4. மஹாமோக்³க³ல்லானஸுத்தவண்ணனா

34. சதுத்தே² திஸ்ஸோ நாம பி⁴க்கூ²தி தே²ரஸ்ஸேவ ஸத்³தி⁴விஹாரிகோ. மஹித்³தி⁴கோ மஹானுபா⁴வோதி இஜ்ஜ²னட்டே²ன மஹதீ இத்³தி⁴ அஸ்ஸாதி மஹித்³தி⁴கோ. அனுப²ரணட்டே²ன மஹா ஆனுபா⁴வோ அஸ்ஸாதி மஹானுபா⁴வோ. சிரஸ்ஸம் கோ², மாரிஸ மோக்³க³ல்லான, இமம் பரியாயமகாஸீதி ஏவரூபம் லோகே பகதியா பியஸமுதா³ஹாரவசனம் ஹோதி. லோகியா ஹி சிரஸ்ஸம் ஆக³தம்பி அனாக³தபுப்³ப³ம்பி மனாபஜாதியம் ஆக³தம் தி³ஸ்வா ‘‘குதோ ப⁴வம் ஆக³தோ, சிரஸ்ஸம் ப⁴வம் ஆக³தோ, கத²ம் தே இதா⁴க³மனமக்³கோ³ ஞாதோ, கிம் மக்³க³மூள்ஹோஸீ’’திஆதீ³னி வத³ந்தி. அயம் பன ஆக³தபுப்³ப³த்தாயேவ ஏவமாஹ. தே²ரோ ஹி காலேன காலம் ப்³ரஹ்மலோகம் க³ச்ச²தியேவ. தத்த² பரியாயமகாஸீதி வாரம் அகாஸி. யதி³த³ம் இதா⁴க³மனாயாதி யோ அயம் இதா⁴க³மனாய வாரோ, தம் சிரஸ்ஸம் அகாஸீதி வுத்தம் ஹோதி. இத³மாஸனம் பஞ்ஞத்தந்தி மஹாரஹம் ப்³ரஹ்மபல்லங்கம் பஞ்ஞாபேத்வா ஏவமாஹ. அவேச்சப்பஸாதே³னாதி அதி⁴க³தேன அசலேன மக்³க³ப்பஸாதே³ன. இமஸ்மிம் ஸுத்தே ஸோதாபத்திமக்³க³ஞாணம் கதி²தம்.