1. யோதா⁴ஜீவஸுத்தவண்ணனா

134. சதுத்த²ஸ்ஸ பட²மே யுத்³த⁴ம் உபஜீவதீதி யோதா⁴ஜீவோ. ராஜாரஹோதி ரஞ்ஞோ அனுச்ச²விகோ. ராஜபோ⁴க்³கோ³தி ரஞ்ஞோ உபபோ⁴க³பரிபோ⁴கோ³. அங்க³ந்தேவ ஸங்க்²யம் க³ச்ச²தீதி ஹத்தோ² விய பாதோ³ விய ச அவஸ்ஸம் இச்சி²தப்³ப³த்தா அங்க³ந்தி ஸங்க்²யம் க³ச்ச²தி. தூ³ரே பாதீ ஹோதீதி உத³கே உஸப⁴மத்தம், த²லே அட்டு²ஸப⁴மத்தம், ததோ வா உத்தரிந்தி தூ³ரே கண்ட³ம் பாதேதி. து³ட்ட²கா³மணிஅப⁴யஸ்ஸ ஹி யோதா⁴ஜீவோ நவஉஸப⁴மத்தம் கண்ட³ம் பாதேஸி, பச்சி²மப⁴வே போ³தி⁴ஸத்தோ யோஜனப்பமாணம். அக்க²ணவேதீ⁴தி அவிராதி⁴தவேதீ⁴, அக்க²ணம் வா விஜ்ஜு விஜ்ஜந்தரிகாய விஜ்ஜி²தும் ஸமத்தோ²தி அத்தோ². மஹதோ காயஸ்ஸ பதா³லேதாதி ஏகதோப³த்³த⁴ம் ப²லகஸதம்பி மஹிம்ஸசம்மஸதம்பி அங்கு³ட்ட²பமாணப³ஹலம் லோஹபட்டம்பி சதுரங்கு³லப³ஹலம் அஸனபத³ரம்பி வித³த்தி²ப³ஹலம் உது³ம்ப³ரபத³ரம்பி தீ³க⁴ந்தேன வாலிகஸகடம்பி வினிவிஜ்ஜி²தும் ஸமத்தோ²தி அத்தோ². யம்கிஞ்சி ரூபந்திஆதி³ விஸுத்³தி⁴மக்³கே³ வித்தா²ரிதமேவ. நேதம் மமாதிஆதி³ தண்ஹாமானதி³ட்டி²படிக்கே²பவஸேன வுத்தம். ஸம்மப்பஞ்ஞாய பஸ்ஸதீதி ஸம்மா ஹேதுனா காரணேன ஸஹவிபஸ்ஸனாய மக்³க³பஞ்ஞாய பஸ்ஸதி. பதா³லேதீதி அரஹத்தமக்³கே³ன பதா³லேதி.