(9) 4. ஸமணவக்³கோ³

1. ஸமணஸுத்தவண்ணனா

82. சதுத்த²ஸ்ஸ பட²மே ஸமணியானீதி ஸமணஸந்தகானி. ஸமணகரணீயானீதி ஸமணேன கத்தப்³ப³கிச்சானி. அதி⁴ஸீலஸிக்கா²ஸமாதா³னந்திஆதீ³ஸு ஸமாதா³னம் வுச்சதி க³ஹணம், அதி⁴ஸீலஸிக்கா²ய ஸமாதா³னம் க³ஹணம் பூரணம் அதி⁴ஸீலஸிக்கா²ஸமாதா³னம். ஸேஸபத³த்³வயேபி ஏஸேவ நயோ. ஏத்த² ச ஸீலம் அதி⁴ஸீலம், சித்தம் அதி⁴சித்தம், பஞ்ஞா அதி⁴பஞ்ஞாதி அயம் விபா⁴கோ³ வேதி³தப்³போ³. தத்த² பஞ்சஸீலம் ஸீலம் நாம, தம் உபாதா³ய த³ஸஸீலம் அதி⁴ஸீலம் நாம, தம்பி உபாதா³ய சதுபாரிஸுத்³தி⁴ஸீலம் அதி⁴ஸீலம் நாம. அபிச ஸப்³ப³ம்பி லோகியஸீலம் ஸீலம் நாம, லோகுத்தரஸீலம் அதி⁴ஸீலம், ததே³வ ஸிக்கி²தப்³ப³தோ ஸிக்கா²தி வுச்சதி. காமாவசரசித்தம் பன சித்தம் நாம, தம் உபாதா³ய ரூபாவசரம் அதி⁴சித்தம் நாம, தம்பி உபாதா³ய அரூபாவசரம் அதி⁴சித்தம் நாம. அபிச ஸப்³ப³ம்பி லோகியசித்தம் சித்தமேவ, லோகுத்தரம் அதி⁴சித்தம். பஞ்ஞாயபி ஏஸேவ நயோ. தஸ்மாதி யஸ்மா இமானி தீணி ஸமணகரணீயானி, தஸ்மா. திப்³போ³தி ப³ஹலோ. ச²ந்தோ³தி கத்துகம்யதாகுஸலச்ச²ந்தோ³. இதி இமஸ்மிம் ஸுத்தந்தே திஸ்ஸோ ஸிக்கா² லோகியலோகுத்தரா கதி²தாதி.

2. க³த்³ரப⁴ஸுத்தவண்ணனா

83. து³தியே பிட்டி²தோ பிட்டி²தோதி பச்ச²தோ பச்ச²தோ. அஹம்பி த³ம்மோ அஹம்பி த³ம்மோதி அஹம்பி ‘‘த³ம்மோ த³ம்மமானோ’’தி வத³மானோ கா³வீதி. ஸேய்யதா²பி கு³ன்னந்தி யதா² கா³வீனம். கா³வோ ஹி காளாபி ரத்தாபி ஸேதாதி³வண்ணாபி ஹோந்தி, க³த்³ரப⁴ஸ்ஸ பன தாதி³ஸோ வண்ணோ நாம நத்தி². யதா² ச வண்ணோ, ஏவம் ஸரோபி பத³ம்பி அஞ்ஞாதி³ஸமேவ. ஸேஸம் உத்தானத்த²மேவ. இமஸ்மிம்பி ஸுத்தே திஸ்ஸோ ஸிக்கா² மிஸ்ஸிகாவ கதி²தாதி.

3. கே²த்தஸுத்தவண்ணனா

84. ததியே படிகச்சேவாதி பட²மமேவ. ஸுகட்ட²ம் கரோதீதி நங்க³லேன ஸுகட்ட²ம் கரோதி. ஸுமதிகதந்தி மதியா ஸுட்டு² ஸமீகதம். காலேனாதி வபிதப்³ப³யுத்தகாலேன. ஸேஸம் உத்தானமேவ. இதா⁴பி திஸ்ஸோ ஸிக்கா² மிஸ்ஸிகாவ கதி²தா.

4. வஜ்ஜிபுத்தஸுத்தவண்ணனா

85. சதுத்தே² வஜ்ஜிபுத்தகோதி வஜ்ஜிராஜகுலஸ்ஸ புத்தோ. தி³யட்³ட⁴ஸிக்கா²பத³ஸதந்தி பண்ணாஸாதி⁴கம் ஸிக்கா²பத³ஸதம். தஸ்மிம் ஸமயே பஞ்ஞத்தானி ஸிக்கா²பதா³னேவ ஸந்தா⁴யேதம் வுத்தம். ஸோ கிர பி⁴க்கு² அஜ்ஜவஸம்பன்னோ உஜுஜாதிகோ அவங்கோ அகுடிலோ, தஸ்மா ‘‘அஹம் ஏத்தகானி ஸிக்கா²பதா³னி ரக்கி²தும் ஸக்குணேய்யம் வா ந வா’’தி சிந்தேத்வா ஸத்து² ஆரோசேஸி. ஸக்கோமஹந்தி ஸக்கோமி அஹம். ஸோ கிர ‘‘ஏத்தகேஸு ஸிக்கா²பதே³ஸு ஸிக்க²ந்தஸ்ஸ அக³ரு தீஸு ஸிக்கா²ஸு ஸிக்கி²து’’ந்தி மஞ்ஞமானோ ஏவமாஹ. அத² ப⁴க³வா யதா² நாம பஞ்ஞாஸ திணகலாபியோ உக்கி²பிதும் அஸக்கோந்தஸ்ஸ கலாபியஸதம் ப³ந்தி⁴த்வா ஸீஸே ட²பேய்ய, ஏவமேவ ஏகிஸ்ஸாபி ஸிக்கா²ய ஸிக்கி²தும் அஸக்கோந்தஸ்ஸ அபரா த்³வேபி ஸிக்கா² உபரி பக்கி²பந்தோ தஸ்மாதிஹ த்வம் பி⁴க்கூ²திஆதி³மாஹ. ஸுகு²மாலோ கிர உத்தரோ நாம ஜானபத³மனுஸ்ஸோ லோஹபாஸாத³விஹாரே வஸதி. அத² நம் த³ஹரபி⁴க்கூ² ஆஹம்ஸு – ‘‘உத்தர, அக்³கி³ஸாலா ஓவஸ்ஸதி, திணம் கப்பியம் கத்வா தே³ஹீ’’தி. தம் ஆதா³ய அடவிம் க³ந்த்வா தேன லாயிதம் திணம்யேவ கரளே ப³ந்தி⁴த்வா ‘‘பஞ்ஞாஸ கரளே க³ஹேதும் ஸக்கி²ஸ்ஸஸி உத்தரா’’தி ஆஹம்ஸு. ஸோ ‘‘ந ஸக்கி²ஸ்ஸாமீ’’தி ஆஹ. அஸீதிம் பன ஸக்கி²ஸ்ஸஸீதி? ந ஸக்கி²ஸ்ஸாமி, ப⁴ந்தேதி. ஏகம் கரளஸதம் ஸக்கி²ஸ்ஸஸீதி? ஆம, ப⁴ந்தே, க³ண்ஹிஸ்ஸாமீதி. த³ஹரபி⁴க்கூ² கரளஸதம் ப³ந்தி⁴த்வா தஸ்ஸ ஸீஸே ட²பயிம்ஸு. ஸோ உக்கி²பித்வா நித்து²னந்தோ க³ந்த்வா அக்³கி³ஸாலாய ஸமீபே பாதேஸி. அத² நம் பி⁴க்கூ² ‘‘கிலந்தரூபோஸி உத்தரா’’தி ஆஹம்ஸு. ஆம, ப⁴ந்தே, த³ஹரா பி⁴க்கூ² மம் வஞ்சேஸும், இமம் ஏகம்பி கரளஸதம் உக்கி²பிதும் அஸக்கோந்தம் மம் ‘‘பண்ணாஸ கரளே உக்கி²பாஹீ’’தி வதி³ம்ஸு. ஆம, உத்தர, வஞ்சயிம்ஸு தந்தி. ஏவம் ஸம்பத³மித³ம் வேதி³தப்³ப³ம். இதா⁴பி திஸ்ஸோ ஸிக்கா² மிஸ்ஸிகாவ கதி²தா.

5. ஸேக்க²ஸுத்தவண்ணனா

86. பஞ்சமே உஜுமக்³கா³னுஸாரினோதி உஜுமக்³கோ³ வுச்சதி அரியமக்³கோ³, தம் அனுஸ்ஸரந்தஸ்ஸ படிபன்னகஸ்ஸாதி அத்தோ². க²யஸ்மிம் பட²மம் ஞாணந்தி பட²மமேவ மக்³க³ஞாணம் உப்பஜ்ஜதி. மக்³கோ³ ஹி கிலேஸானம் கே²பனதோ க²யோ நாம, தம்ஸம்பயுத்தம் ஞாணம் க²யஸ்மிம் ஞாணம் நாம. ததோ அஞ்ஞா அனந்தராதி ததோ சதுத்த²மக்³க³ஞாணதோ அனந்தரா அஞ்ஞா உப்பஜ்ஜதி, அரஹத்தப²லம் உப்பஜ்ஜதீதி அத்தோ². அஞ்ஞாவிமுத்தஸ்ஸாதி அரஹத்தப²லவிமுத்தியா விமுத்தஸ்ஸ. ஞாணம் வே ஹோதீதி பச்சவேக்க²ணஞாணம் ஹோதி. இதி ஸுத்தேபி கா³தா²ஸுபி ஸத்த ஸேகா² கதி²தா. அவஸானே பன கீ²ணாஸவோ த³ஸ்ஸிதோதி.

6. பட²மஸிக்கா²ஸுத்தவண்ணனா

87. ச²ட்டே² அத்தகாமாதி அத்தனோ ஹிதகாமா. யத்தே²தம் ஸப்³ப³ம் ஸமோதா⁴னம் க³ச்ச²தீதி யாஸு ஸிக்கா²ஸு ஸப்³ப³மேதம் தி³யட்³ட⁴ஸிக்கா²பத³ஸதம் ஸங்க³ஹம் க³ச்ச²தி. பரிபூரகாரீ ஹோதீதி ஸமத்தகாரீ ஹோதி. மத்தஸோ காரீதி பமாணேன காரகோ, ஸப்³பே³ன ஸப்³ப³ம் காதும் ந ஸக்கோதீதி அத்தோ². கு²த்³தா³னுகு²த்³த³கானீதி சத்தாரி பாராஜிகானி ட²பேத்வா ஸேஸஸிக்கா²பதா³னி. தத்ராபி ஸங்கா⁴தி³ஸேஸம் கு²த்³த³கம், து²ல்லச்சயம் அனுகு²த்³த³கம் நாம. து²ல்லச்சயஞ்ச கு²த்³த³கம், பாசித்தியம் அனுகு²த்³த³கம் நாம, பாசித்தியஞ்ச கு²த்³த³கம், பாடிதே³ஸனியது³க்கடது³ப்³பா⁴ஸிதானி அனுகு²த்³த³கானி நாம. இமே பன அங்கு³த்தரமஹானிகாயவளஞ்ஜனகஆசரியா ‘‘சத்தாரி பாராஜிகானி ட²பேத்வா ஸேஸானி ஸப்³பா³னிபி கு²த்³தா³னுகு²த்³த³கானீ’’தி வத³ந்தி. தானி ஆபஜ்ஜதிபி வுட்டா²திபீதி ஏத்த² பன கீ²ணாஸவோ தாவ லோகவஜ்ஜம் நாபஜ்ஜதி, பண்ணத்திவஜ்ஜமேவ ஆபஜ்ஜதி. ஆபஜ்ஜந்தோ ச காயேனபி வாசாயபி சித்தேனபி ஆபஜ்ஜதி. காயேன ஆபஜ்ஜந்தோ குடிகாரஸஹஸேய்யாதீ³னி ஆபஜ்ஜதி, வாசாய ஆபஜ்ஜந்தோ ஸஞ்சரித்தபத³ஸோத⁴ம்மாதீ³னி, சித்தேன ஆபஜ்ஜந்தோ ரூபியபடிக்³க³ஹணம் ஆபஜ்ஜதி. ஸேக்கே²ஸுபி ஏஸேவ நயோ. ந ஹி மேத்த², பி⁴க்க²வே, அப⁴ப்³ப³தா வுத்தாதி, பி⁴க்க²வே, ந ஹி மயா ஏத்த² ஏவரூபம் ஆபத்திம் ஆபஜ்ஜனே ச வுட்டா²னே ச அரியபுக்³க³லஸ்ஸ அப⁴ப்³ப³தா கதி²தா. ஆதி³ப்³ரஹ்மசரியகானீதி மக்³க³ப்³ரஹ்மசரியஸ்ஸ ஆதி³பூ⁴தானி சத்தாரி மஹாஸீலஸிக்கா²பதா³னி. ப்³ரஹ்மசரியஸாருப்பானீதி தானியேவ சதுமக்³க³ப்³ரஹ்மசரியஸ்ஸ ஸாருப்பானி அனுச்ச²விகானி. தத்தா²தி தேஸு ஸிக்கா²பதே³ஸு. து⁴வஸீலோதி நிப³த்³த⁴ஸீலோ. டி²தஸீலோதி பதிட்டி²தஸீலோ. ஸோதாபன்னோதி ஸோதஸங்கா²தேன மக்³கே³ன ப²லம் ஆபன்னோ. அவினிபாதத⁴ம்மோதி சதூஸு அபாயேஸு அபதனஸபா⁴வோ. நியதோதி ஸோதாபத்திமக்³க³னியாமேன நியதோ. ஸம்போ³தி⁴பராயணோதி உபரிமக்³க³த்தயஸம்போ³தி⁴பராயணோ.

தனுத்தாதி தனுபா⁴வோ. ஸகதா³கா³மினோ ஹி ராகா³த³யோ அப்³ப⁴படலம் விய மச்சி²காபத்தம் விய ச தனுகா ஹோந்தி, ந ப³ஹலா. ஓரம்பா⁴கி³யானந்தி ஹேட்டா²பா⁴கி³யானம். ஸம்யோஜனானந்தி ப³ந்த⁴னானம். பரிக்க²யாதி பரிக்க²யேன. ஓபபாதிகோ ஹோதீதி உப்பன்னகோ ஹோதி. தத்த² பரினிப்³பா³யீதி ஹேட்டா² அனோதரித்வா உபரியேவ பரினிப்³பா³னத⁴ம்மோ. அனாவத்தித⁴ம்மோதி யோனிக³திவஸேன அனாக³மனத⁴ம்மோ.

பதே³ஸம் பதே³ஸகாரீதிஆதீ³ஸு பதே³ஸகாரீ புக்³க³லோ நாம ஸோதாபன்னோ ச ஸகதா³கா³மீ ச அனாகா³மீ ச, ஸோ பதே³ஸமேவ ஸம்பாதே³தி. பரிபூரகாரீ நாம அரஹா, ஸோ பரிபூரமேவ ஸம்பாதே³தி. அவஞ்ஜா²னீதி அதுச்சா²னி ஸப²லானி ஸஉத்³ரயானீதி அத்தோ². இதா⁴பி திஸ்ஸோ ஸிக்கா² மிஸ்ஸகாவ கதி²தா.

7. து³தியஸிக்கா²ஸுத்தவண்ணனா

88. ஸத்தமே கோலம்கோலோதி குலா குலம் க³மனகோ. குலந்தி சேத்த² ப⁴வோ அதி⁴ப்பேதோ, தஸ்மா ‘‘த்³வே வா தீணி வா குலானீ’’தி ஏத்த²பி த்³வே வா தயோ வா ப⁴வேதி அத்தோ² வேதி³தப்³போ³. அயஞ்ஹி த்³வே வா ப⁴வே ஸந்தா⁴வதி தயோ வா, உத்தமகோடியா ச² வா. தஸ்மா த்³வே வா தீணி வா சத்தாரி வா பஞ்ச வா ச² வாதி ஏவமேத்த² விகப்போ த³ட்ட²ப்³போ³. ஏகபீ³ஜீதி ஏகஸ்ஸேவ ப⁴வஸ்ஸ பீ³ஜம் ஏதஸ்ஸ அத்தீ²தி ஏகபீ³ஜீ. உத்³த⁴ம்ஸோதோதிஆதீ³ஸு அத்தி² உத்³த⁴ம்ஸோதோ அகனிட்ட²கா³மீ, அத்தி² உத்³த⁴ம்ஸோதோ ந அகனிட்ட²கா³மீ, அத்தி² ந உத்³த⁴ம்ஸோதோ அகனிட்ட²கா³மீ, அத்தி² ந உத்³த⁴ம்ஸோதோ ந அகனிட்ட²கா³மீ. தத்த² யோ இத⁴ அனாகா³மிப²லம் பத்வா அவிஹாதீ³ஸு நிப்³ப³த்தோ தத்த² யாவதாயுகம் ட²த்வா உபரூபரி நிப்³ப³த்தித்வா அகனிட்ட²ம் பாபுணாதி, அயம் உத்³த⁴ம்ஸோதோ அகனிட்ட²கா³மீ நாம. யோ பன அவிஹாதீ³ஸு நிப்³ப³த்தோ தத்தே²வ அபரினிப்³பா³யித்வா அகனிட்ட²ம்பி அப்பத்வா உபரிமப்³ரஹ்மலோகே பரினிப்³பா³யதி, அயம் உத்³த⁴ம்ஸோதோ ந அகனிட்ட²கா³மீ நாம. யோ இதோ சவித்வா அகனிட்டே²யேவ நிப்³ப³த்ததி, அயம் ந உத்³த⁴ம்ஸோதோ அகனிட்ட²கா³மீ நாம. யோ பன அவிஹாதீ³ஸு சதூஸு அஞ்ஞதரஸ்மிம் நிப்³ப³த்தித்வா தத்தே²வ பரினிப்³பா³யதி, அயம் ந உத்³த⁴ம்ஸோதோ ந அகனிட்ட²கா³மீ நாம.

யத்த² கத்த²சி உப்பன்னோ பன ஸஸங்கா²ரேன ஸப்பயோகே³ன அரஹத்தம் பத்தோ ஸஸங்கா²ரபரினிப்³பா³யீ நாம. அஸங்கா²ரேன அப்பயோகே³ன பத்தோ அஸங்கா²ரபரினிப்³பா³யீ நாம. யோ பன கப்பஸஹஸ்ஸாயுகேஸு அவிஹேஸு நிப்³ப³த்தித்வா பஞ்சமம் கப்பஸதம் அதிக்கமித்வா அரஹத்தம் பத்தோ, அயம் உபஹச்சபரினிப்³பா³யீ நாம. அதப்பாதீ³ஸுபி ஏஸேவ நயோ. அந்தராபரினிப்³பா³யீதி யோ ஆயுவேமஜ்ஜ²ம் அனதிக்கமித்வா பரினிப்³பா³யதி, ஸோ திவிதோ⁴ ஹோதி. கப்பஸஹஸ்ஸாயுகேஸு தாவ அவிஹேஸு நிப்³ப³த்தித்வா ஏகோ நிப்³ப³த்ததி³வஸேயேவ அரஹத்தம் பாபுணாதி. நோ சே நிப்³ப³த்ததி³வஸே பாபுணாதி, பட²மஸ்ஸ பன கப்பஸதஸ்ஸ மத்த²கே பாபுணாதி, அயம் பட²மோ அந்தராபரினிப்³பா³யீ. அபரோ ஏவம் அஸக்கோந்தோ த்³வின்னம் கப்பஸதானம் மத்த²கே பாபுணாதி, அயம் து³தியோ. அபரோ ஏவம்பி அஸக்கோந்தோ சதுன்னம் கப்பஸதானம் மத்த²கே பாபுணாதி, அயம் ததியோ அந்தராபரினிப்³பா³யீ. ஸேஸம் வுத்தனயமேவ.

இமஸ்மிம் பன டா²னே ட²த்வா சதுவீஸதி ஸோதாபன்னா, த்³வாத³ஸ ஸகதா³கா³மினோ, அட்ட²சத்தாலீஸ அனாகா³மினோ, த்³வாத³ஸ ச அரஹந்தோ கதே²தப்³பா³. இமஸ்மிம் ஹி ஸாஸனே ஸத்³தா⁴து⁴ரம் பஞ்ஞாது⁴ரந்தி த்³வே து⁴ரானி, து³க்க²படிபதா³த³ந்தா⁴பி⁴ஞ்ஞாத³யோ சதஸ்ஸோ படிபதா³. தத்தே²கோ ஸத்³தா⁴து⁴ரேன அபி⁴னிவிஸித்வா ஸோதாபத்திப²லம் பத்வா ஏகமேவ ப⁴வம் நிப்³ப³த்தித்வா து³க்க²ஸ்ஸந்தம் கரோதி, அயமேகோ ஏகபீ³ஜீ. ஸோ படிபதா³வஸேன சதுப்³பி³தோ⁴ ஹோதி. யதா² சேஸ, ஏவம் பஞ்ஞாது⁴ரேன அபி⁴னிவிட்டோ²பீதி அட்ட² ஏகபீ³ஜினோ. ததா² கோலம்கோலா ஸத்தக்க²த்துபரமா சாதி இமே சதுவீஸதி ஸோதாபன்னா நாம. தீஸு பன விமோக்கே²ஸு ஸுஞ்ஞதவிமோக்கே²ன ஸகதா³கா³மிபூ⁴மிம் பத்தா சதுன்னம் படிபதா³னம் வஸேன சத்தாரோ ஸகதா³கா³மினோ, ததா² அனிமித்தவிமோக்கே²ன பத்தா சத்தாரோ, அப்பணிஹிதவிமோக்கே²ன பத்தா சத்தாரோதி இமே த்³வாத³ஸ ஸகதா³கா³மினோ. அவிஹேஸு பன தயோ அந்தராபரினிப்³பா³யினோ, ஏகோ உபஹச்சபரினிப்³பா³யீ, ஏகோ உத்³த⁴ம்ஸோதோ அகனிட்ட²கா³மீதி பஞ்ச அனாகா³மினோ, தே அஸங்கா²ரபரினிப்³பா³யினோ பஞ்ச, ஸஸங்கா²ரபரினிப்³பா³யினோ பஞ்சாதி த³ஸ ஹோந்தி, ததா² அதப்பாதீ³ஸு. அகனிட்டே²ஸு பன உத்³த⁴ம்ஸோதோ நத்தி², தஸ்மா தத்த² சத்தாரோ ஸஸங்கா²ரபரினிப்³பா³யீ, சத்தாரோ அஸங்கா²ரபரினிப்³பா³யீதி அட்ட², இமே அட்ட²சத்தாலீஸ அனாகா³மினோ. யதா² பன ஸகதா³கா³மினோ, ததே²வ அரஹந்தோபி த்³வாத³ஸ வேதி³தப்³பா³. இதா⁴பி திஸ்ஸோ ஸிக்கா² மிஸ்ஸிகாவ கதி²தா.

8. ததியஸிக்கா²ஸுத்தவண்ணனா

89. அட்ட²மே தம் வா பன அனபி⁴ஸம்ப⁴வம் அப்படிவிஜ்ஜ²ந்தி தம் அரஹத்தம் அபாபுணந்தோ அப்படிவிஜ்ஜ²ந்தோ. இமினா நயேன ஸப்³ப³ட்டா²னேஸு அத்தோ² வேதி³தப்³போ³. இதா⁴பி திஸ்ஸோ ஸிக்கா² மிஸ்ஸிகாவ கதி²தா. நவமம் உத்தானத்த²மேவ. இதா⁴பி திஸ்ஸோ ஸிக்கா² மிஸ்ஸிகாவ கதி²தா.

10. து³தியஸிக்க²த்தயஸுத்தவண்ணனா

91. த³ஸமே ஆஸவானம் க²யாதி ஏத்த² அரஹத்தமக்³கோ³ அதி⁴பஞ்ஞாஸிக்கா² நாம. ப²லம் பன ஸிக்கி²தஸிக்க²ஸ்ஸ உப்பஜ்ஜனதோ ஸிக்கா²தி ந வத்தப்³ப³ம்.

யதா² புரே ததா² பச்சா²தி யதா² பட²மம் தீஸு ஸிக்கா²ஸு ஸிக்க²தி, பச்சா² ததே²வ ஸிக்க²தீதி அத்தோ². து³தியபதே³பி ஏஸேவ நயோ. யதா² அதோ⁴ ததா² உத்³த⁴ந்தி யதா² ஹேட்டி²மகாயம் அஸுப⁴வஸேன பஸ்ஸதி, உபரிமகாயம்பி ததே²வ ப²ரதி. து³தியபதே³பி ஏஸேவ நயோ. யதா² தி³வா ததா² ரத்திந்தி யதா² தி³வா திஸ்ஸோ ஸிக்கா² ஸிக்க²தி, ரத்திம்பி ததே²வ ஸிக்க²தீதி அத்தோ². அபி⁴பு⁴ய்ய தி³ஸா ஸப்³பா³தி ஸப்³பா³ தி³ஸா ஆரம்மணவஸேன அபி⁴ப⁴வித்வா. அப்பமாணஸமாதி⁴னாதி அரஹத்தமக்³க³ஸமாதி⁴னா.

ஸேக்க²ந்தி ஸிக்க²மானம் ஸகரணீயம். படிபத³ந்தி படிபன்னகம். ஸம்ஸுத்³த⁴சாரியந்தி ஸம்ஸுத்³த⁴சரணம் பரிஸுத்³த⁴ஸீலம். ஸம்பு³த்³த⁴ந்தி சதுஸச்சபு³த்³த⁴ம். தீ⁴ரம் படிபத³ந்தகு³ந்தி க²ந்த⁴தீ⁴ரஆயதனதீ⁴ரவஸேன தீ⁴ரம் தி⁴திஸம்பன்னம் படிபத்தியா அந்தம் க³தம். விஞ்ஞாணஸ்ஸாதி சரிமகவிஞ்ஞாணஸ்ஸ. தண்ஹாக்க²யவிமுத்தினோதி தண்ஹாக்க²யவிமுத்திஸங்கா²தாய அரஹத்தப²லவிமுத்தியா ஸமன்னாக³தஸ்ஸ. பஜ்ஜோதஸ்ஸேவ நிப்³பா³னந்தி பதீ³பனிப்³பா³னம் விய. விமோக்கோ² ஹோதி சேதஸோதி சித்தஸ்ஸ விமுத்தி விமுச்சனா அப்பவத்திபா⁴வோ ஹோதி. தண்ஹாக்க²யவிமுத்தினோ ஹி கீ²ணாஸவஸ்ஸ சரிமகவிஞ்ஞாணனிரோதே⁴ன பரினிப்³பா³னம் விய சேதஸோ விமோக்கோ² ஹோதி, ந க³தட்டா²னம் பஞ்ஞாயதி, அபண்ணத்திகபா⁴வூபக³மோயேவ ஹோதீதி அத்தோ².

11. ஸங்கவாஸுத்தவண்ணனா

92. ஏகாத³ஸமே ஸங்கவா நாம கோஸலானம் நிக³மோதி ஸங்கவாதி ஏவம்னாமகோ கோஸலரட்டே² நிக³மோ. ஆவாஸிகோதி பா⁴ரஹாரோ நவே ஆவாஸே ஸமுட்டா²பேதி, புராணே படிஜக்³க³தி. ஸிக்கா²பத³படிஸம்யுத்தாயாதி ஸிக்கா²ஸங்கா²தேஹி பதே³ஹி படிஸம்யுத்தாய, தீஹி ஸிக்கா²ஹி ஸமன்னாக³தாயாதி அத்தோ². ஸந்த³ஸ்ஸேதீதி ஸம்முகே² விய கத்வா த³ஸ்ஸேதி. ஸமாத³பேதீதி க³ண்ஹாபேதி. ஸமுத்தேஜேதீதி ஸமுஸ்ஸாஹேதி. ஸம்பஹம்ஸேதீதி படிலத்³த⁴கு³ணேஹி வண்ணம் கதே²ந்தோ வோதா³பேதி. அதி⁴ஸல்லிக²தேதி அதிவிய ஸல்லிக²தி, அதிவிய ஸல்லிகி²தம் கத்வா ஸண்ஹம் ஸண்ஹம் கதே²தீதி அத்தோ².

அச்சயோதி அபராதோ⁴. மம் அச்சக³மாதி மம் அதிக்கம்ம அதி⁴ப⁴வித்வா பவத்தோ. அஹுதே³வ அக்க²ந்தீதி அஹோஸியேவ அனதி⁴வாஸனா. அஹு அப்பச்சயோதி அஹோஸி அதுட்டா²காரோ. படிக்³க³ண்ஹாதூதி க²மது. ஆயதிம் ஸம்வராயாதி அனாக³தே ஸம்வரத்தா²ய, புன ஏவரூபஸ்ஸ அபராத⁴ஸ்ஸ தோ³ஸஸ்ஸ க²லிதஸ்ஸ வா அகரணத்தா²யாதி அத்தோ². தக்³கா⁴தி ஏகம்ஸேன. யதா²த⁴ம்மம் படிகரோஸீதி யதா² த⁴ம்மோ டி²தோ, ததா² கரோஸி, க²மாபேஸீதி வுத்தம் ஹோதி. தம் தே மயம் படிக்³க³ண்ஹாமாதி தம் தவ அபராத⁴ம் மயம் க²மாம. வுத்³தி⁴ஹேஸா, கஸ்ஸப, அரியஸ்ஸ வினயேதி ஏஸா கஸ்ஸப பு³த்³த⁴ஸ்ஸ ப⁴க³வதோ ஸாஸனே வுத்³தி⁴ நாம. கதமா? யாயம் அச்சயம் அச்சயதோ தி³ஸ்வா யதா²த⁴ம்மம் படிகரித்வா ஆயதிம் ஸம்வராபஜ்ஜனா. தே³ஸனம் பன புக்³க³லாதி⁴ட்டா²னம் கரோந்தோ ‘‘யோ அச்சயம் அச்சயதோ தி³ஸ்வா யதா²த⁴ம்மம் படிகரோதி, ஆயதிம் ஸம்வரம் ஆபஜ்ஜதீ’’தி ஆஹ. ந ஸிக்கா²காமோதி திஸ்ஸோ ஸிக்கா² ந காமேதி ந பத்தே²தி ந பிஹேதி. ஸிக்கா²ஸமாதா³னஸ்ஸாதி ஸிக்கா²பரிபூரணஸ்ஸ. ந வண்ணவாதீ³தி கு³ணம் ந கதே²தி. காலேனாதி யுத்தப்பயுத்தகாலேன. ஸேஸமேத்த² உத்தானத்த²மேவாதி.

ஸமணவக்³கோ³ சதுத்தோ².