதஸ்மிம் த்³வயே க³ஹிதே ஸம்மாஆஜீவோ தப்பக்கி²கத்தா க³ஹிதோவ ஹோதி. யம் பன மனேன து³ஸ்ஸீல்யம் அஜ்ஜா²சரதி, தம்ஹா ஸம்வரோ மானஸிகோதி வேதி³தப்³போ³. ஸோ தி³ட்டி²ஸங்கப்பவாயாமஸதிஸமாதி⁴வஸேன பஞ்சவிதோ⁴ ஹோதி. அயம் பஞ்சவிதோ⁴பி மனோகம்மம் நாம. ஏவம் லோகுத்தரமக்³கோ³ ப⁴ஜாபியமானோ தீணி கம்மானி ப⁴ஜதி.

இமஸ்மிம் டா²னே த்³வாரஸம்ஸந்த³னம் நாம ஹோதி. காயவசீத்³வாரேஸு ஹி சோபனம் பத்வா கம்மபத²ம் அப்பத்தம்பி அத்தி², மனோத்³வாரே ச ஸமுதா³சாரம் பத்வா கம்மபத²ம் அப்பத்தம்பி அத்தி²; தம் க³ஹேத்வா தம்தம்த்³வாரபக்கி²கமேவ அகம்ஸு.

தத்ராயம் நயோ – யோ ‘மிக³வம் க³மிஸ்ஸாமீ’தி த⁴னும் ஸஜ்ஜேதி, ஜியம் வட்டேதி, ஸத்திம் நிஸேதி, ப⁴த்தம் பு⁴ஞ்ஜதி, வத்த²ம் பரித³ஹதி, ஏத்தாவதா காயத்³வாரே சோபனம் பத்தம் ஹோதி. ஸோ அரஞ்ஞே தி³வஸம் சரித்வா அந்தமஸோ ஸஸபி³ளாரமத்தம்பி ந லப⁴தி, இத³ம் அகுஸலம் காயகம்மம் நாம ஹோதி ந ஹோதீதி? ந ஹோதி. கஸ்மா? கம்மபத²ம் அப்பத்ததாய. கேவலம் பன காயது³ச்சரிதம் நாம ஹோதீதி வேதி³தப்³ப³ம். மச்ச²க்³க³ஹணாதீ³ ஸுபயோகே³ஸுபி ஏஸேவ நயோ.

வசீத்³வாரேபி ‘மிக³வம் க³மிஸ்ஸாமி’ ‘வேகே³ன த⁴னுஆதீ³னி ஸஜ்ஜேதா²’தி ஆணாபேத்வா புரிமனயேனேவ அரஞ்ஞே கிஞ்சி அலப⁴ந்தஸ்ஸ கிஞ்சாபி வசீத்³வாரே சோபனம் பத்தம், கம்மபத²ம் அப்பத்ததாய பன காயகம்மம் ந ஹோதி. கேவலம் வசீது³ச்சரிதம் நாம ஹோதீதி வேதி³தப்³ப³ம்.

மனோத்³வாரே பன வத⁴கசேதனாய உப்பன்னமத்தாய ஏவ கம்மபத²பே⁴தோ³வ ஹோதி. ஸோ ச கோ² ப்³யாபாத³வஸேன ந பாணாதிபாதவஸேன. அகுஸலஞ்ஹி காயகம்மம் காயவசீத்³வாரேஸு ஸமுட்டா²தி, ந மனோத்³வாரே; ததா² அகுஸலம் வசீகம்மம். அகுஸலம் மனோகம்மம் பன தீஸுபி த்³வாரேஸு ஸமுட்டா²தி; ததா² குஸலானி காயவசீமனோகம்மானி.

கத²ம்? ஸஹத்தா² ஹி பாணம் ஹனந்தஸ்ஸ அதி³ன்னம் ஆதி³யந்தஸ்ஸ மிச்சா²சாரம் சரந்தஸ்ஸ கம்மம் காயகம்மமேவ ஹோதி. த்³வாரம்பி காயத்³வாரமேவ ஹோதி. ஏவம் தாவ அகுஸலம் காயகம்மம் காயத்³வாரே ஸமுட்டா²தி. தேஹி பன சித்தேஹி ஸஹஜாதா அபி⁴ஜ்ஜா²ப்³யாபாத³மிச்சா²தி³ட்டி²யோ சேதனாபக்கி²கா வா ப⁴வந்தி, அப்³போ³ஹாரிகா வா. ‘க³ச்ச² இத்த²ன்னாமம் ஜீவிதா வோரோபேஹி, இத்த²ன்னாமம் ப⁴ண்ட³ம் அவஹரா’தி ஆணாபேந்தஸ்ஸ பன கம்மம் காயகம்மம் ஹோதி, த்³வாரம் பன வசீத்³வாரம். ஏவம் அகுஸலம் காயகம்மம் வசீத்³வாரே ஸமுட்டா²தி. தேஹி பன சித்தேஹி ஸஹஜாதா அபி⁴ஜ்ஜா²ப்³யாபாத³மிச்சா²தி³ட்டி²யோ சேதனாபக்கி²கா வா ப⁴வந்தி அப்³போ³ஹாரிகா வா. ஏத்தகா ஆசரியானம் ஸமானத்த²கதா² நாம.

விதண்ட³வாதீ³ பனாஹ – ‘அகுஸலம் காயகம்மம் மனோத்³வாரேபி ஸமுட்டா²தீ’தி. ஸோ ‘தயோ ஸங்க³ஹே ஆருள்ஹம் ஸுத்தம் ஆஹராஹீ’தி வுத்தோ இத³ம் குலும்ப³ஸுத்தம் நாம ஆஹரி –

‘‘புன சபரம், பி⁴க்க²வே, இதே⁴கச்சோ ஸமணோ வா ப்³ராஹ்மணோ வா இத்³தி⁴மா சேதோவஸிப்பத்தோ அஞ்ஞிஸ்ஸா குச்சி²க³தம் க³ப்³ப⁴ம் பாபகேன மனஸா அனுபேக்க²கோ ஹோதி – ‘அஹோ வதாயம் குச்சி²க³தோ க³ப்³போ⁴ ந ஸோத்தி²னா அபி⁴னிக்க²மேய்யா’தி. ஏவம், பி⁴க்க²வே, குலும்ப³ஸ்ஸ உபகா⁴தோ ஹோதீ’’தி.

இத³ம் ஸுத்தம் ஆஹரித்வா ஆஹ – ‘ஏவம் சிந்திதமத்தேயேவ மனஸா குச்சி²க³தோ க³ப்³போ⁴ பே²ணபிண்டோ³ விய விலீயதி. ஏத்த² குதோ காயங்க³சோபனம் வா வாசங்க³சோபனம் வா? மனோத்³வாரஸ்மிம்யேவ பன இத³ம் அகுஸலம் காயகம்மம் ஸமுட்டா²தீ’தி.

தமேனம் ‘தவ ஸுத்தஸ்ஸ அத்த²ம் துலயிஸ்ஸாமா’தி வத்வா ஏவம் துலயிம்ஸு – ‘த்வம் இத்³தி⁴யா பரூபகா⁴தம் வதே³ஸி. இத்³தி⁴ நாம சேஸா – அதி⁴ட்டா²னித்³தி⁴, விகுப்³ப³னித்³தி⁴, மனோமயித்³தி⁴, ஞாணவிப்பா²ரித்³தி⁴, ஸமாதி⁴விப்பா²ரித்³தி⁴, அரியித்³தி⁴, கம்மவிபாகஜித்³தி⁴, புஞ்ஞவதோ இத்³தி⁴, விஜ்ஜாமயித்³தி⁴, தத்த² தத்த² ஸம்மாபயோக³பச்சயா இஜ்ஜ²னட்டே²ன இத்³தீ⁴தி த³ஸவிதா⁴ (படி. ம. 3.10). தத்த² கதரம் இத்³தி⁴ம் வதே³ஸீ’தி? ‘பா⁴வனாமய’ந்தி. ‘கிம் பன பா⁴வனாமயித்³தி⁴யா பரூபகா⁴தகம்மம் ஹோதீ’தி? ‘ஆம, ஏகச்சே ஆசரியா ஏகவாரம் ஹோதீ’தி; வத³ந்தி யதா² ஹி பரம் பஹரிதுகாமேன உத³கப⁴ரிதே க⁴டே கி²த்தே க⁴டோபி பி⁴ஜ்ஜதி, உத³கம்பி நஸ்ஸதி, ஏவமேவ பா⁴வனாமயித்³தி⁴யா ஏகவாரம் பரூபகா⁴தகம்மம் ஹோதி. ததோ பட்டா²ய பன ஸா நஸ்ஸதீதி. அத² நம் ‘பா⁴வனாமயித்³தி⁴யா நேவ ஏகவாரம் ந த்³வே வாரே பரூபகா⁴தகம்மம் ஹோதீ’தி வத்வா தம் ஸஞ்ஞத்திம் ஆக³ச்ச²ந்தம் புச்சி²ம்ஸு – ‘பா⁴வனாமயித்³தி⁴ கிம் குஸலா, அகுஸலா, அப்³யாகதா? ஸுகா²ய வேத³னாய ஸம்பயுத்தா, து³க்கா²ய வேத³னாய ஸம்பயுத்தா, அது³க்க²மஸுகா²ய வேத³னாய ஸம்பயுத்தா? ஸவிதக்கஸவிசாரா, அவிதக்கவிசாரமத்தா, அவிதக்கஅவிசாரா? காமாவசரா, ரூபாவசரா, அரூபாவசரா’தி?

இமம் பன பஞ்ஹம் யோ ஜானாதி ஸோ ஏவம் வக்க²தி – ‘பா⁴வனாமயித்³தி⁴ குஸலா வா ஹோதி, அப்³யாகதா வா; அது³க்க²மஸுக²வேத³னீயா ஏவ, அவிதக்கஅவிசாரா ஏவ, ரூபாவசரா ஏவா’தி. ஸோ வத்தப்³போ³ – ‘பாணாதிபாதசேதனா குஸலாதீ³ஸு கதரம் கோட்டா²ஸம் ப⁴ஜதீ’தி? ஜானந்தோ வக்க²தி – ‘பாணாதிபாதசேதனா அகுஸலா ஏவ, து³க்க²வேத³னீயா ஏவ, ஸவிதக்கஸவிசாரா ஏவ காமாவசரா ஏவா’தி. ‘ஏவம் ஸந்தே தவ பஞ்ஹோ நேவ குஸலத்திகேன ஸமேதி, ந வேத³னாத்திகேன, ந விதக்கத்திகேன, ந பூ⁴மந்தரேனா’தி.

‘கிம் பன ஏவம் மஹந்தம் ஸுத்தம் நிரத்த²க’ந்தி? ‘நோ நிரத்த²கம்; த்வம் பனஸ்ஸ அத்த²ம் ந ஜானாஸி. ‘‘இத்³தி⁴மா சேதோவஸிப்பத்தோ’’தி ஏத்த² ஹி நேவ பா⁴வனாமயித்³தி⁴ அதி⁴ப்பேதா, ஆத²ப்³ப³ணித்³தி⁴ பன அதி⁴ப்பேதா. ஸா ஹி ஏத்த² லப்³ப⁴மானா லப்³ப⁴தி. ஸா பன காயவசீத்³வாரானி முஞ்சித்வா காதும் ந ஸக்கா. ஆத²ப்³ப³ணித்³தி⁴கா ஹி ஸத்தாஹம் அலோணகம் பு⁴ஞ்ஜித்வா த³ப்³பே³ அத்த²ரித்வா பத²வியம் ஸயமானா தபம் சரித்வா ஸத்தமே தி³வஸே ஸுஸானபூ⁴மிம் ஸஜ்ஜேத்வா ஸத்தமே பதே³ ட²த்வா ஹத்த²ம் வட்டேத்வா வட்டேத்வா முகே²ன விஜ்ஜம் பரிஜப்பந்தி. அத² நேஸம் கம்மம் ஸமிஜ்ஜ²தி. ஏவம் அயம்பி இத்³தி⁴ காயவசீத்³வாரானி முஞ்சித்வா காதும் ந ஸக்காதி. ‘ந காயகம்மம் மனோத்³வாரே ஸமுட்டா²தீ’தி நிட்ட²மேத்த² க³ந்தப்³ப³ம்.

ஹத்த²முத்³தா³ய பன முஸாவாதா³தீ³னி கதே²ந்தஸ்ஸ கம்மம் வசீகம்மம், த்³வாரம் பன காயத்³வாரம் ஹோதி. ஏவம் அகுஸலம் வசீகம்மம்பி காயத்³வாரே ஸமுட்டா²தி. தேஹி பன சித்தேஹி ஸஹஜாதா அபி⁴ஜ்ஜா²ப்³யாபாத³மிச்சா²தி³ட்டி²யோ சேதனாபக்கி²கா வா ப⁴வந்தி, அப்³போ³ஹாரிகா வா. வசீபே⁴த³ம் பன கத்வா முஸாவாதா³தீ³னி கதே²ந்தஸ்ஸ கம்மம்பி வசீகம்மம் த்³வாரம்பி வசீத்³வாரமேவ. ஏவம் அகுஸலம் வசீகம்மம் வசீத்³வாரே ஸமுட்டா²தி. தேஹி பன சித்தேஹி ஸஹஜாதா அபி⁴ஜ்ஜா²ப்³யாபாத³மிச்சா²தி³ட்டி²யோ சேதனாபக்கி²கா வா ப⁴வந்தி அப்³போ³ஹாரிகா வா. ஏத்தகா ஆசரியானம் ஸமானத்த²கதா² நாம.

விதண்ட³வாதீ³ பனாஹ – ‘அகுஸலம் வசீகம்மம் மனோத்³வாரேபி ஸமுட்டா²தீ’தி. ஸோ ‘தயோ ஸங்க³ஹே ஆருள்ஹம் ஸுத்தம் ஆஹராஹீ’தி வுத்தோ இத³ம் உபோஸத²க்க²ந்த⁴கதோ ஸுத்தம் ஆஹரி –

‘‘யோ பன பி⁴க்கு² யாவததியம் அனுஸ்ஸாவியமானே ஸரமானோ ஸந்திம் ஆபத்திம் நாவிகரேய்ய ஸம்பஜானமுஸாவாத³ஸ்ஸ ஹோதீ’’தி (மஹாவ. 134).

இத³ம் ஸுத்தம் ஆஹரித்வா ஆஹ – ‘ஏவம் ஆபத்திம் அனாவிகரோந்தோ துண்ஹீபூ⁴தோவ அஞ்ஞம் ஆபத்திம் ஆபஜ்ஜதி, ஏத்த² குதோ காயங்க³சோபனம் வா வாசங்க³சோபனம் வா? மனோத்³வாரஸ்மிம்யேவ பன இத³ம் அகுஸலம் வசீகம்மம் ஸமுட்டா²தீ’தி.

ஸோ வத்தப்³போ³ – ‘கிம் பனேதம் ஸுத்தம் நேய்யத்த²ம் உதா³ஹு நீதத்த²’ந்தி? ‘நீதத்த²மேவ மய்ஹம் ஸுத்த’ந்தி. ஸோ ‘மா ஏவம் அவச, துலயிஸ்ஸாமஸ்ஸ அத்த²’ந்தி வத்வா ஏவம் புச்சி²தப்³போ³ – ‘ஸம்பஜானமுஸாவாதே³ கிம் ஹோதீ’தி? ஜானந்தோ ‘ஸம்பஜானமுஸாவாதே³ து³க்கடம் ஹோதீ’தி வக்க²தி. ததோ வத்தப்³போ³ ‘வினயஸ்ஸ த்³வே மூலானி – காயோ ச வாசா ச; ஸம்மாஸம்பு³த்³தே⁴ன ஹி ஸப்³பா³பத்தியோ இமேஸுயேவ த்³வீஸு த்³வாரேஸு பஞ்ஞத்தா, மனோத்³வாரே ஆபத்திபஞ்ஞபனம் நாம நத்தி². த்வம் அதிவிய வினயே பகதஞ்ஞூ, யோ ஸத்தா²ரா அபஞ்ஞத்தே டா²னே ஆபத்திம் பஞ்ஞபேஸி, ஸம்மாஸம்பு³த்³த⁴ம் அப்³பா⁴சிக்க²ஸி, ஜினசக்கம் பஹரஸீ’திஆதி³வசனேஹி நிக்³க³ண்ஹித்வா உத்தரி பஞ்ஹம் புச்சி²தப்³போ³ – ‘ஸம்பஜானமுஸாவாதோ³ கிரியதோ ஸமுட்டா²தி உதா³ஹு அகிரியதோ’தி? ஜானந்தோ ‘கிரியதோ’தி வக்க²தி. ததோ வத்தப்³போ³ – ‘அனாவிகரோந்தோ கதரம் கிரியம் கரோதீ’தி? அத்³தா⁴ ஹி கிரியம் அபஸ்ஸந்தோ விகா⁴தம் ஆபஜ்ஜிஸ்ஸதி. ததோ இமஸ்ஸ ஸுத்தஸ்ஸ அத்தே²ன ஸஞ்ஞாபேதப்³போ³. அயஞ்ஹேத்த² அத்தோ² – ய்வாயம் ‘ஸம்பஜானமுஸாவாதோ³ ஹோதீ’தி வுத்தோ, ஸோ ஆபத்திதோ கிம் ஹோதி? ‘கதராபத்தி ஹோதீ’தி அத்தோ². ‘து³க்கடாபத்தி ஹோதி’. ஸா ச கோ² ந முஸாவாத³லக்க²ணேன, ப⁴க³வதோ பன வசனேன வசீத்³வாரே அகிரியஸமுட்டா²னா ஆபத்தி ஹோதீதி வேதி³தப்³பா³. வுத்தம்பி சேதம் –

‘‘அனாலபந்தோ மனுஜேன கேனசி,

வாசாகி³ரம் நோ ச பரே ப⁴ணேய்ய;

ஆபஜ்ஜேய்ய வாசஸிகம் ந காயிகம்,

பஞ்ஹா மேஸா குஸலேஹி சிந்திதா’’தி. (படி. 479);

ஏவம் அகுஸலம் வசீகம்மம் ந மனோத்³வாரே ஸமுட்டா²தீதி நிட்ட²மேத்த² க³ந்தப்³ப³ம்.

யதா³ பன அபி⁴ஜ்ஜா²ஸஹக³தேன சேதஸா காயங்க³ம் சோபேந்தோ ஹத்த²க்³கா³ஹாதீ³னி கரோதி, ப்³யாபாத³ஸஹக³தேன சேதஸா த³ண்ட³பராமாஸாதீ³னி, மிச்சா²தி³ட்டி²ஸஹக³தேன சேதஸா ‘க²ந்த³ஸிவாத³யோ ஸேட்டா²’தி தேஸம் அபி⁴வாத³னஅஞ்ஜலிகம்மபூ⁴தபீட²கபரிப⁴ண்டா³தீ³னி கரோதி, ததா³ கம்மம் மனோகம்மம் ஹோதி, த்³வாரம் பன காயத்³வாரம். ஏவம் அகுஸலம் மனோகம்மம் காயத்³வாரே ஸமுட்டா²தி. சேதனா பனேத்த² அப்³போ³ஹாரிகா.

யதா³ பன அபி⁴ஜ்ஜா²ஸஹக³தேன சேதஸா வாசங்க³ம் சோபேந்தோ ‘அஹோ வத யம் பரஸ்ஸ, தம் மமஸ்ஸா’தி பரவித்தூபகரணம் அபி⁴ஜ்ஜா²யதி, ப்³யாபாத³ஸஹக³தேன சேதஸா ‘இமே ஸத்தா ஹஞ்ஞந்து வா, ப³ஜ்ஜ²ந்து வா, உச்சி²ஜ்ஜந்து வா, மா வா அஹேஸு’ந்தி வத³தி, மிச்சா²தி³ட்டி²ஸஹக³தேன சேதஸா ‘நத்தி² தி³ன்னம், நத்தி² யிட்ட²’ந்திஆதீ³னி வத³தி, ததா³ கம்மம் மனோகம்மம் ஹோதி, த்³வாரம் பன வசீத்³வாரம். ஏவம் அகுஸலம் மனோகம்மம் வசீத்³வாரே ஸமுட்டா²தி. சேதனா பனேத்த² அப்³போ³ஹாரிகா.

யதா³ பன காயங்க³வாசங்கா³னி அசோபேத்வா ரஹோ நிஸின்னோ அபி⁴ஜ்ஜா²ப்³யாபாத³மிச்சா²தி³ட்டி²ஸஹக³தானி சித்தானி உப்பாதே³தி, ததா³ கம்மம் மனோகம்மம், த்³வாரம்பி மனோத்³வாரமேவ. ஏவம் அகுஸலம் மனோகம்மம் மனோத்³வாரே ஸமுட்டா²தி. இமஸ்மிம் பன டா²னே சேதனாபி சேதனாஸம்பயுத்தகா த⁴ம்மாபி மனோத்³வாரேயேவ ஸமுட்ட²ஹந்தி. ஏவம் அகுஸலம் மனோகம்மம் தீஸுபி த்³வாரேஸு ஸமுட்டா²தீதி வேதி³தப்³ப³ம்.

யம் பன வுத்தம் ‘ததா² குஸலானி காயவசீமனோகம்மானீ’தி, தத்ராயம் நயோ – யதா³ ஹி கேனசி காரணேன வத்தும் அஸக்கோந்தோ ‘பாணாதிபாதா அதி³ன்னாதா³னா காமேஸுமிச்சா²சாரா படிவிரமாமீ’தி இமானி ஸிக்கா²பதா³னி ஹத்த²முத்³தா³ய க³ண்ஹாதி, ததா³ கம்மம் காயகம்மம் த்³வாரம்பி காயத்³வாரமேவ. ஏவம் குஸலம் காயகம்மம் காயத்³வாரே ஸமுட்டா²தி. தேஹி சித்தேஹி ஸஹக³தா அனபி⁴ஜ்ஜா²த³யோ சேதனாபக்கி²கா வா ஹோந்தி, அப்³போ³ஹாரிகா வா.

யதா³ பன தானேவ ஸிக்கா²பதா³னி வசீபே⁴த³ம் கத்வா க³ண்ஹாதி, ததா³ கம்மம் காயகம்மம், த்³வாரம் பன வசீத்³வாரம் ஹோதி. ஏவம் குஸலம் காயகம்மம் வசீத்³வாரே ஸமுட்டா²தி. தேஹி சித்தேஹி ஸஹக³தா அனபி⁴ஜ்ஜா²த³யோ சேதனாபக்கி²கா வா ஹோந்தி, அப்³போ³ஹாரிகா வா.

யதா³ பன தேஸு ஸிக்கா²பதே³ஸு தி³ய்யமானேஸு காயங்க³வாசங்கா³னி அசோபேத்வா மனஸாவ ‘பாணாதிபாதா அதி³ன்னாதா³னா காமேஸுமிச்சா²சாரா படிவிரமாமீ’தி க³ண்ஹாதி, ததா³ கம்மம் காயகம்மம், த்³வாரம் பன மனோத்³வாரம் ஹோதி. ஏவம் குஸலம் காயகம்மம் மனோத்³வாரே ஸமுட்டா²தி. தேஹி சித்தேஹி ஸஹக³தா அனபி⁴ஜ்ஜா²த³யோ சேதனாபக்கி²கா வா ஹோந்தி, அப்³போ³ஹாரிகா வா.

‘முஸாவாதா³ வேரமணீ’ஆதீ³னி பன சத்தாரி ஸிக்கா²பதா³னி வுத்தனயேனேவ காயாதீ³ஹி க³ண்ஹந்தஸ்ஸ குஸலம் வசீகம்மம் தீஸு த்³வாரேஸு ஸமுட்டா²தீதி வேதி³தப்³ப³ம். இதா⁴பி அனபி⁴ஜ்ஜா²த³யோ சேதனாபக்கி²கா வா ஹோந்தி, அப்³போ³ஹாரிகா வா.

அனபி⁴ஜ்ஜா²தி³ஸஹக³தேஹி பன சித்தேஹி காயங்க³ம் சோபேத்வா சேதியங்க³ணஸம்மஜ்ஜனக³ந்த⁴மாலாதி³பூஜனசேதியவந்த³னாதீ³னி கரோந்தஸ்ஸ கம்மம் மனோகம்மம் ஹோதி, த்³வாரம் பன காயத்³வாரம். ஏவம் குஸலம் மனோகம்மம் காயத்³வாரே ஸமுட்டா²தி. சேதனா பனேத்த² அப்³போ³ஹாரிகா. அனபி⁴ஜ்ஜா²ஸஹக³தேன சித்தேன வாசங்க³ம் சோபேத்வா ‘அஹோ வத யம் பரஸ்ஸ வித்தூபகரணம் ந தம் மமஸ்ஸா’தி அனபி⁴ஜ்ஜா²யதோ அப்³யாபாத³ஸஹக³தேன சித்தேன ‘ஸப்³பே³ ஸத்தா அவேரா அப்³யாப³ஜ்ஜா² அனீகா⁴ ஸுகீ² அத்தானம் பரிஹரந்தூ’தி வத³ந்தஸ்ஸ ஸம்மாதி³ட்டி²ஸஹக³தேன சித்தேன ‘அத்தி² தி³ன்ன’ந்திஆதீ³னி உதா³ஹரந்தஸ்ஸ கம்மம் மனோகம்மம் ஹோதி, த்³வாரம் பன வசீத்³வாரம். ஏவம் குஸலம் மனோகம்மம் வசீத்³வாரே ஸமுட்டா²தி. சேதனா பனேத்த² அப்³போ³ஹாரிகா. காயங்க³வாசங்கா³னி பன அசோபேத்வா ரஹோ நிஸின்னஸ்ஸ மனஸாவ அனபி⁴ஜ்ஜா²தி³ஸஹக³தானி சித்தானி உப்பாதே³ந்தஸ்ஸ கம்மம் மனோகம்மம், த்³வாரம்பி மனோத்³வாரமேவ. ஏவம் குஸலம் மனோகம்மம் மனோத்³வாரே ஸமுட்டா²தி. இமஸ்மிம் பன டா²னே சேதனாபி சேதனாஸம்பயுத்தகா த⁴ம்மாபி மனோத்³வாரேயேவ ஸமுட்ட²ஹந்தி.

தத்த² ஆணத்திஸமுட்டி²தேஸு பாணாதிபாதஅதி³ன்னாதா³னேஸு கம்மம்பி காயகம்மம் த்³வாரம்பி கம்மவஸேனேவ காயத்³வாரந்தி வத³ந்தோ கம்மம் ரக்க²தி, த்³வாரம் பி⁴ந்த³தி நாம. ஹத்த²முத்³தா³ய ஸமுட்டி²தேஸு முஸாவாதா³தீ³ஸு த்³வாரம்பி காயத்³வாரம், கம்மம்பி த்³வாரவஸேனேவ காயகம்மந்தி வத³ந்தோ த்³வாரம் ரக்க²தி கம்மம் பி⁴ந்த³தி நாம. தஸ்மா ‘கம்மம் ரக்கா²மீ’தி த்³வாரம் ந பி⁴ந்தி³தப்³ப³ம், ‘த்³வாரம் ரக்கா²மீ’தி கம்மம் ந பி⁴ந்தி³தப்³ப³ம். யதா²வுத்தேனேவ பன நயேன கம்மஞ்ச த்³வாரஞ்ச வேதி³தப்³ப³ம். ஏவம் கதே²ந்தோ ஹி நேவ கம்மம் ந த்³வாரம் பி⁴ந்த³தீதி.

கம்மகதா² நிட்டி²தா.

இதா³னி ‘பஞ்ச விஞ்ஞாணானி பஞ்சவிஞ்ஞாணத்³வாரானீ’திஆதீ³ஸு சக்கு²விஞ்ஞாணம் ஸோதவிஞ்ஞாணம் கா⁴னவிஞ்ஞாணம் ஜிவ்ஹாவிஞ்ஞாணம் காயவிஞ்ஞாணந்தி இமானி பஞ்ச விஞ்ஞாணானி நாம. சக்கு²விஞ்ஞாணத்³வாரம் ஸோத… கா⁴ன… ஜிவ்ஹா… காயவிஞ்ஞாணத்³வாரந்தி இமானி பஞ்ச விஞ்ஞாணத்³வாரானி நாம. இமேஸம் பஞ்சன்னம் த்³வாரானம் வஸேன உப்பன்னா சேதனா நேவ காயகம்மம் ஹோதி, ந வசீகம்மம், மனோகம்மமேவ ஹோதீதி வேதி³தப்³பா³. சக்கு²ஸம்ப²ஸ்ஸோ ஸோத… கா⁴ன… ஜிவ்ஹா… காய… மனோஸம்ப²ஸ்ஸோதி இமே பன ச² ஸம்ப²ஸ்ஸா நாம. சக்கு²ஸம்ப²ஸ்ஸத்³வாரம் ஸோத… கா⁴ன… ஜிவ்ஹா… காய… மனோஸம்ப²ஸ்ஸத்³வாரந்தி இமானி ச² ஸம்ப²ஸ்ஸத்³வாரானி நாம.

சக்கு²அஸம்வரோ ஸோத… கா⁴ன… ஜிவ்ஹா… பஸாத³காய… சோபனகாயஅஸம்வரோ வாசாஅஸம்வரோ மனோஅஸம்வரோதி – இமே அட்ட² அஸம்வரா நாம. தே அத்த²தோ ‘து³ஸ்ஸீல்யம் முட்ட²ஸ்ஸச்சம் அஞ்ஞாணம் அக்க²ந்தி கோஸஜ்ஜ’ந்தி இமே பஞ்ச த⁴ம்மா ஹோந்தி. தேஸு ஏகத⁴ம்மோபி பஞ்சத்³வாரே வோட்ட²ப்³ப³னபரியோஸானேஸு சித்தேஸு நுப்பஜ்ஜதி, ஜவனக்க²ணேயேவ உப்பஜ்ஜதி. ஜவனே உப்பன்னோபி பஞ்சத்³வாரே அஸம்வரோதி வுச்சதி.

சக்கு²விஞ்ஞாணஸஹஜாதோ ஹி ப²ஸ்ஸோ சக்கு²ஸம்ப²ஸ்ஸோ நாம, சேதனா மனோகம்மம் நாம, தம் சித்தம் மனோகம்மத்³வாரம் நாம. ஏத்த² பஞ்சவிதோ⁴ அஸம்வரோ நத்தி². ஸம்படிச்ச²னஸஹஜாதோ ப²ஸ்ஸோ மனோஸம்ப²ஸ்ஸோ நாம, சேதனா மனோகம்மம் நாம, தம் சித்தம் மனோகம்மத்³வாரம் நாம. ஏத்தா²பி அஸம்வரோ நத்தி². ஸந்தீரணவோட்ட²ப்³ப³னேஸுபி ஏஸேவ நயோ. ஜவனஸஹஜாதோ பன ப²ஸ்ஸோ மனோஸம்ப²ஸ்ஸோ நாம, சேதனா மனோகம்மம் நாம, தம் சித்தம் மனோகம்மத்³வாரம் நாம. ஏத்த² அஸம்வரோ சக்கு²அஸம்வரோ நாம ஹோதி. ஸோதகா⁴னஜிவ்ஹாபஸாத³காயத்³வாரேஸுபி ஏஸேவ நயோ. யதா³ பன ரூபாதீ³ஸு அஞ்ஞதராரம்மணம் மனோத்³வாரிகஜவனம் வினா வசீத்³வாரேன ஸுத்³த⁴ம் காயத்³வாரஸங்கா²தம் சோபனம் பாபயமானம் உப்பஜ்ஜதி, ததா³ தேன சித்தேன ஸஹஜாதோ ப²ஸ்ஸோ மனோஸம்ப²ஸ்ஸோ நாம, சேதனா காயகம்மம் நாம, தம் பன சித்தம் அப்³போ³ஹாரிகம், சோபனஸ்ஸ உப்பன்னத்தா மனோத்³வாரந்தி ஸங்க்²யம் ந க³ச்ச²தி. ஏத்த² அஸம்வரோ சோபனகாயஅஸம்வரோ நாம. யதா³ தாதி³ஸம்யேவ ஜவனம் வினா காயத்³வாரேன ஸுத்³த⁴ம் வசீத்³வாரஸங்கா²தம் சோபனம் பாபயமானம் உப்பஜ்ஜதி, ததா³ தேன சித்தேன ஸஹஜாதோ ப²ஸ்ஸோ மனோஸம்ப²ஸ்ஸோ நாம, சேதனா வசீகம்மம் நாம, தம் பன சித்தம் அப்³போ³ஹாரிகம், சோபனஸ்ஸ உப்பன்னத்தா மனோத்³வாரந்தி ஸங்க்²யம் ந க³ச்ச²தி. ஏத்த² அஸம்வரோ வாசாஅஸம்வரோ நாம. யதா³ பன தாதி³ஸம் ஜவனசித்தம் வினா காயவசீத்³வாரேஹி ஸுத்³த⁴ம் மனோத்³வாரமேவ ஹுத்வா உப்பஜ்ஜதி, ததா³ தேன சித்தேன ஸஹஜாதோ ப²ஸ்ஸோ மனோஸம்ப²ஸ்ஸோ நாம, சேதனா மனோகம்மம் நாம, தம் பன சித்தம் மனோகம்மத்³வாரம் நாம. ஏத்த² அஸம்வரோ மனோஅஸம்வரோ நாம. இதி இமேஸம் அட்ட²ன்னம் அஸம்வரானம் வஸேன சக்கு²அஸம்வரத்³வாரம், ஸோத… கா⁴ன… ஜிவ்ஹா… பஸாத³காய… சோபனகாய… வாசா… மனோஅஸம்வரத்³வாரந்தி இமானி அட்ட² அஸம்வரத்³வாரானி வேதி³தப்³பா³னி.

சக்கு²ஸம்வரோ ஸோத… கா⁴ன… ஜிவ்ஹா… பஸாத³காய… சோபனகாய… வாசா… மனோஸம்வரோதி இமே பன அட்ட² ஸம்வரா நாம. தே அத்த²தோ ‘ஸீலம் ஸதி ஞாணம் க²ந்தி வீரிய’ந்தி இமே பஞ்ச த⁴ம்மா ஹோந்தி. தேஸுபி ஏகத⁴ம்மோபி பஞ்சத்³வாரே வோட்ட²ப்³ப³னபரியோஸானேஸு சித்தேஸு நுப்பஜ்ஜதி. ஜவனக்க²ணேயேவ உப்பஜ்ஜதி. ஜவனே உப்பன்னோபி பஞ்சத்³வாரே ஸம்வரோதி வுச்சதி. தஸ்ஸ ஸப்³ப³ஸ்ஸாபி சக்கு²விஞ்ஞாணஸஹஜாதோ ஹி ப²ஸ்ஸோ சக்கு²ஸம்ப²ஸ்ஸோதிஆதி³னா அஸம்வரே வுத்தனயேனேவ உப்பத்தி வேதி³தப்³பா³. இதி இமேஸம் அட்ட²ன்னம் ஸம்வரானம் வஸேன சக்கு²ஸம்வரத்³வாரம்…பே… மனோஸம்வரத்³வாரந்தி இமானி அட்ட² ஸம்வரத்³வாரானி வேதி³தப்³பா³னி.

அகுஸலகம்மபத²கதா²

பாணாதிபாதோ, அதி³ன்னாதா³னம், காமேஸுமிச்சா²சாரோ, முஸாவாதோ³, பிஸுணவாசா, ப²ருஸவாசா, ஸம்ப²ப்பலாபோ, அபி⁴ஜ்ஜா², ப்³யாபாதோ³, மிச்சா²தி³ட்டீ²தி இமே பன த³ஸ அகுஸலகம்மபதா² நாம.

தத்த² பாணஸ்ஸ அதிபாதோ பாணாதிபாதோ நாம; பாணவதோ⁴, பாணகா⁴தோதி வுத்தம் ஹோதி. பாணோதி சேத்த² வோஹாரதோ ஸத்தோ, பரமத்த²தோ ஜீவிதிந்த்³ரியம். தஸ்மிம் பன பாணே பாணஸஞ்ஞினோ ஜீவிதிந்த்³ரியுபச்சே²த³கஉபக்கமஸமுட்டா²பிகா காயவசீத்³வாரானம் அஞ்ஞதரத்³வாரப்பவத்தா வத⁴கசேதனா பாணாதிபாதோ. ஸோ கு³ணவிரஹிதேஸு திரச்சா²னக³தாதீ³ஸு பாணேஸு கு²த்³த³கே பாணே அப்பஸாவஜ்ஜோ, மஹாஸரீரே மஹாஸாவஜ்ஜோ. கஸ்மா? பயோக³மஹந்ததாய. பயோக³ஸமத்தேபி வத்து²மஹந்ததாய. கு³ணவந்தேஸு மனுஸ்ஸாதீ³ஸு அப்பகு³ணே அப்பஸாவஜ்ஜோ, மஹாகு³ணே மஹாஸாவஜ்ஜோ. ஸரீரகு³ணானம் பன ஸமபா⁴வே ஸதி கிலேஸானம் உபக்கமானஞ்ச முது³தாய அப்பஸாவஜ்ஜோ, திப்³ப³தாய மஹாஸாவஜ்ஜோதி வேதி³தப்³போ³.

தஸ்ஸ பஞ்ச ஸம்பா⁴ரா ஹோந்தி – பாணோ, பாணஸஞ்ஞிதா, வத⁴கசித்தம், உபக்கமோ, தேன மரணந்தி. ச² பயோகா³ – ஸாஹத்தி²கோ, ஆணத்திகோ, நிஸ்ஸக்³கி³யோ, தா²வரோ, விஜ்ஜாமயோ, இத்³தி⁴மயோதி. இமஸ்மிம் பனத்தே² வித்தா²ரியமானே அதிபபஞ்சோ ஹோதி. தஸ்மா தம் ந வித்தா²ரயாம. அஞ்ஞஞ்ச ஏவரூபம் அத்தி²கேஹி பன ஸமந்தபாஸாதி³கம் வினயட்ட²கத²ம் (பாரா. அட்ட². 2.172) ஓலோகேத்வா க³ஹேதப்³ப³ம்.

அதி³ன்னஸ்ஸ ஆதா³னம் ‘அதி³ன்னாதா³னம்’; பரஸ்ஸஹரணம், தே²ய்யம், சோரிகாதி வுத்தம் ஹோதி. தத்த² அதி³ன்னந்தி பரபரிக்³க³ஹிதம், யத்த² பரோ யதா²காமகாரிதம் ஆபஜ்ஜந்தோ அத³ண்டா³ரஹோ அனுபவஜ்ஜோ ச ஹோதி. தஸ்மிம் பரபரிக்³க³ஹிதே பரபரிக்³க³ஹிதஸஞ்ஞினோ ததா³தா³யகஉபக்கமஸமுட்டா²பிகா தே²ய்யசேதனா அதி³ன்னாதா³னம். தம் ஹீனே பரஸந்தகே அப்பஸாவஜ்ஜம், பணீதே மஹாஸாவஜ்ஜம். கஸ்மா? வத்து²பணீததாய. வத்து²ஸமத்தே ஸதி கு³ணாதி⁴கானம் ஸந்தகே வத்து²ஸ்மிம் மஹாஸாவஜ்ஜம். தம்தம்கு³ணாதி⁴கம் உபாதா³ய ததோ ததோ ஹீனகு³ணஸ்ஸ ஸந்தகே வத்து²ஸ்மிம் அப்பஸாவஜ்ஜம்.

தஸ்ஸ பஞ்ச ஸம்பா⁴ரா ஹோந்தி – பரபரிக்³க³ஹிதம், பரபரிக்³க³ஹிதஸஞ்ஞிதா, தே²ய்யசித்தம், உபக்கமோ, தேன ஹரணந்தி. ச² பயோகா³ – ஸாஹத்தி²காத³யோவ. தே ச கோ² யதா²னுரூபம் தே²ய்யாவஹாரோ, பஸய்ஹாவஹாரோ, படிச்ச²ன்னாவஹாரோ, பரிகப்பாவஹாரோ, குஸாவஹாரோதி இமேஸம் பஞ்சன்னம் அவஹாரானம் வஸேன பவத்தந்தி. அயமேத்த² ஸங்கே²போ. வித்தா²ரோ பன ஸமந்தபாஸாதி³காயம் (பாரா. அட்ட². 1.138) வுத்தோ.

‘காமேஸு மிச்சா²சாரோ’தி ஏத்த² பன ‘காமேஸூ’தி மேது²னஸமாசாரேஸு; ‘மிச்சா²சாரோ’தி ஏகந்தனிந்தி³தோ லாமகாசாரோ. லக்க²ணதோ பன அஸத்³த⁴ம்மாதி⁴ப்பாயேன காயத்³வாரப்பவத்தா அக³மனீயட்டா²னவீதிக்கமசேதனா காமேஸுமிச்சா²சாரோ.

தத்த² அக³மனீயட்டா²னம் நாம – புரிஸானம் தாவ மாதுரக்கி²தா, பிதுரக்கி²தா, மாதாபிதுரக்கி²தா, பா⁴துரக்கி²தா, ப⁴கி³னிரக்கி²தா, ஞாதிரக்கி²தா, கோ³த்தரக்கி²தா, த⁴ம்மரக்கி²தா, ஸாரக்கா², ஸபரித³ண்டா³தி மாதுரக்கி²தாத³யோ த³ஸ; த⁴னக்கீதா, ச²ந்த³வாஸினீ, போ⁴க³வாஸினீ, படவாஸினீ, ஓத³பத்தகினீ, ஓப⁴டசும்ப³டா, தா³ஸீ ச ப⁴ரியா, கம்மகாரீ ச ப⁴ரியா, த⁴ஜாஹடா, முஹுத்திகாதி ஏதா த⁴னக்கீதாத³யோ த³ஸாதி வீஸதி இத்தி²யோ. இத்தீ²ஸு பன த்³வின்னம் ஸாரக்க²ஸபரித³ண்டா³னம், த³ஸன்னஞ்ச த⁴னக்கீதாதீ³னந்தி த்³வாத³ஸன்னம் இத்தீ²னம் அஞ்ஞே புரிஸா இத³ம் அக³மனீயட்டா²னம் நாம.

ஸோ பனேஸ மிச்சா²சாரோ ஸீலாதி³கு³ணரஹிதே அக³மனீயட்டா²னே அப்பஸாவஜ்ஜோ, ஸீலாதி³கு³ணஸம்பன்னே மஹாஸாவஜ்ஜோ. தஸ்ஸ சத்தாரோ ஸம்பா⁴ரா – அக³மனீயவத்து², தஸ்மிம் ஸேவனசித்தம், ஸேவனப்பயோகோ³, மக்³கே³னமக்³க³ப்படிபத்திஅதி⁴வாஸனந்தி. ஏகோ பயோகோ³ ஸாஹத்தி²கோ ஏவ.

‘முஸா’தி விஸம்வாத³னபுரேக்கா²ரஸ்ஸ அத்த²ப⁴ஞ்ஜகோ வசீபயோகோ³, காயபயோகோ³ வா. விஸம்வாத³னாதி⁴ப்பாயேன பனஸ்ஸ பரவிஸம்வாத³ககாயவசீபயோக³ஸமுட்டா²பிகா சேதனா முஸாவாதோ³. அபரோ நயோ – ‘முஸா’தி அபூ⁴தம் அதச்ச²ம் வத்து². ‘வாதோ³’தி தஸ்ஸ பூ⁴ததோ தச்ச²தோ விஞ்ஞாபனம். லக்க²ணதோ பன அதத²ம் வத்து²ம் தத²தோ பரம் விஞ்ஞாபேதுகாமஸ்ஸ ததா²விஞ்ஞத்திஸமுட்டா²பிகா சேதனா முஸாவாதோ³. ஸோ யமத்த²ம் ப⁴ஞ்ஜதி தஸ்ஸ அப்பதாய அப்பஸாவஜ்ஜோ, மஹந்ததாய மஹாஸாவஜ்ஜோ. அபிச க³ஹட்டா²னம் அத்தனோ ஸந்தகம் அதா³துகாமதாய ‘நத்தீ²’திஆதி³னயப்பவத்தோ அப்பஸாவஜ்ஜோ. ஸக்கி²னா ஹுத்வா அத்த²ப⁴ஞ்ஜனத்த²ம் வுத்தோ மஹாஸாவஜ்ஜோ. பப்³ப³ஜிதானம் அப்பகம்பி தேலம் வா ஸப்பிம் வா லபி⁴த்வா ஹஸாதி⁴ப்பாயேன ‘அஜ்ஜ கா³மே தேலம் நதீ³ மஞ்ஞே ஸந்த³தீ’தி பூரணகதா²னயேன பவத்தோ அப்பஸாவஜ்ஜோ. அதி³ட்ட²ம்யேவ பன தி³ட்ட²ந்திஆதி³னா நயேன வத³ந்தானம் மஹாஸாவஜ்ஜோ.

தஸ்ஸ சத்தாரோ ஸம்பா⁴ரா ஹோந்தி – அதத²ம் வத்து², விஸம்வாத³னசித்தம், தஜ்ஜோ வாயாமோ, பரஸ்ஸ தத³த்த²விஜானனந்தி. ஏகோ பயோகோ³ – ஸாஹத்தி²கோவ. ஸோ ச காயேன வா காயப்படிப³த்³தே⁴ன வா வாசாய வா பரவிஸம்வாத³ககிரியாகரணே த³ட்ட²ப்³போ³. தாய சே கிரியாய பரோ தமத்த²ம் ஜானாதி, அயம் கிரியஸமுட்டா²பிகசேதனாக்க²ணேயேவ முஸாவாத³கம்முனா ப³ஜ்ஜ²தி. யஸ்மா பன யதா² காயகாயப்படிப³த்³த⁴வாசாஹி பரம் விஸம்வாதே³தி, ததா² இமஸ்ஸ ‘இமம் ப⁴ணாஹீ’தி ஆணாபேந்தோபி, பண்ணம் லிகி²த்வா புரதோ நிஸ்ஸஜ்ஜந்தோபி, ‘அயமத்தோ² ஏவம் த³ட்ட²ப்³போ³’தி குட்டாதீ³ஸு லிகி²த்வா ட²பேந்தோபி; தஸ்மா ஏத்த² ஆணத்திகனிஸ்ஸக்³கி³யதா²வராபி பயோகா³ யுஜ்ஜந்தி. அட்ட²கதா²ஸு பன அனாக³தத்தா வீமம்ஸித்வா க³ஹேதப்³பா³.

‘பிஸுணவாசா’திஆதீ³ஸு யாய வாசாய யஸ்ஸ தம் வாசம் பா⁴ஸதி தஸ்ஸ ஹத³யே அத்தனோ பியபா⁴வம் பரஸ்ஸ ச ஸுஞ்ஞபா⁴வம் கரோதி, ஸா பிஸுணவாசா. யாய பன அத்தானம்பி பரம்பி ப²ருஸம் கரோதி, யா வாசா ஸயம்பி ப²ருஸா நேவ கண்ணஸுகா², ந ஹத³யங்க³மா, அயம் ‘ப²ருஸவாசா’. யேன ஸம்ப²ம் பலபதி, நிரத்த²கம், ஸோ ‘ஸம்ப²ப்பலாபோ’. தேஸம் மூலபூ⁴தா சேதனாபி பிஸுணவாசாதி³னாமமேவ லப⁴தி. ஸா ஏவ ச இத⁴ அதி⁴ப்பேதாதி.

தத்த² ஸம்கிலிட்ட²சித்தஸ்ஸ பரேஸம் வா பே⁴தா³ய அத்தனோ பியகம்யதாய வா காயவசீபயோக³ஸமுட்டா²பிகா சேதனா பிஸுணவாசா நாம. ஸா யஸ்ஸ பே⁴த³ம் கரோதி தஸ்ஸ அப்பகு³ணதாய அப்பஸாவஜ்ஜா, மஹாகு³ணதாய மஹாஸாவஜ்ஜா.

தஸ்ஸா சத்தாரோ ஸம்பா⁴ரா – ‘பி⁴ந்தி³தப்³போ³ பரோ’ இதி ‘இமே நானா ப⁴விஸ்ஸ’ந்தி வினா ப⁴விஸ்ஸந்தீதி பே⁴த³புரேக்கா²ரதா வா, ‘இதி அஹம் பியோ ப⁴விஸ்ஸாமி விஸ்ஸாஸிகோ’தி பியகம்யதா வா, தஜ்ஜோ வாயாமோ, தஸ்ஸ தத³த்த²விஜானனந்தி. பரே பன அபி⁴ன்னே கம்மபத²பே⁴தோ³ நத்தி², பி⁴ன்னே ஏவ ஹோதி.

பரஸ்ஸ மம்மச்சே²த³ககாயவசீபயோக³ஸமுட்டா²பிகா ஏகந்தப²ருஸசேதனா ‘ப²ருஸவாசா’. தஸ்ஸா ஆவிபா⁴வத்த²மித³ம் வத்து² – ஏகோ கிர தா³ரகோ மாது வசனம் அனாதி³யித்வா அரஞ்ஞம் க³ச்ச²தி. தம் மாதா நிவத்தேதும் அஸக்கோந்தீ ‘சண்டா³ தம் மஹிம்ஸீ அனுப³ந்த⁴தூ’தி அக்கோஸி. அத²ஸ்ஸ ததே²வ அரஞ்ஞே மஹிம்ஸீ உட்டா²ஸி. தா³ரகோ ‘யம் மம மாதா முகே²ன கதே²ஸி தம் மா ஹோது, யம் சித்தேன சிந்தேஸி தம் ஹோதூ’தி ஸச்சகிரியம் அகாஸி. மஹிம்ஸீ தத்தே²வ ப³த்³தா⁴ விய அட்டா²ஸி. ஏவம் மம்மச்சே²த³கோபி பயோகோ³ சித்தஸண்ஹதாய ப²ருஸவாசா ந ஹோதி. மாதாபிதரோ ஹி கதா³சி புத்தகே ஏவம்பி வத³ந்தி – ‘சோரா வோ க²ண்டா³க²ண்டி³கம் கரோந்தூ’தி, உப்பலபத்தம்பி ச நேஸம் உபரி பதந்தம் ந இச்ச²ந்தி. ஆசரியுபஜ்ஜா²யா ச கதா³சி நிஸ்ஸிதகே ஏவம் வத³ந்தி – ‘கிம் இமே அஹிரிகா அனோத்தப்பினோ சரந்தி, நித்³த⁴மத² நே’தி; அத² ச நேஸம் ஆக³மாதி⁴க³மஸம்பத்திம் இச்ச²ந்தி. யதா² ச சித்தஸண்ஹதாய ப²ருஸவாசா ந ஹோதி, ஏவம் வசனஸண்ஹதாய அப²ருஸவாசாபி ந ஹோதி. ந ஹி மாராபேதுகாமஸ்ஸ ‘இமம் ஸுக²ம் ஸயாபேதா²’தி வசனம் அப²ருஸவாசா ஹோதி. சித்தப²ருஸதாய பனேஸா ப²ருஸவாசாவ. ஸா யம் ஸந்தா⁴ய பவத்திதா தஸ்ஸ அப்பகு³ணதாய அப்பஸாவஜ்ஜா, மஹாகு³ணதாய மஹாஸாவஜ்ஜா. தஸ்ஸா தயோ ஸம்பா⁴ரா – அக்கோஸிதப்³போ³ பரோ, குபிதசித்தம், அக்கோஸனந்தி.

அனத்த²விஞ்ஞாபிகா காயவசீபயோக³ஸமுட்டா²பிகா அகுஸலசேதனா ‘ஸம்ப²ப்பலாபோ’. ஸோ ஆஸேவனமந்த³தாய அப்பஸாவஜ்ஜோ. ஆஸேவனமஹந்ததாய மஹாஸாவஜ்ஜோ. தஸ்ஸ த்³வே ஸம்பா⁴ரா – பா⁴ரதயுத்³த⁴ஸீதாஹரணாதி³னிரத்த²ககதா²புரேக்கா²ரதா, ததா²ரூபீகதா²கத²னஞ்சாதி. பரே பன தம் கத²ம் அக³ண்ஹந்தே கம்மபத²பே⁴தோ³ நத்தி², பரேன ஸம்ப²ப்பலாபே க³ஹிதேயேவ ஹோதி.

அபி⁴ஜ்ஜா²யதீதி ‘அபி⁴ஜ்ஜா²’. பரப⁴ண்டா³பி⁴முகீ² ஹுத்வா தன்னின்னதாய பவத்ததீதி அத்தோ². ஸா ‘அஹோ தவ இத³ம் மமஸ்ஸா’தி ஏவம் பரப⁴ண்டா³பி⁴ஜ்ஜா²யனலக்க²ணா. அதி³ன்னாதா³னம் விய அப்பஸாவஜ்ஜா மஹாஸாவஜ்ஜா ச. தஸ்ஸா த்³வே ஸம்பா⁴ரா – பரப⁴ண்ட³ம், அத்தனோ பரிணாமனஞ்சாதி. பரப⁴ண்ட³வத்து²கே ஹி லோபே⁴ உப்பன்னேபி ந தாவ கம்மபத²பே⁴தோ³ ஹோதி யாவ ந ‘அஹோ வத இத³ம் மமஸ்ஸா’தி அத்தனோ பரிணாமேதி.

ஹிதஸுக²ம் ப்³யாபாத³யதீதி ‘ப்³யாபாதோ³’. ஸோ பரவினாஸாய மனோபதோ³ஸலக்க²ணோ. ப²ருஸவாசா விய அப்பஸாவஜ்ஜோ மஹாஸாவஜ்ஜோ ச. தஸ்ஸ த்³வே ஸம்பா⁴ரா – பரஸத்தோ ச, தஸ்ஸ ச வினாஸசிந்தாதி. பரஸத்தவத்து²கே ஹி கோதே⁴ உப்பன்னேபி ந தாவ கம்மபத²பே⁴தோ³ ஹோதி யாவ ‘அஹோ வதாயம் உச்சி²ஜ்ஜேய்ய வினஸ்ஸேய்யா’தி தஸ்ஸ வினாஸனம் ந சிந்தேஸி.

யதா²பு⁴ச்சக³ஹணாபா⁴வேன மிச்சா² பஸ்ஸதீதி ‘மிச்சா²தி³ட்டி²’. ஸா ‘நத்தி² தி³ன்ன’ந்திஆதி³னா நயேன விபரீதத³ஸ்ஸனலக்க²ணா. ஸம்ப²ப்பலாபோ விய அப்பஸாவஜ்ஜா மஹாஸாவஜ்ஜா ச. அபிச அனியதா அப்பஸாவஜ்ஜா, நியதா மஹாஸாவஜ்ஜா. தஸ்ஸா த்³வே ஸம்பா⁴ரா – வத்து²னோ ச க³ஹிதாகாரவிபரீததா, யதா² ச தம் க³ண்ஹாதி ததா²பா⁴வேன தஸ்ஸுபட்டா²னந்தி. தத்த² நத்தி²காஹேதுகஅகிரியதி³ட்டீ²ஹி ஏவ கம்மபத²பே⁴தோ³ ஹோதி, ந அஞ்ஞதி³ட்டீ²ஹி.

இமேஸம் பன த³ஸன்னம் அகுஸலகம்மபதா²னம் த⁴ம்மதோ கோட்டா²ஸதோ ஆரம்மணதோ வேத³னாதோ மூலதோ சாதி பஞ்சஹாகாரேஹி வினிச்ச²யோ வேதி³தப்³போ³ –

தத்த² ‘த⁴ம்மதோ’தி ஏதேஸு ஹி படிபாடியா ஸத்த சேதனாத⁴ம்மாவ ஹோந்தி, அபி⁴ஜ்ஜா²த³யோ தயோ சேதனாஸம்பயுத்தா.

‘கோட்டா²ஸதோ’தி படிபாடியா ஸத்த, மிச்சா²தி³ட்டி² சாதி இமே அட்ட² கம்மபதா² ஏவ ஹோந்தி; நோ மூலானி. அபி⁴ஜ்ஜா²ப்³யாபாதா³ கம்மபதா² சேவ மூலானி ச. அபி⁴ஜ்ஜா² ஹி மூலம் பத்வா ‘லோபோ⁴ அகுஸலமூலம்’ ஹோதி, ப்³யாபாதோ³ ‘தோ³ஸோ அகுஸலமூலம்’.

‘ஆரம்மணதோ’தி பாணாதிபாதோ ஜீவிதிந்த்³ரியாரம்மணதோ ஸங்கா²ராரம்மணோ ஹோதி. அதி³ன்னாதா³னம் ஸத்தாரம்மணம் வா ஹோதி ஸங்கா²ராரம்மணம் வா. மிச்சா²சாரோ போ²ட்ட²ப்³ப³வஸேன ஸங்கா²ராரம்மணோ ஹோதி; ஸத்தாரம்மணோதிபி ஏகே. முஸாவாதோ³ ஸத்தாரம்மணோ வா, ஸங்கா²ராரம்மணோ வா. ததா² பிஸுணவாசா. ப²ருஸவாசா ஸத்தாரம்மணாவ. ஸம்ப²ப்பலாபோ தி³ட்ட²ஸுதமுதவிஞ்ஞாதவஸேன ஸத்தாரம்மணோ வா ஸங்கா²ராரம்மணோ வா. ததா² அபி⁴ஜ்ஜா². ப்³யாபாதோ³ ஸத்தாரம்மணோவ. மிச்சா²தி³ட்டி² தேபூ⁴மகத⁴ம்மவஸேன ஸங்கா²ராரம்மணாவ.

‘வேத³னாதோ’தி பாணாதிபாதோ து³க்க²வேத³னோ ஹோதி. கிஞ்சாபி ஹி ராஜானோ சோரம் தி³ஸ்வா ஹஸமானாபி ‘க³ச்ச²த² நம் கா⁴தேதா²’தி வத³ந்தி, ஸன்னிட்டா²பகசேதனா பன நேஸம் து³க்க²ஸம்பயுத்தாவ ஹோதி. அதி³ன்னாதா³னம் திவேத³னம். தஞ்ஹி பரப⁴ண்ட³ம் தி³ஸ்வா ஹட்ட²துட்ட²ஸ்ஸ க³ண்ஹதோ ஸுக²வேத³னம் ஹோதி, பீ⁴ததஸிதஸ்ஸ க³ண்ஹதோ து³க்க²வேத³னம். ததா² விபாகனிஸ்ஸந்த³ப²லானி பச்சவேக்க²ந்தஸ்ஸ. க³ஹணகாலே மஜ்ஜ²த்தபா⁴வே டி²தஸ்ஸ பன க³ண்ஹதோ அது³க்க²மஸுக²வேத³னம் ஹோதீதி. மிச்சா²சாரோ ஸுக²மஜ்ஜ²த்தவஸேன த்³விவேத³னோ. ஸன்னிட்டா²பகசித்தே பன மஜ்ஜ²த்தவேத³னோ ந ஹோதி. முஸாவாதோ³ அதி³ன்னாதா³னே வுத்தனயேனேவ திவேத³னோ; ததா² பிஸுணவாசா. ப²ருஸவாசா து³க்க²வேத³னா. ஸம்ப²ப்பலாபோ திவேத³னோ. பரேஸு ஹி ஸாது⁴காரம் தே³ந்தேஸு சேலுக்கே²பாதீ³னி கி²பந்தேஸு ஹட்ட²துட்ட²ஸ்ஸ ஸீதாஹரணபா⁴ரதயுத்³தா⁴தீ³னி கத²னகாலே ஸோ ஸுக²வேத³னோ ஹோதி. பட²மம் தி³ன்னவேதனேன ஏகேன பச்சா² ஆக³ந்த்வா ‘ஆதி³தோ பட்டா²ய கதே²ஹீ’தி வுத்தே ‘அனனுஸந்தி⁴கம் பகிண்ணககத²ம் கதே²ஸ்ஸாமி நு கோ² நோ’தி தோ³மனஸ்ஸிதஸ்ஸ கத²னகாலே து³க்க²வேத³னோ ஹோதி, மஜ்ஜ²த்தஸ்ஸ கத²யதோ அது³க்க²மஸுக²வேத³னோ ஹோதி. அபி⁴ஜ்ஜா² ஸுக²மஜ்ஜ²த்தவஸேன த்³விவேத³னா; ததா² மிச்சா²தி³ட்டி². ப்³யாபாதோ³ து³க்க²வேத³னோ.

‘மூலதோ’தி பாணாதிபாதோ தோ³ஸமோஹவஸேன த்³விமூலகோ ஹோதி. அதி³ன்னாதா³னம் தோ³ஸமோஹவஸேன வா லோப⁴மோஹவஸேன வா. மிச்சா²சாரோ லோப⁴மோஹவஸேன. முஸாவாதோ³ தோ³ஸமோஹவஸேன வா லோப⁴மோஹவஸேன வா; ததா² பிஸுணவாசா ஸம்ப²ப்பலாபோ ச. ப²ருஸவாசா தோ³ஸமோஹவஸேன. அபி⁴ஜ்ஜா² மோஹவஸேன ஏகமூலா; ததா² ப்³யாபாதோ³. மிச்சா²தி³ட்டி² லோப⁴மோஹவஸேன த்³விமூலாதி.

அகுஸலகம்மபத²கதா² நிட்டி²தா.

குஸலகம்மபத²கதா²

பாணாதிபாதாதீ³ஹி பன விரதியோ அனபி⁴ஜ்ஜா²அப்³யாபாத³ஸம்மாதி³ட்டி²யோ சாதி இமே த³ஸ குஸலகம்மபதா² நாம. தத்த² பாணாதிபாதாத³யோ வுத்தத்தா² ஏவ. பாணாதிபாதாதீ³ஹி ஏதாய விரமந்தி, ஸயம் வா விரமதி, விரமணமத்தமேவ வா ஏதந்தி விரதி. யா பாணாதிபாதா விரமந்தஸ்ஸ ‘‘யா தஸ்மிம் ஸமயே பாணாதிபாதா ஆரதி விரதீ’’தி (த⁴. ஸ. 299-301) ஏவம் வுத்தா குஸலசித்தஸம்பயுத்தா விரதி, ஸா பபே⁴த³தோ திவிதா⁴ ஹோதி – ஸம்பத்தவிரதி, ஸமாதா³னவிரதி, ஸமுச்சே²த³விரதீதி.

தத்த² அஸமாதி³ன்னஸிக்கா²பதா³னம் அத்தனோ ஜாதிவயபா³ஹுஸச்சாதீ³னி பச்சவேக்கி²த்வா ‘அயுத்தம் அம்ஹாகம் ஏவரூபம் பாபம் காது’ந்தி ஸம்பத்தம் வத்து²ம் அவீதிக்கமந்தானம் உப்பஜ்ஜமானா விரதி ‘ஸம்பத்தவிரதீ’தி வேதி³தப்³பா³ – ஸீஹளதீ³பே சக்கனஉபாஸகஸ்ஸ விய. தஸ்ஸ கிர த³ஹரகாலேயேவ மாதுயா ரோகோ³ உப்பஜ்ஜி. வேஜ்ஜேன ச ‘அல்லஸஸமம்ஸம் லத்³து⁴ம் வட்டதீ’தி வுத்தம். ததோ சக்கனஸ்ஸ பா⁴தா ‘க³ச்ச², தாத, கே²த்தம் ஆஹிண்டா³ஹீ’தி சக்கனம் பேஸேஸி. ஸோ தத்த² க³தோ. தஸ்மிஞ்ச ஸமயே ஏகோ ஸஸோ தருணஸஸ்ஸம் கா²தி³தும் ஆக³தோ ஹோதி. ஸோ தம் தி³ஸ்வாவ வேகே³ன தா⁴வந்தோ வல்லியா ப³த்³தோ⁴ ‘கிரி கிரீ’தி ஸத்³த³மகாஸி. சக்கனோ தேன ஸத்³தே³ன க³ந்த்வா தம் க³ஹேத்வா சிந்தேஸி – ‘மாது பே⁴ஸஜ்ஜம் கரோமீ’தி. புன சிந்தேஸி – ‘ந மேதம் பதிரூபம் ய்வாஹம் மாது ஜீவிதகாரணா பரம் ஜீவிதா வோரோபேய்ய’ந்தி. அத² நம் ‘க³ச்ச², அரஞ்ஞே ஸஸேஹி ஸத்³தி⁴ம் திணோத³கம் பரிபு⁴ஞ்ஜா’தி முஞ்சி. பா⁴தரா ச ‘கிம் தாத ஸஸோ லத்³தோ⁴’தி புச்சி²தோ தம் பவத்திம் ஆசிக்கி². ததோ நம் பா⁴தா பரிபா⁴ஸி. ஸோ மாதுஸந்திகம் க³ந்த்வா ‘யதோ அஹம் ஜாதோ நாபி⁴ஜானாமி ஸஞ்சிச்ச பாணம் ஜீவிதா வோரோபேதா’தி ஸச்சம் வத்வா அட்டா²ஸி. தாவதே³வஸ்ஸ மாதா அரோகா³ அஹோஸி.

ஸமாதி³ன்னஸிக்கா²பதா³னம் பன ஸிக்கா²பத³ஸமாதா³னே ச ததுத்தரிஞ்ச அத்தனோ ஜீவிதம்பி பரிச்சஜித்வா வத்து²ம் அவீதிக்கமந்தானம் உப்பஜ்ஜமானா விரதி ‘ஸமாதா³னவிரதீ’தி வேதி³தப்³பா³. உத்தரவட்³ட⁴மானபப்³ப³தவாஸீஉபாஸகஸ்ஸ விய. ஸோ கிர அம்ப³ரியவிஹாரவாஸினோ பிங்க³லபு³த்³த⁴ரக்கி²தத்தே²ரஸ்ஸ ஸந்திகே ஸிக்கா²பதா³னி க³ஹேத்வா கே²த்தம் கஸதி. அத²ஸ்ஸ கோ³ணோ நட்டோ². ஸோ தம் க³வேஸந்தோ உத்தரவட்³ட⁴மானபப்³ப³தம் ஆருஹி. தத்ர நம் மஹாஸப்போ அக்³க³ஹேஸி. ஸோ சிந்தேஸி – ‘இமாயஸ்ஸ திகி²ணவாஸியா ஸீஸம் சி²ந்தா³மீ’தி. புன சிந்தேஸி – ‘ந மேதம் பதிரூபம் ய்வாஹம் பா⁴வனீயஸ்ஸ க³ருனோ ஸந்திகே ஸிக்கா²பதா³னி க³ஹேத்வா பி⁴ந்தே³ய்ய’ந்தி ஏவம் யாவததியம் சிந்தேத்வா ‘ஜீவிதம் பரிச்சஜாமி, ந ஸிக்கா²பத³’ந்தி அம்ஸே ட²பிதம் திகி²ணத³ண்ட³வாஸிம் அரஞ்ஞே ச²ட்³டே³ஸி. தாவதே³வ நம் மஹாவாளோ முஞ்சித்வா அக³மாஸீதி.

அரியமக்³க³ஸம்பயுத்தா பன விரதி ‘ஸமுச்சே²த³விரதீ’தி வேதி³தப்³பா³, யஸ்ஸா உப்பத்திதோ பபு⁴தி ‘பாணம் கா⁴தேஸ்ஸாமீ’தி அரியபுக்³க³லானம் சித்தம்பி நுப்பஜ்ஜதீதி.

இதா³னி யதா² அகுஸலானம் ஏவம் இமேஸம்பி குஸலகம்மபதா²னம் த⁴ம்மதோ கோட்டா²ஸதோ ஆரம்மணதோ வேத³னாதோ மூலதோதி பஞ்சஹாகாரேஹி வினிச்ச²யோ வேதி³தப்³போ³ –

தத்த² ‘த⁴ம்மதோ’தி ஏதேஸு ஹி படிபாடியா ஸத்த சேதனாபி வட்டந்தி, விரதியோபி; அந்தே தயோ சேதனாஸம்பயுத்தாவ.

‘கோட்டா²ஸதோ’தி படிபாடியா ஸத்த கம்மபதா² ஏவ, நோ மூலானி. அந்தே தயோ கம்மபதா² சேவ மூலானி ச. அனபி⁴ஜ்ஜா² ஹி மூலம் பத்வா ‘அலோபோ⁴ குஸலமூலம்’ ஹோதி. அப்³யாபாதோ³ ‘அதோ³ஸோ குஸலமூலம்’, ஸம்மாதி³ட்டி² ‘அமோஹோ குஸலமூலம்’.

‘ஆரம்மணதோ’தி பாணாதிபாதாதீ³னம் ஆரம்மணானேவ ஏதேஸம் ஆரம்மணானி. வீதிக்கமிதப்³ப³தோயேவ ஹி வேரமணீ நாம ஹோதி. யதா² பன நிப்³பா³னாரம்மணோ அரியமக்³கோ³ கிலேஸே பஜஹதி, ஏவம் ஜீவிதிந்த்³ரியாதி³ஆரம்மணாபேதே கம்மபதா² பாணாதிபாதாதீ³னி து³ஸ்ஸீல்யானி பஜஹந்தீதி வேதி³தப்³பா³.

‘வேத³னாதோ’தி ஸப்³பே³ ஸுக²வேத³னா வா ஹோந்தி மஜ்ஜ²த்தவேத³னா வா. குஸலம் பத்வா ஹி து³க்க²வேத³னா நாம நத்தி².

‘மூலதோ’தி படிபாடியா ஸத்த கம்மபதா² ஞாணஸம்பயுத்தசித்தேன விரமந்தஸ்ஸ அலோப⁴அதோ³ஸஅமோஹவஸேன திமூலா ஹோந்தி; ஞாணவிப்பயுத்தசித்தேன விரமந்தஸ்ஸ த்³விமூலா. அனபி⁴ஜ்ஜா² ஞாணஸம்பயுத்தசித்தேன விரமந்தஸ்ஸ த்³விமூலா ஹோதி; ஞாணவிப்பயுத்தசித்தேன ஏகமூலா. அலோபோ⁴ பன அத்தனாவ அத்தனோ மூலம் ந ஹோதி. அப்³யாபாதே³பி ஏஸேவ நயோ. ஸம்மாதி³ட்டி² அலோபா⁴தோ³ஸவஸேன த்³விமூலாவ ஹோதி. இமே த³ஸ குஸலகம்மபதா² நாம.

கம்மபத²ஸம்ஸந்த³னகதா²

இதா³னி இமஸ்மிம் டா²னே கம்மபத²ஸம்ஸந்த³னம் நாம வேதி³தப்³ப³ம். பஞ்சப²ஸ்ஸத்³வாரவஸேன ஹி உப்பன்னோ அஸம்வரோ அகுஸலம் மனோகம்மமேவ ஹோதி. மனோப²ஸ்ஸத்³வாரவஸேன உப்பன்னோ தீணிபி கம்மானி ஹோந்தி – ஸோ ஹி காயத்³வாரே சோபனப்பத்தோ அகுஸலம் காயகம்மம் ஹோதி, வசீத்³வாரே அகுஸலம் வசீகம்மம், உப⁴யத்த² சோபனம் அப்பத்தோ அகுஸலம் மனோகம்மம். பஞ்சஅஸம்வரத்³வாரவஸேன உப்பன்னோபி அகுஸலம் மனோகம்மமேவ ஹோதி. சோபனகாயஅஸம்வரத்³வாரவஸேன உப்பன்னோ அகுஸலம் காயகம்மமேவ ஹோதி, வாசாஅஸம்வரத்³வாரவஸேன உப்பன்னோ அகுஸலம் வசீகம்மமேவ ஹோதி, மனோஅஸம்வரத்³வாரவஸேன உப்பன்னோ அகுஸலம் மனோகம்மமேவ ஹோதி. திவித⁴ம் காயது³ச்சரிதம் அகுஸலம் காயகம்மமேவ ஹோதி, சதுப்³பி³த⁴ம் வசீது³ச்சரிதம் அகுஸலம் வசீகம்மமேவ ஹோதி, திவித⁴ம் மனோது³ச்சரிதம் அகுஸலம் மனோகம்மமேவ ஹோதி.

பஞ்சப²ஸ்ஸத்³வாரவஸேன உப்பன்னோ ஸம்வரோபி குஸலம் மனோகம்மமேவ ஹோதி. மனோப²ஸ்ஸத்³வாரவஸேன உப்பன்னோ பன அயம்பி, அஸம்வரோ விய, தீணிபி கம்மானி ஹோந்தி. பஞ்சஸம்வரத்³வாரவஸேன உப்பன்னோபி குஸலம் மனோகம்மமேவ ஹோதி, சோபனகாயஸம்வரத்³வாரவஸேன உப்பன்னோ குஸலம் காயகம்மமேவ ஹோதி, வாசாஸம்வரத்³வாரவஸேன உப்பன்னோ குஸலம் வசீகம்மமேவ ஹோதி, மனோஸம்வரத்³வாரவஸேன உப்பன்னோ குஸலம் மனோகம்மமேவ ஹோதி. திவித⁴ம் காயஸுசரிதம் குஸலம் காயகம்மமேவ ஹோதி, சதுப்³பி³த⁴ம் வசீஸுசரிதம் குஸலம் வசீகம்மமேவ ஹோதி, திவித⁴ம் மனோஸுசரிதம் குஸலம் மனோகம்மமேவ ஹோதி.

அகுஸலம் காயகம்மம் பஞ்சப²ஸ்ஸத்³வாரவஸேன நுப்பஜ்ஜதி; மனோப²ஸ்ஸத்³வாரவஸேனேவ உப்பஜ்ஜதி. ததா² அகுஸலம் வசீகம்மம். அகுஸலம் மனோகம்மம் பன ச²ப²ஸ்ஸத்³வாரவஸேன உப்பஜ்ஜதி; தம் காயவசீத்³வாரேஸு சோபனம் பத்தம் அகுஸலம் காயவசீகம்மம் ஹோதி, சோபனம் அப்பத்தம் அகுஸலம் மனோகம்மமேவ. யதா² ச பஞ்சப²ஸ்ஸத்³வாரவஸேன, ஏவம் பஞ்சஅஸம்வரத்³வாரவஸேனபி அகுஸலம் காயகம்மம் நுப்பஜ்ஜதி, சோபனகாயஅஸம்வரத்³வாரவஸேன பன வாசாஅஸம்வரத்³வாரவஸேன ச உப்பஜ்ஜதி; மனோஅஸம்வரத்³வாரவஸேன நுப்பஜ்ஜதி. அகுஸலம் வசீகம்மம்பி பஞ்சஅஸம்வரத்³வாரவஸேன நுப்பஜ்ஜதி, சோபனகாயவாசாஅஸம்வரத்³வாரவஸேன உப்பஜ்ஜதி; மனோஅஸம்வரத்³வாரவஸேன நுப்பஜ்ஜதி. அகுஸலம் மனோகம்மம் அட்ட²அஸம்வரத்³வாரவஸேனபி உப்பஜ்ஜதேவ. குஸலகாயகம்மாதீ³ஸுபி ஏஸேவ நயோ.

அயம் பன விஸேஸோ – யதா² அகுஸலகாயகம்மவசீகம்மானி மனோஅஸம்வரத்³வாரவஸேன நுப்பஜ்ஜந்தி, ந ததா² ஏதானி. ஏதானி பன காயங்க³வாசங்க³ம் அசோபேத்வா ஸிக்கா²பதா³னி க³ண்ஹந்தஸ்ஸ மனோஸம்வரத்³வாரேபி உப்பஜ்ஜந்தி ஏவ. தத்த² காமாவசரம் குஸலம் சித்தம் திவித⁴கம்மத்³வாரவஸேன உப்பஜ்ஜதி, பஞ்சவிஞ்ஞாணத்³வாரவஸேன நுப்பஜ்ஜதி; ‘யமித³ம் சக்கு²ஸம்ப²ஸ்ஸபச்சயா உப்பஜ்ஜதி வேத³யிதம், ஸுக²ம் வா து³க்க²ம் வா அது³க்க²மஸுக²ம் வா’தி இமினா பன நயேன ச²ப²ஸ்ஸத்³வாரவஸேன உப்பஜ்ஜதி; அட்ட²அஸம்வரத்³வாரவஸேன நுப்பஜ்ஜதி, அட்ட²ஸம்வரத்³வாரவஸேன உப்பஜ்ஜதி; த³ஸஅகுஸலகம்மபத²வஸேன நுப்பஜ்ஜதி, த³ஸகுஸலகம்மபத²வஸேன உப்பஜ்ஜதி; தஸ்மா இத³ம்பி சித்தம் திவித⁴கம்மத்³வாரவஸேன வா உப்பன்னம் ஹோது, ச²ப²ஸ்ஸத்³வாரவஸேன வா, அட்ட²ஸம்வரத்³வாரவஸேன வா த³ஸகுஸலகம்மபத²வஸேன வா. ‘‘காமாவசரம் குஸலம் சித்தம் உப்பன்னம் ஹோதி…பே… ரூபாரம்மணம் வா…பே… த⁴ம்மாரம்மணம் வா’’தி வுத்தே ஸப்³ப³ம் வுத்தமேவ ஹோதீதி.

த்³வாரகதா² நிட்டி²தா.

யம் யம் வா பனாரப்³பா⁴தி ஏத்த² அயம் யோஜனா – ஹேட்டா² வுத்தேஸு ரூபாரம்மணாதீ³ஸு ரூபாரம்மணம் வா ஆரப்³ப⁴, ஆரம்மணம் கத்வாதி அத்தோ². ஸத்³தா³ரம்மணம் வா…பே… த⁴ம்மாரம்மணம் வா ஆரப்³ப⁴ உப்பன்னம் ஹோதி. ஏத்தாவதா ஏதஸ்ஸ சித்தஸ்ஸ ஏதேஸு ஆரம்மணேஸு யம்கிஞ்சி ஏகமேவ ஆரம்மணம் அனுஞ்ஞாதஸதி³ஸம் ஹோதி. இத³ஞ்ச ஏகஸ்மிம் ஸமயே ஏகஸ்ஸ வா புக்³க³லஸ்ஸ ரூபாரம்மணம் ஆரப்³ப⁴ உப்பன்னம் புன அஞ்ஞஸ்மிம் ஸமயே அஞ்ஞஸ்ஸ வா புக்³க³லஸ்ஸ ஸத்³தா³தீ³ஸுபி அஞ்ஞதரம் ஆரம்மணம் ஆரப்³ப⁴ உப்பஜ்ஜதி ஏவ. ஏவம் உப்பஜ்ஜமானஸ்ஸ சஸ்ஸ ஏகஸ்மிம் ப⁴வே பட²மம் ரூபாரம்மணம் ஆரப்³ப⁴ பவத்தி ஹோதி, பச்சா² ஸத்³தா³ரம்மணந்தி அயம்பி கமோ நத்தி². ரூபாதீ³ஸு சாபி பட²மம் நீலாரம்மணம் பச்சா² பீதாரம்மணந்தி அயம்பி நியமோ நத்தி². இதி இமம் ஸப்³பா³ரம்மணதஞ்சேவ, கமாபா⁴வஞ்ச, கமாபா⁴வேபி ச நீலபீதாதீ³ஸு நியமாபா⁴வம் த³ஸ்ஸேதும் ‘யம் யம் வா பனாரப்³பா⁴’தி ஆஹ. இத³ம் வுத்தம் ஹோதி – இமேஸு ரூபாதீ³ஸு ந யம்கிஞ்சி ஏகமேவ, அத² கோ² யம் யம் வா பனாரப்³ப⁴ உப்பன்னம் ஹோதி. ஏவம் உப்பஜ்ஜமானம்பி ச ‘பட²மம் ரூபாரம்மணம் பச்சா² ஸத்³தா³ரம்மணம் ஆரப்³பா⁴’தி ஏவம்பி அனுப்பஜ்ஜித்வா யம் யம் வா பனாரப்³ப⁴ உப்பன்னம் ஹோதி; ‘படிலோமதோ வா அனுலோமதோ வா, ஏகந்தரிகத்³வந்தரிகாதி³னயேன வா, ரூபாரம்மணாதீ³ஸு யம் வா தம் வா ஆரம்மணம் கத்வா உப்பன்னம் ஹோதீ’தி அத்தோ². ரூபாரம்மணேஸுபி ச ‘பட²மம் நீலாரம்மணம் பச்சா² பீதாரம்மண’ந்தி இமினாபி நியமேன அனுப்பஜ்ஜித்வா, யம் யம் வா பனாரப்³ப⁴ ‘நீலபீதகாதீ³ஸு ரூபாரம்மணேஸு யம் வா தம் வா ரூபாரம்மணம் ஆரப்³ப⁴ உப்பன்னம் ஹோதீ’தி அத்தோ². ஸத்³தா³ரம்மணாதீ³ஸுபி ஏஸேவ நயோ. அயம் தாவ ஏகா யோஜனா.

அயம் பன அபரா – ரூபம் ஆரம்மணம் ஏதஸ்ஸாதி ரூபாரம்மணம்…பே… த⁴ம்மோ ஆரம்மணம் ஏதஸ்ஸாதி த⁴ம்மாரம்மணம். இதி ரூபாரம்மணம் வா…பே… த⁴ம்மாரம்மணம் வா சித்தம் உப்பன்னம் ஹோதீதி வத்வா புன ‘யம் யம் வா பனாரப்³பா⁴’தி ஆஹ. தஸ்ஸத்தோ² – ஏதேஸு ரூபாதீ³ஸு ஹேட்டா² வுத்தனயேனேவ யம் வா தம் வா பன ஆரப்³ப⁴ உப்பன்னம் ஹோதீதி. மஹாஅட்ட²கதா²யம் பன யேவாபனகே அபி⁴னவம் நத்தி², ஹேட்டா² க³ஹிதமேவ க³ஹித’ந்தி வத்வா ‘ரூபம் வா ஆரப்³ப⁴…பே… த⁴ம்மம் வா ஆரப்³ப⁴, இத³ம் வா இத³ம் வா ஆரப்³பா⁴தி கதே²தும் இத³ம் வுத்த’ந்தி ஏத்தகமேவ ஆக³தம்.