(18) 3. உபாஸகவக்³கோ³

1-3. ஸாரஜ்ஜஸுத்தாதி³வண்ணனா

171-173. ததியஸ்ஸ பட²மது³தியததியேஸு அகா³ரியப்படிபத்தி கதி²தா. ஸோதாபன்னஸகதா³கா³மினோபி ஹோந்து, வட்டந்தியேவ.

4. வேரஸுத்தவண்ணனா

174. சதுத்தே² ப⁴யானீதி சித்துத்ராஸப⁴யானி. வேரானீதி அகுஸலவேரானிபி புக்³க³லவேரானிபி. சேதஸிகந்தி சித்தனிஸ்ஸிதம். து³க்க²ந்தி காயபஸாத³வத்து²கம் து³க்க²ம். தோ³மனஸ்ஸந்தி தோ³மனஸ்ஸவேத³னம். இமஸ்மிம் ஸுத்தே விரதிபஹானம் கதி²தம்.

5. சண்டா³லஸுத்தவண்ணனா

175. பஞ்சமே உபாஸகபதிகுட்டோ²தி உபாஸகபச்சி²மகோ. கோதூஹலமங்க³லிகோதி ‘‘இமினா இத³ம் ப⁴விஸ்ஸதீ’’தி ஏவம் பவத்தத்தா கோதூஹலஸங்கா²தேன தி³ட்ட²ஸுதமுதமங்க³லேன ஸமன்னாக³தோ. மங்க³லம் பச்சேதி நோ கம்மந்தி மங்க³லம் ஓலோகேதி, கம்மம் ந ஓலோகேதி. இதோ ச ப³ஹித்³தா⁴தி இமம்ஹா ஸாஸனா ப³ஹித்³தா⁴. புப்³ப³காரம் கரோதீதி தா³னாதி³கம் குஸலகிச்சம் பட²மதரம் கரோதி.

6. பீதிஸுத்தவண்ணனா

176. ச²ட்டே² கிந்தி மயந்தி கேன நாம உபாயேன மயம். பவிவேகம் பீதிந்தி பட²மது³தியஜ்ஜா²னானி நிஸ்ஸாய உப்பஜ்ஜனகபீதிம். காமூபஸம்ஹிதந்தி காமனிஸ்ஸிதம் து³விதே⁴ காமே ஆரப்³ப⁴ உப்பஜ்ஜனகம். அகுஸலூபஸம்ஹிதந்தி ‘‘மிக³ஸூகராத³யோ விஜ்ஜி²ஸ்ஸாமீ’’தி ஸரம் கி²பித்வா தஸ்மிம் விரத்³தே⁴ ‘‘விரத்³த⁴ம் மயா’’தி ஏவம் அகுஸலே நிஸ்ஸாய உப்பஜ்ஜனகம். தாதி³ஸேஸு பன டா²னேஸு அவிரஜ்ஜ²ந்தஸ்ஸ ‘‘ஸுட்டு² மே வித்³த⁴ம், ஸுட்டு² மே பஹட’’ந்தி உப்பஜ்ஜனகம் அகுஸலூபஸம்ஹிதம் ஸுக²ம் ஸோமனஸ்ஸம் நாம. தா³னாதி³உபகரணானம் அஸம்பத்தியா உப்பஜ்ஜமானம் பன குஸலூபஸம்ஹிதம் து³க்க²ம் தோ³மனஸ்ஸந்தி வேதி³தப்³ப³ம்.

7. வணிஜ்ஜாஸுத்தவண்ணனா

177. ஸத்தமே வணிஜ்ஜாதி வாணிஜகம்மானி. உபாஸகேனாதி திஸரணக³தேன. ஸத்த²வணிஜ்ஜாதி ஆவுத⁴ப⁴ண்ட³ம் காரேத்வா தஸ்ஸ விக்கயோ. ஸத்தவணிஜ்ஜாதி மனுஸ்ஸவிக்கயோ. மம்ஸவணிஜ்ஜாதி ஸூகரமிகா³த³யோ போஸேத்வா தேஸம் விக்கயோ. மஜ்ஜவணிஜ்ஜாதி யம்கிஞ்சி மஜ்ஜம் காரேத்வா தஸ்ஸ விக்கயோ. விஸவணிஜ்ஜாதி விஸம் காரேத்வா தஸ்ஸ விக்கயோ. இதி ஸப்³ப³ம்பி இமம் வணிஜ்ஜம் நேவ அத்தனா காதும், ந பரே ஸமாத³பேத்வா காரேதும் வட்டதி.

8. ராஜஸுத்தவண்ணனா

178. அட்ட²மே பப்³பா³ஜேந்தீதி ரட்ட²ம்ஹா பப்³பா³ஜேந்தி. யதா²பச்சயம் வா கரோந்தீதி யதா²தி⁴ப்பாயம் யதா²ஜ்ஜா²ஸயம் கரோந்தி. ததே²வ பாபகம்மம் பவேதே³ந்தீதி யதா² தேன கதம், தம் ததே²வ அஞ்ஞேஸம் ஆரோசேந்தி கதே²ந்தி.

9. கி³ஹிஸுத்தவண்ணனா

179. நவமே ஸம்வுதகம்மந்தந்தி பிஹிதகம்மந்தம். ஆபி⁴சேதஸிகானந்தி உத்தமசித்தனிஸ்ஸிதானம். தி³ட்ட²த⁴ம்மஸுக²விஹாரானந்தி பச்சக்கே²யேவ த⁴ம்மே பவத்திக்க²ணே ஸுக²விஹாரானம். அரியகந்தேஹீதி அரியானம் கந்தேஹி மக்³க³ப²லஸீலேஹி.

அரியத⁴ம்மம் ஸமாதா³யாதி ஏத்த² அரியத⁴ம்மோதி பஞ்ச ஸீலானி கதி²தானி. மேரயம் வாருணிந்தி சதுப்³பி³த⁴ம் மேரயம் பஞ்சவித⁴ஞ்ச ஸுரம். த⁴ம்மஞ்சானுவிதக்கயேதி நவவித⁴ம் லோகுத்தரத⁴ம்மம் அனுஸ்ஸதிவஸேனேவ விதக்கேய்ய. அப்³யாபஜ்ஜ²ம் ஹிதம் சித்தந்தி நித்³து³க்க²ம் மேத்தாதி³ப்³ரஹ்மவிஹாரசித்தம். தே³வலோகாய பா⁴வயேதி ப்³ரஹ்மலோகத்தா²ய பா⁴வேய்ய. புஞ்ஞத்த²ஸ்ஸ ஜிகீ³ஸதோதி புஞ்ஞேன அத்தி²கஸ்ஸ புஞ்ஞம் க³வேஸந்தஸ்ஸ. ஸந்தேஸூதி பு³த்³த⁴பச்சேகபு³த்³த⁴ததா²க³தஸாவகேஸு. விபுலா ஹோதி த³க்கி²ணாதி ஏவம் தி³ன்னதா³னம் மஹப்ப²லம் ஹோதி. அனுபுப்³பே³னாதி ஸீலபூரணாதி³னா அனுக்கமேன. ஸேஸம் திகனிபாதே வுத்தத்த²மேவ.

10. க³வேஸீஸுத்தவண்ணனா

180. த³ஸமே ஸிதம் பாத்வாகாஸீதி மஹாமக்³கே³னேவ க³ச்ச²ந்தோ தம் ஸாலவனம் ஓலோகேத்வா ‘‘அத்தி² நு கோ² இமஸ்மிம் டா²னே கிஞ்சி ஸுகாரணம் உப்பன்னபுப்³ப³’’ந்தி அத்³த³ஸ கஸ்ஸபபு³த்³த⁴காலே க³வேஸினா உபாஸகேன கதம் ஸுகாரணம். அத²ஸ்ஸ ஏதத³ஹோஸி – ‘‘இத³ம் ஸுகாரணம் பி⁴க்கு²ஸங்க⁴ஸ்ஸ அபாகடம் படிச்ச²ன்னம், ஹந்த³ நம் பி⁴க்கு²ஸங்க⁴ஸ்ஸ பாகடம் கரோமீ’’தி மக்³கா³ ஓக்கம்ம அஞ்ஞதரஸ்மிம் பதே³ஸே டி²தோவ ஸிதபாதுகம்மம் அகாஸி, அக்³க³க்³க³த³ந்தே த³ஸ்ஸேத்வா மந்த³ஹஸிதம் ஹஸி. யதா² ஹி லோகியமனுஸ்ஸா உத³ரம் பஹரந்தா ‘‘கஹம் கஹ’’ந்தி ஹஸந்தி, ந ஏவம் பு³த்³தா⁴. பு³த்³தா⁴னம் பன ஹஸிதம் ஹட்ட²பஹட்டா²காரமத்தமேவ ஹோதி.

ஹஸிதஞ்ச நாமேதம் தேரஸஹி ஸோமனஸ்ஸஸஹக³தசித்தேஹி ஹோதி. தத்த² லோகியமஹாஜனோ அகுஸலதோ சதூஹி, காமாவசரகுஸலதோ சதூஹீதி அட்ட²ஹி சித்தேஹி ஹஸதி, ஸேகா² அகுஸலதோ தி³ட்டி²க³தஸம்பயுத்தானி த்³வே அபனேத்வா ச²ஹி சித்தேஹி ஹஸந்தி, கீ²ணாஸவா சதூஹி ஸஹேதுககிரியசித்தேஹி, ஏகேன அஹேதுககிரியசித்தேனாதி பஞ்சஹி சித்தேஹி ஹஸந்தி. தேஸுபி ப³லவாரம்மணே ஆபாத²மாக³தே த்³வீஹி ஞாணஸம்பயுத்தசித்தேஹி ஹஸந்தி, து³ப்³ப³லாரம்மணே து³ஹேதுகசித்தத்³வயேன ச அஹேதுகசித்தேன சாதி தீஹி சித்தேஹி ஹஸந்தி. இமஸ்மிம் பன டா²னே கிரியாஹேதுகமனோவிஞ்ஞாணதா⁴துஸோமனஸ்ஸஸஹக³தசித்தம் ப⁴க³வதோ பஹட்டா²காரமத்தஹஸிதம் உப்பாதே³தி.

தம் பனேதம் ஹஸிதம் ஏவம் அப்பமத்தகம்பி தே²ரஸ்ஸ பாகடம் அஹோஸி. கத²ம்? ததா²ரூபே ஹி காலே ததா²க³தஸ்ஸ சதூஹி தா³டா²ஹி சாதுத்³தீ³பிகமஹாமேக⁴முக²தோ ஸமோஸரிதா விஜ்ஜுலதா விய விரோசமானா மஹாதாலக்க²ந்த⁴ப்பமாணா ரஸ்மிவட்டியோ உட்ட²ஹித்வா திக்க²த்தும் ஸிரவரம் பத³க்கி²ணம் கத்வா தா³ட²க்³கே³ஸுயேவ அந்தரதா⁴யந்தி. தேன ஸஞ்ஞாணேன ஆயஸ்மா ஆனந்தோ³ ப⁴க³வதோ பச்ச²தோ க³ச்ச²மானோபி ஸிதபாதுபா⁴வம் ஜானாதி.

இத்³த⁴ந்தி ஸமித்³த⁴ம். பீ²தந்தி அதிஸமித்³த⁴ம் ஸப்³ப³பாலிபு²ல்லம் விய. ஆகிண்ணமனுஸ்ஸந்தி ஜனஸமாகுலம். ஸீலேஸு அபரிபூரகாரீதி பஞ்சஸு ஸீலேஸு அஸமத்தகாரீ. படிதே³ஸிதானீதி உபாஸகபா⁴வம் படிதே³ஸிதானி. ஸமாத³பிதானீதி ஸரணேஸு பதிட்டா²பிதானீதி அத்தோ². இச்சேதம் ஸமஸமந்தி இதி ஏதம் காரணம் ஸப்³பா³காரதோ ஸமபா⁴வேனேவ ஸமம், ந ஏகதே³ஸேன. நத்தி² கிஞ்சி அதிரேகந்தி மய்ஹம் இமேஹி கிஞ்சி அதிரேகம் நத்தி². ஹந்தா³தி வவஸ்ஸக்³க³த்தே² நிபாதோ. அதிரேகாயாதி விஸேஸகாரணத்தா²ய படிபஜ்ஜாமீதி அத்தோ². ஸீலேஸு பரிபூரகாரிம் தா⁴ரேதா²தி பஞ்சஸு ஸீலேஸு ஸமத்தகாரீதி ஜானாத². ஏத்தாவதா தேன பஞ்ச ஸீலானி ஸமாதி³ன்னானி நாம ஹோந்தி. கிமங்க³ பன ந மயந்தி மயம் பன கேனேவ காரணேன பரிபூரகாரினோ ந ப⁴விஸ்ஸாம. ஸேஸமேத்த² உத்தானமேவாதி.

உபாஸகவக்³கோ³ ததியோ.