3. உபக்கிலேஸஸுத்தவண்ணனா

23. ததியே ந ச பப⁴ஸ்ஸரந்தி ந ச பபா⁴வந்தம். பப⁴ங்கு³ சாதி பபி⁴ஜ்ஜனஸபா⁴வம். அயோதி காளலோஹம். லோஹந்தி ட²பேத்வா இத⁴ வுத்தானி சத்தாரி அவஸேஸம் லோஹம். ஸஜ்ஜ²ந்தி ரஜதம். சித்தஸ்ஸாதி சாதுபூ⁴மககுஸலசித்தஸ்ஸ. தேபூ⁴மகஸ்ஸ தாவ உபக்கிலேஸா ஹோந்து, லோகுத்தரஸ்ஸ கத²ம் ஹோந்தீதி? உப்பஜ்ஜிதும் அப்பதா³னேன. யத³க்³கே³ன ஹி உப்பஜ்ஜிதும் ந தே³ந்தி, தத³க்³கே³னேவ தே லோகியஸ்ஸபி லோகுத்தரஸ்ஸபி உபக்கிலேஸா நாம ஹோந்தி. பப⁴ங்கு³ சாதி ஆரம்மணே சுண்ணவிசுண்ணபா⁴வூபக³மனேன பி⁴ஜ்ஜனஸபா⁴வம். ஸம்மா ஸமாதி⁴யதி ஆஸவானம் க²யாயாதி ஆஸவானம் க²யஸங்கா²தஸ்ஸ அரஹத்தஸ்ஸ அத்தா²ய ஹேதுனா காரணேன ஸமாதி⁴யதி. ஏத்தாவதா சித்தம் விஸோதே⁴த்வா அரஹத்தே பதிட்டி²தம் கீ²ணாஸவம் த³ஸ்ஸேதி. இதா³னிஸ்ஸ அபி⁴ஞ்ஞாபடிவேத⁴ம் த³ஸ்ஸேந்தோ யஸ்ஸ யஸ்ஸ சாதிஆதி³மாஹ. தம் உத்தானத்த²மேவாதி.