4. தே³வதாவக்³கோ³

5. பட²மமித்தஸுத்தவண்ணனா

36. சதுத்த²ஸ்ஸ பஞ்சமே து³த்³த³த³ந்தி து³ப்பரிச்சஜம் மஹாரஹம் ப⁴ண்ட³கம். து³க்கரம் கரோதீதி காதும் அஸுகரம் கம்மம் கரோதி. து³க்க²மம் க²மதீதி ஸஹாயஸ்ஸ அத்தா²ய து³ரதி⁴வாஸம் அதி⁴வாஸேதி. கு³ய்ஹமஸ்ஸ ஆவிகரோதீதி அத்தனோ கு³ய்ஹம் தஸ்ஸ ஆவிகரோதி. கு³ய்ஹமஸ்ஸ பரிகு³ஹதீதி தஸ்ஸ கு³ய்ஹம் அஞ்ஞேஸம் நாசிக்க²தி. கீ²ணேன நாதிமஞ்ஞதீதி தஸ்ஸ போ⁴கே³ கீ²ணே தேன க²யேன தம் நாதிமஞ்ஞதி, தஸ்மிம் ஓமானம் அத்தனி ச அதிமானம் ந கரோதி.

6. து³தியமித்தஸுத்தவண்ணனா

37. ச²ட்டே² வத்தாதி வசனகுஸலோ. வசனக்க²மோதி வசனம் க²மதி, தி³ன்னம் ஓவாத³ம் கரோதி. க³ம்பீ⁴ரந்தி கு³ய்ஹம் ரஹஸ்ஸம் ஜா²னனிஸ்ஸிதம் விபஸ்ஸனாமக்³க³ப²லனிப்³பா³னனிஸ்ஸிதம்.

7. பட²மபடிஸம்பி⁴தா³ஸுத்தவண்ணனா

38. ஸத்தமே இத³ம் மே சேதஸோ லீனத்தந்தி உப்பன்னே சேதஸோ லீனத்தே ‘‘இத³ம் மே சேதஸோ லீனத்த’’ந்தி யதா²ஸபா⁴வதோ ஜானாதி. அஜ்ஜ²த்தம் ஸம்கி²த்தம் நாம தி²னமித்³தா⁴னுக³தம். ப³ஹித்³தா⁴ விக்கி²த்தம் நாம பஞ்சஸு காமகு³ணேஸு விக்கி²த்தம். வேத³னாதிஆதீ³னி பபஞ்சமூலவஸேன க³ஹிதானி. வேத³னா ஹி தண்ஹாய மூலம் ஸுக²வஸேன தண்ஹுப்பத்திதோ, ஸஞ்ஞா தி³ட்டி²யா மூலம் அவிபூ⁴தாரம்மணே தி³ட்டி²உப்பத்திதோ, விதக்கோ மானஸ்ஸ மூலம் விதக்கவஸேன அஸ்மீதி மானுப்பத்திதோ. ஸப்பாயாஸப்பாயேஸூதி உபகாரானுபகாரேஸு. நிமித்தந்தி காரணம். ஸேஸம் ஸப்³ப³த்த² உத்தானத்த²மேவாதி.

தே³வதாவக்³கோ³ சதுத்தோ².