10. குஸீதாரம்ப⁴வத்து²ஸுத்தவண்ணனா

80. த³ஸமே குஸீதவத்தூ²னீதி குஸீதஸ்ஸ அலஸஸ்ஸ வத்தூ²னி பதிட்டா², கோஸஜ்ஜகாரணானீதி அத்தோ². கம்மம் கத்தப்³ப³ம் ஹோதீதி சீவரவிசாரணாதி³கம்மம் கத்தப்³ப³ம் ஹோதி. ந வீரியம் ஆரப⁴தீதி து³வித⁴ம்பி வீரியம் நாரப⁴தி. அப்பத்தஸ்ஸாதி ஜா²னவிபஸ்ஸனாமக்³க³ப²லத⁴ம்மஸ்ஸ அப்பத்தஸ்ஸ பத்தியா. அனதி⁴க³தஸ்ஸாதி தஸ்ஸேவ அனதி⁴க³தஸ்ஸ அதி⁴க³மத்தா²ய. அஸச்சி²கதஸ்ஸாதி ததே³வ அஸச்சி²கதஸ்ஸ ஸச்சி²கரணத்தா²ய. இத³ம் பட²மந்தி இத³ம் ‘‘ஹந்தா³ஹம் நிபஜ்ஜாமீ’’தி ஏவம் ஓஸீத³னம் பட²மம் குஸீதவத்து². இமினா நயேன ஸப்³ப³த்த² அத்தோ² வேதி³தப்³போ³. மாஸாசிதகம் மஞ்ஞேதி ஏத்த² பன மாஸாசிதம் நாம திந்தமாஸோ. யதா² திந்தமாஸோ க³ருகோ ஹோதி, ஏவம் க³ருகோதி அதி⁴ப்பாயோ. கி³லானா வுட்டி²தோ ஹோதீதி கி³லானோ ஹுத்வா பச்சா² வுட்டி²தோ ஹோதி. ஆரம்ப⁴வத்தூ²னீதி வீரியகாரணானி. தேஸம்பி இமினாவ நயேன அத்தோ² வேதி³தப்³போ³. ஸேஸம் ஸப்³ப³த்த² உத்தானமேவாதி.

யமகவக்³கோ³ அட்ட²மோ.