3. மஹானாமஸக்கஸுத்தவண்ணனா

74. ததியே கி³லானா வுட்டி²தோதி கி³லானோ ஹுத்வா வுட்டி²தோ. கே³லஞ்ஞாதி கி³லானபா⁴வதோ. உபஸங்கமீதி பு⁴த்தபாதராஸோ மாலாக³ந்தா⁴தீ³னி ஆதா³ய மஹாபரிவாரபரிவுதோ உபஸங்கமி. பா³ஹாயம் க³ஹேத்வாதி ந பா³ஹாயம் க³ஹேத்வா ஆகட்³டி⁴, நிஸின்னாஸனதோ வுட்டா²ய தஸ்ஸ ஸந்திகம் க³ந்த்வா த³க்கி²ணபா³ஹாயம் அங்கு³ட்ட²கேன ஸஞ்ஞம் த³த்வா ஏகமந்தம் அபனேஸீதி வேதி³தப்³போ³. அத²ஸ்ஸ ‘‘ஸேக²ம்பி கோ², மஹானாம, ஸீல’’ந்திஆதி³னா நயேன ஸத்தன்னம் ஸேகா²னம் ஸீலஞ்ச ஸமாதி⁴ஞ்ச பஞ்ஞஞ்ச கதே²த்வா உபரி அரஹத்தப²லவஸேன அஸேகா² ஸீலஸமாதி⁴பஞ்ஞாயோ கதே²ந்தோ – ‘‘ஸேக²ஸமாதி⁴தோ ஸேக²ம் விபஸ்ஸனாஞாணம் அஸேக²ஞ்ச ப²லஞாணம் பச்சா², ஸேக²விபஸ்ஸனாஞாணதோ ச அஸேக²ப²லஸமாதி⁴ பச்சா² உப்பஜ்ஜதீ’’தி தீ³பேஸி. யானி பன ஸம்பயுத்தானி ஸமாதி⁴ஞாணானி, தேஸம் அபச்சா² அபுரே உப்பத்தி வேதி³தப்³பா³தி.