6. குஹஸுத்தவண்ணனா

26. ச²ட்டே² குஹாதி குஹகா. த²த்³தா⁴தி கோதே⁴ன ச மானேன ச த²த்³தா⁴. லபாதி உபலாபகா. ஸிங்கீ³தி ‘‘தத்த² கதமம் ஸிங்க³ம், யம் ஸிங்க³ம் ஸிங்கா³ரதா சாதுரதா சாதுரியம் பரிக்க²த்ததா பாரிக்க²த்திய’’ந்தி (விப⁴. 852) ஏவம் வுத்தேஹி ஸிங்க³ஸதி³ஸேஹி பாகடகிலேஸேஹி ஸமன்னாக³தா. உன்னளாதி உக்³க³தனளா துச்ச²மானம் உக்கி²பித்வா டி²தா. அஸமாஹிதாதி சித்தேகக்³க³மத்தஸ்ஸாபி அலாபி⁴னோ. ந மே தே, பி⁴க்க²வே, பி⁴க்கூ² மாமகாதி தே மய்ஹம் பி⁴க்கூ² மம ஸந்தகா ந ஹோந்தி. ‘‘தே மய்ஹ’’ந்தி இத³ம் பன ஸத்தா²ரம் உத்³தி³ஸ்ஸ பப்³ப³ஜிதத்தா வுத்தம். தே கோ² மே, பி⁴க்க²வே, பி⁴க்கூ² மாமகாதி இதா⁴பி மேதி அத்தானம் உத்³தி³ஸ்ஸ பப்³ப³ஜிதத்தா வத³தி, ஸம்மாபடிபன்னத்தா பன ‘‘மாமகா’’தி ஆஹ. வுத்³தி⁴ம் விரூள்ஹிம் வேபுல்லம் ஆபஜ்ஜந்தீதி ஸீலாதீ³ஹி கு³ணேஹி வட்³ட⁴னதோ வுத்³தி⁴ம், நிச்சலபா⁴வேன விரூள்ஹிம், ஸப்³ப³த்த² பத்த²டதாய வேபுல்லம் பாபுணந்தி. தே பனேதே யாவ அரஹத்தமக்³கா³ விருஹந்தி, அரஹத்தப²லம் பத்தே விரூள்ஹா நாம ஹோந்தி. இதி இமஸ்மிம் ஸுத்தேபி கா³தா²ஸுபி வட்டவிவட்டமேவ கதி²தம்.