5. ஜா²னஸுத்தவண்ணனா

36. பஞ்சமே ஆஸவானம் க²யந்தி அரஹத்தம். யதே³வ தத்த² ஹோதி ரூபக³தந்தி தஸ்மிம் பட²மஜ்ஜா²னக்க²ணே வத்து²வஸேன வா சித்தஸமுட்டா²னிகாதி³வஸேன வா யம் ரூபம் நாம பவத்ததி. வேத³னாக³தாதீ³னி ஸம்பயுத்தவேத³னாதீ³னம் வஸேன வேதி³தப்³பா³னி. தே த⁴ம்மேதி தே ரூபாத³யோ பஞ்சக்க²ந்த⁴த⁴ம்மே. அனிச்சதோதிஆதீ³ஸு ஹுத்வா அபா⁴வாகாரேன அனிச்சதோ, படிபீளனாகாரேன து³க்க²தோ, ருஜ்ஜனாகாரேன ரோக³தோ, அந்தோது³ஸ்ஸனட்டே²ன க³ண்ட³தோ, அனுபவிட்ட²ட்டே²ன அனுகந்தனட்டே²ன ச ஸல்லதோ, து³க்க²ட்டே²ன அக⁴தோ, ஆபா³த⁴னட்டே²ன ஆபா³த⁴தோ, அஸகட்டே²ன பரதோ, பலுஜ்ஜனட்டே²ன பலோகதோ, அஸ்ஸாமிகட்டே²ன ஸுஞ்ஞதோ, அவஸவத்தனட்டே²ன அனத்ததோ. ஸமனுபஸ்ஸதீதி ப³லவவிபஸ்ஸனாபஞ்ஞாய பஸ்ஸதி.

தேஹி த⁴ம்மேஹீதி தேஹி பஞ்சக்க²ந்த⁴த⁴ம்மேஹி. படிவாபேதீதி நிப்³பா³னவஸேன நிவத்தேதி. அமதாய தா⁴துயாதி நிப்³பா³னதா⁴துயா. சித்தம் உபஸம்ஹரதீதி ஞாணேன ஆனிஸம்ஸம் தி³ஸ்வா ஓதாரேதி. ஸந்தந்தி பச்சனீகஸந்ததாய ஸந்தம். பணீதந்தி அதப்பகம். ஸோ தத்த² டி²தோ ஆஸவானம் க²யம் பாபுணாதீதி ஸோ தஸ்மிம் பட²மஜ்ஜா²னே டி²தோ தம் ப³லவவிபஸ்ஸனம் வட்³டே⁴த்வா அரஹத்தம் பாபுணாதி. அபரோ நயோ – ஸோ தேஹி த⁴ம்மேஹீதி யஸ்மா அனிச்சதோதிஆதீ³ஸு அனிச்சதோ பலோகதோதி த்³வீஹி பதே³ஹி அனிச்சலக்க²ணம் கதி²தம், து³க்க²தோதிஆதீ³ஹி ச²ஹி து³க்க²லக்க²ணம், பரதோ, ஸுஞ்ஞதோ, அனத்ததோதி தீஹி அனத்தலக்க²ணம். தஸ்மா ஸோ தேஹி ஏவம் திலக்க²ணம் ஆரோபேத்வா தி³ட்டே²ஹி அந்தோஸமாபத்தியம் பஞ்சக்க²ந்த⁴த⁴ம்மேஹி. சித்தம் படிவாபேதீதி சித்தம் படிஸம்ஹரதி மோசேதி அபனேதி. உபஸம்ஹரதீதி விபஸ்ஸனாசித்தம் தாவ ஸவனவஸேன து²திவஸேன பரியத்திவஸேன பஞ்ஞத்திவஸேன ச ஸந்தம் நிப்³பா³னந்தி ஏவம் அஸங்க²தாய அமதாய தா⁴துயா உபஸம்ஹரதி. மக்³க³சித்தம் நிப்³பா³னம் ஆரம்மணகரணவஸேனேவ ‘‘ஏதம் ஸந்தம் ஏதம் பணீத’’ந்தி ந ஏவம் வத³தி. இமினா பனாகாரேன தம் படிவிஜ்ஜ²ந்தோ தத்த² சித்தம் உபஸம்ஹரதீதி அத்தோ².

ஸோ தத்த² டி²தோதி தஸ்ஸா திலக்க²ணாரம்மணாய விபஸ்ஸனாய டி²தோ. ஆஸவானம் க²யம் பாபுணாதீதி அனுக்கமேன சத்தாரோ மக்³கே³ பா⁴வேத்வா அரஹத்தம் பாபுணாதி. தேனேவ த⁴ம்மராகே³னாதி ஸமத²விபஸ்ஸனாத⁴ம்மே ச²ந்த³ராகே³ன. த⁴ம்மனந்தி³யாதி தஸ்ஸேவ வேவசனம். ஸமத²விபஸ்ஸனாஸு ஹி ஸப்³ப³ஸோ ச²ந்த³ராக³ம் பரியாதா³தும் ஸக்கோந்தோ அரஹத்தம் பாபுணாதி, அஸக்கோந்தோ அனாகா³மீ ஹோதி.

திணபுரிஸரூபகே வாதி திணபோத்த²கரூபே வா. தூ³ரே கண்டே³ பாதேதீதி தூ³ரேபாதீ. அவிராதி⁴தம் விஜ்ஜ²தீதி அக்க²ணவேதீ⁴. யதே³வ தத்த² ஹோதி வேத³னாக³தந்தி இத⁴ ரூபம் ந க³ஹிதம். கஸ்மா? ஸமதிக்கந்தத்தா. அயஞ்ஹி ஹேட்டா² ரூபாவசரஜ்ஜா²னம் ஸமாபஜ்ஜித்வா ரூபம் அதிக்கமித்வா அரூபாவசரஸமாபத்திம் ஸமாபன்னோதி ஸமத²வஸேனாபி அனேன ரூபம் ஸமதிக்கந்தம், ஹேட்டா² ரூபம் ஸம்மஸித்வா தம் அதிக்கம்ம இதா³னி அரூபம் ஸம்மஸதீதி விபஸ்ஸனாவஸேனாபி அனேன ரூபம் அதிக்கந்தம். ஆருப்பே பன ஸப்³ப³ஸோபி ரூபம் நத்தீ²தி தம் ஸந்தா⁴யபி ரூபம் ந க³ஹிதம். அத² நேவஸஞ்ஞானாஸஞ்ஞாயதனம் கஸ்மா ந க³ஹிதந்தி? ஸுகு²மத்தா. தஸ்மிஞ்ஹி சத்தாரோபி அரூபக்க²ந்தா⁴ ஸுகு²மா ந ஸம்மஸனூபகா³. தேனேவாஹ – ‘‘இதி கோ², பி⁴க்க²வே, யாவதா ஸஞ்ஞாஸமாபத்தி தாவதா அஞ்ஞாபடிவேதோ⁴’’தி. இத³ம் வுத்தம் ஹோதி – யாவதா ஸசித்தகஸமாபத்தி நாம அத்தி², தாவதா ஓளாரிகே த⁴ம்மே ஸம்மஸதோ அஞ்ஞாபடிவேதோ⁴ ஹோதி, அரஹத்தம் ஸம்பஜ்ஜதி. நேவஸஞ்ஞானாஸஞ்ஞாயதனம் பன ஸுகு²மத்தா ஸஞ்ஞாஸமாபத்தீதி ந வுச்சதி. ஜா²யீஹேதேதி ஜா²யீஹி ஜா²னாபி⁴ரதேஹி ஏதானி. வுட்ட²ஹித்வாதி ததோ ஸமாபத்திதோ வுட்டா²ய. ஸமக்கா²தப்³பா³னீதி ஸம்மா அக்கா²தப்³பா³னி, ‘‘ஸந்தானி பணீதானீ’’தி ஏவம் கேவலம் ஆசிக்கி²தப்³பா³னி தோ²மேதப்³பா³னி வண்ணேதப்³பா³னீதி.