4. ஸமித்³தி⁴ஸுத்தவண்ணனா

14. சதுத்தே² ஸமித்³தீ⁴தி அத்தபா⁴வஸமித்³த⁴தாய ஏவம்லத்³த⁴னாமோ தே²ரஸ்ஸ ஸத்³தி⁴விஹாரிகத்தே²ரோ. கிமாரம்மணாதி கிம்பச்சயா. ஸங்கப்பவிதக்காதி ஸங்கப்பபூ⁴தா விதக்கா. நாமரூபாரம்மணாதி நாமரூபபச்சயா. இமினா சத்தாரோ அரூபக்க²ந்தா⁴ பூ⁴துபாதா³யரூபஞ்ச விதக்கானம் பச்சயோதி த³ஸ்ஸேதி. க்வ நானத்தம் க³ச்ச²ந்தீதி கஸ்மிம் டா²னே நானாஸபா⁴வதம் வேமத்தம் க³ச்ச²ந்தி. தா⁴துஸூதி ரூபதா⁴துஆதீ³ஸு. அஞ்ஞோயேவ ஹி ரூபவிதக்கோ, அஞ்ஞே ஸத்³த³விதக்காத³யோதி. ப²ஸ்ஸஸமுத³யாதி ஸம்பயுத்தப²ஸ்ஸபச்சயா. வேத³னாஸமோஸரணாதி திஸ்ஸோ வேத³னா ஸமோஸரணா. ஏத்தகேன குஸலாகுஸலமிஸ்ஸகா கதி²தா. ஸமாதி⁴ப்பமுகா²திஆத³யோ பன அபசயபக்கி²காதி வேதி³தப்³பா³. தத்த² புப்³ப³ங்க³மட்டே²ன ஜேட்ட²கட்டே²ன வா ஸமாதி⁴ பமுக²ம் ஏதேஸந்தி ஸமாதி⁴ப்பமுகா². ஜேட்ட²ககாரணட்டே²ன ஸதி அதி⁴பதேய்யா ஏதேஸந்தி ஸதாதி⁴பதேய்யா. மக்³க³பஞ்ஞா உத்தரா ஏதேஸந்தி பஞ்ஞுத்தரா. ப²லவிமுத்திம் பத்வா ஸாரப்பத்தா ஹோந்தீதி விமுத்திஸாரா. ஆரம்மணவஸேன அமதம் நிப்³பா³னம் ஓகா³ஹித்வா தத்த² பதிட்டி²தாதி அமதோக³தா⁴. தேன ச மா மஞ்ஞீதி தேன விஸ்ஸஜ்ஜனேன ‘‘அஹம் அக்³க³ஸாவகேன புச்சி²தே பஞ்ஹே விஸ்ஸஜ்ஜேஸி’’ந்தி மா மானம் வா த³ப்பம் வா அகாஸி.