3. அனுத்தரியவக்³கோ³

1-2. ஸாமகஸுத்தாதி³வண்ணனா

21-22. ததியஸ்ஸ பட²மே ஸாமகா³மகேதி ஸாமகானம் உஸ்ஸன்னத்தா ஏவம்லத்³த⁴னாமே கா³மகே. போக்க²ரணியாயந்தி போக்க²ரணியானாமகே விஹாரே. அபி⁴க்கந்தாய ரத்தியாதி ரத்தியா பட²மயாமம் அதிக்கம்ம மஜ்ஜி²மயாமே ஸம்பத்தே. அபி⁴க்கந்தவண்ணாதி அபி⁴க்கந்தஅதிமனாபவண்ணா. கேவலகப்பந்தி ஸகலகப்பம். போக்க²ரணியம் ஓபா⁴ஸேத்வாதி போக்க²ரணியானாமகம் மஹாவிஹாரம் அத்தனோ ஓபா⁴ஸேன ப²ரித்வா. ஸமனுஞ்ஞோதி ஸமானஅனுஞ்ஞோ ஸமானசித்தோ. தோ³வசஸ்ஸதாதி து³ப்³ப³சபா⁴வோ. பாபமித்ததாதி லாமகமித்ததா. இமஸ்மிம் ஸுத்தே பரிஹானியத⁴ம்மாவ கதி²தா. து³தியே அபரிஹானியத⁴ம்மா லோகுத்தரமிஸ்ஸகா கதி²தா.

3. ப⁴யஸுத்தவண்ணனா

23. ததியே காமராக³ரத்தாயந்தி காமராக³ரத்தோ அயம். ச²ந்த³ராக³வினிப³த்³தோ⁴தி ச²ந்த³ராகே³ன வினிப³த்³தோ⁴. ப⁴யாதி சித்துத்ராஸப⁴யா. பங்காதி கிலேஸபங்கதோ. ஸங்கோ³ பங்கோ ச உப⁴யந்தி ஸங்கோ³ ச பங்கோ ச இத³ம்பி உப⁴யம். ஏதே காமா பவுச்சந்தி, யத்த² ஸத்தோ புது²ஜ்ஜனோதி யஸ்மிம் ஸங்கே³ ச பங்கே ச புது²ஜ்ஜனோ ஸத்தோ லக்³கோ³ லக்³கி³தோ பலிபு³த்³தோ⁴. உபாதா³னேதி சதுப்³பி³தே⁴ உபாதா³னே. ஜாதிமரணஸம்ப⁴வேதி ஜாதியா ச மரணஸ்ஸ ச ஸம்ப⁴வே பச்சயபூ⁴தே. அனுபாதா³ விமுச்சந்தீதி அனுபாதி³யித்வா விமுச்சந்தி. ஜாதிமரணஸங்க²யேதி ஜாதிமரணானம் ஸங்க²யஸங்கா²தே நிப்³பா³னே, நிப்³பா³னாரம்மணாய விமுத்தியா விமுச்சந்தீதி அத்தோ². இமஸ்மிம் டா²னே விவட்டேத்வா அரஹத்தமேவ பத்தோ ஏஸ பி⁴க்கு². இதா³னி தம் கீ²ணாஸவம் தோ²மேந்தோ தே கே²மப்பத்தாதிஆதி³மாஹ. தத்த² கே²மப்பத்தாதி கே²மபா⁴வம் பத்தா. ஸுகி²னோதி லோகுத்தரஸுகே²ன ஸுகி²தா. தி³ட்ட²த⁴ம்மாபி⁴னிப்³பு³தாதி அப்³ப⁴ந்தரே கிலேஸாபா⁴வேன தி³ட்ட²த⁴ம்மேயேவ அபி⁴னிப்³பு³தா. இமஸ்மிம் ஸுத்தே வட்டமேவ கதே²த்வா கா³தா²ஸு வட்டவிவடம் கதி²தம்.

4. ஹிமவந்தஸுத்தவண்ணனா

24. சதுத்தே² பதா³லேய்யாதி பி⁴ந்தே³ய்ய. ச²வாயாதி லாமிகாய. ஸமாதி⁴ஸ்ஸ ஸமாபத்திகுஸலோ ஹோதீதி ஆஹாரஸப்பாயஉதுஸப்பாயானி பரிக்³க³ஹேத்வா ஸமாதி⁴ம் ஸமாபஜ்ஜிதும் குஸலோ ஹோதி சே²கோ ஸமத்தோ² படிப³லோ. ஸமாதி⁴ஸ்ஸ டி²திகுஸலோதி ஸமாதி⁴ஸ்ஸ டி²தியம் குஸலோ, ஸமாதி⁴ம் ட²பேதும் ஸக்கோதீதி அத்தோ². ஸமாதி⁴ஸ்ஸ வுட்டா²னகுஸலோதி ஸமாதி⁴ஸ்ஸ வுட்டா²னே குஸலோ, யதா²பரிச்சே²தே³ன வுட்டா²தும் ஸக்கோதீதி அத்தோ². ஸமாதி⁴ஸ்ஸ கல்லிதகுஸலோதி ஸமாதி⁴ஸ்ஸ கல்லதாய குஸலோ, ஸமாதி⁴சித்தம் ஹாஸேதும் கல்லம் காதும் ஸக்கோதீதி அத்தோ². ஸமாதி⁴ஸ்ஸ கோ³சரகுஸலோதி ஸமாதி⁴ஸ்ஸ அஸப்பாயே அனுபகாரகே த⁴ம்மே வஜ்ஜேத்வா ஸப்பாயே உபகாரகே ஸேவந்தோபி, ‘‘அயம் ஸமாதி⁴னிமித்தாரம்மணோ அயம் லக்க²ணாரம்மணோ’’தி ஜானந்தோபி ஸமாதி⁴ஸ்ஸ கோ³சரகுஸலோ நாம ஹோதி. ஸமாதி⁴ஸ்ஸ அபி⁴னீஹாரகுஸலோதி உபரிஉபரிஸமாபத்திஸமாபஜ்ஜனத்தா²ய பட²மஜ்ஜா²னாதி³ஸமாதி⁴ம் அபி⁴னீஹரிதும் ஸக்கோந்தோ ஸமாதி⁴ஸ்ஸ அபி⁴னீஹாரகுஸலோ நாம ஹோதி. ஸோ பட²மஜ்ஜா²னா வுட்டா²ய து³தியம் ஸமாபஜ்ஜதி, து³தியஜ்ஜா²னா…பே… ததியஜ்ஜா²னா வுட்டா²ய சதுத்த²ம் ஸமாபஜ்ஜதீதி.

5. அனுஸ்ஸதிட்டா²னஸுத்தவண்ணனா

25. பஞ்சமே அனுஸ்ஸதிட்டா²னானீதி அனுஸ்ஸதிகாரணானி. இதிபி ஸோ ப⁴க³வாதிஆதீ³னி விஸுத்³தி⁴மக்³கே³ (விஸுத்³தி⁴. 1.123 ஆத³யோ) வித்தா²ரிதானேவ. இத³ம்பி கோ², பி⁴க்க²வே, ஆரம்மணம் கரித்வாதி இத³ம் பு³த்³தா⁴னுஸ்ஸதிகம்மட்டா²னம் ஆரம்மணம் கரித்வா. விஸுஜ்ஜ²ந்தீதி பரமவிஸுத்³தி⁴ம் நிப்³பா³னம் பாபுணந்தி. ஸேஸம் ஸப்³ப³த்த² உத்தானத்த²மேவ. இமஸ்மிம் பன ஸுத்தே ச² அனுஸ்ஸதிட்டா²னானி மிஸ்ஸகானி கதி²தானீதி வேதி³தப்³பா³னி.

6. மஹாகச்சானஸுத்தவண்ணனா

26. ச²ட்டே² ஸம்பா³தே⁴தி பஞ்சகாமகு³ணஸம்பா³தே⁴. ஓகாஸாதி⁴க³மோதி ஏத்த² ஓகாஸா வுச்சந்தி ச² அனுஸ்ஸதிட்டா²னானி, தேஸம் அதி⁴க³மோ. விஸுத்³தி⁴யாதி விஸுஜ்ஜ²னத்தா²ய. ஸோகபரிதே³வானம் ஸமதிக்கமாயாதி ஸோகானஞ்ச பரிதே³வானஞ்ச ஸமதிக்கமத்தா²ய. அத்த²ங்க³மாயாதி அத்த²ம் க³மனத்தா²ய. ஞாயஸ்ஸ அதி⁴க³மாயாதி ஸஹவிபஸ்ஸனகஸ்ஸ மக்³க³ஸ்ஸ அதி⁴க³மனத்தா²ய. நிப்³பா³னஸ்ஸ ஸச்சி²கிரியாயாதி அபச்சயபரினிப்³பா³னஸ்ஸ பச்சக்க²கிரியத்தா²ய.

ஸப்³ப³ஸோதி ஸப்³பா³காரேன. ஆகாஸஸமேனாதி அலக்³க³னட்டே²ன சேவ அபலிபு³த்³த⁴ட்டே²ன ச ஆகாஸஸதி³ஸேன. விபுலேனாதி ந பரித்தகேன. மஹக்³க³தேனாதி மஹந்தபா⁴வம் க³தேன, மஹந்தேஹி வா அரியஸாவகேஹி க³தேன, படிபன்னேனாதி அத்தோ². அப்பமாணேனாதி ப²ரணஅப்பமாணதாய அப்பமாணேன. அவேரேனாதி அகுஸலவேரபுக்³க³லவேரரஹிதேன. அப்³யாபஜ்ஜே²னாதி கோத⁴து³க்க²வஜ்ஜிதேன. ஸப்³ப³மேதம் பு³த்³தா⁴னுஸ்ஸதிசித்தமேவ ஸந்தா⁴ய வுத்தம். பரதோபி ஏஸேவ நயோ. விஸுத்³தி⁴த⁴ம்மாதி விஸுஜ்ஜ²னஸபா⁴வா. இமஸ்மிம்பி ஸுத்தே ச² அனுஸ்ஸதிட்டா²னானி மிஸ்ஸகானேவ கதி²தானீதி.

7. பட²மஸமயஸுத்தவண்ணனா

27. ஸத்தமே மனோபா⁴வனீயஸ்ஸாதி ஏத்த² மனம் பா⁴வேதி வட்³டே⁴தீதி மனோபா⁴வனீயோ. த³ஸ்ஸனாயாதி த³ஸ்ஸனத்த²ம். நிஸ்ஸரணந்தி நிக்³க³மனம் வூபஸமனம். த⁴ம்மம் தே³ஸேதீதி காமராக³ப்பஜஹனத்தா²ய அஸுப⁴கம்மட்டா²னம் கதே²தி. து³தியவாராதீ³ஸு ப்³யாபாத³ப்பஹானாய மேத்தாகம்மட்டா²னம், தி²னமித்³த⁴ப்பஹானாய தி²னமித்³த⁴வினோத³னகம்மட்டா²னம், ஆலோகஸஞ்ஞம் வா வீரியாரம்ப⁴வத்து²ஆதீ³னம் வா அஞ்ஞதரம், உத்³த⁴ச்சகுக்குச்சப்பஹானாய ஸமத²கம்மட்டா²னம், விசிகிச்சா²பஹானாய திண்ணம் ரதனானம் கு³ணகத²ம் கதே²ந்தோ த⁴ம்மம் தே³ஸேதீதி வேதி³தப்³போ³. ஆக³ம்மாதி ஆரப்³ப⁴. மனஸிகரோதோதி ஆரம்மணவஸேன சித்தே கரோந்தஸ்ஸ. அனந்தரா ஆஸவானம் க²யோ ஹோதீதி அனந்தராயேன ஆஸவானம் க²யோ ஹோதி.

8. து³தியஸமயஸுத்தவண்ணனா

28. அட்ட²மே மண்ட³லமாளேதி போ⁴ஜனஸாலாய. சாரித்தகிலமதோ²தி பிண்ட³பாதசரியாய உப்பன்னகிலமதோ². ப⁴த்தகிலமதோ²தி ப⁴த்தத³ரதோ². விஹாரபச்சா²யாயந்தி விஹாரபச்சந்தே சா²யாய. யதே³வஸ்ஸ தி³வா ஸமாதி⁴னிமித்தம் மனஸிகதம் ஹோதீதி யம் ஏவ தஸ்ஸ ததோ புரிமதி³வஸபா⁴கே³ ஸமத²னிமித்தம் சித்தே கதம் ஹோதி. ததே³வஸ்ஸ தஸ்மிம் ஸமயே ஸமுதா³சரதீதி தம்யேவ ஏதஸ்ஸ தஸ்மிம் ஸமயே தி³வாவிஹாரே நிஸின்னஸ்ஸ மனோத்³வாரே ஸஞ்சரதி. ஓஜட்டா²யீதி ஓஜாய டி²தோ பதிட்டி²தோ. பா²ஸுகஸ்ஸ ஹோதீதி பா²ஸுகம் அஸ்ஸ ஹோதி. ஸம்முகா²தி கதே²ந்தஸ்ஸ ஸம்முக²ட்டா²னே. ஸுதந்தி ஸோதேன ஸுதம். படிக்³க³ஹிதந்தி சித்தேன படிக்³க³ஹிதம்.

9. உதா³யீஸுத்தவண்ணனா

29. நவமே உதா³யிந்தி லாளுதா³யித்தே²ரம். ஸுணோமஹம், ஆவுஸோதி, ஆவுஸோ, நாஹம் ப³தி⁴ரோ, ஸுணாமி ப⁴க³வதோ வசனம், பஞ்ஹம் பன உபபரிக்கா²மீதி. அதி⁴சித்தந்தி ஸமாதி⁴விபஸ்ஸனாசித்தம். இத³ம், ப⁴ந்தே, அனுஸ்ஸதிட்டா²னந்தி இத³ம் ஜா²னத்தயஸங்கா²தம் அனுஸ்ஸதிகாரணம். தி³ட்ட²த⁴ம்மஸுக²விஹாராய ஸம்வத்ததீதி இமஸ்மிம்யேவ அத்தபா⁴வே ஸுக²விஹாரத்தா²ய பவத்ததி. ஆலோகஸஞ்ஞந்தி ஆலோகனிமித்தே உப்பன்னஸஞ்ஞம். தி³வா ஸஞ்ஞம் அதி⁴ட்டா²தீதி தி³வாதி ஸஞ்ஞம் ட²பேதி. யதா² தி³வா ததா² ரத்திந்தி யதா²னேன தி³வா ஆலோகஸஞ்ஞா மனஸிகதா, ரத்திம்பி ததே²வ தம் மனஸி கரோதி. யதா² ரத்திம் ததா² தி³வாதி யதா² வானேன ரத்திம் ஆலோகஸஞ்ஞா மனஸிகதா, தி³வாபி தம் ததே²வ மனஸி கரோதி. விவடேனாதி பாகடேன. அபரியோனத்³தே⁴னாதி நீவரணேஹி அனோனத்³தே⁴ன. ஸப்பபா⁴ஸம் சித்தம் பா⁴வேதீதி தி³ப்³ப³சக்கு²ஞாணத்தா²ய ஸஹோபா⁴ஸகம் சித்தம் ப்³ரூஹேதி வட்³டே⁴தி. யம் பன ‘‘ஆலோகஸஞ்ஞம் மனஸி கரோதீ’’தி வுத்தம், தம் தி²னமித்³த⁴வினோத³னாலோகஸஞ்ஞம் ஸந்தா⁴ய வுத்தம், ந தி³ப்³ப³சக்கு²ஞாணாலோகந்தி வேதி³தப்³ப³ம். ஞாணத³ஸ்ஸனப்படிலாபா⁴யாதி தி³ப்³ப³சக்கு²ஸங்கா²தஸ்ஸ ஞாணத³ஸ்ஸனஸ்ஸ படிலாபா⁴ய.

இமமேவ காயந்திஆதீ³ஸு யம் வத்தப்³ப³ம் ஸியா, தம் ஸப்³ப³ம் ஸப்³பா³காரேன வித்தா²ரதோ விஸுத்³தி⁴மக்³கே³ காயக³தாஸதிகம்மட்டா²னே வுத்தம். காமராக³ப்பஹானாயாதி பஞ்சகாமகு³ணிகஸ்ஸ ராக³ஸ்ஸ பஹானத்தா²ய. ஸேய்யதா²பி பஸ்ஸேய்யாதி யதா² பஸ்ஸேய்ய. ஸரீரந்தி மதஸரீரம். ஸிவதி²காய ச²ட்³டி³தந்தி ஸுஸானே அபவித்³த⁴ம். ஏகாஹம் மதஸ்ஸ அஸ்ஸாதி ஏகாஹமதம். த்³வீஹம் மதஸ்ஸ அஸ்ஸாதி த்³வீஹமதம். தீஹம் மதஸ்ஸ அஸ்ஸாதி தீஹமதம். ப⁴ஸ்தா விய வாயுனா உத்³த⁴ம் ஜீவிதபரியாதா³னா யதா²னுக்கமம் ஸமுக்³க³தேன ஸூனபா⁴வேன து⁴மாதத்தா உத்³து⁴மாதம், உத்³து⁴மாதமேவ உத்³து⁴மாதகம். படிகூலத்தா வா குச்சி²தம் உத்³து⁴மாதந்தி உத்³து⁴மாதகம். வினீலம் வுச்சதி விபரிபி⁴ன்னவண்ணம், வினீலமேவ வினீலகம். படிகூலத்தா வா குச்சி²தம் வினீலந்தி வினீலகம். மம்ஸுஸ்ஸத³ட்டா²னேஸு ரத்தவண்ணஸ்ஸ புப்³ப³ஸன்னிசயட்டா²னேஸு ஸேதவண்ணஸ்ஸ யேபு⁴ய்யேன ச நீலவண்ணஸ்ஸ நீலட்டா²னே நீலஸாடகபாருதஸ்ஸேவ ச²வஸரீரஸ்ஸேதம் அதி⁴வசனம். பரிபி⁴ன்னட்டா²னேஹி நவஹி வா வணமுகே²ஹி விஸ்ஸந்த³மானம் புப்³ப³ம் விபுப்³ப³ம், விபுப்³ப³மேவ விபுப்³ப³கம். படிகூலத்தா வா குச்சி²தம் விபுப்³ப³ந்தி விபுப்³ப³கம். விபுப்³ப³கம் ஜாதம் ததா²பா⁴வம் க³தந்தி விபுப்³ப³கஜாதம்.

ஸோ இமமேவ காயந்தி ஸோ பி⁴க்கு² இமம் அத்தனோ காயம் தேன காயேன ஸத்³தி⁴ம் ஞாணேன உபஸம்ஹரதி உபனேதி. கத²ம்? அயம்பி கோ² காயோ ஏவம்த⁴ம்மோ ஏவம்பா⁴வீ ஏவம்அனதீதோதி. இத³ம் வுத்தம் ஹோதி – ஆயு உஸ்மா விஞ்ஞாணந்தி இமேஸம் திண்ணம் த⁴ம்மானம் அத்தி²தாய அயம் காயோ டா²னக³மனாதி³க²மோ ஹோதி, இமேஸம் பன விக³மா அயம்பி ஏவம்த⁴ம்மோ ஏவம்பூதிகஸபா⁴வோயேவாதி. ஏவம்பா⁴வீதி ஏவமேவம் உத்³து⁴மாதாதி³பே⁴தோ³ ப⁴விஸ்ஸதி. ஏவம் அனதீதோதி ஏவம் உத்³து⁴மாதாதி³பா⁴வம் அனதிக்கந்தோ.

க²ஜ்ஜமானந்தி உத³ராதீ³ஸு நிஸீதி³த்வா உத³ரமம்ஸஓட்ட²மம்ஸஅக்கி²கமம்ஸாதீ³னி லுஞ்சித்வா லுஞ்சித்வா கா²தி³யமானம். ஸமம்ஸலோஹிதந்தி ஸேஸாவஸேஸமம்ஸலோஹிதயுத்தம். நிம்மம்ஸலோஹிதமக்கி²தந்தி மம்ஸே கீ²ணேபி லோஹிதம் ந ஸுஸ்ஸதி, தம் ஸந்தா⁴ய வுத்தம் – ‘‘நிம்மம்ஸலோஹிதமக்கி²த’’ந்தி. அஞ்ஞேனாதி அஞ்ஞேன தி³ஸாபா⁴கே³ன. ஹத்த²ட்டி²கந்தி சதுஸட்டி²பே⁴த³ம்பி ஹத்த²ட்டி²கம் பாடியேக்கம் பாடியேக்கம் விப்பகிண்ணம். பாத³ட்டி²காதீ³ஸுபி ஏஸேவ நயோ. தேரோவஸ்ஸிகானீதி அதிக்கந்தஸம்வச்ச²ரானி. பூதீனீதி அப்³போ⁴காஸே டி²தானி வாதாதபவுட்டி²ஸம்ப²ஸ்ஸேன தேரோவஸ்ஸிகானேவ பூதீனி ஹோந்தி, அந்தோபூ⁴மிக³தானி பன சிரதரம் திட்ட²ந்தி. சுண்ணகஜாதானீதி சுண்ணவிசுண்ணம் ஹுத்வா விப்பகிண்ணானி. ஸப்³ப³த்த² ஸோ இமமேவாதி வுத்தனயேன க²ஜ்ஜமானாதீ³னம் வஸேன யோஜனா காதப்³பா³. அஸ்மிமானஸமுக்³கா⁴தாயாதி அஸ்மீதி பவத்தஸ்ஸ நவவித⁴ஸ்ஸ மானஸ்ஸ ஸமுக்³கா⁴தத்தா²ய. அனேகதா⁴துபடிவேதா⁴யாதி அனேகதா⁴தூனம் படிவிஜ்ஜ²னத்தா²ய. ஸதோவ அபி⁴க்கமதீதி க³ச்ச²ந்தோ ஸதிபஞ்ஞாஹி ஸமன்னாக³தோவ க³ச்ச²தி. ஸதோவ படிக்கமதீதி படினிவத்தந்தோபி ஸதிபஞ்ஞாஹி ஸமன்னாக³தோவ நிவத்ததி. ஸேஸபதே³ஸுபி ஏஸேவ நயோ. ஸதிஸம்பஜஞ்ஞாயாதி ஸதியா ச ஞாணஸ்ஸ ச அத்தா²ய. இதி இமஸ்மிம் ஸுத்தே ஸதிஞாணானி மிஸ்ஸகானி கதி²தானீதி.

10. அனுத்தரியஸுத்தவண்ணனா

30. த³ஸமே உச்சாவசந்தி யம் கிஞ்சி மஹந்தகு²த்³த³கம், உச்சனீசம் வா. ஹீனந்தி நிஹீனம். க³ம்மந்தி கா³மவாஸிகானம் த³ஸ்ஸனம். போது²ஜ்ஜனிகந்தி புது²ஜ்ஜனானம் ஸந்தகம். அனரியந்தி ந அரியம் ந உத்தமம் ந பரிஸுத்³த⁴ம். அனத்த²ஸம்ஹிதந்தி ந அத்த²ஸன்னிஸ்ஸிதம். ந நிப்³பி³தா³யாதி ந வட்டே நிப்³பி³ந்த³னத்தா²ய. ந விராகா³யாதி ந ராகா³தீ³னம் விரஜ்ஜனத்தா²ய. ந நிரோதா⁴யாதி ந ராகா³தீ³னம் அப்பவத்தினிரோதா⁴ய. ந உபஸமாயாதி ந ராகா³தீ³னம் வூபஸமனத்தா²ய. ந அபி⁴ஞ்ஞாயாதி ந அபி⁴ஜானனத்தா²ய. ந ஸம்போ³தா⁴யாதி ந ஸம்போ³தி⁴ஸங்கா²தஸ்ஸ சதுமக்³க³ஞாணஸ்ஸ படிவிஜ்ஜ²னத்தா²ய. ந நிப்³பா³னாயாதி ந நிப்³பா³னஸ்ஸ ஸச்சி²கிரியாய.

நிவிட்ட²ஸத்³தோ⁴தி பதிட்டி²தஸத்³தோ⁴. நிவிட்ட²பேமோதி பதிட்டி²தபேமோ. ஏகந்தக³தோதி ஏகந்தம் க³தோ, அசலப்பத்தோதி அத்தோ². அபி⁴ப்பஸன்னோதி அதிவிய பஸன்னோ. ஏததா³னுத்தரியந்தி ஏதம் அனுத்தரம். ஹத்தி²ஸ்மிம்பி ஸிக்க²தீதி ஹத்தி²னிமித்தம் ஸிக்கி²தப்³ப³ம் ஹத்தி²ஸிப்பம் ஸிக்க²தி. ஸேஸபதே³ஸுபி ஏஸேவ நயோ. உச்சாவசந்தி மஹந்தகு²த்³த³கம் ஸிப்பம் ஸிக்க²தி.

உபட்டி²தா பாரிசரியேதி பாரிசரியாய பச்சுபட்டி²தா. பா⁴வயந்தி அனுஸ்ஸதிந்தி அனுத்தரம் அனுஸ்ஸதிம் பா⁴வேந்தி. விவேகப்படிஸம்யுத்தந்தி நிப்³பா³னனிஸ்ஸிதம் கத்வா. கே²மந்தி நிருபத்³த³வம். அமதகா³மினந்தி நிப்³பா³னகா³மினம், அரியமக்³க³ம் பா⁴வேந்தீதி அத்தோ². அப்பமாதே³ பமோதி³தாதி ஸதியா அவிப்பவாஸஸங்கா²தே அப்பமாதே³ ஆமோதி³தா பமோதி³தா. நிபகாதி நேபக்கேன ஸமன்னாக³தா. ஸீலஸம்வுதாதி ஸீலேன ஸம்வுதா பிஹிதா. தே வே காலேன பச்சேந்தீதி தே வே யுத்தப்பயுத்தகாலே ஜானந்தி. யத்த² து³க்க²ம் நிருஜ்ஜ²தீதி யஸ்மிம் டா²னே ஸகலம் வட்டது³க்க²ம் நிருஜ்ஜ²தி, தம் அமதம் மஹானிப்³பா³னம் தே பி⁴க்கூ² ஜானந்தீதி. இமஸ்மிம் ஸுத்தே ச² அனுத்தரியானி மிஸ்ஸகானி கதி²தானீதி.

அனுத்தரியவக்³கோ³ ததியோ.