(10) 5. லோணகபல்லவக்³கோ³

1. அச்சாயிகஸுத்தவண்ணனா

93. பஞ்சமஸ்ஸ பட²மே அச்சாயிகானீதி அதிபாதிகானி. கரணீயானீதி அவஸ்ஸகிச்சானி. யஞ்ஹி ந அவஸ்ஸம் காதப்³ப³ம், தம் கிச்சந்தி வுச்சதி. அவஸ்ஸம் காதப்³ப³ம் கரணீயம் நாம. ஸீக⁴ம் ஸீக⁴ந்தி வேகே³ன வேகே³ன. தஸ்ஸ கோ² தந்தி ஏத்த² தந்தி நிபாதமத்தம். நத்தி² ஸா இத்³தி⁴ வா ஆனுபா⁴வோ வாதி ஸா வா இத்³தி⁴ ஸோ வா ஆனுபா⁴வோ நத்தி². உத்தரஸ்வேதி ததியதி³வஸே. உதுபரிணாமினீதி லத்³த⁴உதுபரிணாமானி ஹுத்வா. ஜாயந்திபீதி ததியதி³வஸே நிக்க²ந்தஸேதங்குரானி ஹோந்தி, ஸத்தாஹே பத்தே நீலங்குரானி ஹோந்தி. க³ப்³பீ⁴னிபி ஹோந்தீதி தி³யட்³ட⁴மாஸம் பத்வா க³ஹிதக³ப்³பா⁴னி ஹோந்தி. பச்சந்திபீதி தயோ மாஸே பத்வா பச்சந்தி. இதா³னி யஸ்மா பு³த்³தா⁴னம் க³ஹபதிகேன வா ஸஸ்ஸேஹி வா அத்தோ² நத்தி², ஸாஸனே பன தப்படிரூபகம் புக்³க³லம் வா அத்த²ம் வா த³ஸ்ஸேதும் தம் தம் ஓபம்மம் ஆஹரந்தி. தஸ்மா யமத்த²ம் த³ஸ்ஸேதுகாமேன ஏதம் ஆப⁴தம், தம் த³ஸ்ஸேந்தோ ஏவமேவ கோ²திஆதி³மாஹ. தம் அத்த²தோ உத்தானமேவ. ஸிக்கா² பன இதா⁴பி மிஸ்ஸிகா ஏவ கதி²தா.

2. பவிவேகஸுத்தவண்ணனா

94. து³தியே சீவரபவிவேகந்தி சீவரம் நிஸ்ஸாய உப்பஜ்ஜனககிலேஸேஹி விவித்தபா⁴வம். ஸேஸத்³வயேபி ஏஸேவ நயோ. ஸாணானீதி ஸாணவாகசேலானி. மஸாணானீதி மிஸ்ஸகசேலானி. ச²வது³ஸ்ஸானீதி மதஸரீரதோ ச²ட்³டி³தவத்தா²னி, ஏரகதிணாதீ³னி வா க³ந்தே²த்வா கதனிவாஸனானி. பம்ஸுகூலானீதி பத²வியம் ச²ட்³டி³தனந்தகானி. திரீடானீதி ருக்க²தசவத்தா²னி. அஜினானீதி அஜினமிக³சம்மானி. அஜினக்கி²பந்தி ததே³வ மஜ்ஜே² பா²லிதம், ஸஹகு²ரகந்திபி வத³ந்தி. குஸசீரந்தி குஸதிணானி க³ந்தே²த்வா கதசீரம். வாகசீரப²லகசீரேஸுபி ஏஸேவ நயோ. கேஸகம்ப³லந்தி மனுஸ்ஸகேஸேஹி கதகம்ப³லம். வாலகம்ப³லந்தி அஸ்ஸவாலாதீ³ஹி கதகம்ப³லம். உலூகபக்கி²கந்தி உலூகபத்தானி க³ந்தே²த்வா கதனிவாஸனம்.

ஸாகப⁴க்கா²தி அல்லஸாகப⁴க்கா². ஸாமாகப⁴க்கா²தி ஸாமாகதண்டு³லப⁴க்கா². நீவாராதீ³ஸு நீவாரா நாம அரஞ்ஞே ஸயம் ஜாதவீஹிஜாதி. த³த்³து³லந்தி சம்மகாரேஹி சம்மம் லிகி²த்வா ச²ட்³டி³தகஸடம். ஹடம் வுச்சதி ஸிலேஸோபி ஸேவாலோபி கணிகாராதி³ருக்க²னிய்யாஸோபி. கணந்தி குண்ட³கம். ஆசாமோதி ப⁴த்தஉக்க²லிகாய லக்³கோ³ ஜா²மஓத³னோ. தம் ச²ட்³டி³தட்டா²னே க³ஹேத்வா கா²த³ந்தி, ஓத³னகஞ்ஜியந்திபி வத³ந்தி. பிஞ்ஞாகாத³யோ பாகடாவ. பவத்தப²லபோ⁴ஜீதி பதிதப²லபோ⁴ஜீ. பு⁴ஸாகா³ரந்தி க²லஸாலம்.

ஸீலவாதி சதுபாரிஸுத்³தி⁴ஸீலேன ஸமன்னாக³தோ. து³ஸ்ஸீல்யஞ்சஸ்ஸ பஹீனம் ஹோதீதி பஞ்ச து³ஸ்ஸீல்யானி பஹீனானி ஹோந்தி. ஸம்மாதி³ட்டி²கோதி யாதா²வதி³ட்டி²கோ. மிச்சா²தி³ட்டீ²தி அயாதா²வதி³ட்டி². ஆஸவாதி சத்தாரோ ஆஸவா. அக்³க³ப்பத்தோதி ஸீலக்³க³ப்பத்தோ. ஸாரப்பத்தோதி ஸீலஸாரம் பத்தோ. ஸுத்³தோ⁴தி பரிஸுத்³தோ⁴. ஸாரே பதிட்டி²தோதி ஸீலஸமாதி⁴பஞ்ஞாஸாரே பதிட்டி²தோ.

ஸேய்யதா²பீதி யதா² நாம. ஸம்பன்னந்தி பரிபுண்ணம் பரிபக்கஸாலிப⁴ரிதம். ஸங்க⁴ராபேய்யாதி ஸங்கட்³டா⁴பேய்ய. உப்³ப³ஹாபேய்யாதி க²லட்டா²னம் ஆஹராபேய்ய. பு⁴ஸிகந்தி பு⁴ஸம். கோட்டாபேய்யாதி உது³க்க²லே பக்கி²பாபேத்வா முஸலேஹி பஹராபேய்ய. அக்³க³ப்பத்தானீதி தண்டு³லக்³க³ம் பத்தானி. ஸாரப்பத்தாதீ³ஸுபி ஏஸேவ நயோ. ஸேஸம் உத்தானமேவ. யம் பனேத்த² ‘‘து³ஸ்ஸீல்யஞ்சஸ்ஸ பஹீனம் மிச்சா²தி³ட்டி² சஸ்ஸ பஹீனா’’தி வுத்தம், தம் ஸோதாபத்திமக்³கே³ன பஹீனபா⁴வம் ஸந்தா⁴ய வுத்தந்தி வேதி³தப்³ப³ம்.

3. ஸரத³ஸுத்தவண்ணனா

95. ததியே வித்³தே⁴தி வலாஹகவிக³மேன தூ³ரீபூ⁴தே. தே³வேதி ஆகாஸே. அபி⁴விஹச்சாதி அபி⁴விஹனித்வா. யதோதி யஸ்மிம் காலே. விரஜந்தி ராக³ரஜாதி³ரஹிதம். தேஸம்யேவ மலானம் விக³தத்தா வீதமலம். த⁴ம்மசக்கு²ந்தி சதுஸச்சத⁴ம்மபரிக்³கா³ஹகம் ஸோதாபத்திமக்³க³சக்கு²ம். நத்தி² தம் ஸம்யோஜனந்தி து³வித⁴மேவஸ்ஸ ஸம்யோஜனம் நத்தி², இதரம்பி பன புன இமம் லோகம் ஆனேதும் அஸமத்த²தாய நத்தீ²தி வுத்தம். இமஸ்மிம் ஸுத்தே ஜா²னானாகா³மீ நாம கதி²தோதி.

4. பரிஸாஸுத்தவண்ணனா

96. சதுத்தே² ந பா³ஹுலிகா ஹோந்தீதி பச்சயபா³ஹுல்லிகா ந ஹோந்தி. ந ஸாத²லிகாதி திஸ்ஸோ ஸிக்கா² ஸிதி²லம் கத்வா ந க³ண்ஹந்தி. ஓக்கமனே நிக்கி²த்தது⁴ராதி ஓக்கமனம் வுச்சதி அவக³மனட்டே²ன பஞ்ச நீவரணானி, தேஸு நிக்கி²த்தது⁴ரா. பவிவேகே புப்³ப³ங்க³மாதி காயசித்தஉபதி⁴விவேகஸங்கா²தே திவிதே⁴பி விவேகே புப்³ப³ங்க³மா. வீரியம் ஆரப⁴ந்தீதி து³வித⁴ம்பி வீரியம் பக்³க³ண்ஹந்தி. அப்பத்தஸ்ஸாதி ஜா²னவிபஸ்ஸனாமக்³க³ப²லஸங்கா²தஸ்ஸ அப்பத்தவிஸேஸஸ்ஸ. ஸேஸபத³த்³வயேபி ஏஸேவ நயோ. பச்சி²மா ஜனதாதி ஸத்³தி⁴விஹாரிகஅந்தேவாஸிகாத³யோ. தி³ட்டா²னுக³திம் ஆபஜ்ஜதீதி ஆசரியுபஜ்ஜா²யேஹி கதம் அனுகரோதி. யம் தாய ஜனதாய ஆசரியுபஜ்ஜா²யேஸு தி³ட்ட²ம், தஸ்ஸ அனுக³திம் ஆபஜ்ஜதி நாம. அயம் வுச்சதி, பி⁴க்க²வே, அக்³க³வதீ பரிஸாதி, பி⁴க்க²வே, அயம் பரிஸா அக்³க³புக்³க³லவதீ நாம வுச்சதி.

ப⁴ண்ட³னஜாதாதி ஜாதப⁴ண்ட³னா. கலஹஜாதாதி ஜாதகலஹா. ப⁴ண்ட³னந்தி சேத்த² கலஹஸ்ஸ புப்³ப³பா⁴கோ³, ஹத்த²பராமாஸாதி³வஸேன வீதிக்கமோ கலஹோ நாம. விவாதா³பன்னாதி விருத்³த⁴வாத³ம் ஆபன்னா. முக²ஸத்தீஹீதி கு³ணவிஜ்ஜ²னட்டே²ன ப²ருஸா வாசா ‘‘முக²ஸத்தியோ’’தி வுச்சந்தி, தாஹி முக²ஸத்தீஹி. விதுத³ந்தா விஹரந்தீதி விஜ்ஜ²ந்தா விசரந்தி.

ஸமக்³கா³தி ஸஹிதா. ஸம்மோத³மானாதி ஸமப்பவத்தமோதா³. கீ²ரோத³கீபூ⁴தாதி கீ²ரோத³கம் விய பூ⁴தா. பியசக்கூ²ஹீதி உபஸந்தேஹி மேத்தசக்கூ²ஹி. பீதி ஜாயதீதி பஞ்சவண்ணா பீதி உப்பஜ்ஜதி. காயோ பஸ்ஸம்ப⁴தீதி நாமகாயோபி ரூபகாயோபி விக³தத³ரதோ² ஹோதி. பஸ்ஸத்³த⁴காயோதி அஸாரத்³த⁴காயோ. ஸுக²ம் வேதி³யதீதி காயிகசேதஸிகஸுக²ம் வேதி³யதி. ஸமாதி⁴யதீதி ஆரம்மணே ஸம்மா ட²பீயதி.

து²ல்லபு²ஸிதகேதி மஹாபு²ஸிதகே. பப்³ப³தகந்த³ரபத³ரஸாகா²தி ஏத்த² கந்த³ரோ நாம ‘‘க’’ந்தி லத்³த⁴னாமேன உத³கேன தா³ரிதோ உத³கபி⁴ன்னோ பப்³ப³தப்பதே³ஸோ, யோ ‘‘நிதம்போ⁴’’திபி ‘‘நதி³குஞ்ஜோ’’திபி வுச்சதி. பத³ரம் நாம அட்ட² மாஸே தே³வே அவஸ்ஸந்தே ப²லிதோ பூ⁴மிப்பதே³ஸோ. ஸாகா²தி குஸோப்³ப⁴கா³மினியோ கு²த்³த³கமாதிகாயோ. குஸோப்³பா⁴தி கு²த்³த³கஆவாடா. மஹாஸோப்³பா⁴தி மஹாஆவாடா. குன்னதி³யோதி கு²த்³த³கனதி³யோ. மஹானதி³யோதி க³ங்கா³யமுனாதி³கா மஹாஸரிதா.

5-7. பட²மஆஜானீயஸுத்தாதி³வண்ணனா

97-99. பஞ்சமே அங்கே³ஹீதி கு³ணங்கே³ஹி. ராஜாரஹோதி ரஞ்ஞோ அரஹோ அனுச்ச²விகோ. ராஜபோ⁴க்³கோ³தி ரஞ்ஞோ உபபோ⁴க³பூ⁴தோ. ரஞ்ஞோ அங்க³ந்தி ரஞ்ஞோ ஹத்த²பாதா³தி³அங்க³ஸமதாய அங்க³ந்தேவ ஸங்க²ம் க³ச்ச²தி. வண்ணஸம்பன்னோதி ஸரீரவண்ணேன ஸம்பன்னோ. ப³லஸம்பன்னோதி காயப³லேன ஸம்பன்னோ. ஆஹுனேய்யோதி ஆஹுதிஸங்கா²தம் பிண்ட³பாதம் படிக்³க³ஹேதும் யுத்தோ. பாஹுனேய்யோதி பாஹுனகப⁴த்தஸ்ஸ அனுச்ச²விகோ. த³க்கி²ணேய்யோதி த³ஸவித⁴தா³னவத்து²பரிச்சாக³வஸேன ஸத்³தா⁴தா³னஸங்கா²தாய த³க்கி²ணாய அனுச்ச²விகோ. அஞ்ஜலிகரணீயோதி அஞ்ஜலிபக்³க³ஹணஸ்ஸ அனுச்ச²விகோ. அனுத்தரம் புஞ்ஞக்கே²த்தம் லோகஸ்ஸாதி ஸப்³ப³லோகஸ்ஸ அஸதி³ஸம் புஞ்ஞவிருஹனட்டா²னம்.

வண்ணஸம்பன்னோதி கு³ணவண்ணேன ஸம்பன்னோ. ப³லஸம்பன்னோதி வீரியப³லேன ஸம்பன்னோ. ஜவஸம்பன்னோதி ஞாணஜவேன ஸம்பன்னோ. தா²மவாதி ஞாணதா²மேன ஸமன்னாக³தோ. த³ள்ஹபரக்கமோதி தி²ரபரக்கமோ. அனிக்கி²த்தது⁴ரோதி அட்ட²பிதது⁴ரோ பக்³க³ஹிதது⁴ரோ, அக்³க³ப²லம் அரஹத்தம் அப்பத்வா வீரியது⁴ரம் ந நிக்கி²பிஸ்ஸாமீதி ஏவம் படிபன்னோ. இமஸ்மிம் ஸுத்தே சதுஸச்சவஸேன ஸோதாபத்திமக்³கோ³, ஸோதாபத்திமக்³கே³ன ச ஞாணஜவஸம்பன்னதா கதி²தாதி. ச²ட்டே² தீணி ச மக்³கா³னி தீணி ச ப²லானி, தீஹி மக்³க³ப²லேஹி ச ஞாணஜவஸம்பன்னதா கதி²தா. ஸத்தமே அரஹத்தப²லம், அரஹத்தப²லேனேவ ச மக்³க³கிச்சம் கதி²தம். ப²லம் பன ஜவிதஜவேன உப்பஜ்ஜனதோ ஜவோதி ச வத்தும் வட்டதி.

8. போத்த²கஸுத்தவண்ணனா

100. அட்ட²மே நவோதி கரணம் உபாதா³ய வுச்சதி. போத்த²கோதி வாகமயவத்த²ம். மஜ்ஜி²மோதி பரிபோ⁴க³மஜ்ஜி²மோ. ஜிண்ணோதி பரிபோ⁴க³ஜிண்ணோ. உக்க²லிபரிமஜ்ஜனந்தி உக்க²லிபரிபுஞ்ச²னம் து³ஸ்ஸீலோதி நிஸ்ஸீலோ. து³ப்³ப³ண்ணதாயாதி கு³ணவண்ணாபா⁴வேன து³ப்³ப³ண்ணதாய. தி³ட்டா²னுக³திம் ஆபஜ்ஜந்தீதி தேன கதம் அனுகரோந்தி. ந மஹப்ப²லம் ஹோதீதி விபாகப²லேன மஹப்ப²லம் ந ஹோதி. ந மஹானிஸம்ஸந்தி விபாகானிஸம்ஸேனேவ ந மஹானிஸம்ஸம். அப்பக்³க⁴தாயாதி விபாகக்³கே⁴ன அப்பக்³க⁴தாய. காஸிகம் வத்த²ந்தி தீஹி கப்பாஸஅம்ஸூஹி ஸுத்தம் கந்தித்வா கதவத்த²ம், தஞ்ச கோ² காஸிரட்டே²யேவ உட்டி²தம். ஸேஸம் உத்தானமேவ. ஸீலம் பனேத்த² மிஸ்ஸகம் கதி²தந்தி.

9. லோணகபல்லஸுத்தவண்ணனா

101. நவமே யதா² யதா²யந்தி யதா² யதா² அயம். ததா² ததா² தந்தி ததா² ததா² தம் கம்மம். இத³ம் வுத்தம் ஹோதி – யோ ஏவம் வதே³ய்ய – ‘‘யதா² யதா² கம்மம் கரோதி, ததா² ததா²ஸ்ஸ விபாகம் படிஸம்வேதி³யதேவ. ந ஹி ஸக்கா கதஸ்ஸ கம்மஸ்ஸ விபாகம் படிஸேதே⁴தும். தஸ்மா யத்தகம் கம்மம் கரோதி, தத்தகஸ்ஸ விபாகம் படிஸம்வேதி³யதேவா’’தி. ஏவம் ஸந்தந்தி ஏவம் ஸந்தே. ப்³ரஹ்மசரியவாஸோ ந ஹோதீதி யம் மக்³க³பா⁴வனதோ புப்³பே³ உபபஜ்ஜவேத³னீயம் கம்மம் கதம், தஸ்ஸ அவஸ்ஸம் படிஸம்வேத³னீயத்தா ப்³ரஹ்மசரியம் வுத்த²ம்பி அவுத்த²மேவ ஹோதி. ஓகாஸோ ந பஞ்ஞாயதி ஸம்மா து³க்க²ஸ்ஸ அந்தகிரியாயாதி யஸ்மா ச ஏவம் ஸந்தே தேன கம்மாயூஹனஞ்சேவ விபாகானுப⁴வனா ச ஹோதி, தஸ்மா ஹேதுனா நயேன வட்டது³க்க²ஸ்ஸ அந்தகிரியாய ஓகாஸோ ந பஞ்ஞாயதி நாம.

யதா² யதா² வேத³னீயந்தி யேன யேனாகாரேன வேதி³தப்³ப³ம். ததா² ததா²ஸ்ஸ விபாகம் படிஸம்வேதி³யதீதி தேன தேனாகாரேன அஸ்ஸ விபாகம் பச்சனுபோ⁴தி. இத³ம் வுத்தம் ஹோதி – யதே³தம் ஸத்தஸு ஜவனேஸு பட²மஜவனகம்மம் ஸதி பச்சயே விபாகவாரம் லப⁴ந்தமேவ தி³ட்ட²த⁴ம்மவேத³னீயம் ஹோதி, அஸதி அஹோஸிகம்மம் நாம. யஞ்ச ஸத்தமஜவனகம்மம் ஸதி பச்சயே உபபஜ்ஜவேத³னீயம் ஹோதி, அஸதி அஹோஸிகம்மம் நாம. யஞ்ச மஜ்ஜே² பஞ்சஜவனகம்மம் யாவ ஸம்ஸாரப்பவத்தி, தாவ அபரபரியாயவேத³னீயம் நாம ஹோதி. ஏதேஸு ஆகாரேஸு யேன யேனாகாரேன வேதி³தப்³ப³ம் கம்மம் அயம் புரிஸோ கரோதி, தேன தேனேவஸ்ஸ விபாகம் படிஸம்வேதி³யதி நாம. அட்ட²கதா²யஞ்ஹி லத்³த⁴விபாகவாரமேவ கம்மம் யதா²வேத³னீயம் கம்மம் நாமாதி வுத்தம். ஏவம் ஸந்தம், பி⁴க்க²வே, ப்³ரஹ்மசரியவாஸோ ஹோதீதி கம்மக்க²யகரஸ்ஸ ப்³ரஹ்மசரியஸ்ஸ கே²பேதப்³ப³கம்மஸம்ப⁴வதோ வாஸோ நாம ஹோதி, வுத்த²ம் ஸுவுத்த²மேவ ஹோதீதி அத்தோ². ஓகாஸோ பஞ்ஞாயதி ஸம்மா து³க்க²ஸ்ஸ அந்தகிரியாயாதி யஸ்மா ஏவம் ஸந்தே தேன தேன மக்³கே³ன அபி⁴ஸங்கா²ரவிஞ்ஞாணஸ்ஸ நிரோதே⁴ன தேஸு தேஸு ப⁴வேஸு ஆயதிம் வட்டது³க்க²ம் ந உப்பஜ்ஜதி, தஸ்மா ஓகாஸோ பஞ்ஞாயதி ஸம்மா து³க்க²ஸ்ஸ அந்தகிரியாய.

இதா³னி தம் யதா²வேத³னீயகம்மஸபா⁴வம் த³ஸ்ஸேந்தோ இத⁴, பி⁴க்க²வே, ஏகச்சஸ்ஸாதிஆதி³மாஹ. தத்த² அப்பமத்தகந்தி பரித்தம் தோ²கம் மந்த³ம் லாமகம். தாதி³ஸம்யேவாதி தம்ஸரிக்க²கமேவ. தி³ட்ட²த⁴ம்மவேத³னீயந்தி தஸ்மிம் கம்மேயேவ தி³ட்ட²த⁴ம்மே விபச்சிதப்³ப³ம் விபாகவாரம் லப⁴ந்தம் தி³ட்ட²த⁴ம்மவேத³னீயம் ஹோதி. நாணுபி கா²யதீதி து³தியே அத்தபா⁴வே அணுபி ந கா²யதி, அணுமத்தம்பி து³தியே அத்தபா⁴வே விபாகம் ந தே³தீதி அத்தோ². ப³ஹுதே³வாதி ப³ஹுகம் பன விபாகம் கிமேவ த³ஸ்ஸதீதி அதி⁴ப்பாயோ. அபா⁴விதகாயோதிஆதீ³ஹி காயபா⁴வனாரஹிதோ வட்டகா³மீ புது²ஜ்ஜனோ த³ஸ்ஸிதோ. பரித்தோதி பரித்தகு³ணோ. அப்பாதுமோதி ஆதுமா வுச்சதி அத்தபா⁴வோ, தஸ்மிம் மஹந்தேபி கு³ணபரித்ததாய அப்பாதுமோயேவ. அப்பது³க்க²விஹாரீதி அப்பகேனபி பாபேன து³க்க²விஹாரீ. பா⁴விதகாயோதிஆதீ³ஹி கீ²ணாஸவோ த³ஸ்ஸிதோ. ஸோ ஹி காயானுபஸ்ஸனாஸங்கா²தாய காயபா⁴வனாய பா⁴விதகாயோ நாம. காயஸ்ஸ வா வட்³டி⁴தத்தா பா⁴விதகாயோ. பா⁴விதஸீலோதி வட்³டி⁴தஸீலோ. ஸேஸபத³த்³வயேபி ஏஸேவ நயோ. பஞ்சத்³வாரபா⁴வனாய வா பா⁴விதகாயோ. ஏதேன இந்த்³ரியஸம்வரஸீலம் வுத்தம், பா⁴விதஸீலோதி இமினா ஸேஸானி தீணி ஸீலானி. அபரித்தோதி ந பரித்தகு³ணோ. மஹத்தோதி அத்தபா⁴வே பரித்தேபி கு³ணமஹந்ததாய மஹத்தோ. அப்பமாணவிஹாரீதி கீ²ணாஸவஸ்ஸேதம் நாமமேவ. ஸோ ஹி பமாணகரானம் ராகா³தீ³னம் அபா⁴வேன அப்பமாணவிஹாரீ நாம.

பரித்தேதி கு²த்³த³கே. உத³கமல்லகேதி உத³கஸராவே. ஓரப்³பி⁴கோதி உரப்³ப⁴ஸாமிகோ. உரப்³ப⁴கா⁴தகோதி ஸூனகாரோ. ஜாபேதும் வாதி த⁴னஜானியா ஜாபேதும். ஜா²பேதுந்திபி பாடோ², அயமேவத்தோ². யதா²பச்சயம் வா காதுந்தி யதா² இச்ச²தி, ததா² காதும். உரப்³ப⁴த⁴னந்தி ஏளகஅக்³க⁴னகமூலம். ஸோ பனஸ்ஸ ஸசே இச்ச²தி, தே³தி. நோ சே இச்ச²தி, கீ³வாயம் க³ஹேத்வா நிக்கட்³டா⁴பேதி. ஸேஸம் வுத்தனயேனேவ வேதி³தப்³ப³ம். இமஸ்மிம் பன ஸுத்தே வட்டவிவட்டம் கதி²தந்தி.

10. பம்ஸுதோ⁴வகஸுத்தவண்ணனா

102. த³ஸமே தோ⁴வதீதி விக்கா²லேதி. ஸந்தோ⁴வதீதி ஸுட்டு² தோ⁴வதி, புனப்புனம் தோ⁴வதி. நித்³தோ⁴வதீதி நிக்³க³ண்ஹித்வா தோ⁴வதி. அனித்³த⁴ந்தகஸாவந்தி அனீஹததோ³ஸம் அனபனீதகஸாவம். பப⁴ங்கூ³தி பபி⁴ஜ்ஜனஸபா⁴வம், அதி⁴கரணீயம் ட²பேத்வா முட்டி²காய பஹடமத்தம் பி⁴ஜ்ஜதி. பட்டிகாயாதி ஸுவண்ணபட்டகாய. கீ³வேய்யகேதி கீ³வாலங்காரே.

அதி⁴சித்தந்தி ஸமத²விபஸ்ஸனாசித்தம். அனுயுத்தஸ்ஸாதி பா⁴வேந்தஸ்ஸ. ஸசேதஸோதி சித்தஸம்பன்னோ. த³ப்³ப³ஜாதிகோதி பண்டி³தஜாதிகோ. காமவிதக்காதீ³ஸு காமே ஆரப்³ப⁴ உப்பன்னோ விதக்கோ காமவிதக்கோ. ப்³யாபாத³விஹிம்ஸஸம்பயுத்தா விதக்கா ப்³யாபாத³விஹிம்ஸவிதக்கா நாம. ஞாதிவிதக்காதீ³ஸு ‘‘அம்ஹாகம் ஞாதகா ப³ஹூ புஞ்ஞவந்தா’’திஆதி³னா நயேன ஞாதகே ஆரப்³ப⁴ உப்பன்னோ விதக்கோ ஞாதிவிதக்கோ. ‘‘அஸுகோ ஜனபதோ³ கே²மோ ஸுபி⁴க்கோ²’’திஆதி³னா நயேன ஜனபத³மாரப்³ப⁴ உப்பன்னோ விதக்கோ ஜனபத³விதக்கோ. ‘‘அஹோ வத மம் பரே ந அவஜானேய்யு’’ந்தி ஏவம் உப்பன்னோ விதக்கோ அனவஞ்ஞத்திபடிஸம்யுத்தோ விதக்கோ நாம. த⁴ம்மவிதக்காவஸிஸ்ஸந்தீதி த⁴ம்மவிதக்கா நாம த³ஸவிபஸ்ஸனுபக்கிலேஸவிதக்கா. ஸோ ஹோதி ஸமாதி⁴ ந சேவ ஸந்தோதி ஸோ அவஸிட்ட²த⁴ம்மவிதக்கோ விபஸ்ஸனாஸமாதி⁴ அவூபஸந்தகிலேஸத்தா ஸந்தோ ந ஹோதி. ந பணீதோதி ந அதப்பகோ. நப்படிப்பஸ்ஸத்³தி⁴லத்³தோ⁴தி ந கிலேஸபடிப்பஸ்ஸத்³தி⁴யா லத்³தோ⁴. ந ஏகோதி³பா⁴வாதி⁴க³தோதி ந ஏகக்³க³பா⁴வப்பத்தோ. ஸஸங்கா²ரனிக்³க³ய்ஹவாரிதக³தோதி ஸஸங்கா²ரேன ஸப்பயோகே³ன கிலேஸே நிக்³க³ண்ஹித்வா வாரேத்வா வாரிதோ, ந கிலேஸானம் சி²ன்னந்தே உப்பன்னோ, கிலேஸே பன வாரேத்வா உப்பன்னோ.

ஹோதி ஸோ, பி⁴க்க²வே, ஸமயோதி ஏத்த² ஸமயோ நாம உதுஸப்பாயம் ஆஹாரஸப்பாயம் ஸேனாஸனஸப்பாயம் புக்³க³லஸப்பாயம் த⁴ம்மஸ்ஸவனஸப்பாயந்தி இமேஸம் பஞ்சன்னம் ஸப்பாயானம் படிலாப⁴காலோ. யம் தம் சித்தந்தி யஸ்மிம் ஸமயே தம் விபஸ்ஸனாசித்தம். அஜ்ஜ²த்தம்யேவ ஸந்திட்ட²தீதி அத்தனியேவ திட்ட²தி. நியகஜ்ஜ²த்தஞ்ஹி இத⁴ அஜ்ஜ²த்தம் நாம. கோ³சரஜ்ஜ²த்தம்பி வட்டதி. புது²த்தாரம்மணம் பஹாய ஏகஸ்மிம் நிப்³பா³னகோ³சரேயேவ திட்ட²தீதி வுத்தம் ஹோதி. ஸன்னிஸீத³தீதி ஸுட்டு² நிஸீத³தி. ஏகோதி³ ஹோதீதி ஏகக்³க³ம் ஹோதி. ஸமாதி⁴யதீதி ஸம்மா ஆதி⁴யதி. ஸந்தோதிஆதீ³ஸு பச்சனீககிலேஸவூபஸமேன ஸந்தோ. அதப்பகட்டே²ன பணீதோ. கிலேஸபடிப்பஸ்ஸத்³தி⁴யா லத்³த⁴த்தா படிப்பஸ்ஸத்³த⁴லத்³தோ⁴. ஏகக்³க³பா⁴வம் க³தத்தா ஏகோதி³பா⁴வாதி⁴க³தோ. கிலேஸானம் சி²ன்னந்தே உப்பன்னத்தா ந ஸப்பயோகே³ன கிலேஸே நிக்³க³ண்ஹித்வா வாரேத்வா வாரிதோதி ந ஸஸங்கா²ரனிக்³க³ய்ஹவாரிதக³தோ. ஏத்தாவதா அயம் பி⁴க்கு² விவட்டேத்வா அரஹத்தம் பத்தோ நாம ஹோதி.

இதா³னி கீ²ணாஸவஸ்ஸ ஸதோ அபி⁴ஞ்ஞாபடிபத³ம் த³ஸ்ஸேந்தோ யஸ்ஸ யஸ்ஸ சாதிஆதி³மாஹ. தத்த² அபி⁴ஞ்ஞா ஸச்சி²கரணீயஸ்ஸாதி அபி⁴ஜானித்வா பச்சக்க²ம் காதப்³ப³ஸ்ஸ. ஸதி ஸதிஆயதனேதி புப்³ப³ஹேதுஸங்கா²தே சேவ இதா³னி ச படிலத்³த⁴ப்³பே³ அபி⁴ஞ்ஞாபாத³கஜ்ஜா²னாதி³பே⁴தே³ ச ஸதி ஸதிகாரணே. வித்தா²ரதோ பன அயம் அபி⁴ஞ்ஞாகதா² விஸுத்³தி⁴மக்³கே³ (விஸுத்³தி⁴. 2.365 ஆத³யோ) வுத்தனயேனேவ வேதி³தப்³பா³. ஆஸவானம் க²யாதிஆதி³ சேத்த² ப²லஸமாபத்திவஸேன வுத்தந்தி வேதி³தப்³ப³ம்.

11. நிமித்தஸுத்தவண்ணனா

103. ஏகாத³ஸமேபி அதி⁴சித்தம் ஸமத²விபஸ்ஸனாசித்தமேவ. தீணி நிமித்தானீதி தீணி காரணானி. காலேன காலந்தி காலே காலே, யுத்தகாலேதி அத்தோ². காலேன காலம் ஸமாதி⁴னிமித்தம் மனஸிகாதப்³ப³ந்திஆதீ³ஸு தம் தம் காலம் ஸல்லக்கே²த்வா ஏகக்³க³தாய யுத்தகாலே ஏகக்³க³தா மனஸிகாதப்³பா³. ஏகக்³க³தா ஹி இத⁴ ஸமாதி⁴னிமித்தந்தி வுத்தா. தத்ர வசனத்தோ² – ஸமாதி⁴யேவ நிமித்தம் ஸமாதி⁴னிமித்தம். ஸேஸபத³த்³வயேபி ஏஸேவ நயோ. பக்³க³ஹோதி பன வீரியஸ்ஸ நாமம், உபேக்கா²தி மஜ்ஜ²த்தபா⁴வஸ்ஸ. தஸ்மா வீரியஸ்ஸ யுத்தகாலே வீரியம் மனஸிகாதப்³ப³ம், மஜ்ஜ²த்தபா⁴வஸ்ஸ யுத்தகாலே மஜ்ஜ²த்தபா⁴வே டா²தப்³ப³ந்தி. டா²னம் தம் சித்தம் கோஸஜ்ஜாய ஸம்வத்தேய்யாதி காரணம் விஜ்ஜதி யேன தம் சித்தம் கோஸஜ்ஜபா⁴வே திட்டே²ய்ய. இதரேஸுபி ஏஸேவ நயோ. உபேக்கா²னிமித்தம்யேவ மனஸி கரேய்யாதி ஏத்த² ச ஞாணஜவம் உபேக்கே²ய்யாதி அயமத்தோ². ஆஸவானம் க²யாயாதி அரஹத்தப²லத்தா²ய.

உக்கம் ப³ந்தே⁴ய்யாதி அங்கா³ரகபல்லம் ஸஜ்ஜேய்ய. ஆலிம்பேய்யாதி தத்த² அங்கா³ரே பக்கி²பித்வா அக்³கி³ம் த³த்வா நாளிகாய த⁴மந்தோ அக்³கி³ம் கா³ஹாபேய்ய. உக்காமுகே² பக்கி²பேய்யாதி அங்கா³ரே வியூஹித்வா அங்கா³ரமத்த²கே வா ட²பேய்ய, மூஸாய வா பக்கி²பேய்ய. அஜ்ஜு²பேக்க²தீதி பக்காபக்கபா⁴வம் உபதா⁴ரேதி.

ஸம்மா ஸமாதி⁴யதி ஆஸவானம் க²யாயாதி அரஹத்தப²லத்தா²ய ஸம்மா ட²பீயதி. ஏத்தாவதா ஹி விபஸ்ஸனம் வட்³டே⁴த்வா அரஹத்தப்பத்தோ பி⁴க்கு² த³ஸ்ஸிதோ. இதா³னி தஸ்ஸ கீ²ணாஸவஸ்ஸ அபி⁴ஞ்ஞாய படிபத³ம் த³ஸ்ஸேந்தோ யஸ்ஸ யஸ்ஸ சாதிஆதி³மாஹ. தம் ஹேட்டா² வுத்தனயேனேவ வேதி³தப்³ப³ம்.

லோணகபல்லவக்³கோ³ பஞ்சமோ.