4. கா³வீஉபமாஸுத்தவண்ணனா

35. சதுத்தே² பப்³ப³தேய்யாதி பப்³ப³தசாரினீ. ந ஸுப்பதிட்டி²தம் பதிட்டா²பேத்வாதி யதா² ஸுப்பதிட்டி²தா ஹோதி, ஏவம் ந பதிட்டா²பேத்வா. தம் நிமித்தந்தி தம் பட²மஜ்ஜா²னஸங்கா²தம் நிமித்தம். ந ஸ்வாதி⁴ட்டி²தம் அதி⁴ட்டா²தீதி யதா² ஸுட்டு² அதி⁴ட்டி²தம் ஹோதி, ந ஏவம் அதி⁴ட்டா²தி. அனபி⁴ஹிம்ஸமானோதி அபோதே²ந்தோ அவிஹேடே²ந்தோ. முது³ சித்தம் ஹோதி கம்மஞ்ஞந்தி யதா² விபஸ்ஸனாசித்தம் லோகுத்தரமக்³க³க்க²ணே முது³ கம்மக்க²மம் கம்மயோக்³க³ம் ஹோதி, ஏவமஸ்ஸ அபி⁴ஞ்ஞாபாத³கம் சதுத்த²ஜ்ஜா²னசித்தம் முது³ ஹோதி கம்மஞ்ஞம். அப்பமாணோ ஸமாதீ⁴தி சதுப்³ரஹ்மவிஹாரஸமாதி⁴பி மக்³க³ப²லஸமாதி⁴பி அப்பமாணோ ஸமாதி⁴ நாம, இத⁴ பன ‘‘அப்பமாணம் அப்பமாணாரம்மண’’ந்தி இமினா பரியாயேன ஸுப்பகு³ணஸமாதி⁴ அப்பமாணஸமாதீ⁴தி த³ட்ட²ப்³போ³. ஸோ அப்பமாணேன ஸமாதி⁴னா ஸுபா⁴விதேனாதி இமஸ்மிம் டா²னே அயம் பி⁴க்கு² விபஸ்ஸனம் வட்³டே⁴த்வா அரஹத்தம் பத்தோ. இதா³னி கீ²ணாஸவஸ்ஸ அபி⁴ஞ்ஞாபடிபாடிம் த³ஸ்ஸேந்தோ யஸ்ஸ யஸ்ஸ சாதிஆதி³மாஹ.