1. ஆஹுனேய்யவக்³கோ³

1. பட²மஆஹுனேய்யஸுத்தவண்ணனா

1. ச²க்கனிபாதஸ்ஸ பட²மே இத⁴, பி⁴க்க²வே, பி⁴க்கூ²தி, பி⁴க்க²வே, இமஸ்மிம் ஸாஸனே பி⁴க்கு². நேவ ஸுமனோ ஹோதி ந து³ம்மனோதி இட்டா²ரம்மணே ராக³ஸஹக³தேன ஸோமனஸ்ஸேன ஸுமனோ வா அனிட்டா²ரம்மணே தோ³ஸஸஹக³தேன தோ³மனஸ்ஸேன து³ம்மனோ வா ந ஹோதி. உபேக்க²கோ விஹரதி ஸதோ ஸம்பஜானோதி மஜ்ஜ²த்தாரம்மணே அஸமபேக்க²னேன அஞ்ஞாணுபேக்கா²ய உபேக்க²கபா⁴வம் அனாபஜ்ஜித்வா ஸதோ ஸம்பஜானோ ஹுத்வா ஆரம்மணே மஜ்ஜ²த்தோ விஹரதி. இமஸ்மிம் ஸுத்தே கீ²ணாஸவஸ்ஸ ஸததவிஹாரோ கதி²தோ.

2. து³தியஆஹுனேய்யஸுத்தவண்ணனா

2-4. து³தியே அனேகவிஹிதம் இத்³தி⁴வித⁴ந்திஆதீ³னி விஸுத்³தி⁴மக்³கே³ வுத்தானேவ. ஆஸவானம் க²யா அனாஸவந்தி ஆஸவானம் க²யேன அனாஸவம், ந சக்கு²விஞ்ஞாணாதீ³னம் விய அபா⁴வேனாதி. இமஸ்மிம் ஸுத்தே கீ²ணாஸவஸ்ஸ அபி⁴ஞ்ஞா படிபாடியா கதி²தா. ததியசதுத்தே²ஸு கீ²ணாஸவோ கதி²தோ.

5-7. ஆஜானீயஸுத்தத்தயவண்ணனா

5-7. பஞ்சமே அங்கே³ஹீதி கு³ணங்கே³ஹி. க²மோதி அதி⁴வாஸகோ. ரூபானந்தி ரூபாரம்மணானம். வண்ணஸம்பன்னோதி ஸரீரவண்ணேன ஸம்பன்னோ. ச²ட்டே² ப³லஸம்பன்னோதி காயப³லேன ஸம்பன்னோ. ஸத்தமே ஜவஸம்பன்னோதி பத³ஜவேன ஸம்பன்னோ.

8-9. அனுத்தரியஸுத்தாதி³வண்ணனா

8-9. அட்ட²மே அனுத்தரியானீதி அஞ்ஞேன உத்தரிதரேன ரஹிதானி நிருத்தரானி. த³ஸ்ஸனானுத்தரியந்தி ரூபத³ஸ்ஸனேஸு அனுத்தரம். ஏஸ நயோ ஸப்³ப³பதே³ஸு. ஹத்தி²ரதனாதீ³னஞ்ஹி த³ஸ்ஸனம் ந த³ஸ்ஸனானுத்தரியம், நிவிட்ட²ஸத்³த⁴ஸ்ஸ பன நிவிட்ட²பேமவஸேன த³ஸப³லஸ்ஸ வா பி⁴க்கு²ஸங்க⁴ஸ்ஸ வா கஸிணஅஸுப⁴னிமித்தாதீ³னம் வா அஞ்ஞதரஸ்ஸ த³ஸ்ஸனம் த³ஸ்ஸனானுத்தரியம் நாம. க²த்தியாதீ³னம் கு³ணகதா²ஸவனம் ந ஸவனானுத்தரியம், நிவிட்ட²ஸத்³த⁴ஸ்ஸ பன நிவிட்ட²பேமவஸேன திண்ணம் வா ரதனானம் கு³ணகதா²ஸவனம் தேபிடகபு³த்³த⁴வசனஸவனம் வா ஸவனானுத்தரியம் நாம. மணிரதனாதீ³னம் லாபோ⁴ ந லாபா⁴னுத்தரியம், ஸத்தவித⁴அரியத⁴னலாபோ⁴ பன லாபா⁴னுத்தரியம் நாம. ஹத்தி²ஸிப்பாதி³ஸிக்க²னம் ந ஸிக்கா²னுத்தரியம், ஸிக்கா²த்தயஸ்ஸ பூரணம் பன ஸிக்கா²னுத்தரியம் நாம. க²த்தியாதீ³னம் பாரிசரியா ந பாரிசரியானுத்தரியம், திண்ணம் பன ரதனானம் பாரிசரியா பாரிசரியானுத்தரியம் நாம. க²த்தியாதீ³னம் கு³ணானுஸ்ஸரணம் ந அனுஸ்ஸதானுத்தரியம், திண்ணம் பன ரதனானம் கு³ணானுஸ்ஸரணம் அனுஸ்ஸதானுத்தரியம் நாம. இதி இமானி ச² அனுத்தரியானி லோகியலோகுத்தரானி கதி²தானி. நவமே பு³த்³தா⁴னுஸ்ஸதீதி பு³த்³த⁴கு³ணாரம்மணா ஸதி. ஸேஸபதே³ஸுபி ஏஸேவ நயோ.

10. மஹானாமஸுத்தவண்ணனா

10. த³ஸமே மஹானாமோதி த³ஸப³லஸ்ஸ சூளபிது புத்தோ ஏகோ ஸக்யராஜா. யேன ப⁴க³வா தேனுபஸங்கமீதி பு⁴த்தபாதராஸோ ஹுத்வா தா³ஸபரிஜனபரிவுதோ க³ந்த⁴மாலாதீ³னி கா³ஹாபேத்வா யத்த² ஸத்தா², தத்த² அக³மாஸி. அரியப²லம் அஸ்ஸ ஆக³தந்தி ஆக³தப²லோ. ஸிக்கா²த்தயஸாஸனம் ஏதேன விஞ்ஞாதந்தி விஞ்ஞாதஸாஸனோ. இதி அயம் ராஜா ‘‘ஸோதாபன்னஸ்ஸ நிஸ்ஸயவிஹாரம் புச்சா²மீ’’தி புச்ச²ந்தோ ஏவமாஹ.

நேவஸ்ஸ ராக³பரியுட்டி²தந்தி ந உப்பஜ்ஜமானேன ராகே³ன உட்ட²ஹித்வா க³ஹிதம். உஜுக³தந்தி பு³த்³தா⁴னுஸ்ஸதிகம்மட்டா²னே உஜுகமேவ க³தம். ததா²க³தம் ஆரப்³பா⁴தி ததா²க³தகு³ணே ஆரப்³ப⁴. அத்த²வேத³ந்தி அட்ட²கத²ம் நிஸ்ஸாய உப்பன்னம் பீதிபாமோஜ்ஜம். த⁴ம்மவேத³ந்தி பாளிம் நிஸ்ஸாய உப்பன்னம் பீதிபாமோஜ்ஜம். த⁴ம்மூபஸஞ்ஹிதந்தி பாளிஞ்ச அட்ட²கத²ஞ்ச நிஸ்ஸாய உப்பன்னம். பமுதி³தஸ்ஸாதி து³விதே⁴ன பாமோஜ்ஜேன பமுதி³தஸ்ஸ. பீதி ஜாயதீதி பஞ்சவிதா⁴ பீதி நிப்³ப³த்ததி. காயோ பஸ்ஸம்ப⁴தீதி நாமகாயோ ச கரஜகாயோ ச த³ரத²படிப்பஸ்ஸத்³தி⁴யா படிப்பஸ்ஸம்ப⁴தி. ஸுக²ந்தி காயிகசேதஸிகஸுக²ம். ஸமாதி⁴யதீதி ஆரம்மணே ஸம்மா ட²பிதம் ஹோதி. விஸமக³தாய பஜாயாதி ராக³தோ³ஸமோஹவிஸமக³தேஸு ஸத்தேஸு. ஸமப்பத்தோதி ஸமம் உபஸமம் பத்தோ ஹுத்வா. ஸப்³யாபஜ்ஜா²யாதி ஸது³க்கா²ய. த⁴ம்மஸோதம் ஸமாபன்னோதி விபஸ்ஸனாஸங்கா²தம் த⁴ம்மஸோதம் ஸமாபன்னோ. பு³த்³தா⁴னுஸ்ஸதிம் பா⁴வேதீதி பு³த்³தா⁴னுஸ்ஸதிகம்மட்டா²னம் ப்³ரூஹேதி வட்³டே⁴தி. இமினா நயேன ஸப்³ப³த்த² அத்தோ² வேதி³தப்³போ³. இதி மஹானாமோ ஸோதாபன்னஸ்ஸ நிஸ்ஸயவிஹாரம் புச்சி². ஸத்தா²பிஸ்ஸ தமேவ கதே²ஸி. ஏவம் இமஸ்மிம் ஸுத்தே ஸோதாபன்னோவ கதி²தோதி.

ஆஹுனேய்யவக்³கோ³ பட²மோ.