9. ஸீதிவக்³கோ³

1. ஸீதிபா⁴வஸுத்தவண்ணனா

85. நவமஸ்ஸ பட²மே ஸீதிபா⁴வந்தி ஸீதலபா⁴வம். யஸ்மிம் ஸமயே சித்தம் நிக்³க³ண்ஹிதப்³ப³ந்திஆதீ³ஸு உத்³த⁴ச்சஸமயே சித்தம் ஸமாதி⁴னா நிக்³க³ஹேதப்³ப³ம் நாம, கோஸஜ்ஜானுபதிதகாலே வீரியேன பக்³க³ஹேதப்³ப³ம் நாம, நிரஸ்ஸாத³க³தகாலே ஸமாதி⁴னா ஸம்பஹம்ஸிதப்³ப³ம் நாம, ஸமப்பவத்தகாலே போ³ஜ்ஜ²ங்கு³பேக்கா²ய அஜ்ஜு²பேக்கி²தப்³ப³ம் நாம.

2. ஆவரணஸுத்தவண்ணனா

86. து³தியே கம்மாவரணதாயாதி பஞ்சானந்தரியகம்மேஹி. கிலேஸாவரணதாயாதி நியதமிச்சா²தி³ட்டி²யா. விபாகாவரணதாயாதி அகுஸலவிபாகபடிஸந்தி⁴யா வா குஸலவிபாகேஹி அஹேதுகபடிஸந்தி⁴யா வாதி.

4-5. ஸுஸ்ஸூஸதிஸுத்தாதி³வண்ணனா

88-89. சதுத்தே² அனத்த²ந்தி அவட்³டி⁴ம். அத்த²ம் ரிஞ்சதீதி வட்³டி⁴அத்த²ம் ச²ட்³டே³தி. அனனுலோமிகாயாதி ஸாஸனஸ்ஸ அனனுலோமிகாய. பஞ்சமே தி³ட்டி²ஸம்பத³ந்தி ஸோதாபத்திமக்³க³ம்.

8-11. அப⁴ப்³ப³ட்டா²னஸுத்தசதுக்கவண்ணனா

92-95. அட்ட²மே அனாக³மனீயம் வத்து²ந்தி அனுபக³ந்தப்³ப³ம் காரணம், பஞ்சன்னம் வேரானம் த்³வாஸட்டி²யா ச தி³ட்டி²க³தானமேதம் அதி⁴வசனம். அட்ட²மம் ப⁴வந்தி காமாவசரே அட்ட²மம் படிஸந்தி⁴ம். நவமே கோதூஹலமங்க³லேனாதி தி³ட்ட²ஸுதமுதமங்க³லேன. த³ஸமே ஸயம்கதந்திஆதீ³னி அத்ததி³ட்டி²வஸேன வுத்தானி. அதி⁴ச்சஸமுப்பன்னந்தி அஹேதுனிப்³ப³த்தம். ஸேஸம் ஸப்³ப³த்த² உத்தானமேவாதி.

ஸீதிவக்³கோ³ நவமோ.