(9) 4. ஸதிவக்³கோ³

1-2. ஸதிஸம்பஜஞ்ஞஸுத்தவண்ணனா

81-82. நவமஸ்ஸ பட²மம் ஹேட்டா² வுத்தனயமேவ. து³தியே ஸத்³தோ⁴தி து³விதா⁴ய ஸத்³தா⁴ய ஸமன்னாக³தோ. நோ சுபஸங்கமிதாதி ந உபட்ட²ஹதி. நோ ச பரிபுச்சி²தாதி அத்தா²னத்த²ம் காரணாகாரணம் பரிபுச்சி²தா ந ஹோதி. ஸமன்னாக³தோதி ஸாமிஅத்தே² பச்சத்தம், ஸமன்னாக³தஸ்ஸாதி வுத்தம் ஹோதி. ஏகந்தபடிபா⁴னா ததா²க³தம் த⁴ம்மதே³ஸனா ஹோதீதி ததா²க³தஸ்ஸ ஏகந்தபடிபா⁴னா த⁴ம்மதே³ஸனா ஹோதி, ஏகந்தேனேவ படிபா⁴தி உபட்டா²தீதி அத்தோ².

3. மூலகஸுத்தவண்ணனா

83. ததியே ஸப்³பே³ த⁴ம்மாதி பஞ்சக்க²ந்தா⁴. ச²ந்த³மூலகாதி அஜ்ஜா²ஸயச்ச²ந்தோ³ கத்துகம்யதாச²ந்தோ³ தம் மூலம் ஏதேஸந்தி ச²ந்த³மூலகா. மனஸிகாரதோ ஸம்ப⁴வந்தீதி மனஸிகாரஸம்ப⁴வா. ப²ஸ்ஸதோ ஸமுதே³ந்தி ராஸீ ப⁴வந்தீதி ப²ஸ்ஸஸமுத³யா. வேத³னாய ஸமோஸரந்தீதி வேத³னாஸமோஸரணா. ஸமாதி⁴ ஏதேஸம் பமுகோ²தி ஸமாதி⁴ப்பமுகா². ஜேட்ட²கட்டே²ன ஸதி அதி⁴பதி ஏதேஸந்தி ஸதாதி⁴பதேய்யா, ஸதிஜேட்ட²காதி அத்தோ². பஞ்ஞா உத்தரா ஏதேஸந்தி பஞ்ஞுத்தரா. விமுத்தி ஏவ ஸாரோ ஏதேஸந்தி விமுத்திஸாரா. ஏத்த² ச ச²ந்த³மூலகாத³யோ சத்தாரோபி லோகியா கதி²தா, ஸேஸா லோகியலோகுத்தரமிஸ்ஸகாதி.

4. சோரஸுத்தவண்ணனா

84. சதுத்தே² மஹாசோரோதி ரஜ்ஜந்தரே து³ப்³பி⁴தும் ஸமத்தோ² மஹாசோரோ. பரியாபஜ்ஜதீதி பரியாதா³னம் க³ச்ச²தி. ந சிரட்டி²திகோ ஹோதீதி அத்³தா⁴னம் பாலேந்தோ டா²தும் ந ஸக்கோதி. அப்பஹரந்தஸ்ஸ பஹரதீதி அத்தனோ அவேரினே அப்பஹரந்தே கு³ணஸம்பன்னே ச மஹல்லகே ச தருணதா³ரகே ச அப்பஹரிதப்³ப³யுத்தகே பஹரதி. அனவஸேஸம் ஆதி³யதீதி நிஸ்ஸேஸம் க³ண்ஹாதி. ப்³யத்தசோரானஞ்ஹி இத³ம் வத்தம் – பரஸ்ஸ த்³வீஸு ஸாடகேஸு ஏகோ க³ஹேதப்³போ³, ஏகஸ்மிம் ஸந்தே து³ப்³ப³லம் த³த்வா தி²ரோ க³ஹேதப்³போ³. புடப⁴த்ததண்டு³லாதீ³ஸு ஏகம் கோட்டா²ஸம் த³த்வா ஏகோ க³ஹேதப்³போ³தி. அச்சாஸன்னே கம்மம் கரோதீதி கா³மனிக³மராஜதா⁴னீனம் ஆஸன்னட்டா²னே சோரிககம்மம் கரோதி. ந ச நிதா⁴னகுஸலோ ஹோதீதி யம் லத்³த⁴ம், தம் த³க்கி²ணேய்யே நித³ஹிதும் சே²கோ ந ஹோதி, பரலோகமக்³க³ம் ந ஸோதே⁴தி.

5. ஸமணஸுத்தவண்ணனா

85. பஞ்சமே யம் ஸமணேனாதி யம் கு³ணஜாதம் ஸமணேன பத்தப்³ப³ம். வுஸீமதாதி ப்³ரஹ்மசரியவாஸம்வுதேன. முத்தோ மோசேமி ப³ந்த⁴னாதி அஹம் ஸப்³ப³ப³ந்த⁴னேஹி முத்தோ ஹுத்வா மஹாஜனம்பி ராகா³தி³ப³ந்த⁴னதோ மோசேமி. பரமத³ந்தோதி அஞ்ஞேன கேனசி அஸிக்கா²பிதோ அசோதி³தோ ஸயம்பு⁴ஞாணேன படிவிஜ்ஜி²த்வா பரமத³மதே²ன த³ந்தத்தா பரமத³ந்தோ நாம. பரினிப்³பு³தோதி கிலேஸபரினிப்³பா³னேன பரினிப்³பு³தோ.

6. யஸஸுத்தவண்ணனா

86. ச²ட்டே² மா ச மயா யஸோதி யஸோ ச மயா ஸத்³தி⁴ம் மா க³ஞ்சி². அகஸிரலாபீ⁴தி விபுலலாபீ⁴. ஸீலபஞ்ஞாணந்தி ஸீலஞ்சேவ ஞாணஞ்ச. ஸங்க³ம்மாதி ஸன்னிபதித்வா. ஸமாக³ம்மாதி ஸமாக³ந்த்வா. ஸங்க³ணிகவிஹாரந்தி க³ணஸங்க³ணிகவிஹாரம். ந ஹி நூனமேதி ந ஹி நூன இமே. ததா² ஹி பனமேதி ததா² ஹி பன இமே. அங்கு³லிபதோத³கேஹீதி அங்கு³லிபதோத³யட்டி²ம் கத்வா விஜ்ஜ²னேன. ஸஞ்ஜக்³க⁴ந்தேதி மஹாஹஸிதம் ஹஸந்தே. ஸம்கீளந்தேதி கேளிம் கரோந்தே.

7. பத்தனிகுஜ்ஜனஸுத்தவண்ணனா

87. ஸத்தமே நிக்குஜ்ஜேய்யாதி தேன தி³ன்னஸ்ஸ தே³ய்யத⁴ம்மஸ்ஸ அப்படிக்³க³ஹணத்த²ம் பத்தனிக்குஜ்ஜனகம்மவாசாய நிகுஜ்ஜேய்ய, ந அதோ⁴முக²ட²பனேன. அலாபா⁴யாதி சதுன்னம் பச்சயானம் அலாப⁴த்தா²ய. அனத்தா²யாதி உபத்³த³வாய அவட்³டி⁴யா. உக்குஜ்ஜேய்யாதி உக்குஜ்ஜனகம்மவாசாய உக்குஜ்ஜேய்ய.

8. அப்பஸாத³பவேத³னீயஸுத்தவண்ணனா

88. அட்ட²மே அப்பஸாத³ம் பவேதே³ய்யுந்தி அப்பஸன்னபா⁴வம் ஜானாபேய்யும். அப்பஸாத³ம் பவேதே³ந்தேன பன கிம் காதப்³ப³ந்தி? நிஸின்னாஸனதோ ந உட்டா²தப்³ப³ம் ந வந்தி³தப்³ப³ம் ந பச்சுக்³க³மனம் காதப்³ப³ம், ந தே³ய்யத⁴ம்மோ தா³தப்³போ³. அகோ³சரேதி பஞ்சவிதே⁴ அகோ³சரே.

9. படிஸாரணீயஸுத்தவண்ணனா

89. நவமே த⁴ம்மிகஞ்ச கி³ஹிபடிஸ்ஸவந்தி ‘‘இமம் தேமாஸம் இதே⁴வ வஸிதப்³ப³’’ந்தி வுத்தோ ‘‘ஏவம் ஹோதூ’’திஆதி³னா நயேன படிஸ்ஸவம். ந ஸச்சாபேதீதி வுத்தம் ந ஸச்சம் கரோதி விஸம்வாதே³தி.

10. ஸம்மாவத்தனஸுத்தவண்ணனா

90. த³ஸமே பச்சேகட்டா²னேதி அதி⁴பதிட்டா²னே ஜேட்ட²கட்டா²னே. தஞ்ஹி ஜேட்ட²கம் கத்வா கிஞ்சி ஸங்க⁴கம்மம் காதும் ந லப⁴தி. ந ச தேன மூலேன வுட்டா²பேதப்³போ³தி தம் மூலம் கத்வா அப்³பா⁴னகம்மம் காதும் ந லப⁴தி. ஸேஸம் ஸப்³ப³த்த² உத்தானமேவாதி.

ஸதிவக்³கோ³ நவமோ.