5. அபி⁴பா⁴யதனஸுத்தவண்ணனா

65. பஞ்சமே அபி⁴பா⁴யதனானீதி அபி⁴ப⁴வனகாரணானி. கிம் அபி⁴ப⁴வந்தி? பச்சனீகத⁴ம்மேபி ஆரம்மணானிபி. தானி ஹி படிபக்க²பா⁴வேன பச்சனீகத⁴ம்மே அபி⁴ப⁴வந்தி, புக்³க³லஸ்ஸ ஞாணுத்தரியதாய ஆரம்மணானி. அஜ்ஜ²த்தம் ரூபஸஞ்ஞீதிஆதீ³ஸு பன அஜ்ஜ²த்தரூபே பரிகம்மவஸேன அஜ்ஜ²த்தம் ரூபஸஞ்ஞீ நாம ஹோதி. அஜ்ஜ²த்தஞ்ஹி நீலபரிகம்மம் கரோந்தோ கேஸே வா பித்தே வா அக்கி²தாரகாய வா கரோதி. பீதபரிகம்மம் கரோந்தோ மேதே³ வா ச²வியா வா ஹத்த²தலபாத³தலேஸு வா அக்கீ²னம் பீதட்டா²னே வா கரோதி. லோஹிதபரிகம்மம் கரோந்தோ மம்ஸே வா லோஹிதே வா ஜிவ்ஹாய வா அக்கீ²னம் ரத்தட்டா²னே வா கரோதி. ஓதா³தபரிகம்மம் கரோந்தோ அட்டி²ம்ஹி வா த³ந்தே வா நகே² வா அக்கீ²னம் ஸேதட்டா²னே வா கரோதி. தம் பன ஸுனீலகம் ஸுபீதகம் ஸுலோஹிதகம் ஸுஓதா³தம் ந ஹோதி, அவிஸுத்³த⁴மேவ ஹோதி.

ஏகோ ப³ஹித்³தா⁴ ரூபானி பஸ்ஸதீதி யஸ்ஸேவம் பரிகம்மம் அஜ்ஜ²த்தம் உப்பன்னம் ஹோதி, நிமித்தம் பன ப³ஹித்³தா⁴, ஸோ ஏவம் அஜ்ஜ²த்தம் பரிகம்மஸ்ஸ ப³ஹித்³தா⁴ ச அப்பனாய வஸேன ‘‘அஜ்ஜ²த்தம் ரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதீ’’தி வுச்சதி. பரித்தானீதி அவட்³டி⁴தானி. ஸுவண்ணது³ப்³ப³ண்ணானீதி ஸுவண்ணானி வா ஹோந்து து³ப்³ப³ண்ணானி வா, பரித்தவஸேனேவ இத³ம் அபி⁴பா⁴யதனம் வுத்தந்தி வேதி³தப்³ப³ம். தானி அபி⁴பு⁴ய்யாதி யதா² நாம ஸம்பன்னக்³க³ஹணிகோ கடச்சு²மத்தம் ப⁴த்தம் லபி⁴த்வா ‘‘கிம் ஏத்த² பு⁴ஞ்ஜிதப்³ப³ம் அத்தீ²’’தி ஸம்கட்³டி⁴த்வா ஏககப³ளமேவ கரோதி, ஏவமேவ ஞாணுத்தரிகோ புக்³க³லோ விஸத³ஞாணோ ‘‘கிமேத்த² பரித்தகே ஆரம்மணே ஸமாபஜ்ஜிதப்³ப³ம் அத்தி², நாயம் மம பா⁴ரோ’’தி தானி ரூபானி அபி⁴ப⁴வித்வா ஸமாபஜ்ஜதி, ஸஹ நிமித்துப்பாதே³னேவேத்த² அப்பனம் பாபேதீதி அத்தோ². ஜானாமி பஸ்ஸாமீதி இமினா பனஸ்ஸ ஆபோ⁴கோ³ கதி²தோ. ஸோ ச கோ² ஸமாபத்திதோ வுட்டி²தஸ்ஸ, ந அந்தோஸமாபத்தியம். ஏவம்ஸஞ்ஞீ ஹோதீதி ஆபோ⁴க³ஸஞ்ஞாயபி ஜா²னஸஞ்ஞாயபி ஏவம்ஸஞ்ஞீ ஹோதி. அபி⁴ப⁴வனஸஞ்ஞா ஹிஸ்ஸ அந்தோஸமாபத்தியம்பி அத்தி², ஆபோ⁴க³ஸஞ்ஞா பன ஸமாபத்திதோ வுட்டி²தஸ்ஸேவ.

அப்பமாணானீதி வட்³டி⁴தப்பமாணானி, மஹந்தானீதி அத்தோ². அபி⁴பு⁴ய்யாதி ஏத்த² ச பன யதா² மஹக்³க⁴ஸோ புரிஸோ ஏகம் ப⁴த்தவட்³டி⁴தகம் லபி⁴த்வா ‘‘அஞ்ஞாபி ஹோது, அஞ்ஞாபி ஹோது, கிம் ஏஸா மய்ஹம் கரிஸ்ஸதீ’’தி ந தம் மஹந்ததோ பஸ்ஸதி, ஏவமேவ ஞாணுத்தரோ புக்³க³லோ விஸத³ஞாணோ ‘‘கிம் ஏத்த² ஸமாபஜ்ஜிதப்³ப³ம், நயித³ம் அப்பமாணம், ந மய்ஹம் சித்தேகக்³க³தாகரணே பா⁴ரோ அத்தீ²’’தி அபி⁴ப⁴வித்வா ஸமாபஜ்ஜதி, ஸஹ நிமித்துப்பாத³னேவேத்த² அப்பனம் பாபேதீதி அத்தோ².

அஜ்ஜ²த்தம் அரூபஸஞ்ஞீதி அலாபி⁴தாய வா அனத்தி²கதாய வா அஜ்ஜ²த்தரூபே பரிகம்மஸஞ்ஞாவிரஹிதோ.

ஏகோ ப³ஹித்³தா⁴ ரூபானி பஸ்ஸதீதி யஸ்ஸ பரிகம்மம்பி நிமித்தம்பி ப³ஹித்³தா⁴ உப்பன்னம், ஸோ ஏவம் ப³ஹித்³தா⁴ பரிகம்மஸ்ஸ சேவ அப்பனாய ச வஸேன ‘‘அஜ்ஜ²த்தம் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதீ’’தி வுச்சதி. ஸேஸமேத்த² சதுத்தா²பி⁴பா⁴யதனே ச வுத்தனயமேவ. இமேஸு பன சதூஸு பரித்தம் விதக்கசரிதவஸேன ஆக³தம், அப்பமாணம் மோஹசரிதவஸேன, ஸுவண்ணம் தோ³ஸசரிதவஸேன, து³ப்³ப³ண்ணம் ராக³சரிதவஸேன. ஏதேஸஞ்ஹி ஏதானி ஸப்பாயானி. ஸா ச நேஸம் ஸப்பாயதா விஸுத்³தி⁴மக்³கே³ (விஸுத்³தி⁴. 1.43) சரியனித்³தே³ஸே வுத்தா.

பஞ்சமஅபி⁴பா⁴யதனாதீ³ஸு நீலானீதி ஸப்³ப³ஸங்கா³ஹிகவஸேன வுத்தம். நீலவண்ணானீதி வண்ணவஸேன. நீலனித³ஸ்ஸனானீதி நித³ஸ்ஸனவஸேன. அபஞ்ஞாயமானவிவரானி அஸம்பி⁴ன்னவண்ணானி ஏகனீலானேவ ஹுத்வா தி³ஸ்ஸந்தீதி வுத்தம் ஹோதி. நீலனிபா⁴ஸானீதி இத³ம் பன ஓபா⁴ஸவஸேன வுத்தம், நீலோபா⁴ஸானி நீலப்பபா⁴யுத்தானீதி அத்தோ². ஏதேன நேஸம் ஸுவிஸுத்³த⁴தம் த³ஸ்ஸேதி. விஸுத்³த⁴வண்ணவஸேனேவ ஹி இமானி அபி⁴பா⁴யதனானி வுத்தானி. ‘‘நீலகஸிணம் உக்³க³ண்ஹந்தோ நீலஸ்மிம் நிமித்தம் க³ண்ஹாதி புப்ப²ஸ்மிம் வா வத்த²ஸ்மிம் வா வண்ணதா⁴துயா வா’’திஆதி³கம் பனேத்த² கஸிணகரணஞ்ச பரிகம்மஞ்ச அப்பனாவிதா⁴னஞ்ச ஸப்³ப³ம் விஸுத்³தி⁴மக்³கே³ (விஸுத்³தி⁴. 1.55) வித்தா²ரதோ வுத்தமேவாதி.