5. அனுக்³க³ஹிதஸுத்தவண்ணனா

25. பஞ்சமே ஸம்மாதி³ட்டீ²தி விபஸ்ஸனாஸம்மாதி³ட்டி². சேதோவிமுத்திப²லாதிஆதீ³ஸு சேதோவிமுத்தீதி மக்³க³ப²லஸமாதி⁴. பஞ்ஞாவிமுத்தீதி ப²லஞாணம். ஸீலானுக்³க³ஹிதாதி ஸீலேன அனுக்³க³ஹிதா அனுரக்கி²தா. ஸுதானுக்³க³ஹிதாதி பா³ஹுஸச்சேன அனுக்³க³ஹிதா. ஸாகச்சா²னுக்³க³ஹிதாதி த⁴ம்மஸாகச்சா²ய அனுக்³க³ஹிதா. ஸமதா²னுக்³க³ஹிதாதி சித்தேகக்³க³தாய அனுக்³க³ஹிதா.

இமஸ்ஸ பனத்த²ஸ்ஸ ஆவிபா⁴வத்த²ம் மது⁴ரம்ப³பீ³ஜம் ரோபேத்வா ஸமந்தா மரியாத³ம் ப³ந்தி⁴த்வா காலானுகாலம் உத³கம் ஆஸிஞ்சித்வா காலானுகாலம் மூலானி ஸோதே⁴த்வா காலானுகாலம் பதிதபாணகே ஹாரேத்வா காலானுகாலம் மக்கடஜாலம் லுஞ்சித்வா அம்ப³ம் படிஜக்³க³ந்தோ புரிஸோ த³ஸ்ஸேதப்³போ³. தஸ்ஸ ஹி புரிஸஸ்ஸ மது⁴ரம்ப³பீ³ஜரோபனம் விய விபஸ்ஸனாஸம்மாதி³ட்டி² த³ட்ட²ப்³பா³, மரியாத³ப³ந்த⁴னம் விய ஸீலேன அனுக்³க³ண்ஹனம், உத³காஸேசனம் விய ஸுதேன அனுக்³க³ண்ஹனம், மூலபரிஸோத⁴னம் விய ஸாகச்சா²ய அனுக்³க³ண்ஹனம், பாணகஹரணம் விய ஜா²னவிபஸ்ஸனாபாரிபந்தி²கஸோத⁴னவஸேன ஸமதா²னுக்³க³ண்ஹனம், மக்கடஜாலலுஞ்சனம் விய ப³லவவிபஸ்ஸனானுக்³க³ண்ஹனம், ஏவம் அனுக்³க³ஹிதஸ்ஸ ருக்க²ஸ்ஸ கி²ப்பமேவ வட்³டி⁴த்வா ப²லப்பதா³னம் விய இமேஹி ஸீலாதீ³ஹி அனுக்³க³ஹிதாய மூலஸம்மாதி³ட்டி²யா கி²ப்பமேவ மக்³க³வஸேன வட்³டி⁴த்வா சேதோவிமுத்திபஞ்ஞாவிமுத்திப²லப்பதா³னம் வேதி³தப்³ப³ம்.