5. த³ட்ட²ப்³ப³ஸுத்தவண்ணனா

15. பஞ்சமே ஸவிஸயஸ்மிம்யேவ லோகியலோகுத்தரத⁴ம்மே கதே²தும் கத்த² ச, பி⁴க்க²வே, ஸத்³தா⁴ப³லம் த³ட்ட²ப்³ப³ந்திஆதி³மாஹ. யதா² ஹி சத்தாரோ ஸேட்டி²புத்தா, ராஜாதி ராஜபஞ்சமேஸு ஸஹாயேஸு ‘‘நக்க²த்தம் கீளிஸ்ஸாமா’’தி வீதி²ம் ஓதிண்ணேஸு ஏகஸ்ஸ ஸேட்டி²புத்தஸ்ஸ கே³ஹம் க³தகாலே இதரே சத்தாரோ துண்ஹீ நிஸீத³ந்தி, கே³ஹஸாமிகோவ ‘‘இமேஸம் கா²த³னீயம் போ⁴ஜனீயம் தே³த², க³ந்த⁴மாலாலங்காராதீ³னி தே³தா²’’தி கே³ஹே விசாரேதி. து³தியததியசதுத்த²ஸ்ஸ கே³ஹம் க³தகாலே இதரே சத்தாரோ துண்ஹீ நிஸீத³ந்தி, கே³ஹஸாமிகோவ ‘‘இமேஸம் கா²த³னீயம் போ⁴ஜனீயம் தே³த², க³ந்த⁴மாலாலங்காராதீ³னி தே³தா²’’தி கே³ஹே விசாரேதி. அத² ஸப்³ப³பச்சா² ரஞ்ஞோ கே³ஹம் க³தகாலே கிஞ்சாபி ராஜா ஸப்³ப³த்த² இஸ்ஸரோ, இமஸ்மிம் பன காலே அத்தனோ கே³ஹேயேவ ‘‘இமேஸம் கா²த³னீயம் போ⁴ஜனீயம் தே³த², க³ந்த⁴மாலாலங்காராதீ³னி தே³தா²’’தி விசாரேதி, ஏவமேவம் ஸத்³தா⁴பஞ்சமேஸு ப³லேஸு தேஸு ஸஹாயேஸு ஏகதோ வீதி²ம் ஓதரந்தேஸு விய ஏகாரம்மணே உப்பஜ்ஜமானேஸுபி யதா² பட²மஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவம் ஸோதாபத்தியங்கா³னி பத்வா அதி⁴மோக்க²லக்க²ணம் ஸத்³தா⁴ப³லமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தி. யதா² து³தியஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவம் ஸம்மப்பதா⁴னானி பத்வா பக்³க³ஹலக்க²ணம் வீரியப³லமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தி. யதா² ததியஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவம் ஸதிபட்டா²னானி பத்வா உபட்டா²னலக்க²ணம் ஸதிப³லமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தி. யதா² சதுத்த²ஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவம் ஜா²னவிமோக்கே² பத்வா அவிக்கே²பலக்க²ணம் ஸமாதி⁴ப³லமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தி. ஸப்³ப³பச்சா² ரஞ்ஞோ கே³ஹம் க³தகாலே பன யதா² இதரே சத்தாரோ துண்ஹீ நிஸீத³ந்தி, ராஜாவ கே³ஹே விசாரேதி, ஏவமேவ அரியஸச்சானி பத்வா பஜானனலக்க²ணம் பஞ்ஞாப³லமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தீதி ஏவமித⁴ பஞ்ச ப³லானி மிஸ்ஸகானி கதி²தானி. ச²ட்ட²ம் உத்தானத்த²மேவ. ஏவம் புரிமவக்³கே³ ச இத⁴ ச அட்ட²ஸு ஸுத்தேஸு ஸேக²ப³லானேவ கதி²தானி. கரண்ட³கோலவாஸீ மஹாத³த்தத்தே²ரோ பனாஹ – ‘‘ஹேட்டா² சதூஸு ஸுத்தேஸு ஸேக²ப³லானி கதி²தானி, உபரி சதூஸு அஸேக²ப³லானீ’’தி.