3. நிஸ்ஸாரணீயஸுத்தவண்ணனா

13. ததியே நிஸ்ஸாரணீயா தா⁴துயோதி நிஸ்ஸரணதா⁴துயோவ. மேத்தா ஹி கோ² மே சேதோவிமுத்தீதி ஏத்த² பச்சனீகத⁴ம்மேஹி விமுத்தத்தா திகசதுக்கஜ்ஜா²னிகா மேத்தாவ மேத்தாசேதோவிமுத்தி நாம. பா⁴விதாதி வட்³டி⁴தா. ப³ஹுலீகதாதி புனப்புனம் கதா. யானீகதாதி யுத்தயானஸதி³ஸா கதா. வத்து²கதாதி பதிட்டா² கதா. அனுட்டி²தாதி அதி⁴ட்டி²தா. பரிசிதாதி ஸமந்ததோ சிதா ஆசிதா உபசிதா. ஸுஸமாரத்³தா⁴தி ஸுப்பகு³ணகரணேன ஸுட்டு² ஸமாரத்³தா⁴. பரியாதா³ய திட்ட²தீதி பரியாதி³யித்வா க³ஹேத்வா திட்ட²தி. மா ஹேவந்திஸ்ஸ வசனீயோதி யஸ்மா அபூ⁴தப்³யாகரணம் ப்³யாகரோதி, தஸ்மா ‘‘மா ஏவம் ப⁴ணீ’’தி வத்தப்³போ³. யதி³த³ம் மேத்தாசேதோவிமுத்தீதி யா அயம் மேத்தாசேதோவிமுத்தி, இத³ம் நிஸ்ஸரணம் ப்³யாபாத³ஸ்ஸ, ப்³யாபாத³தோ நிஸ்ஸடாதி அத்தோ². யோ பன மேத்தாய திகசதுக்கஜ்ஜா²னதோ வுட்டி²தோ ஸங்கா²ரே ஸம்மஸித்வா ததியமக்³க³ம் பத்வா ‘‘புன ப்³யாபாதோ³ நத்தீ²’’தி ததியப²லேன நிப்³பா³னம் பஸ்ஸதி, தஸ்ஸ சித்தம் அச்சந்தனிஸ்ஸரணம் ப்³யாபாத³ஸ்ஸ. ஏதேனுபாயேன ஸப்³ப³த்த² அத்தோ² வேதி³தப்³போ³.

அனிமித்தாசேதோவிமுத்தீதி ப³லவவிபஸ்ஸனா. தீ³க⁴பா⁴ணகா பன அரஹத்தப²லஸமாபத்தீதி வத³ந்தி. ஸா ஹி ராக³னிமித்தாதீ³னஞ்சேவ ரூபனிமித்தாதீ³னஞ்ச நிச்சனிமித்தாதீ³னஞ்ச அபா⁴வா அனிமித்தாதி வுத்தா. நிமித்தானுஸாரீதி வுத்தப்பபே⁴த³ம் நிமித்தம் அனுஸரணஸபா⁴வம்.

அஸ்மீதி அஸ்மிமானோ. அயமஹமஸ்மீதி பஞ்சஸு க²ந்தே⁴ஸு அயம் நாம அஹம் அஸ்மீதி. ஏத்தாவதா அரஹத்தம் ப்³யாகதம் ஹோதி. விசிகிச்சா²கத²ம்கதா²ஸல்லந்தி விசிகிச்சா²பூ⁴தம் கத²ம்கதா²ஸல்லம். மா ஹேவந்திஸ்ஸ வசனீயோதி ஸசே தே பட²மமக்³க³வஜ்ஜா² விசிகிச்சா² உப்பஜ்ஜதி, அரஹத்தப்³யாகரணம் மிச்சா² ஹோதி, தஸ்மா ‘‘மா அபூ⁴தம் க³ண்ஹீ’’தி வாரேதப்³போ³. அஸ்மீதி மானஸமுக்³கா⁴தோதி அரஹத்தமக்³கோ³. அரஹத்தமக்³க³ப²லவஸேன ஹி நிப்³பா³னே தி³ட்டே² புன அஸ்மிமானோ நத்தீ²தி அரஹத்தமக்³கோ³ ‘‘அஸ்மீதி மானஸமுக்³கா⁴தோ’’தி வுத்தோ. இதி இமஸ்மிம் ஸுத்தே அபூ⁴தப்³யாகரணம் நாம கதி²தம்.