3. ததியபண்ணாஸகம்

(11) 1. பா²ஸுவிஹாரவக்³கோ³

1. ஸாரஜ்ஜஸுத்தவண்ணனா

101. ததியஸ்ஸ பட²மே வேஸாரஜ்ஜகரணாதி விஸாரத³பா⁴வாவஹா. ஸாரஜ்ஜம் ஹோதீதி தோ³மனஸ்ஸம் ஹோதி.

2. உஸ்ஸங்கிதஸுத்தவண்ணனா

102. து³தியே உஸ்ஸங்கிதபரிஸங்கிதோதி உஸ்ஸங்கிதோ ச பரிஸங்கிதோ ச. அபி அகுப்பத⁴ம்மோபீதி அபி அகுப்பத⁴ம்மோ கீ²ணாஸவோ ஸமானோபி பரேஹி பாபபி⁴க்கூ²ஹி உஸ்ஸங்கிதபரிஸங்கிதோ ஹோதீதி அத்தோ². வேஸியாகோ³சரோதிஆதீ³ஸு வேஸியா வுச்சந்தி ரூபூபஜீவினியோ, தா கோ³சரோ அஸ்ஸாதி வேஸியாகோ³சரோ, தாஸம் கே³ஹம் அபி⁴ண்ஹக³மனோதி அத்தோ². ஸேஸபதே³ஸுபி ஏஸேவ நயோ. தத்த² பன வித⁴வாதி மதபதிகா. து²ல்லகுமாரிகாதி மஹல்லிககுமாரிகாயோ.

3. மஹாசோரஸுத்தவண்ணனா

103. ததியே இதோ போ⁴கே³ன படிஸந்த²ரிஸ்ஸாமீதி இதோ மம ஸாபதேய்யதோ போ⁴க³ம் க³ஹேத்வா தேன படிஸந்தா²ரம் கரிஸ்ஸாமி, தஸ்ஸ ச மம ச அந்தரம் பித³ஹிஸ்ஸாமீதி அத்தோ². க³ஹணானீதி பரஸந்தகானம் ப⁴ண்டா³னம் க³ஹணானி. கு³ய்ஹமந்தாதி கு³ஹிதப்³ப³மந்தா. அந்தக்³கா³ஹிகாயாதி ஸஸ்ஸதம் வா உச்சே²த³ம் வா க³ஹேத்வா டி²தாய. ஸேஸமேத்த² உத்தானத்த²மேவ. சதுத்தே² ஸப்³ப³ம் ஹேட்டா² வுத்தனயமேவ.

5. பா²ஸுவிஹாரஸுத்தவண்ணனா

105. பஞ்சமே மேத்தம் காயகம்மந்தி மேத்தசித்தேன பவத்திதம் காயகம்மம். ஆவி சேவ ரஹோ சாதி ஸம்முகே² சேவ பரம்முகே² ச. இதரேஸுபி ஏஸேவ நயோ. யானி தானி ஸீலானீதிஆதி³ சதுபாரிஸுத்³தி⁴ஸீலவஸேன வுத்தம். ஸமாதி⁴ஸம்வத்தனிகானீதி மக்³க³ஸமாதி⁴ப²லஸமாதி⁴னிப்³ப³த்தகானி. ஸீலஸாமஞ்ஞக³தோதி ஸமானஸீலதம் க³தோ, ஏகஸதி³ஸஸீலோ ஹுத்வாதி அத்தோ². தக்கரஸ்ஸாதி யோ நம் கரோதி, தஸ்ஸ. இதி இமஸ்மிம் ஸுத்தே ஸீலம் மிஸ்ஸகம் கதி²தம், தி³ட்டி² விபஸ்ஸனாஸம்மாதி³ட்டீ²தி.

6. ஆனந்த³ஸுத்தவண்ணனா

106. ச²ட்டே² நோ ச பரம் அதி⁴ஸீலே ஸம்பவத்தா ஹோதீதி பரம் ஸீலபா⁴வேன ந க³ரஹதி ந உபவத³தி. அத்தானுபேக்கீ²தி அத்தனோவ கதாகதம் ஜானனவஸேன அத்தானம் அனுபேக்கி²தா. நோ பரானுபேக்கீ²தி பரஸ்ஸ கதாகதேஸு அப்³யாவடோ. அபஞ்ஞாதோதி அபாகடோ அப்பபுஞ்ஞோ. அபஞ்ஞாதகேனாதி அபஞ்ஞாதபா⁴வேன அபாகடதாய மந்த³புஞ்ஞதாய. நோ பரிதஸ்ஸதீதி பரிதாஸம் நாபஜ்ஜதி. இதி இமஸ்மிம் ஸுத்தே கீ²ணாஸவோவ கதி²தோ.

7-8. ஸீலஸுத்தாதி³வண்ணனா

107-108. ஸத்தமே ஸீலஸமாதி⁴பஞ்ஞா மிஸ்ஸிகா கதி²தா, விமுத்தி அரஹத்தப²லம், விமுத்திஞாணத³ஸ்ஸனம் பச்சவேக்க²ணஞாணம் லோகியமேவ. அட்ட²மேபி ஏஸேவ நயோ. பச்சவேக்க²ணஞாணம் பனேத்த² அஸேக²ஸ்ஸ பவத்தத்தா அஸேக²ந்தி வுத்தம்.

9-10. சாதுத்³தி³ஸஸுத்தாதி³வண்ணனா

109-110. நவமே சாதுத்³தி³ஸோதி சதூஸு தி³ஸாஸு அப்படிஹதசாரோ. இமஸ்மிம்பி ஸுத்தே கீ²ணாஸவோவ கதி²தோ. த³ஸமே அலந்தி யுத்தோ. இதா⁴பி கீ²ணாஸவோவ கதி²தோ.

பா²ஸுவிஹாரவக்³கோ³ பட²மோ.

(12) 2. அந்த⁴கவிந்த³வக்³கோ³

1. குலூபகஸுத்தவண்ணனா

111. து³தியஸ்ஸ பட²மே அஸந்த²வவிஸ்ஸாஸீதி அத்தனா ஸத்³தி⁴ம் ஸந்த²வம் அகரோந்தேஸு விஸ்ஸாஸம் அனாபஜ்ஜந்தேஸுயேவ விஸ்ஸாஸம் கரோதி. அனிஸ்ஸரவிகப்பீதி அனிஸ்ஸரோவ ஸமானோ ‘‘இமம் தே³த², இமம் க³ண்ஹதா²’’தி இஸ்ஸரோ விய விகப்பேதி. விஸ்ஸட்டு²பஸேவீதி விஸ்ஸட்டா²னி பி⁴ன்னகுலானி க⁴டனத்தா²ய உபஸேவதி. உபகண்ணகஜப்பீதி கண்ணமூலே மந்தம் க³ண்ஹாதி. ஸுக்கபக்கோ² வுத்தவிபரியாயேன வேதி³தப்³போ³.

2. பச்சா²ஸமணஸுத்தவண்ணனா

112. து³தியே பத்தபரியாபன்னம் ந க³ண்ஹாதீதி உபஜ்ஜா²யே நிவத்தித்வா டி²தே அத்தனோ துச்ச²பத்தம் த³த்வா தஸ்ஸ பத்தம் ந க³ண்ஹாதி, ததோ வா தீ³யமானம் ந க³ண்ஹாதி. ந நிவாரேதீதி இத³ம் வசனம் ஆபத்திவீதிக்கமவசனம் நாமாதி ந ஜானாதி. ஞத்வா வாபி, ‘‘ப⁴ந்தே, ஏவரூபம் நாம வத்தும் ந வட்டதீ’’தி ந நிவாரேதி. கத²ம் ஓபாதேதீதி தஸ்ஸ கத²ம் பி⁴ந்தி³த்வா அத்தனோ கத²ம் பவேஸேதி. ஜளோதி ஜடோ³. ஏளமூகோ³தி பக்³க⁴ரிதகே²ளமுகோ². ததியம் உத்தானமேவ.

4. அந்த⁴கவிந்த³ஸுத்தவண்ணனா

114. சதுத்தே² ஸீலவா ஹோதா²தி ஸீலவந்தா ஹோத². ஆரக்க²ஸதினோதி த்³வாரரக்கி²காய ஸதியா ஸமன்னாக³தா. நிபக்கஸதினோதி த்³வாரரக்க²னகேனேவ ஞாணேன ஸமன்னாக³தஸ்ஸதினோ. ஸதாரக்கே²ன சேதஸா ஸமன்னாக³தாதி ஸதாரக்கே²ன சித்தேன ஸமன்னாக³தா. அப்பப⁴ஸ்ஸாதி அப்பகதா². ஸம்மாதி³ட்டி²காதி கம்மஸ்ஸகதஜ்ஜா²ன-விபஸ்ஸனாமக்³க³-ப²லவஸேன பஞ்சவிதா⁴ய ஸம்மாதி³ட்டி²யா ஸமன்னாக³தா. அபிச பச்சவேக்க²ணஞாணம்பி ஸம்மாதி³ட்டி²யேவாதி வேதி³தப்³பா³.

5. மச்ச²ரினீஸுத்தவண்ணனா

115. பஞ்சமே ஆவாஸமச்ச²ரினீதி ஆவாஸம் மச்ச²ராயதி, தத்த² அஞ்ஞேஸம் வாஸம் ந ஸஹதி. குலமச்ச²ரினீதி உபட்டா²ககுலம் மச்ச²ராயதி, அஞ்ஞேஸம் தத்த² உபஸங்கமனம் ந ஸஹதி. லாப⁴மச்ச²ரினீதி லாப⁴ம் மச்ச²ராயதி, அஞ்ஞேஸம் தம் உப்பஜ்ஜந்தம் ந ஸஹதி. வண்ணமச்ச²ரினீதி கு³ணம் மச்ச²ராயதி, அஞ்ஞேஸம் கு³ணகத²ம் ந ஸஹதி. த⁴ம்மமச்ச²ரினீதி பரியத்தித⁴ம்மம் மச்ச²ராயதி, அஞ்ஞேஸம் தா³தும் ந இச்ச²தி.

6-7. வண்ணனாஸுத்தாதி³வண்ணனா

116-117. ச²ட்டே² ஸத்³தா⁴தே³ய்யம் வினிபாதேதீதி பரேஹி ஸத்³தா⁴ய தி³ன்னபிண்ட³பாததோ அக்³க³ம் அக்³க³ஹேத்வா பரஸ்ஸ தே³தி. ஸத்தமே இஸ்ஸுகினீதி இஸ்ஸாய ஸமன்னாக³தா. ஸேஸம் ஸப்³ப³த்த² உத்தானமேவாதி.

அந்த⁴கவிந்த³வக்³கோ³ து³தியோ.

(13) 3. கி³லானவக்³கோ³

4. து³தியஉபட்டா²கஸுத்தவண்ணனா

124. ததியஸ்ஸ சதுத்தே² நப்படிப³லோதி காயப³லேன ச ஞாணப³லேன ச அஸமன்னாக³தோ. ஆமிஸந்தரோதி ஆமிஸஹேதுகோ சீவராதீ³னி பச்சாஸீஸமானோ.

5-6. அனாயுஸ்ஸாஸுத்தத்³வயவண்ணனா

125-126. பஞ்சமே அனாயுஸ்ஸாதி ஆயுபச்சே²த³னா, ந ஆயுவட்³ட⁴னா. ச²ட்டே²பி ஏஸேவ நயோ.

7. வபகாஸஸுத்தவண்ணனா

127. ஸத்தமே நாலம் ஸங்க⁴ம்ஹா வபகாஸிதுந்தி ஸங்க⁴தோ நிக்க²மித்வா ஏககோ வஸிதும் ந யுத்தோ. காமஞ்சேஸ ஸங்க⁴மஜ்ஜே²பி வஸிதும் அயுத்தோவ அஸங்க⁴ஸோப⁴னதாய, ஓவாதா³னுஸாஸனிப்படிப³த்³த⁴த்தா பன நிப்பரியாயேனேவ ஸங்க⁴ம்ஹா வபகாஸிதும் ந யுத்தோ. அலம் ஸங்க⁴ம்ஹா வபகாஸிதுந்தி சாதுத்³தி³ஸத்தா ஸங்க⁴ம்ஹா நிக்க²ம்ம ஏககோ வஸிதும் யுத்தோ, ஸங்க⁴ஸோப⁴னதாய பன ஸங்கே⁴பி வஸிதும் யுத்தோயேவ. அட்ட²மம் உத்தானத்த²மேவ.

9. பரிகுப்பஸுத்தவண்ணனா

129. நவமே ஆபாயிகாதி அபாயகா³மினோ. நேரயிகாதி நிரயகா³மினோ. பரிகுப்பாதி பரிகுப்பனஸபா⁴வா புராணவணஸதி³ஸா. அதேகிச்சா²தி அகத்தப்³ப³பரிகம்மா. த³ஸமம் உத்தானத்த²மேவாதி.

கி³லானவக்³கோ³ ததியோ.

(14) 4. ராஜவக்³கோ³

1. பட²மசக்கானுவத்தனஸுத்தவண்ணனா

131. சதுத்த²ஸ்ஸ பட²மே த⁴ம்மேனாதி த³ஸகுஸலத⁴ம்மேன. சக்கந்தி ஆணாசக்கம். அத்த²ஞ்ஞூதி ரஜ்ஜத்த²ம் ஜானாதி. த⁴ம்மஞ்ஞூதி பவேணித⁴ம்மம் ஜானாதி. மத்தஞ்ஞூதி த³ண்டே³ வா ப³லம்ஹி வா பமாணம் ஜானாதி. காலஞ்ஞூதி ரஜ்ஜஸுகா²னுப⁴வனகாலம், வினிச்ச²யகரணகாலம், ஜனபத³சாரிகாகாலஞ்ச ஜானாதி. பரிஸஞ்ஞூதி அயம் பரிஸா க²த்தியபரிஸா, அயம் ப்³ராஹ்மணவேஸ்ஸஸுத்³த³ஸமணபரிஸாதி ஜானாதி.

ததா²க³தவாரே அத்த²ஞ்ஞூதி பஞ்ச அத்தே² ஜானாதி. த⁴ம்மஞ்ஞூதி சத்தாரோ த⁴ம்மே ஜானாதி. மத்தஞ்ஞூதி சதூஸு பச்சயேஸு படிக்³க³ஹணபரிபோ⁴க³மத்தம் ஜானாதி. காலஞ்ஞூதி அயம் காலோ படிஸல்லீனஸ்ஸ, அயம் ஸமாபத்தியா, அயம் த⁴ம்மதே³ஸனாய, அயம் ஜனபத³சாரிகாயாதி ஏவம் காலம் ஜானாதி. பரிஸஞ்ஞூதி அயம் பரிஸா க²த்தியபரிஸா…பே… அயம் ஸமணபரிஸாதி ஜானாதி. அனுத்தரந்தி நவஹி லோகுத்தரத⁴ம்மேஹி அனுத்தரம். த⁴ம்மசக்கந்தி ஸேட்ட²சக்கம்.

2. து³தியசக்கானுவத்தனஸுத்தவண்ணனா

132. து³தியே பிதரா பவத்திதம் சக்கந்தி சக்கவத்திம்ஹி பப்³ப³ஜிதே வா காலகதே வா சக்கரதனம் ஸத்தாஹமத்தம் ட²த்வா அந்தரதா⁴யதி, கத²மேஸ தம் அனுப்பவத்தேதி நாம? பிது பவேணியம் ட²த்வா சக்கவத்திவத்தம் பூரேத்வா சக்கவத்திரஜ்ஜம் காரேந்தோபி பிதரா பவத்திதமேவ அனுப்பவத்தேதி நாம.

3. த⁴ம்மராஜாஸுத்தவண்ணனா

133. ததியம் திகனிபாதே வுத்தனயமேவ. ஸேவிதப்³பா³ஸேவிதப்³பே³ பனேத்த² பச்சி²மபத³த்³வயமேவ விஸேஸோ. தத்த² ஸம்மாஆஜீவோ ஸேவிதப்³போ³, மிச்சா²ஆஜீவோ ந ஸேவிதப்³போ³. ஸப்பாயோ கா³மனிக³மோ ஸேவிதப்³போ³, அஸப்பாயோ ந ஸேவிதப்³போ³.

4. யஸ்ஸம்தி³ஸம்ஸுத்தவண்ணனா

134. சதுத்தே² உப⁴தோதி த்³வீஹிபி பக்கே²ஹி. மாதிதோ ச பிதிதோ சாதி யஸ்ஸ ஹி மாதா க²த்தியா, மாதுமாதா க²த்தியா, தஸ்ஸாபி மாதா க²த்தியா. பிதா க²த்தியோ, பிதுபிதா க²த்தியோ, தஸ்ஸபி பிதா க²த்தியோ. ஸோ உப⁴தோ ஸுஜாதோ மாதிதோ ச பிதிதோ ச. ஸம்ஸுத்³த⁴க³ஹணிகோதி ஸம்ஸுத்³தா⁴ய மாதுகுச்சி²யா ஸமன்னாக³தோ. ‘‘ஸமவேபாகினியா க³ஹணியா’’தி ஏத்த² பன கம்மஜதேஜோதா⁴து க³ஹணீதி வுச்சதி. யாவ ஸத்தமா பிதாமஹயுகா³தி ஏத்த² பிதுபிதா பிதாமஹோ, பிதாமஹஸ்ஸ யுக³ம் பிதாமஹயுக³ம். யுக³ந்தி ஆயுப்பமாணம் வுச்சதி. அபி⁴லாபமத்தமேவ சேதம், அத்த²தோ பன பிதாமஹோயேவ பிதாமஹயுக³ம். ததோ உத்³த⁴ம் ஸப்³பே³பி புப்³ப³புரிஸா பிதாமஹக்³க³ஹணேனேவ க³ஹிதா. ஏவம் யாவ ஸத்தமோ புரிஸோ, தாவ ஸம்ஸுத்³த⁴க³ஹணிகோ, அத² வா அக்கி²த்தோ அனுபக்குட்டோ² ஜாதிவாதே³னாதி த³ஸ்ஸேதி. அக்கி²த்தோதி ‘‘அபனேத² ஏதம், கிம் இமினா’’தி ஏவம் அக்கி²த்தோ அனவக்கி²த்தோ. அனுபக்குட்டோ²தி ந உபக்குட்டோ² ந அக்கோஸம் வா நிந்த³ம் வா பத்தபுப்³போ³. கேன காரணேனாதி? ஜாதிவாதே³ன, ‘‘இதிபி ஹீனஜாதிகோ ஏஸோ’’தி ஏவரூபேன வசனேனாதி அத்தோ².

அட்³டோ⁴திஆதீ³ஸு யோ கோசி அத்தனோ ஸந்தகேன விப⁴வேன அட்³டோ⁴ ஹோதி. இத⁴ பன ந கேவலம் அட்³டோ⁴யேவ, மஹத்³த⁴னோ மஹதா அபரிமாணஸங்கே²ன த⁴னேன ஸமன்னாக³தோதி அத்தோ². பஞ்சகாமகு³ணவஸேன மஹந்தா உளாரா போ⁴கா³ அஸ்ஸாதி மஹாபோ⁴கோ³. பரிபுண்ணகோஸகோட்டா²கா³ரோதி கோஸோ வுச்சதி ப⁴ண்டா³கா³ரம், நித³ஹித்வா ட²பிதேன த⁴னேன பரிபுண்ணகோஸோ, த⁴ஞ்ஞேன ச பரிபுண்ணகோட்டா²கா³ரோதி அத்தோ². அத² வா சதுப்³பி³தோ⁴ கோஸோ ஹத்தீ² அஸ்ஸா ரதா² ரட்ட²ந்தி, திவித⁴ம் கோட்டா²கா³ரம் த⁴னகோட்டா²கா³ரம் த⁴ஞ்ஞகோட்டா²கா³ரம் வத்த²கோட்டா²கா³ரந்தி. தம் ஸப்³ப³ம்பி பரிபுண்ணமஸ்ஸாதி பரிபுண்ணகோஸகோட்டா²கா³ரோ. அஸ்ஸவாயாதி கஸ்ஸசி ப³ஹும்பி த⁴னம் தே³ந்தஸ்ஸ ஸேனா ந ஸுணாதி, ஸா அனஸ்ஸவா நாம ஹோதி. கஸ்ஸசி அதே³ந்தஸ்ஸாபி ஸுணாதியேவ, அயம் அஸ்ஸவா நாம. ஓவாத³படிகராயாதி ‘‘இத³ம் வோ கத்தப்³ப³, இத³ம் ந கத்தப்³ப³’’ந்தி தி³ன்னஓவாத³கராய. பண்டி³தோதி பண்டி³ச்சேன ஸமன்னாக³தோ. ப்³யத்தோதி பஞ்ஞாவேய்யத்தியேன யுத்தோ. மேதா⁴வீதி டா²னுப்பத்திகபஞ்ஞாய ஸமன்னாக³தோ. படிப³லோதி ஸமத்தோ². அத்தே² சிந்தேதுந்தி வட்³டி⁴அத்தே² சிந்தேதும். ஸோ ஹி பச்சுப்பன்னஅத்த²வஸேனேவ ‘‘அதீதேபி ஏவம் அஹேஸும், அனாக³தேபி ஏவம் ப⁴விஸ்ஸந்தீ’’தி சிந்தேதி. விஜிதாவீனந்தி விஜிதவிஜயானம், மஹந்தேன வா விஜயேன ஸமன்னாக³தானம். விமுத்தசித்தானந்தி பஞ்சஹி விமுத்தீஹி விமுத்தமானஸானம்.

5-6. பத்த²னாஸுத்தத்³வயவண்ணனா

135-136. பஞ்சமே நேக³மஜானபத³ஸ்ஸாதி நிக³மவாஸினோ ச ரட்ட²வாஸினோ ச ஜனஸ்ஸ. ஹத்தி²ஸ்மிந்திஆதீ³ஹி ஹத்தி²அஸ்ஸரத²த²ருத⁴னுலேக²முத்³தா³க³ணனாதீ³னி ஸோளஸ மஹாஸிப்பானி த³ஸ்ஸிதானி. அனவயோதி ஸமத்தோ² பரிபுண்ணோ. ஸேஸமேத்த² ஹேட்டா² வுத்தனயேனேவ வேதி³தப்³ப³ம். ச²ட்டே² ஓபரஜ்ஜந்தி உபராஜபா⁴வம்.

7. அப்பம்ஸுபதிஸுத்தவண்ணனா

137. ஸத்தமே புரிஸாதி⁴ப்பாயாதி அஸ்ஸத்³த⁴ம்மவஸேன புரிஸே உப்பன்னாதி⁴ப்பாயா புரிஸஜ்ஜா²ஸயா. ஆதா³னாதி⁴ப்பாயோதி இதா³னி க³ஹேதும் ஸக்கி²ஸ்ஸாமி, இதா³னி ஸக்கி²ஸ்ஸாமீதி ஏவம் க³ஹணாதி⁴ப்பாயோ. விஸம்யோகா³தி⁴ப்பாயோதி இதா³னி நிப்³பா³னம் பாபுணிஸ்ஸாமி, இதா³னி பாபுணிஸ்ஸாமீதி ஏவம் நிப்³பா³னஜ்ஜா²ஸயோ.

8. ப⁴த்தாத³கஸுத்தவண்ணனா

138. அட்ட²மே ப⁴த்தாத³கோதி ப⁴த்தக்கா²த³கோ, ப³ஹுப⁴த்தபு⁴ஞ்ஜோதி அத்தோ². ஓகாஸப²ரணோதி ஓகாஸம் ப²ரித்வா அஞ்ஞேஸம் ஸம்பா³த⁴ம் கத்வா டா²னேன ஓகாஸப²ரணோ. தத்த² தத்த² லண்ட³ம் ஸாரேதி பாதேதீதி லண்ட³ஸாரணோ. ஏத்தகா ஹத்தீ²தி க³ணனகாலே ஸலாகம் க³ண்ஹாதீதி ஸலாகக்³கா³ஹீ. நிஸீத³னஸயனவஸேன மஞ்சபீட²ம் மத்³த³தீதி மஞ்சபீட²மத்³த³னோ. பி⁴க்கு²க³ணனகாலே ஸலாகம் க³ண்ஹாதீதி ஸலாகக்³கா³ஹீ.

9. அக்க²மஸுத்தவண்ணனா

139. நவமே ஹத்தி²காயந்தி ஹத்தி²க⁴டம். ஸேஸேஸுபி ஏஸேவ நயோ. ஸங்கா³மே அவசரந்தீதி ஸங்கா³மாவசரா. ஏகிஸ்ஸா வா திணோத³கத³த்தியா விமானிதோதி ஏகதி³வஸம் ஏகேன திணோத³கதா³னேன விமானிதோ, ஏகதி³வஸமத்தம் அலத்³த⁴திணோத³கோதி அத்தோ². இதோ பரம்பி ஏஸேவ நயோ. ந ஸக்கோதி சித்தம் ஸமாத³ஹிதுந்தி ஆரம்மணே சித்தம் ஸம்மா ட²பேதும் ந ஸக்கோதி. ஸேஸமேத்த² உத்தானமேவ. இமஸ்மிம் பன ஸுத்தே வட்டவிவட்டம் கதி²தந்தி வேதி³தப்³ப³ம்.

10. ஸோதஸுத்தவண்ணனா

140. த³ஸமே து³ருத்தானந்தி ந ஸுட்டு² வுத்தானம் தோ³ஸவஸேன பவத்திதானம் ப²ருஸவசனானம். து³ராக³தானந்தி து³க்கு²ப்பாத³னாகாரேன ஸோதத்³வாரம் ஆக³தானம். வசனபதா²னந்தி வசனானம். து³க்கா²னந்தி து³க்க²மானம். திப்³பா³னந்தி ப³ஹலானம் தாபனஸபா⁴வானம் வா. க²ரானந்தி ப²ருஸானம். கடுகானந்தி திகி²ணானம். அஸாதானந்தி அமது⁴ரானம். அமனாபானந்தி மனம் அப்பாயிதும் வட்³டே⁴தும் அஸமத்தா²னம். பாணஹரானந்தி ஜீவிதஹரானம். யா ஸா தி³ஸாதி ஸப்³ப³ஸங்கா²ரஸமதா²தி³வஸேன தி³ஸ்ஸதி அபதி³ஸ்ஸதீதி நிப்³பா³னம் தி³ஸாதி வேதி³தப்³ப³ம். யஸ்மா பன தம் ஆக³ம்ம ஸப்³பே³ ஸங்கா²ரா ஸமத²ம் க³ச்ச²ந்தி, தஸ்மா ஸப்³ப³ஸங்கா²ரஸமதோ²தி வுத்தம். ஸேஸம் ஸப்³ப³த்த² உத்தானமேவ. இமஸ்மிம் பன ஸுத்தே ஸீலஸமாதி⁴பஞ்ஞா மிஸ்ஸிகா கதி²தாதி.

ராஜவக்³கோ³ சதுத்தோ².

(15) 5. திகண்ட³கீவக்³கோ³

1. அவஜானாதிஸுத்தவண்ணனா

141. பஞ்சமஸ்ஸ பட²மே ஸம்வாஸேனாதி ஏகதோவாஸேன. ஆதே³ய்யமுகோ²தி ஆதி³யனமுகோ², க³ஹணமுகோ²தி அத்தோ². தமேனம் த³த்வா அவஜானாதீதி ‘‘அயம் தி³ன்னம் படிக்³க³ஹேதுமேவ ஜானாதீ’’தி ஏவம் அவமஞ்ஞதி. தமேனம் ஸம்வாஸேன அவஜானாதீதி அப்பமத்தகே கிஸ்மிஞ்சிதே³வ குஜ்ஜி²த்வா ‘‘ஜானாமஹம் தயா கதகம்மம், ஏத்தகம் அத்³தா⁴னம் அஹம் கிம் கரோந்தோ வஸிம், நனு துய்ஹமேவ கதாகதம் வீமம்ஸந்தோ’’திஆதீ³னி வத்தா ஹோதி. அத² இதரோ ‘‘அத்³தா⁴ கோசி மய்ஹம் தோ³ஸோ ப⁴விஸ்ஸதீ’’தி கிஞ்சி படிப்ப²ரிதும் ந ஸக்கோதி. தம் கி²ப்பஞ்ஞேவ அதி⁴முச்சிதா ஹோதீதி தம் வண்ணம் வா அவண்ணம் வா ஸீக⁴மேவ ஸத்³த³ஹதி. ஸத்³த³ஹனட்டே²ன ஹி ஆதா³னேன ஏஸ ஆதி³யனமுகோ²தி வுத்தோ. ஆதே⁴ய்யமுகோ²தி பாளியா பன ட²பிதமுகோ²தி அத்தோ². மக்³கே³ க²டஆவாடோ விய ஆக³தாக³தம் உத³கம் வண்ணம் வா அவண்ணம் வா ஸத்³த³ஹனவஸேன ஸம்படிச்சி²தும் ட²பிதமுகோ²தி வுத்தம் ஹோதி.

இத்தரஸத்³தோ⁴தி பரித்தகஸத்³தோ⁴. குஸலாகுஸலே த⁴ம்மே ந ஜானாதீதிஆதீ³ஸு குஸலே த⁴ம்மே ‘‘இமே குஸலா’’தி ந ஜானாதி, அகுஸலே த⁴ம்மே ‘‘இமே அகுஸலா’’தி ந ஜானாதி. ததா² ஸாவஜ்ஜே ஸதோ³ஸத⁴ம்மே ‘‘இமே ஸாவஜ்ஜா’’தி, அனவஜ்ஜே ச நித்³தோ³ஸத⁴ம்மே ‘‘இமே அனவஜ்ஜா’’தி, ஹீனே ஹீனாதி, பணீதே பணீதாதி. கண்ஹஸுக்கஸப்படிபா⁴கே³தி ‘‘இமே கண்ஹா ஸுக்கே படிபா³ஹேத்வா டி²தத்தா ஸப்படிபா⁴கா³ நாம, இமே ச ஸுக்கா கண்ஹே படிபா³ஹித்வா டி²தத்தா ஸப்படிபா⁴கா³’’தி ந ஜானாதி.

2. ஆரப⁴திஸுத்தவண்ணனா

142. து³தியே ஆரப⁴தி ச விப்படிஸாரீ ச ஹோதீதி ஆபத்திவீதிக்கமனவஸேன ஆரப⁴தி சேவ, தப்பச்சயா ச விப்படிஸாரீ ஹோதி. சேதோவிமுத்திம் பஞ்ஞாவிமுத்திந்தி அரஹத்தஸமாதி⁴ஞ்சேவ அரஹத்தப²லஞாணஞ்ச. நப்பஜானாதீதி அனதி⁴க³தத்தா ந ஜானாதி. ஆரப⁴தி ந விப்படிஸாரீ ஹோதீதி ஆபத்திம் ஆபஜ்ஜதி, வுட்டி²தத்தா பன ந விப்படிஸாரீ ஹோதி. நாரப⁴தி விப்படிஸாரீ ஹோதீதி ஸகிம் ஆபத்திம் ஆபஜ்ஜித்வா ததோ வுட்டா²ய பச்சா² கிஞ்சாபி நாபஜ்ஜதி, விப்படிஸாரம் பன வினோதே³தும் ந ஸக்கோதி. நாரப⁴தி ந விப்படிஸாரீ ஹோதீதி ந சேவ ஆபத்திம் ஆபஜ்ஜதி, ந ச விப்படிஸாரீ ஹோதி. தஞ்ச சேதோவிமுத்திம்…பே… நிருஜ்ஜ²ந்தீதி அரஹத்தம் பன அப்பத்தோ ஹோதி. பஞ்சமனயேன கீ²ணாஸவோ கதி²தோ.

ஆரம்ப⁴ஜாதி ஆபத்திவீதிக்கமஸம்ப⁴வா. விப்படிஸாரஜாதி விப்படிஸாரதோ ஜாதா. பவட்³ட⁴ந்தீதி புனப்புனம் உப்பஜ்ஜனேன வட்³ட⁴ந்தி. ஆரம்ப⁴ஜே ஆஸவே பஹாயாதி வீதிக்கமஸம்ப⁴வே ஆஸவே ஆபத்திதே³ஸனாய வா ஆபத்திவுட்டா²னேன வா பஜஹித்வா. படிவினோதே³த்வாதி ஸுத்³த⁴ந்தே டி²தபா⁴வபச்சவேக்க²ணேன நீஹரித்வா. சித்தம் பஞ்ஞஞ்ச பா⁴வேதூதி விபஸ்ஸனாசித்தஞ்ச தம்ஸம்பயுத்தம் பஞ்ஞஞ்ச பா⁴வேது. ஸேஸம் இமினா உபாயேனேவ வேதி³தப்³ப³ந்தி.

3. ஸாரந்த³த³ஸுத்தவண்ணனா

143. ததியே காமாதி⁴முத்தானந்தி வத்து²காமகிலேஸகாமேஸு அதி⁴முத்தானம். த⁴ம்மானுத⁴ம்மப்படிபன்னோதி நவலோகுத்தரத⁴ம்மத்தா²ய ஸஹஸீலகம் புப்³ப³பா⁴க³ப்படிபத³ம் படிபன்னோ படிபத்திபூரகோ புக்³க³லோ து³ல்லபோ⁴ லோகஸ்மிம்.

4. திகண்ட³கீஸுத்தவண்ணனா

144. சதுத்தே² அப்படிகூலேதி அப்படிகூலாரம்மணே. படிகூலஸஞ்ஞீதி படிகூலந்தி ஏவம்ஸஞ்ஞீ. ஏஸ நயோ ஸப்³ப³த்த². கத²ம் பனாயம் ஏவம் விஹரதீதி? இட்ட²ஸ்மிம் வத்து²ஸ்மிம் பன அஸுபா⁴ய வா ப²ரதி, அனிச்சதோ வா உபஸம்ஹரதி. ஏவம் தாவ அப்படிகூலே படிகூலஸஞ்ஞீ விஹரதி. அனிட்ட²ஸ்மிம் வத்து²ஸ்மிம் மேத்தாய வா ப²ரதி, தா⁴துதோ வா உபஸம்ஹரதி. ஏவம் படிகூலே அப்படிகூலஸஞ்ஞீ விஹரதி. உப⁴யஸ்மிம் பன புரிமனயஸ்ஸ ச பச்சி²மனயஸ்ஸ ச வஸேன ததியசதுத்த²வாரா வுத்தா, ச²ளங்கு³பேக்கா²வஸேன பஞ்சமோ. ச²ளங்கு³பேக்கா² சேஸா கீ²ணாஸவஸ்ஸ உபேக்கா²ஸதி³ஸா, ந பன கீ²ணாஸவுபேக்கா². தத்த² உபேக்க²கோ விஹரேய்யாதி மஜ்ஜ²த்தபா⁴வே டி²தோ விஹரேய்ய. க்வசனீதி கிஸ்மிஞ்சி ஆரம்மணே. கத்த²சீதி கிஸ்மிஞ்சி பதே³ஸே. கிஞ்சனதி கோசி அப்பமத்தகோபி. இதி இமஸ்மிம் ஸுத்தே பஞ்சஸு டா²னேஸு விபஸ்ஸனாவ கதி²தா. தம் ஆரத்³த⁴விபஸ்ஸகோ பி⁴க்கு² காதும் ஸக்கோதி, ஞாணவா பஞ்ஞுத்தரோ ப³ஹுஸ்ஸுதஸமணோபி காதும் ஸக்கோதி. ஸோதாபன்னஸகதா³கா³மிஅனாகா³மினோ காதும் ஸக்கோந்தியேவ, கீ²ணாஸவே வத்தப்³ப³மேவ நத்தீ²தி. பஞ்சமம் உத்தானமேவ.

6. மித்தஸுத்தவண்ணனா

146. ச²ட்டே² கம்மந்தம் காரேதீதி கே²த்தாதி³கம்மந்தம் காரேதி. அதி⁴கரணம் ஆதி³யதீதி சத்தாரி அதி⁴கரணானி ஆதி³யதி. பாமோக்கே²ஸு பி⁴க்கூ²ஸூதி தி³ஸாபாமோக்கே²ஸு பி⁴க்கூ²ஸு. படிவிருத்³தோ⁴ ஹோதீதி பச்சனீகக்³கா³ஹிதாய விருத்³தோ⁴ ஹோதி. அனவத்த²சாரிகந்தி அனவத்தா²னசாரிகம்.

7. அஸப்புரிஸதா³னஸுத்தவண்ணனா

147. ஸத்தமே அஸக்கச்சம் தே³தீதி ந ஸக்கரித்வா ஸுசிம் கத்வா தே³தி. அசித்தீகத்வா தே³தீதி அசித்தீகாரேன அகா³ரவவஸேன தே³தி. அபவித்³த⁴ம் தே³தீதி ந நிரந்தரம் தே³தி, அத² வா ச²ட்³டே³துகாமோ விய தே³தி. அனாக³மனதி³ட்டி²கோ தே³தீதி கதஸ்ஸ நாம ப²லம் ஆக³மிஸ்ஸதீதி ந ஏவம் ஆக³மனதி³ட்டி²ம் ந உப்பாதே³த்வா தே³தி.

ஸுக்கபக்கே² சித்தீகத்வா தே³தீதி தே³ய்யத⁴ம்மே ச த³க்கி²ணேய்யேஸு ச சித்தீகாரம் உபட்ட²பேத்வா தே³தி. தத்த² தே³ய்யத⁴ம்மம் பணீதம் ஓஜவந்தம் கத்வா தே³ந்தோ தே³ய்யத⁴ம்மே சித்தீகாரம் உபட்ட²பேதி நாம. புக்³க³லம் விசினித்வா தே³ந்தோ த³க்கி²ணேய்யேஸு சித்தீகாரம் உபட்ட²பேதி நாம. ஸஹத்தா² தே³தீதி ஆணத்தியா பரஹத்தே²ன அத³த்வா ‘‘அனமதக்³கே³ ஸம்ஸாரே விசரந்தேன மே ஹத்த²பாதா³னம் அலத்³த⁴காலஸ்ஸ பமாணம் நாம நத்தி², வட்டமோக்க²ம் ப⁴வனிஸ்ஸரணம் கரிஸ்ஸாமீ’’தி ஸஹத்தே²னேவ தே³தி. ஆக³மனதி³ட்டி²கோதி ‘‘அனாக³தப⁴வஸ்ஸ பச்சயோ ப⁴விஸ்ஸதீ’’தி கம்மஞ்ச விபாகஞ்ச ஸத்³த³ஹித்வா தே³தீதி.

8. ஸப்புரிஸதா³னஸுத்தவண்ணனா

148. அட்ட²மே ஸத்³தா⁴யாதி தா³னஞ்ச தா³னப²லஞ்ச ஸத்³த³ஹித்வா. காலேனாதி யுத்தப்பத்தகாலேன. அனக்³க³ஹிதசித்தோதி அக்³க³ஹிதசித்தோ முத்தசாகோ³ ஹுத்வா. அனுபஹச்சாதி அனுபகா⁴தேத்வா கு³ணே அமக்கே²த்வா. காலாக³தா சஸ்ஸ அத்தா² பசுரா ஹோந்தீதி அத்தா² ஆக³ச்ச²மானா வயோவுட்³ட⁴காலே அனாக³ந்த்வா யுத்தப்பத்தகாலே பட²மவயஸ்மிம்யேவ ஆக³ச்ச²ந்தி சேவ ப³ஹூ ச ஹோந்தி.

9. பட²மஸமயவிமுத்தஸுத்தவண்ணனா

149. நவமே ஸமயவிமுத்தஸ்ஸாதி அப்பிதப்பிதக்க²ணேயேவ விக்க²ம்பி⁴தேஹி கிலேஸேஹி விமுத்தத்தா ஸமயவிமுத்திஸங்கா²தாய லோகியவிமுத்தியா விமுத்தசித்தஸ்ஸ. த³ஸமம் உத்தானத்த²மேவ.

திகண்ட³கீவக்³கோ³ பஞ்சமோ.

ததியபண்ணாஸகம் நிட்டி²தம்.