10. பரிப்³பா³ஜகஸுத்தவண்ணனா

30. த³ஸமே அபி⁴ஞ்ஞாதாதி ஞாதா பாகடா. அன்னபா⁴ரோதிஆதீ³னி தேஸம் நாமானி. படிஸல்லானா வுட்டி²தோதி ப²லஸமாபத்திதோ வுட்டி²தோ. ஸா ஹி இத⁴ படிஸல்லானந்தி அதி⁴ப்பேதா. பச்சக்கா²யாதி படிக்கி²பித்வா. அபி⁴ஜ்ஜா²லுந்தி ஸதண்ஹம். காமேஸு திப்³ப³ஸாராக³ந்தி வத்து²காமேஸு ப³ஹலராக³ம். தமஹம் தத்த² ஏவம் வதே³ய்யந்தி தம் அஹம் தஸ்மிம் காரணே ஏவம் வதே³ய்யம். படிக்கோஸிதப்³ப³ம் மஞ்ஞேய்யாதி படிக்கோஸிதப்³பா³னி படிபா³ஹிதப்³ப³னி வா மஞ்ஞேய்ய. ஸஹத⁴ம்மிகாதி ஸகாரணா. வாதா³னுபாதாதி த⁴ம்மிகவாதே³ க⁴ட்டயமானா அத⁴ம்மிகவாதா³னுபாதா, வாத³ப்பவத்தியோதி அத்தோ². கா³ரய்ஹா டா²னாதி க³ரஹிதப்³ப³யுத்தகா பச்சயா. ஆக³ச்ச²ந்தீதி உபக³ச்ச²ந்தி.

உக்கலாதி உக்கலஜனபத³வாஸினோ. வஸ்ஸப⁴ஞ்ஞாதி வஸ்ஸோ ச ப⁴ஞ்ஞோ சாதி த்³வே ஜனா. அஹேதுகவாதா³தி ‘‘நத்தி² ஹேது நத்தி² பச்சயோ ஸத்தானம் விஸுத்³தி⁴யா’’திஏவமாதி³வாதி³னோ. அகிரியவாதா³தி ‘‘கரோதோ ந கரீயதி பாப’’ந்தி ஏவம் கிரியபடிக்கே²பவாதி³னோ. நத்தி²கவாதா³தி ‘‘நத்தி² தி³ன்ன’’ந்திஆதி³வாதி³னோ. தே இமேஸு தீஸுபி த³ஸ்ஸனேஸு ஓக்கந்தனியாமா அஹேஸும். கத²ம் பன தேஸு நியாமோ ஹோதீதி? யோ ஹி ஏவரூபம் லத்³தி⁴ம் க³ஹேத்வா ரத்திட்டா²னதி³வாட்டா²னேஸு நிஸின்னோ ஸஜ்ஜா²யதி வீமம்ஸதி, தஸ்ஸ ‘‘நத்தி² ஹேது நத்தி² பச்சயோ கரோதோ ந கரீயதி பாபம்…பே… நத்தி² தி³ன்னம்…பே… காயஸ்ஸ பே⁴தா³ உச்சி²ஜ்ஜதீ’’தி தஸ்மிம் ஆரம்மணே மிச்சா²ஸதி ஸந்திட்ட²தி, சித்தம் ஏகக்³க³ம் ஹோதி, ஜவனானி ஜவந்தி. பட²மஜவனே ஸதேகிச்சோ² ஹோதி, ததா² து³தியாதீ³ஸு, ஸத்தமே பு³த்³தா⁴னம்பி அதேகிச்சோ² அனிவத்தி அரிட்ட²கண்டகஸதி³ஸோ ஹோதி. தத்த² கோசி ஏகம் த³ஸ்ஸனம் ஓக்கமதி, கோசி த்³வே, கோசி தீணிபி. நியதமிச்சா²தி³ட்டி²கோவ ஹோதி, பத்தோ ஸக்³க³மக்³கா³வரணஞ்சேவ மோக்க²மக்³கா³வரணஞ்ச, அப⁴ப்³போ³ தஸ்ஸ அத்தபா⁴வஸ்ஸ அனந்தரம் ஸக்³க³ம்பி க³ந்தும், பகே³வ மோக்க²ம். வட்டகா²ணுகோ நாமேஸ ஸத்தோ பத²விகோ³பகோ, யேபு⁴ய்யேன ஏவரூபஸ்ஸ ப⁴வதோ வுட்டா²னம் நத்தி². வஸ்ஸப⁴ஞ்ஞாபி ஏதி³ஸா அஹேஸும். நிந்தா³ப்³யாரோஸனஉபாரம்ப⁴ப⁴யாதி அத்தனோ நிந்த³ப⁴யேன க⁴ட்டனப⁴யேன உபவாத³ப⁴யேன சாதி அத்தோ². அபி⁴ஜ்ஜா²வினயே ஸிக்க²ந்தி அபி⁴ஜ்ஜா²வினயோ வுச்சதி அரஹத்தம், அரஹத்தே ஸிக்க²மானோ அப்பமத்தோ நாம வுச்சதீதி ஸுத்தந்தே வட்டவிட்டம் கதே²த்வா கா³தா²ய ப²லஸமாபத்தி கதி²தாதி.

உருவேலவக்³கோ³ ததியோ.