6. மஹாவக்³கோ³

1. ஸோணஸுத்தவண்ணனா

55. ச²ட்ட²ஸ்ஸ பட²மே ஸோணோதி ஸுகு²மாலஸோணத்தே²ரோ. ஸீதவனேதி ஏவம்னாமகே ஸுஸானே. தஸ்மிம் கிர படிபாடியா பஞ்ச சங்கமனபண்ணஸாலாஸதானி மாபிதானி, தேஸு தே²ரோ அத்தனோ ஸப்பாயசங்கமனம் க³ஹேத்வா ஸமணத⁴ம்மம் கரோதி. தஸ்ஸ ஆரத்³த⁴வீரியஸ்ஸ ஹுத்வா சங்கமதோ பாத³தலானி பி⁴ஜ்ஜிம்ஸு, ஜாணூஹி சங்கமதோ ஜாணுகானிபி ஹத்த²தலானிபி பி⁴ஜ்ஜிம்ஸு, சி²த்³தா³னி அஹேஸும். ஏவம் ஆரத்³த⁴வீரியோ விஹரந்தோ ஓபா⁴ஸனிமித்தமத்தகம்பி த³ஸ்ஸேதும் நாஸக்கி². தஸ்ஸ வீரியேன கிலமிதகாயஸ்ஸ கோடியம் பாஸாணப²லகே நிஸின்னஸ்ஸ யோ விதக்கோ உத³பாதி³, தம் த³ஸ்ஸேதும் அத² கோ² ஆயஸ்மதோதிஆதி³ வுத்தம். தத்த² ஆரத்³த⁴வீரியாதி பரிபுண்ணபக்³க³ஹிதவீரியா. ந அனுபாதா³ய ஆஸவேஹி சித்தம் விமுச்சதீதி ஸசே ஹி அஹம் உக்³க⁴டிதஞ்ஞூ வா அஸ்ஸம் விபஞ்சிதஞ்ஞூ வா நேய்யோ வா, நூன மே சித்தம் விமுச்சேய்ய. அத்³தா⁴ பனஸ்மி பத³பரமோ, யேன மே சித்தம் ந விமுச்சதீதி ஸன்னிட்டா²னம் கத்வா ஸம்விஜ்ஜந்தி கோ² பனாதிஆதீ³னி சிந்தேஸி. தத்த² போ⁴கா³தி உபயோக³த்தே² பச்சத்தம்.

பாதுரஹோஸீதி தே²ரஸ்ஸ சித்தாசாரம் ஞத்வா ‘‘அயம் ஸோணோ அஜ்ஜ ஸீதவனே பதா⁴னபூ⁴மியம் நிஸின்னோ இமம் விதக்கம் விதக்கேதி, க³ந்த்வாஸ்ஸ விதக்கம் ஸஹோத்த²ம் க³ண்ஹித்வா வீணோபமம் கம்மட்டா²னம் கதே²ஸ்ஸாமீ’’தி பமுகே² பாகடோ அஹோஸி. பஞ்ஞத்தே ஆஸனேதி பதா⁴னிகபி⁴க்கூ² அத்தனோ வஸனட்டா²னே ஓவதி³தும் ஆக³தஸ்ஸ பு³த்³த⁴ஸ்ஸ ப⁴க³வதோ நிஸீத³னத்த²ம் யதா²லாபே⁴ன ஆஸனம் பஞ்ஞாபேத்வாவ பதா⁴னம் கரோந்தி, அஞ்ஞம் அலப⁴மானா புராணபண்ணானிபி ஸந்த²ரித்வா உபரி ஸங்கா⁴டிம் பஞ்ஞபேந்தி. தே²ரோபி ஆஸனம் பஞ்ஞாபேத்வா பதா⁴னம் அகாஸி. தம் ஸந்தா⁴ய வுத்தம் – ‘‘பஞ்ஞத்தே ஆஸனே’’தி.

தம் கிம் மஞ்ஞஸீதி ஸத்தா² ‘‘இமஸ்ஸ பி⁴க்கு²னோ அவஸேஸகம்மட்டா²னேஹி அத்தோ² நத்தி², அயம் க³ந்த⁴ப்³ப³ஸிப்பே சே²கோ சிண்ணவஸீ, அத்தனோ விஸயே கதி²யமானம் கி²ப்பமேவ ஸல்லக்கே²ஸ்ஸதீ’’தி வீணோபமம் கதே²தும் ‘‘தம் கிம் மஞ்ஞஸீ’’திஆதி³மாஹ. வீணாய தந்திஸ்ஸரே குஸலதா நாம வீணாய வாத³னகுஸலதா, ஸோ ச தத்த² குஸலோ. மாதாபிதரோ ஹிஸ்ஸ ‘‘அம்ஹாகம் புத்தோ அஞ்ஞம் ஸிப்பம் ஸிக்க²ந்தோ காயேன கிலமிஸ்ஸதி, இத³ம் பன ஸயனே நிஸின்னேனேவ ஸக்கா உக்³க³ண்ஹிது’’ந்தி க³ந்த⁴ப்³ப³ஸிப்பமேவ உக்³க³ண்ஹாபேஸும். தஸ்ஸ –

‘‘ஸத்த ஸரா தயோ கா³மா, முச்ச²னா ஏகவீஸதி;

டா²னா ஏகூனபஞ்ஞாஸ, இச்சேதே ஸரமண்ட³லா’’தி. –

ஆதி³கம் க³ந்த⁴ப்³ப³ஸிப்பம் ஸப்³ப³மேவ பகு³ணம் அஹோஸி. அச்சாயதாதி அதிஆயதா க²ரமுச்ச²னா. ஸரவதீதி ஸரஸம்பன்னா. கம்மஞ்ஞாதி கம்மக்க²மா கம்மயோக்³கா³. அதிஸிதி²லாதி மந்த³முச்ச²னா. ஸமே கு³ணே பதிட்டி²தாதி மஜ்ஜி²மே ஸரே ட²பேத்வா முச்சி²தா.

அச்சாரத்³த⁴ந்தி அதிகா³ள்ஹம். உத்³த⁴ச்சாய ஸம்வத்ததீதி உத்³த⁴தபா⁴வாய ஸம்வத்ததி. அதிலீனந்தி அதிஸிதி²லம். கோஸஜ்ஜாயாதி குஸீதபா⁴வத்தா²ய. வீரியஸமத²ம் அதி⁴ட்ட²ஹாதி வீரியஸம்பயுத்தம் ஸமத²ம் அதி⁴ட்ட²ஹ, வீரியம் ஸமதே²ன யோஜேஹீதி அத்தோ². இந்த்³ரியானஞ்ச ஸமதம் படிவிஜ்ஜா²தி ஸத்³தா⁴தீ³னம் இந்த்³ரியானம் ஸமதம் ஸமபா⁴வம் அதி⁴ட்டா²ஹி. தத்த² ஸத்³த⁴ம் பஞ்ஞாய, பஞ்ஞஞ்ச ஸத்³தா⁴ய, வீரியம் ஸமாதி⁴னா, ஸமாதி⁴ஞ்ச வீரியேன யோஜயதா இந்த்³ரியானம் ஸமதா அதி⁴ட்டி²தா நாம ஹோதி. ஸதி பன ஸப்³ப³த்தி²கா, ஸா ஸதா³ ப³லவதீயேவ வட்டதி. தஞ்ச பன தேஸம் யோஜனாவிதா⁴னம் விஸுத்³தி⁴மக்³கே³ (விஸுத்³தி⁴. 1.60-62) பகாஸிதமேவ. தத்த² ச நிமித்தம் க³ண்ஹாஹீதி தஸ்மிஞ்ச ஸமபா⁴வே ஸதி யேன ஆதா³ஸே முக²பி³ம்பே³னேவ நிமித்தேன உப்பஜ்ஜிதப்³ப³ம், தம் ஸமத²னிமித்தம் விபஸ்ஸனானிமித்தம் மக்³க³னிமித்தம் ப²லனிமித்தஞ்ச க³ண்ஹாஹி நிப்³ப³த்தேஹீதி ஏவமஸ்ஸ ஸத்தா² அரஹத்தே பக்கி²பித்வா கம்மட்டா²னம் கதே²ஸி.

தத்த² ச நிமித்தம் அக்³க³ஹேஸீதி ஸமத²னிமித்தஞ்ச விபஸ்ஸனானிமித்தஞ்ச அக்³க³ஹேஸி. ச² டா²னானீதி ச² காரணானி. அதி⁴முத்தோ ஹோதீதி படிவிஜ்ஜி²த்வா பச்சக்க²ம் கத்வா டி²தோ ஹோதி. நேக்க²ம்மாதி⁴முத்தோதிஆதி³ ஸப்³ப³ம் அரஹத்தவஸேனேவ வுத்தம். அரஹத்தஞ்ஹி ஸப்³ப³கிலேஸேஹி நிக்க²ந்தத்தா நேக்க²ம்மம், தேஹேவ பவிவித்தத்தா பவிவேகோ, ப்³யாபஜ்ஜா²பா⁴வதோ அப்³யாபஜ்ஜ²ம், தண்ஹாக்க²யந்தே உப்பன்னத்தா தண்ஹாக்க²யோ, உபாதா³னக்க²யந்தே உப்பன்னத்தா உபாதா³னக்க²யோ, ஸம்மோஹாபா⁴வதோ அஸம்மோஹோதி வுச்சதி.

கேவலம் ஸத்³தா⁴மத்தகந்தி படிவேத⁴ரஹிதம் கேவலம் படிவேத⁴பஞ்ஞாய அஸம்மிஸ்ஸகம் ஸத்³தா⁴மத்தகம். படிசயந்தி புனப்புனம் கரணேன வட்³டி⁴ம். வீதராக³த்தாதி மக்³க³படிவேதே⁴ன ராக³ஸ்ஸ விக³தத்தாயேவ நேக்க²ம்மஸங்கா²தம் அரஹத்தம் படிவிஜ்ஜி²த்வா ஸச்சி²கத்வா டி²தோ ஹோதி, ப²லஸமாபத்திவிஹாரேன விஹரதி, தன்னின்னமானஸோயேவ ச ஹோதீதி அத்தோ². ஸேஸபதே³ஸுபி ஏஸேவ நயோ.

லாப⁴ஸக்காரஸிலோகந்தி சதுபச்சயலாப⁴ஞ்ச தேஸஞ்ஞேவ ஸுகதபா⁴வஞ்ச வண்ணப⁴ணனஞ்ச. நிகாமயமானோதி இச்ச²மானோ பத்த²யமானோ. பவிவேகாதி⁴முத்தோதி பவிவேகே அதி⁴முத்தோ அரஹந்தி ஏவம் அரஹத்தம் ப்³யாகரோதீதி அத்தோ².

ஸீலப்³ப³தபராமாஸந்தி ஸீலஞ்ச வதஞ்ச பராமஸித்வா க³ஹிதம் க³ஹணமத்தம். ஸாரதோ பச்சாக³ச்ச²ந்தோதி ஸாரபா⁴வேன ஜானந்தோ. அப்³யாபஜ்ஜா²தி⁴முத்தோதி அப்³யாபஜ்ஜ²ம் அரஹத்தம் ப்³யாகரோதி. இமினாவ நயேன ஸப்³ப³ட்டா²னேஸு அத்தோ² த³ட்ட²ப்³போ³. அபிசேத்த² ‘‘நேக்க²ம்மாதி⁴முத்தோதி இமஸ்மிம்யேவ அரஹத்தம் கதி²தம், ஸேஸேஸு பஞ்சஸு நிப்³பா³ன’’ந்தி ஏகே வத³ந்தி. அபரே ‘‘அஸம்மோஹாதி⁴முத்தோதி ஏத்தே²வ நிப்³பா³னம் கதி²தம், ஸேஸேஸு அரஹத்த’’ந்தி வத³ந்தி. அயம் பனேத்த² ஸாரோ – ஸப்³பே³ஸ்வேவ தேஸு அரஹத்தம்பி நிப்³பா³னம்பி கதி²தமேவாதி.

பு⁴ஸாதி ப³லவந்தோ தி³ப்³ப³ரூபஸதி³ஸா. நேவஸ்ஸ சித்தம் பரியாதி³யந்தீதி ஏதஸ்ஸ கீ²ணாஸவஸ்ஸ சித்தம் க³ஹேத்வா டா²தும் ந ஸக்கோந்தி. கிலேஸா ஹி உப்பஜ்ஜமானா சித்தம் க³ண்ஹந்தி நாம. அமிஸ்ஸீகதந்தி கிலேஸா ஹி ஆரம்மணேன ஸத்³தி⁴ம் சித்தம் மிஸ்ஸம் கரோந்தி, தேஸம் அபா⁴வா அமிஸ்ஸீகதம். டி²தந்தி பதிட்டி²தம். ஆனேஞ்ஜப்பத்தந்தி அசலப்பத்தம். வயஞ்சஸ்ஸானுபஸ்ஸதீதி தஸ்ஸ சேஸ சித்தஸ்ஸ உப்பாத³ம்பி வயம்பி பஸ்ஸதி. பு⁴ஸா வாதவுட்டீ²தி ப³லவா வாதக்க²ந்தோ⁴. நேவ ஸம்பகம்பேய்யாதி ஏகபா⁴கே³ன சாலேதும் ந ஸக்குணேய்ய. ந ஸம்பகம்பேய்யாதி தூ²ணம் விய ஸப்³ப³பா⁴க³தோ கம்பேதும் ந ஸக்குணேய்ய. ந ஸம்பவேதே⁴ய்யாதி வேதே⁴த்வா பவேதே⁴த்வா பாதேதும் ந ஸக்குணேய்ய.

நேக்க²ம்மம் அதி⁴முத்தஸ்ஸாதி அரஹத்தம் படிவிஜ்ஜி²த்வா டி²தஸ்ஸ கீ²ணாஸவஸ்ஸ. ஸேஸபதே³ஸுபி அரஹத்தமேவ கதி²தம். உபாதா³னக்க²யஸ்ஸ சாதி உபயோக³த்தே² ஸாமிவசனம். அஸம்மோஹஞ்ச சேதஸோதி சித்தஸ்ஸ ச அஸம்மோஹம் அதி⁴முத்தஸ்ஸ. தி³ஸ்வா ஆயதனுப்பாத³ந்தி ஆயதனானம் உப்பாத³ஞ்ச வயஞ்ச தி³ஸ்வா. ஸம்மா சித்தம் விமுச்சதீதி ஸம்மா ஹேதுனா நயேன இமாய விபஸ்ஸனாபடிபத்தியா ப²லஸமாபத்திவஸேன சித்தம் விமுச்சதி, நிப்³பா³னாரம்மணே அதி⁴முச்சதி. அத² வா இமினா கீ²ணாஸவஸ்ஸ படிபதா³ கதி²தா. தஸ்ஸ ஹி ஆயதனுப்பாத³ம் தி³ஸ்வா இமாய விபஸ்ஸனாய அதி⁴க³தஸ்ஸ அரியமக்³க³ஸ்ஸானுபா⁴வேன ஸப்³ப³கிலேஸேஹி ஸம்மா சித்தம் விமுச்சதி. ஏவம் தஸ்ஸ ஸம்மா விமுத்தஸ்ஸ…பே… ந விஜ்ஜதி. தத்த² ஸந்தசித்தஸ்ஸாதி நிப்³பு³தசித்தஸ்ஸ. ஸேஸமேத்த² உத்தானத்த²மேவாதி.

2. ப²க்³கு³னஸுத்தவண்ணனா

56. து³தியே ஸமதோ⁴ஸீதி உட்டா²னாகாரம் த³ஸ்ஸேஸி. படிக்கமந்தீதி பரிஹாயந்தி. நோ அபி⁴க்கமந்தீதி ந வட்³ட⁴ந்தி. ஸீஸவேட²னம் த³தே³ய்யாதி ஸீஸம் வேடே²த்வா த³ண்ட³கேன ஸம்பரிவத்தகம் ப³ந்தே⁴ய்ய. இந்த்³ரியானி விப்பஸீதி³ம்ஸூதி தஸ்மிம் மரணஸமயே ச² இந்த்³ரியானி விப்பஸன்னானி அஹேஸும். அத்து²பபரிக்கா²யாதி அத்தா²னத்த²ம் காரணாகாரணம் உபபரிக்க²னே. அனுத்தரே உபதி⁴ஸங்க²யேதி நிப்³பா³னே. அவிமுத்தம் ஹோதீதி அரஹத்தப²லேன அதி⁴முத்தம் ஹோதி.

3. ச²ளபி⁴ஜாதிஸுத்தவண்ணனா

57. ததியே ச²ளபி⁴ஜாதியோதி ச² ஜாதியோ. தத்ரித³ந்தி தத்ராயம். லுத்³தா³தி தா³ருணா. பி⁴க்கூ² கண்டகவுத்திகாதி ஸமணா நாமேதே. ஏகஸாடகாதி ஏகேனேவ பிலோதிகக²ண்டே³ன புரதோ படிச்சா²த³னகா. அகாமகஸ்ஸ பி³லம் ஓலக்³கே³ய்யுந்தி ஸத்தே² க³ச்ச²மானே கோ³ணம்ஹி மதே கோ³மம்ஸமூலம் உப்பாத³னத்தா²ய விப⁴ஜித்வா கா²த³மானா ஏகஸ்ஸ கோ³மம்ஸம் அனிச்ச²ந்தஸ்ஸேவ கோட்டா²ஸம் கத்வா ‘‘அயஞ்ச தே கா²தி³தப்³போ³, மூலஞ்ச தா³தப்³ப³’’ந்தி தம் கோட்டா²ஸஸங்கா²தம் பி³லம் ஓலக்³கே³ய்யும், ப³லக்காரேன ஹத்தே² ட²பேய்யுந்தி அத்தோ². அகே²த்தஞ்ஞுனாதி அபி⁴ஜாதிபஞ்ஞத்தியா கே²த்தம் அஜானந்தேன. தம் ஸுணாஹீதி தம் மம பஞ்ஞத்திம் ஸுணாஹி. கண்ஹாபி⁴ஜாதிகோதி காளகஜாதிகோ. கண்ஹம் த⁴ம்மம் அபி⁴ஜாயதீதி கண்ஹஸபா⁴வோ ஹுத்வா ஜாயதி நிப்³ப³த்ததி, கண்ஹாபி⁴ஜாதியம் வா ஜாயதி. நிப்³பா³னம் அபி⁴ஜாயதீதி நிப்³பா³னம் பாபுணாதி, அரியபூ⁴மிஸங்கா²தாய வா நிப்³பா³னஜாதியா ஜாயதி.

4. ஆஸவஸுத்தவண்ணனா

58. சதுத்தே² ஸம்வரா பஹாதப்³பா³தி ஸம்வரேன பஹாதப்³பா³. ஸேஸேஸுபி ஏஸேவ நயோ. இதா⁴தி இமஸ்மிம் ஸாஸனே. படிஸங்கா²தி படிஸஞ்ஜானித்வா, பச்சவேக்கி²த்வாதி அத்தோ². யோனிஸோதி உபாயேன பதே²ன. ஏத்த² ச அஸம்வரே ஆதீ³னவபடிஸங்கா² யோனிஸோ படிஸங்கா²தி வேதி³தப்³பா³. ஸா சாயம் ‘‘வரம், பி⁴க்க²வே, தத்தாய அயோஸலாகாய ஆதி³த்தாய ஸம்பஜ்ஜலிதாய ஸஜோதிபூ⁴தாய சக்கு²ந்த்³ரியம் ஸம்பலிமட்ட²ம், ந த்வேவ சக்கு²விஞ்ஞேய்யேஸு ரூபேஸு அனுப்³யஞ்ஜனஸோ நிமித்தக்³கா³ஹோ’’திஆதி³னா ஆதி³த்தபரியாயேன (ஸம். நி. 4.235) வேதி³தப்³பா³. சக்கு²ந்த்³ரியஸம்வரஸம்வுதோ விஹரதீதி ஏத்த² சக்கு²மேவ இந்த்³ரியம் சக்கு²ந்த்³ரியம், ஸம்வரணதோ ஸம்வரோ, பித³ஹனதோ த²கனதோதி வுத்தம் ஹோதி. ஸதியா ஏதம் அதி⁴வசனம். சக்கு²ந்த்³ரியே ஸம்வரோ சக்கு²ந்த்³ரியஸம்வரோ. ஜவனே உப்பஜ்ஜமானோபி ஹேஸ தஸ்மிம் த்³வாரே கிலேஸானம் உப்பத்திவாரணதோ சக்கு²ந்த்³ரியஸம்வரோதி வுச்சதி. ஸம்வுதோதி தேன ஸம்வரேன உபேதோ. ததா² ஹி ‘‘பாதிமோக்க²ஸம்வரஸம்வுதோ’’தி இமஸ்ஸ விப⁴ங்கே³ ‘‘இமினா பாதிமோக்க²ஸம்வரேன உபேதோ ஹோதி…பே… ஸமன்னாக³தோ’’தி வுத்தம். அத² வா ஸம்வரீதி ஸம்வுதோ, த²கேஸி பித³ஹீதி வுத்தம் ஹோதி. சக்கு²ந்த்³ரியஸம்வரஸம்வுதோதி சக்கு²ந்த்³ரியஸம்வரஸங்கா²தம் ஸதிகவாடம் சக்கு²த்³வாரே க⁴ரத்³வாரே கவாடம் விய ஸம்வரி த²கேஸி பித³ஹீதி வுத்தம் ஹோதி. அயமேவேத்த² அத்தோ² ஸுந்த³ரதரோ. ததா² ஹி ‘‘சக்கு²ந்த்³ரியஸம்வரம் அஸம்வுதஸ்ஸ விஹரதோ, ஸம்வுதஸ்ஸ விஹரதோ’’தி ஏதேஸு பதே³ஸு அயமேவத்தோ² தி³ஸ்ஸதீதி.

யம் ஹிஸ்ஸாதிஆதி³ம்ஹி யம் சக்கு²ந்த்³ரியஸம்வரம் அஸ்ஸ பி⁴க்கு²னோ அஸம்வுதஸ்ஸ அத²கேத்வா அபித³ஹித்வா விஹரந்தஸ்ஸாதி அத்தோ². யேகாரஸ்ஸ வா ஏஸ யந்தி ஆதே³ஸோ, யே அஸ்ஸாதி அத்தோ². ஆஸவா விகா⁴தபரிளாஹாதி சத்தாரோ ஆஸவா ச அஞ்ஞே ச விகா⁴தகரா கிலேஸபரிளாஹா விபாகபரிளாஹா வா. சக்கு²த்³வாரஸ்மிஞ்ஹி இட்டா²ரம்மணம் ஆபாத²க³தம் காமஸ்ஸாத³வஸேன அஸ்ஸாத³யதோ அபி⁴னந்த³தோ காமாஸவோ உப்பஜ்ஜதி, ‘‘ஈதி³ஸம் அஞ்ஞஸ்மிம்பி ஸுக³திப⁴வே லபி⁴ஸ்ஸாமீ’’தி ப⁴வபத்த²னாய அஸ்ஸாத³யதோ ப⁴வாஸவோ உப்பஜ்ஜதி, ஸத்தோதி வா ஸத்தஸ்ஸாதி வா க³ண்ஹதோ தி³ட்டா²ஸவோ உப்பஜ்ஜதி, ஸப்³பே³ஹேவ ஸஹஜாதம் அஞ்ஞாணம் அவிஜ்ஜாஸவோதி சத்தாரோ ஆஸவா உப்பஜ்ஜந்தி. ஏதேஹி ஸம்பயுத்தா அபரே கிலேஸா விகா⁴தபரிளாஹா ஆயதிம் வா தேஸம் விபாகா தேஹிபி அஸம்வுதஸ்ஸேவ விஹரதோ உப்பஜ்ஜேய்யுந்தி வுச்சந்தி. ஏவம்ஸ தேதி ஏவம் அஸ்ஸ தே, ஏதேனுபாயேன ந ஹோந்தி, நோ அஞ்ஞதா²தி வுத்தம் ஹோதி. படிஸங்கா² யோனிஸோ ஸோதிந்த்³ரியஸம்வரஸம்வுதோதிஆதீ³ஸுபி ஏஸேவ நயோ. இமே வுச்சந்தி ஆஸவா ஸம்வரா பஹாதப்³பா³தி இமேஸு ச²ஸு த்³வாரேஸு சத்தாரோ சத்தாரோ கத்வா சதுவீஸதி ஆஸவா ஸம்வரேன பஹாதப்³பா³தி வுச்சந்தி.

படிஸங்கா² யோனிஸோ சீவரந்திஆதீ³ஸு யம் வத்தப்³ப³ம், தம் ஸப்³ப³ம் விஸுத்³தி⁴மக்³கே³ (விஸுத்³தி⁴. 1.18) ஸீலகதா²ய வுத்தமேவ. யம் ஹிஸ்ஸாதி யஞ்ஹி சீவரம் பிண்ட³பாதாதீ³ஸு வா அஞ்ஞதரம் அஸ்ஸ. அப்படிஸேவதோதி ஏவம் யோனிஸோ அப்படிஸேவந்தஸ்ஸ. இமஸ்மிம் வாரே அலத்³த⁴ம் சீவராதி³ம் பத்த²யதோ லத்³த⁴ம் வா அஸ்ஸாத³யதோ காமாஸவஸ்ஸ உப்பத்தி வேதி³தப்³பா³, ஈதி³ஸம் அஞ்ஞஸ்மிம்பி ஸுக³திப⁴வே லபி⁴ஸ்ஸாமீதி ப⁴வபத்த²னாய அஸ்ஸாத³யதோ ப⁴வாஸவஸ்ஸ, அஹம் லபா⁴மி ந லபா⁴மீதி வா மய்ஹம் வா இத³ந்தி அத்தஸஞ்ஞம் அதி⁴ட்ட²ஹதோ தி³ட்டா²ஸவஸ்ஸ, ஸப்³பே³ஹேவ பன ஸஹஜாதோ அவிஜ்ஜாஸவோதி ஏவம் சதுன்னம் ஆஸவானம் உப்பத்தி விகா⁴தபரிளாஹாவ நவவேத³னுப்பாத³னதோபி வேதி³தப்³பா³. இமே வுச்சந்தி, பி⁴க்க²வே, ஆஸவா படிஸேவனா பஹாதப்³பா³தி இமே ஏகமேகஸ்மிம் பச்சயே சத்தாரோ சத்தாரோ கத்வா ஸோளஸ ஆஸவா இமினா ஞாணஸம்வரஸங்கா²தேன பச்சவேக்க²ணபடிஸேவனேன பஹாதப்³பா³தி வுச்சந்தி.

படிஸங்கா² யோனிஸோ க²மோ ஹோதி ஸீதஸ்ஸாதி உபாயேன பதே²ன பச்சவேக்கி²த்வா க²ந்தா ஹோதி ஸீதஸ்ஸ, ஸீதம் க²மதி ஸஹதி, ந அவீரபுரிஸோ விய அப்பமத்தகேனபி ஸீதேன சலதி கம்பதி கம்மட்டா²னம் விஜஹதி. உண்ஹாதீ³ஸுபி ஏஸேவ நயோ. ஏத்த² ச வசனமேவ வசனபதோ²தி வேதி³தப்³போ³. து³க்கா²னந்திஆதீ³ஸு து³க்க²மனட்டே²ன து³க்கா², ப³ஹலட்டே²ன திப்³பா³, ப²ருஸட்டே²ன க²ரா, திகி²ணட்டே²ன கடுகா, அஸ்ஸாத³விரஹதோ அஸாதா, மனம் அவட்³ட⁴னதோ அமனாபா, பாணஹரணஸமத்த²தாய பாணஹராதி வேதி³தப்³பா³. யம் ஹிஸ்ஸாதி ஸீதாதீ³ஸு யம்கிஞ்சி ஏகத⁴ம்மம்பி அஸ்ஸ. அனதி⁴வாஸதோதி அனதி⁴வாஸேந்தஸ்ஸ அக்க²மந்தஸ்ஸ. ஆஸவுப்பத்தி பனேத்த² ஏவம் வேதி³தப்³பா³ – ஸீதேன பு²ட்ட²ஸ்ஸ உண்ஹம் பத்த²யதோ காமாஸவோ உப்பஜ்ஜதி, ஏவம் ஸப்³ப³த்த². ‘‘நத்தி² ஸுக³திப⁴வே ஸீதம் வா உண்ஹம் வா’’தி ப⁴வம் பத்தே²ந்தஸ்ஸ ப⁴வாஸவோ, மய்ஹம் ஸீதம் உண்ஹந்தி கா³ஹோ தி³ட்டா²ஸவோ, ஸப்³பே³ஹேவ ஸம்பயுத்தோ அவிஜ்ஜாஸவோதி. இமே வுச்சந்தீதி இமே ஸீதாதீ³ஸு ஏகமேகஸ்ஸ வஸேன சத்தாரோ சத்தாரோ கத்வா அனேகே ஆஸவா இமாய க²ந்திஸம்வரஸங்கா²தாய அதி⁴வாஸனாய பஹாதப்³பா³தி வுச்சந்தீதி அத்தோ².

படிஸங்கா² யோனிஸோ சண்ட³ம் ஹத்தி²ம் பரிவஜ்ஜேதீதி அஹம் ஸமணோதி ந சண்ட³ஸ்ஸ ஹத்தி²ஸ்ஸ ஆஸன்னே டா²தப்³ப³ம். ததோனிதா³னஞ்ஹி மரணம்பி மரணமத்தம்பி து³க்க²ம் ப⁴வேய்யாதி ஏவம் உபாயேன பதே²ன பச்சவேக்கி²த்வா சண்ட³ம் ஹத்தி²ம் பரிவஜ்ஜேதி படிக்கமதி. ஏஸ நயோ ஸப்³ப³த்த². சண்ட³ந்தி து³ட்ட²ம் வாளம். கா²ணுந்தி க²தி³ரகா²ணுகாதி³ம். கண்டகட்டா²னந்தி யத்த² கண்டகா விஜ்ஜ²ந்தி, தம் ஓகாஸம். ஸோப்³ப⁴ந்தி ஸப்³ப³தோ சி²ன்னதடம். பபாதந்தி ஏகதோ சி²ன்னதடம். சந்த³னிகந்தி உச்சி²ட்டோ²த³கக³ப்³ப⁴மலாதீ³னம் ச²ட்³ட³னட்டா²னம். ஓளிக³ல்லந்தி தேஸம்யேவ கத்³த³மாதீ³னம் ஸந்த³னோகாஸம். தம் ஜண்ணுமத்தம்பி அஸுசிப⁴ரிதம் ஹோதி. த்³வேபி சேதானி டா²னானி அமனுஸ்ஸுஸ்ஸத³ட்டா²னானி ஹோந்தி, தஸ்மா வஜ்ஜேதப்³பா³னி. அனாஸனேதி ஏத்த² அயுத்தம் ஆஸனம் அனாஸனம், தம் அத்த²தோ அனியதவத்து²பூ⁴தம் ரஹோபடிச்ச²ன்னாஸனந்தி வேதி³தப்³ப³ம். அகோ³சரேதி ஏத்த²பி அயுத்தோ கோ³சரோ அகோ³சரோ. ஸோ வேஸியாதி³பே⁴த³தோ பஞ்சவிதோ⁴. பாபகே மித்தேதி லாமகே து³ஸ்ஸீலே மித்தபதிரூபகே அமித்தே. பாபகேஸூதி லாமகேஸு. ஓகப்பேய்யுந்தி ஸத்³த³ஹேய்யும் அதி⁴முச்சேய்யும் ‘‘அத்³தா⁴ அயமாயஸ்மா அகாஸி வா கரிஸ்ஸதி வா’’தி. யம் ஹிஸ்ஸாதி ஹத்தி²ஆதீ³ஸு யம்கிஞ்சி ஏகம்பி அஸ்ஸ. ஆஸவுப்பத்தி பனேத்த² ஏவம் வேதி³தப்³பா³ – ஹத்தி²ஆதி³னிதா³னேன து³க்கே²ன பு²ட்ட²ஸ்ஸ ஸுக²ம் பத்த²யதோ காமாஸவோ உப்பஜ்ஜதி, ‘‘நத்தி² ஸுக³திப⁴வே ஈதி³ஸம் து³க்க²’’ந்தி ப⁴வம் பத்தே²ந்தஸ்ஸ ப⁴வாஸவோ, மம் ஹத்தீ² மத்³த³தி மம் அஸ்ஸோதி கா³ஹோ தி³ட்டா²ஸவோ, ஸப்³பே³ஹேவ ஸம்பயுத்தோ அவிஜ்ஜாஸவோதி. இமே வுச்சந்தீதி இமே ஹத்தி²ஆதீ³ஸு ஏகேகஸ்ஸ வஸேன சத்தாரோ சத்தாரோ கத்வா அனேகே ஆஸவா இமினா ஸீலஸம்வரஸங்கா²தேன பரிவஜ்ஜனேன பஹாதப்³பா³தி வுச்சந்தி.

படிஸங்கா² யோனிஸோ உப்பன்னம் காமவிதக்கம் நாதி⁴வாஸேதீதி ‘‘இதிபாயம் விதக்கோ அகுஸலோ, இதிபி ஸாவஜ்ஜோ, இதிபி து³க்க²விபாகோ, ஸோ ச கோ² அத்தப்³யாபா³தா⁴ய ஸம்வத்ததீ’’திஆதி³னா (ம. நி. 1.207-208) நயேன யோனிஸோ காமவிதக்கே ஆதீ³னவம் பச்சவேக்கி²த்வா தஸ்மிம் தஸ்மிம் ஆரம்மணே உப்பன்னம் காமவிதக்கம் நாதி⁴வாஸேதி, சித்தம் ஆரோபேத்வா ந வாஸேதி, அப்³ப⁴ந்தரே வா ந வாஸேதீதி அத்தோ². அனதி⁴வாஸேந்தோ கிம் கரோதீதி? பஜஹதி. கிம் கசவரம் விய பிடகேனாதி? ந ஹி, அபி ச கோ² நம் வினோதே³தி துத³தி விஜ்ஜ²தி நீஹரதி. கிம் ப³லிப³த்³த³ம் விய பதோதே³னாதி? ந ஹி, அத² கோ² நம் ப்³யந்தீகரோதி விக³தந்தம் கரோதி, யதா²ஸ்ஸ அந்தோபி நாவஸிஸ்ஸதி அந்தமஸோ ப⁴ங்க³மத்தம்பி, ததா² நம் கரோதி. கத²ம் பன நம் ததா² கரோதீதி? அனபா⁴வம் க³மேதி அனு அனு அபா⁴வம் க³மேதி, விக்க²ம்ப⁴னப்பஹானேன யதா² ஸுவிக்க²ம்பி⁴தோ ஹோதி, ததா² கரோதி. ஸேஸவிதக்கத்³வயேபி ஏஸேவ நயோ. உப்பன்னுப்பன்னேதி உப்பன்னே உப்பன்னே, உப்பன்னமத்தேயேவாதி வுத்தம் ஹோதி. ஸகிம் வா உப்பன்னே வினோதே³த்வா து³தியே வாரே அஜ்ஜு²பேக்கி²தா ந ஹோதி, ஸதக்க²த்தும்பி உப்பன்னே உப்பன்னே வினோதே³தியேவ. பாபகே அகுஸலே த⁴ம்மேதி தேயேவ காமவிதக்காத³யோ, ஸப்³பே³பி வா நவ மஹாவிதக்கே. தத்த² தயோ வுத்தா, அவஸேஸா ‘‘ஞாதிவிதக்கோ, ஜனபத³விதக்கோ, அமராவிதக்கோ, பரானுத்³த³யதாபடிஸம்யுத்தோ விதக்கோ, லாப⁴ஸக்காரஸிலோகப்படிஸம்யுத்தோ விதக்கோ, அனவஞ்ஞத்திப்படிஸம்யுத்தோ விதக்கோ’’தி (மஹானி. 207) இமே ச². யம் ஹிஸ்ஸாதி ஏதேஸு விதக்கேஸு யம்கிஞ்சி அஸ்ஸ. காமவிதக்கோ பனேத்த² காமாஸவோ ஏவ, தப்³பி³ஸேஸோ ப⁴வாஸவோ, தம்ஸம்பயுத்தோ தி³ட்டா²ஸவோ, ஸப்³ப³விதக்கேஸு அவிஜ்ஜா அவிஜ்ஜாஸவோதி ஏவம் ஆஸவுப்பத்தி வேதி³தப்³பா³. இமே வுச்சந்தீதி இமே காமவிதக்காதி³வஸேன வுத்தப்பகாரா ஆஸவா இமினா தஸ்மிம் தஸ்மிம் விதக்கே ஆதீ³னவபச்சவேக்க²ணஸஹிதேன வீரியஸம்வரஸங்கா²தேன வினோத³னேன பஹாதப்³பா³தி வுச்சந்தி.

படிஸங்கா² யோனிஸோ ஸதிஸம்போ³ஜ்ஜ²ங்க³ம் பா⁴வேதீதி அபா⁴வனாய ஆதீ³னவம் பா⁴வனாய ச ஆனிஸம்ஸம் உபாயேன பதே²ன பச்சவேக்கி²த்வா ஸதிஸம்போ³ஜ்ஜ²ங்க³ம் பா⁴வேதி. ஏஸேவ நயோ ஸப்³ப³த்த². போ³ஜ்ஜ²ங்கா³னம் பா⁴வனா ஹேட்டா² வித்தா²ரிதாவ. யம் ஹிஸ்ஸாதி ஏதேஸு போ³ஜ்ஜ²ங்கே³ஸு யம்கிஞ்சி அஸ்ஸ. ஆஸவுப்பத்தியம் பனேத்த² இமேஸம் அரியமக்³க³ஸம்பயுத்தானம் போ³ஜ்ஜ²ங்கா³னம் அபா⁴விதத்தா யே உப்பஜ்ஜேய்யும் காமாஸவாத³யோ ஆஸவா, பா⁴வயதோ ஏவம்ஸ தே ந ஹோந்தீதி அயம் நயோ வேதி³தப்³போ³. இமே வுச்சந்தீதி இமே காமாஸவாத³யோ ஆஸவா இமாய லோகுத்தராய போ³ஜ்ஜ²ங்க³பா⁴வனாய பஹாதப்³பா³தி வுச்சந்தி. இமேஹி ச²ஹாகாரேஹி பஹீனாஸவம் பி⁴க்கு²ம் தோ²மேந்தோ யதோ கோ², பி⁴க்க²வேதிஆதி³மாஹ. தத்த² யதோதி ஸாமிவசனே தோ-காரோ, யஸ்ஸாதி வுத்தம் ஹோதி. போராணா பன யம்ஹி காலேதி வண்ணயந்தி. யே ஆஸவா ஸம்வரா பஹாதப்³பா³, தே ஸம்வரா பஹீனா ஹோந்தீதி யே ஆஸவா ஸம்வரேன பஹாதப்³பா³, தே ஸம்வரேனேவ பஹீனா ஹோந்தி, ந அப்பஹீனேஸுயேவ பஹீனஸஞ்ஞீ ஹோதீதி.

5. தா³ருகம்மிகஸுத்தவண்ணனா

59. பஞ்சமே தா³ருகம்மிகோதி தா³ருவிக்கயேன பவத்திதாஜீவோ ஏகோ உபாஸகோ. காஸிகசந்த³னந்தி ஸண்ஹசந்த³னம். அங்கே³னாதி அகு³ணங்கே³ன, ஸுக்கபக்கே² கு³ணங்கே³ன. நேமந்தனிகோதி நிமந்தனம் க³ண்ஹனகோ. ஸங்கே⁴ தா³னம் த³ஸ்ஸாமீதி பி⁴க்கு²ஸங்க⁴ஸ்ஸ த³ஸ்ஸாமி. ஸோ ஏவம் வத்வா ஸத்தா²ரம் அபி⁴வாதே³த்வா பக்காமி. அத²ஸ்ஸ அபரபா⁴கே³ பஞ்சஸதா குலூபகா பி⁴க்கூ² கி³ஹிபா⁴வம் பாபுணிம்ஸு. ஸோ ‘‘குலூபகபி⁴க்கூ² தே விப்³ப⁴ந்தா’’தி வுத்தே ‘‘கிம் ஏத்த² மய்ஹ’’ந்தி வத்வா சித்துப்பாத³வேமத்தமத்தம்பி ந அகாஸி. இத³ம் ஸந்தா⁴ய ஸத்தா² ஸங்கே⁴ தே தா³னம் த³த³தோ சித்தம் பஸீதி³ஸ்ஸதீதி ஆஹ.

6. ஹத்தி²ஸாரிபுத்தஸுத்தவண்ணனா

60. ச²ட்டே² அபி⁴த⁴ம்மகத²ந்தி அபி⁴த⁴ம்மமிஸ்ஸகம் கத²ம். கத²ம் ஓபாதேதீதி தேஸம் கத²ம் விச்சி²ந்தி³த்வா அத்தனோ கத²ம் கதே²தி. தே²ரானம் பி⁴க்கூ²னந்தி கரணத்தே² ஸாமிவசனம், தே²ரேஹி பி⁴க்கூ²ஹி ஸத்³தி⁴ந்தி அத்தோ². யா ச தே²ரானம் அபி⁴த⁴ம்மகதா², தம் அயம்பி கதே²தும் ஸக்கோதீதி அத்தோ². சேதோபரியாயந்தி சித்தவாரம். இதா⁴தி இமஸ்மிம் லோகே. ஸோரதஸோரதோதி ஸூரதோ விய ஸூரதோ, ஸோரச்சஸமன்னாக³தோ வியாதி அத்தோ². நிவாதனிவாதோதி நிவாதோ விய நிவாதோ, நிவாதவுத்தி வியாதி அத்தோ². உபஸந்துபஸந்தோதி உபஸந்தோ விய உபஸந்தோ. வபகஸ்ஸதேவ ஸத்தா²ராதி ஸத்து² ஸந்திகா அபக³ச்ச²தி. ஸம்ஸட்ட²ஸ்ஸாதி பஞ்சஹி ஸம்ஸக்³கே³ஹி ஸம்ஸட்ட²ஸ்ஸ. விஸ்ஸட்ட²ஸ்ஸாதி விஸ்ஸஜ்ஜிதஸ்ஸ. பாகதஸ்ஸாதி பாகதிந்த்³ரியஸ்ஸ.

கிட்டா²தோ³தி கிட்ட²கா²த³கோ. அந்தரதா⁴பேய்யாதி நாஸேய்ய. கோ³பஸூதி கா³வோ ச அஜிகா ச. ஸிப்பிஸம்பு³கந்தி ஸிப்பியோ ச ஸம்பு³கா ச. ஸக்க²ரகட²லந்தி ஸக்க²ரா ச கட²லானி ச. ஆபி⁴தோ³ஸிகந்தி அபி⁴ஞ்ஞாததோ³ஸம் குத்³ரூஸகபோ⁴ஜனம். நச்சா²தே³ய்யாதி ந ருச்சேய்ய. தத்த² யதே³தம் புரிஸம் பு⁴த்தாவிந்தி உபயோக³வசனம், தம் ஸாமிஅத்தே² த³ட்ட²ப்³ப³ம். அமும் ஹாவுஸோ, புரிஸந்தி, ஆவுஸோ, அமும் புரிஸம்.

ஸப்³ப³னிமித்தானந்தி ஸப்³பே³ஸம் நிச்சனிமித்தாதீ³னம் நிமித்தானம். அனிமித்தம் சேதோஸமாதி⁴ந்தி ப³லவவிபஸ்ஸனாஸமாதி⁴ம். சீரிகஸத்³தோ³தி ஜ²ல்லிகஸத்³தோ³. ஸரிஸ்ஸதி நேக்க²ம்மஸ்ஸாதி பப்³ப³ஜ்ஜாய கு³ணம் ஸரிஸ்ஸதி. அரஹதம் அஹோஸீதி ப⁴க³வதோ ஸாவகானம் அரஹந்தானம் அந்தரே ஏகோ அரஹா அஹோஸி. அயஞ்ஹி தே²ரோ ஸத்த வாரே கி³ஹீ ஹுத்வா ஸத்த வாரே பப்³ப³ஜி. கிம் காரணா? கஸ்ஸபஸம்மாஸம்பு³த்³த⁴காலே கிரேஸ ஏகஸ்ஸ பி⁴க்கு²னோ கி³ஹிபா⁴வே வண்ணம் கதே²ஸி. ஸோ தேனேவ கம்மேன அரஹத்தஸ்ஸ உபனிஸ்ஸயே விஜ்ஜமானேயேவ ஸத்த வாரே கி³ஹிபா⁴வே ச பப்³ப³ஜ்ஜாய ச ஸஞ்சரந்தோ ஸத்தமே வாரே பப்³ப³ஜித்வா அரஹத்தம் பாபுணீதி.

7. மஜ்ஜே²ஸுத்தவண்ணனா

61. ஸத்தமே பாராயனே மேத்தேய்யபஞ்ஹேதி பாராயனஸமாக³மம்ஹி மேத்தேய்யமாணவஸ்ஸ பஞ்ஹே. உபோ⁴ந்தே விதி³த்வானாதி த்³வே அந்தே த்³வே கோட்டா²ஸே ஜானித்வா. மஜ்ஜே² மந்தா ந லிப்பதீதி மந்தா வுச்சதி பஞ்ஞா, தாய உபோ⁴ அந்தே விதி³த்வா மஜ்ஜே² ந லிப்பதி, வேமஜ்ஜே²ட்டா²னே ந லிப்பதி. ஸிப்³ப³னிமச்சகா³தி ஸிப்³ப³னிஸங்கா²தம் தண்ஹம் அதீதோ. ப²ஸ்ஸோதி ப²ஸ்ஸவஸேன நிப்³ப³த்தத்தா அயம் அத்தபா⁴வோ. ஏகோ அந்தோதி அயமேகோ கோட்டா²ஸோ. ப²ஸ்ஸஸமுத³யோதி ப²ஸ்ஸோ ஸமுத³யோ அஸ்ஸாதி ப²ஸ்ஸஸமுத³யோ, இமஸ்மிம் அத்தபா⁴வே கதகம்மப²ஸ்ஸபச்சயா நிப்³ப³த்தோ அனாக³தத்தபா⁴வோ. து³தியோ அந்தோதி து³தியோ கோட்டா²ஸோ. ப²ஸ்ஸனிரோதோ⁴தி நிப்³பா³னம். மஜ்ஜே²தி ஸிப்³பி³னிதண்ஹம் சே²த்வா த்³விதா⁴கரணட்டே²ன நிப்³பா³னம் மஜ்ஜே² நாம ஹோதி. தண்ஹா ஹி நம் ஸிப்³ப³தீதி தண்ஹா நம் அத்தபா⁴வத்³வயஸங்கா²தம் ப²ஸ்ஸஞ்ச ப²ஸ்ஸஸமுத³யஞ்ச ஸிப்³ப³தி க⁴ட்டேதி. கிம் காரணா? தஸ்ஸ தஸ்ஸேவ ப⁴வஸ்ஸ அபி⁴னிப்³ப³த்தியா. யதி³ ஹி தண்ஹா ந ஸிப்³பே³ய்ய, தஸ்ஸ தஸ்ஸ ப⁴வஸ்ஸ நிப்³ப³த்தி ந ப⁴வேய்ய. இமஸ்மிம் டா²னே கோடிமஜ்ஜி²கூபமம் க³ண்ஹந்தி. த்³வின்னஞ்ஹி கண்டா³னம் ஏகதோ கத்வா மஜ்ஜே² ஸுத்தேன ஸம்ஸிப்³பி³தானம் கோடி மஜ்ஜ²ந்தி வுச்சதி. ஸுத்தே சி²ன்னே உபோ⁴ கண்டா³னி உப⁴தோ பதந்தி. ஏவமேத்த² கண்ட³த்³வயம் விய வுத்தப்பகாரா த்³வே அந்தா, ஸிப்³பி³த்வா டி²தஸுத்தம் விய தண்ஹா, ஸுத்தே சி²ன்னே கண்ட³த்³வயஸ்ஸ உப⁴தோபதனம் விய தண்ஹாய நிருத்³தா⁴ய அந்தத்³வயம் நிருத்³த⁴மேவ ஹோதி. ஏத்தாவதாதி ஏத்தகேன இமினா உபோ⁴ அந்தே விதி³த்வா தண்ஹாய மஜ்ஜே² அனுபலித்தபா⁴வேன அபி⁴ஞ்ஞேய்யம் சதுஸச்சத⁴ம்மம் அபி⁴ஜானாதி நாம, தீரணபரிஞ்ஞாய ச பஹானபரிஞ்ஞாய ச பரிஜானிதப்³ப³ம் லோகியஸச்சத்³வயம் பரிஜானாதி நாம. தி³ட்டே²வ த⁴ம்மேதி இமஸ்மிம்யேவ அத்தபா⁴வே. து³க்க²ஸ்ஸந்தகரோ ஹோதீதி வட்டது³க்க²ஸ்ஸ கோடிகரோ பரிச்சே²த³பரிவடுமகரோ ஹோதி நாம.

து³தியவாரே திண்ணம் கண்டா³னம் வஸேன உபமா வேதி³தப்³பா³. திண்ணஞ்ஹி கண்டா³னம் ஸுத்தேன ஸம்ஸிப்³பி³தானம் ஸுத்தே சி²ன்னே தீணி கண்டா³னி தீஸு டா²னேஸு பதந்தி, ஏவமேத்த² கண்ட³த்தயம் விய அதீதானாக³தபச்சுப்பன்னா க²ந்தா⁴, ஸுத்தம் விய தண்ஹா. ஸா ஹி அதீதம் பச்சுப்பன்னேன, பச்சுப்பன்னஞ்ச அனாக³தேன ஸத்³தி⁴ம் ஸம்ஸிப்³ப³தி. ஸுத்தே சி²ன்னே கண்ட³த்தயஸ்ஸ தீஸு டா²னேஸு பதனம் விய தண்ஹாய நிருத்³தா⁴ய அதீதானாக³தபச்சுப்பன்னா க²ந்தா⁴ நிருத்³தா⁴வ ஹோந்தி.

ததியவாரே அது³க்க²மஸுகா² மஜ்ஜே²தி த்³வின்னம் வேத³னானம் அந்தரட்ட²கபா⁴வேன மஜ்ஜே². ஸுக²ஞ்ஹி து³க்க²ஸ்ஸ, து³க்க²ம் வா ஸுக²ஸ்ஸ அந்தரம் நாம நத்தி². தண்ஹா ஸிப்³பி³னீதி வேத³னாஸு நந்தி³ராகோ³ வேத³னானம் உபச்சே²த³ம் நிவாரேதீதி தா ஸிப்³ப³தி நாம.

சதுத்த²வாரே விஞ்ஞாணம் மஜ்ஜே²தி படிஸந்தி⁴விஞ்ஞாணம்பி ஸேஸவிஞ்ஞாணம்பி நாமரூபபச்சயஸமுதா³க³தத்தா நாமரூபானம் மஜ்ஜே² நாம.

பஞ்சமவாரே விஞ்ஞாணம் மஜ்ஜே²தி கம்மவிஞ்ஞாணம் மஜ்ஜே², அஜ்ஜ²த்திகாயதனேஸு வா மனாயதனேன கம்மஸ்ஸ க³ஹிதத்தா இத⁴ யம்கிஞ்சி விஞ்ஞாணம் மஜ்ஜே² நாம, மனோத்³வாரே வா ஆவஜ்ஜனஸ்ஸ அஜ்ஜ²த்திகாயதனனிஸ்ஸிதத்தா ஜவனவிஞ்ஞாணம் மஜ்ஜே² நாம.

ச²ட்ட²வாரே ஸக்காயோதி தேபூ⁴மகவட்டம். ஸக்காயஸமுத³யோதி ஸமுத³யஸச்சம். ஸக்காயனிரோதோ⁴தி நிரோத⁴ஸச்சம். பரியாயேனாதி தேன தேன காரணேனேவ. ஸேஸம் ஸப்³ப³த்த² வுத்தனயேனேவ வேதி³தப்³ப³ம்.

8. புரிஸிந்த்³ரியஞாணஸுத்தவண்ணனா

62. அட்ட²மே அஞ்ஞதரோதி தே³வத³த்தபக்கி²கோ ஏகோ. ஸமன்னாஹரித்வாதி ஆவஜ்ஜித்வா. இத³ம் ஸோ ‘‘கிம் நு கோ² ப⁴க³வதா ஜானித்வா கதி²தம், உதா³ஹு அஜானித்வா, ஏகம்ஸிகம் வா கதி²தம் உதா³ஹு விப⁴ஜ்ஜகதி²த’’ந்தி அதி⁴ப்பாயேன புச்ச²தி. ஆபாயிகோதி அபாயே நிப்³ப³த்தனகோ. நேரயிகோதி நிரயகா³மீ. கப்பட்டோ²தி கப்பட்டி²யகம்மஸ்ஸ கதத்தா கப்பம் ட²ஸ்ஸதி. அதேகிச்சோ²தி ந ஸக்கா திகிச்சி²தும். த்³வேஜ்ஜ²ந்தி த்³விதா⁴பா⁴வம். வாலக்³க³கோடினித்துத³னமத்தந்தி வாலஸ்ஸ அக்³க³கோடியா த³ஸ்ஸேதப்³ப³மத்தகம், வாலக்³க³கோடினிபாதமத்தகம் வா. புரிஸிந்த்³ரியஞாணானீதி புரிஸபுக்³க³லானம் இந்த்³ரியபரோபரியத்தஞாணானி, இந்த்³ரியானம் திக்க²முது³பா⁴வஜானனஞாணானீதி அத்தோ².

விஜ்ஜமானா குஸலாபி த⁴ம்மா அகுஸலாபி த⁴ம்மாதி ஏத்தகா குஸலா த⁴ம்மா விஜ்ஜந்தி, ஏத்தகா அகுஸலா த⁴ம்மாதி ஜானாமி. அந்தரஹிதாதி அத³ஸ்ஸனம் க³தா. ஸம்முகீ²பூ⁴தாதி ஸமுதா³சாரவஸேன பாகடா ஜாதா. குஸலமூலந்தி குஸலஜ்ஜா²ஸயோ. குஸலா குஸலந்தி தம்ஹா குஸலஜ்ஜா²ஸயா அஞ்ஞம்பி குஸலம் நிப்³ப³த்திஸ்ஸதி. ஸாரதா³னீதி ஸாராதா³னி க³ஹிதஸாரானி, ஸரத³மாஸே வா நிப்³ப³த்தானி. ஸுக²ஸயிதானீதி ஸுக²ஸன்னிசிதானி. ஸுகே²த்தேதி மண்ட³கே²த்தே. நிக்கி²த்தானீதி வுத்தானி. ஸப்படிபா⁴கா³தி ஸரிக்க²கா. அபி⁴தோ³ அத்³த⁴ரத்தந்தி அபி⁴அத்³த⁴ரத்தம் அத்³த⁴ரத்தே அபி⁴முகீ²பூ⁴தே. ப⁴த்தகாலஸமயேதி ராஜகுலானம் ப⁴த்தகாலஸங்கா²தே ஸமயே. பரிஹானத⁴ம்மோதி கோ ஏவம் ப⁴க³வதா ஞாதோதி? அஜாதஸத்துராஜா. ஸோ ஹி பாபமித்தம் நிஸ்ஸாய மக்³க³ப²லேஹி பரிஹீனோ. அபரேபி ஸுப்பபு³த்³த⁴ஸுனக்க²த்தாத³யோ ப⁴க³வதா ஞாதாவ. அபரிஹானத⁴ம்மோதி ஏவம் ப⁴க³வதா கோ ஞாதோ? ஸுஸீமோ பரிப்³பா³ஜகோ அஞ்ஞே ச ஏவரூபா. பரினிப்³பா³யிஸ்ஸதீதி ஏவம் கோ ஞாதோ ப⁴க³வதாதி? ஸந்ததிமஹாமத்தோ அஞ்ஞே ச ஏவரூபா.

9. நிப்³பே³தி⁴கஸுத்தவண்ணனா

63. நவமே அனிப்³பி³த்³த⁴புப்³பே³ அப்பதா³லிதபுப்³பே³ லோப⁴க்க²ந்தா⁴த³யோ நிப்³பி³ஜ்ஜ²தி பதா³லேதீதி நிப்³பே³தி⁴கபரியாயோ, நிப்³பி³ஜ்ஜ²னகாரணந்தி அத்தோ². நிதா³னஸம்ப⁴வோதி காமே நிதே³தி உப்பாத³னஸமத்த²தாய நிய்யாதே³தீதி நிதா³னம். ஸம்ப⁴வதி ததோதி ஸம்ப⁴வோ, நிதா³னமேவ ஸம்ப⁴வோ நிதா³னஸம்ப⁴வோ. வேமத்ததாதி நானாகரணம்.

காமகு³ணாதி காமயிதப்³ப³ட்டே²ன காமா, ப³ந்த⁴னட்டே²ன கு³ணா ‘‘அந்தகு³ண’’ந்திஆதீ³ஸு விய. சக்கு²விஞ்ஞேய்யாதி சக்கு²விஞ்ஞாணேன பஸ்ஸிதப்³பா³. இட்டா²தி பரியிட்டா² வா ஹோந்து மா வா, இட்டா²ரம்மணபூ⁴தாதி அத்தோ². கந்தாதி கமனீயா. மனாபாதி மனவட்³ட⁴னகா. பியரூபாதி பியஜாதிகா. காமூபஸஞ்ஹிதாதி ஆரம்மணம் கத்வா உப்பஜ்ஜமானேன காமேன உபஸஞ்ஹிதா. ரஜனீயாதி ராகு³ப்பத்திகாரணபூ⁴தா. நேதே காமாதி ந ஏதே கமனட்டே²ன காமா நாம ஹோந்தி. ஸங்கப்பராகோ³தி ஸங்கப்பவஸேன உப்பன்னராகோ³. காமோதி அயம் காமப்பஹானாய படிபன்னேஹி பஹாதப்³போ³. கமனட்டே²ன காமா நாம. சித்ரானீதி சித்ரவிசித்ராரம்மணானி.

ப²ஸ்ஸோதி ஸஹஜாதப²ஸ்ஸோ. காமயமானோதி காமம் காமயமானோ. தஜ்ஜம் தஜ்ஜந்தி தஜ்ஜாதிகம் தஜ்ஜாதிகம். புஞ்ஞபா⁴கி³யந்தி தி³ப்³பே³ காமே பத்தே²த்வா ஸுசரிதபாரிபூரியா தே³வலோகே நிப்³ப³த்தஸ்ஸ அத்தபா⁴வோ புஞ்ஞபா⁴கி³யோ நாம, து³ச்சரிதபாரிபூரியா அபாயே நிப்³ப³த்தஸ்ஸ அத்தபா⁴வோ அபுஞ்ஞபா⁴கி³யோ நாம. அயம் வுச்சதி, பி⁴க்க²வே, காமானம் விபாகோதி அயம் து³விதோ⁴பி காமபத்த²னம் நிஸ்ஸாய உப்பன்னத்தா காமானம் விபாகோதி வுச்சதி. ஸோ இமம் நிப்³பே³தி⁴கந்தி ஸோ பி⁴க்கு² இமம் ச²த்திம்ஸட்டா²னேஸு நிப்³பி³ஜ்ஜ²னகம் ஸேட்ட²சரியம் ஜானாதி. காமனிரோத⁴ந்தி காமானம் நிரோத⁴னே ஏவம் லத்³த⁴னாமம். இமஸ்மிஞ்ஹி டா²னே ப்³ரஹ்மசரியஸங்கா²தோ மக்³கோ³வ காமனிரோதோ⁴தி வுத்தோ.

ஸாமிஸாதி கிலேஸாமிஸஸம்பயுத்தா. இமினா நயேன ஸப்³ப³டா²னேஸு அத்தோ² வேதி³தப்³போ³. அபிசேத்த² வோஹாரவேபக்கந்தி வோஹாரவிபாகம். கதா²ஸங்கா²தோ ஹி வோஹாரோ ஸஞ்ஞாய விபாகோ நாம. யதா² யதா² நந்தி ஏத்த² நம்-இதி நிபாதமத்தமேவ. இதி யஸ்மா யதா² யதா² ஸஞ்ஜானாதி, ததா² ததா² ஏவம்ஸஞ்ஞீ அஹோஸிந்தி கதே²தி, தஸ்மா வோஹாரவேபக்காதி அத்தோ².

அவிஜ்ஜாதி அட்ட²ஸு டா²னேஸு அஞ்ஞாணபூ⁴தா ப³ஹலஅவிஜ்ஜா. நிரயம் க³மேந்தீதி நிரயக³மனீயா, நிரயே நிப்³ப³த்திபச்சயாதி அத்தோ². ஸேஸேஸுபி ஏஸேவ நயோ. சேதனாஹந்தி சேதனம் அஹம். இத⁴ ஸப்³ப³ஸங்கா³ஹிகா ஸம்வித³ஹனசேதனா க³ஹிதா. சேதயித்வாதி த்³வாரப்பவத்தசேதனா. மனஸாதி சேதனாஸம்பயுத்தசித்தேன. நிரயவேத³னீயந்தி நிரயே விபாகதா³யகம். ஸேஸேஸுபி ஏஸேவ நயோ. அதி⁴மத்தந்தி ப³லவது³க்க²ம். த³ந்த⁴விராகீ³தி க³ருகம் ந கி²ப்பம் ஸணிகம் விக³ச்ச²னகது³க்க²ம். உரத்தாளிம் கந்த³தீதி உரம் தாளேத்வா ரோத³தி. பரியேட்டி²ந்தி பரியேஸனம். ஏகபத³ம் த்³விபத³ந்தி ஏகபத³மந்தம் வா த்³விபத³மந்தம் வா, கோ மந்தம் ஜானாதீதி அத்தோ². ஸம்மோஹவேபக்கந்தி ஸம்மோஹவிபாகம். து³க்க²ஸ்ஸ ஹி ஸம்மோஹோ நிஸ்ஸந்த³விபாகோ நாம. து³தியபதே³பி ஏஸேவ நயோ. பரியேஸனாபி ஹி தஸ்ஸ நிஸ்ஸந்த³விபாகோதி. இமஸ்மிம் ஸுத்தே வட்டவிவட்டம் கதி²தம்.

10. ஸீஹனாத³ஸுத்தவண்ணனா

64. த³ஸமே ஆஸப⁴ம் டா²னந்தி ஸேட்ட²ம் நிச்சலட்டா²னம். ஸீஹனாத³ந்தி அபீ⁴தனாத³ம் பமுக²னாத³ம். ப்³ரஹ்மசக்கந்தி ஸேட்ட²ஞாணசக்கம் படிவேத⁴ஞாணஞ்சேவ தே³ஸனாஞாணஞ்ச. டா²னஞ்ச டா²னதோதி காரணஞ்ச காரணதோ. யம்பீதி யேன ஞாணேன. இத³ம்பி ததா²க³தஸ்ஸாதி இத³ம்பி டா²னாட்டா²னஞாணம் ததா²க³தஸ்ஸ ததா²க³தப³லம் நாம ஹோதி. ஏவம் ஸப்³ப³பதே³ஸு அத்தோ² வேதி³தப்³போ³. கம்மஸமாதா³னானந்தி ஸமாதி³யித்வா கதானம் குஸலாகுஸலகம்மானம், கம்மமேவ வா கம்மஸமாதா³னம். டா²னஸோ ஹேதுஸோதி பச்சயதோ சேவ ஹேதுதோ ச. தத்த² க³திஉபதி⁴காலபயோகா³ விபாகஸ்ஸ டா²னம், கம்மம் ஹேது. ஜா²னவிமோக்க²ஸமாதி⁴ஸமாபத்தீனந்தி சதுன்னம் ஜா²னானம் அட்ட²ன்னம் விமோக்கா²னம் திண்ணம் ஸமாதீ⁴னம் நவன்னம் அனுபுப்³ப³ஸமாபத்தீனஞ்ச. ஸம்கிலேஸந்தி ஹானபா⁴கி³யம் த⁴ம்மம். வோதா³னந்தி விஸேஸபா⁴கி³யம் த⁴ம்மம். வுட்டா²னந்தி ‘‘வோதா³னம்பி வுட்டா²னம், தம்ஹா தம்ஹா ஸமாதி⁴ம்ஹா வுட்டா²னம்பி வுட்டா²ன’’ந்தி (விப⁴. 828) ஏவம் வுத்தம் பகு³ணஜ்ஜா²னஞ்சேவ ப⁴வங்க³னப²லஸமாபத்தியோ ச. ஹேட்டி²மம் ஹேட்டி²மஞ்ஹி பகு³ணஜ்ஜா²னம் உபரிமஸ்ஸ உபரிமஸ்ஸ பத³ட்டா²னம் ஹோதி, தஸ்மா ‘‘வோதா³னம்பி வுட்டா²ன’’ந்தி வுத்தம். ப⁴வங்கே³ன பன ஸப்³ப³ஜ்ஜா²னேஹி வுட்டா²னம் ஹோதி, ப²லஸமாபத்தியா நிரோத⁴ஸமாபத்திதோ வுட்டா²னம் ஹோதி. தம் ஸந்தா⁴ய ‘‘தம்ஹா தம்ஹா ஸமாதி⁴ம்ஹா வுட்டா²னம்பி வுட்டா²ன’’ந்தி வுத்தம். அனேகவிஹிதந்திஆதீ³னி விஸுத்³தி⁴மக்³கே³ (விஸுத்³தி⁴. 2.402) வண்ணிதானி. ஆஸவக்க²யஞாணம் ஹேட்டா² வுத்தத்த²மேவ. புரிமஸ்ஸாபி ஞாணத்தயஸ்ஸ வித்தா²ரகத²ம் இச்ச²ந்தேன மஜ்ஜி²மட்ட²கதா²ய மஹாஸீஹனாத³வண்ணனா (ம. நி. அட்ட². 1.146 ஆத³யோ) ஓலோகேதப்³பா³. ஸமாஹிதஸ்ஸாதி ஏகக்³க³சித்தஸ்ஸ. ஸமாதி⁴ மக்³கோ³தி ஸமாதி⁴ ஏதேஸம் ஞாணானம் அதி⁴க³மாய உபாயோ. அஸமாதீ⁴தி அனேகக்³க³பா⁴வோ. கும்மக்³கோ³தி மிச்சா²மக்³கோ³. இமஸ்மிம் ஸுத்தே ததா²க³தஸ்ஸ ஞாணப³லம் கதி²தந்தி.

மஹாவக்³கோ³ ச²ட்டோ².