3. பட²மஅக்³கி³ஸுத்தவண்ணனா

46. ததியே ஸப்³பே³பி ராகா³த³யோ அனுட³ஹனட்டே²ன அக்³கீ³. ஆஹுனேய்யக்³கீ³திஆதீ³ஸு பனேத்த² ஆஹுனம் வுச்சதி ஸக்காரோ, ஆஹுனம் அரஹந்தீதி ஆஹுனேய்யா. மாதாபிதரோ ஹி புத்தானம் ப³ஹுபகாரத்தா ஆஹுனம் அரஹந்தி, தேஸு விப்படிபஜ்ஜமானா புத்தா நிரயாதீ³ஸு நிப்³ப³த்தந்தி. தஸ்மா கிஞ்சாபி மாதாபிதரோ ந அனுட³ஹந்தி, அனுட³ஹனஸ்ஸ பன பச்சயா ஹோந்தி. இதி அனுட³ஹனட்டே²னேவ ஆஹுனேய்யக்³கீ³தி வுச்சந்தி. க³ஹபதீதி பன கே³ஹஸாமிகோ வுச்சதி, ஸோ மாதுகா³மஸ்ஸ ஸயனவத்தா²லங்காராதி³அனுப்பதா³னேன ப³ஹுபகாரோ. தம் அதிசரந்தோ மாதுகா³மோ நிரயாதீ³ஸு நிப்³ப³த்ததி. தஸ்மா ஸோபி புரிமனயேனேவ அனுட³ஹனட்டே²ன க³ஹபதக்³கீ³தி வுத்தோ. த³க்கி²ணேய்யக்³கீ³தி ஏத்த² பன த³க்கி²ணாதி சத்தாரோ பச்சயா, பி⁴க்கு²ஸங்கோ⁴ த³க்கி²ணேய்யோ. ஸோ ஹி கி³ஹீனம் தீஸு ஸரணேஸு பஞ்சஸு ஸீலேஸு த³ஸஸு ஸீலேஸு மாதாபிதுபட்டா²னே த⁴ம்மிகஸமணப்³ராஹ்மணுபட்டா²னேதி ஏவமாதீ³ஸு கல்யாணத⁴ம்மேஸு நியோஜனேன ப³ஹுபகாரோ. தஸ்மிம் மிச்சா²படிபன்னா கி³ஹீ பி⁴க்கு²ஸங்க⁴ம் அக்கோஸித்வா பரிபா⁴ஸித்வா நிரயாதீ³ஸு நிப்³ப³த்தந்தி. தஸ்மா ஸோபி புரிமனயேனேவ அனுட³ஹனட்டே²ன த³க்கி²ணேய்யக்³கீ³தி வுத்தோ. கட்ட²தோ நிப்³ப³த்தோ பாகதிகோவ அக்³கி³ கட்ட²க்³கி³ நாம.