4. நிக³ண்ட²ஸுத்தவண்ணனா

75. சதுத்தே² கூடாகா³ரஸாலாயந்தி த்³வே கண்ணிகா க³ஹேத்வா ஹம்ஸவட்டகச்ச²ன்னேன கதாய க³ந்த⁴குடியா. அபரிஸேஸம் ஞாணத³ஸ்ஸனம் படிஜானாதீதி அப்பமத்தகம்பி அஸேஸேத்வா ஸப்³ப³ம் ஞாணத³ஸ்ஸனம் படிஜானாதி. ஸததம் ஸமிதந்தி ஸப்³ப³காலம் நிரந்தரம். ஞாணத³ஸ்ஸனம் பச்சுபட்டி²தந்தி ஸப்³ப³ஞ்ஞுதஞ்ஞாணம் மய்ஹம் உபட்டி²தமேவாதி த³ஸ்ஸேதி. புராணானம் கம்மானந்தி ஆயூஹிதகம்மானம். தபஸா ப்³யந்தீபா⁴வந்தி து³க்கரதபேன விக³தந்தகரணம். நவானம் கம்மானந்தி இதா³னி ஆயூஹிதப்³ப³கம்மானம். அகரணாதி அனாயூஹனேன. ஸேதுகா⁴தந்தி பத³கா⁴தம் பச்சயகா⁴தம் கதே²தி. கம்மக்க²யா து³க்க²க்க²யோதி கம்மவட்டக்க²யேன து³க்க²க்க²யோ. து³க்க²க்க²யா வேத³னாக்க²யோதி து³க்க²வட்டக்க²யேன வேத³னாக்க²யோ. து³க்க²வட்டஸ்மிஞ்ஹி கீ²ணே வேத³னாவட்டம்பி கீ²ணமேவ ஹோதி. வேத³னாக்க²யா ஸப்³ப³ம் து³க்க²ம் நிஜ்ஜிண்ணம் ப⁴விஸ்ஸதீதி வேத³னாக்க²யேன பன ஸகலவட்டது³க்க²ம் நிஜ்ஜிண்ணமேவ ப⁴விஸ்ஸதி. ஸந்தி³ட்டி²காயாதி ஸாமம் பஸ்ஸிதப்³பா³ய பச்சக்கா²ய. நிஜ்ஜராய விஸுத்³தி⁴யாதி கிலேஸஜீரணகபடிபதா³ய கிலேஸே வா நிஜ்ஜீரணதோ நிஜ்ஜராய ஸத்தானம் விஸுத்³தி⁴யா. ஸமதிக்கமோ ஹோதீதி ஸகலஸ்ஸ வட்டது³க்க²ஸ்ஸ அதிக்கமோ ஹோதி. இத⁴, ப⁴ந்தே, ப⁴க³வா கிமாஹாதி, ப⁴ந்தே, ப⁴க³வா இமாய படிபத்தியா கிமாஹ, கிம் ஏதம்யேவ கிலேஸனிஜ்ஜீரணகபடிபத³ம் பஞ்ஞபேதி, உதா³ஹு அஞ்ஞந்தி புச்ச²தி.

ஜானதாதி அனாவரணஞாணேன ஜானந்தேன. பஸ்ஸதாதி ஸமந்தசக்கு²னா பஸ்ஸந்தேன. விஸுத்³தி⁴யாதி விஸுத்³தி⁴ஸம்பாபனத்தா²ய. ஸமதிக்கமாயாதி ஸமதிக்கமனத்தா²ய. அத்த²ங்க³மாயாதி அத்த²ம் க³மனத்தா²ய. ஞாயஸ்ஸ அதி⁴க³மாயாதி ஸஹ விபஸ்ஸனாய மக்³க³ஸ்ஸ அதி⁴க³மனத்தா²ய. நிப்³பா³னஸ்ஸ ஸச்சி²கிரியாயாதி அபச்சயனிப்³பா³னஸ்ஸ ஸச்சி²கரணத்தா²ய. நவஞ்ச கம்மம் ந கரோதீதி நவம் கம்மம் நாயூஹதி. புராணஞ்ச கம்மந்தி புப்³பே³ ஆயூஹிதகம்மம். பு²ஸ்ஸ பு²ஸ்ஸ ப்³யந்தீ கரோதீதி பு²ஸித்வா பு²ஸித்வா விக³தந்தம் கரோதி, விபாகப²ஸ்ஸம் பு²ஸித்வா பு²ஸித்வா தம் கம்மம் கே²பேதீதி அத்தோ². ஸந்தி³ட்டி²காதி ஸாமம் பஸ்ஸிதப்³பா³. அகாலிகாதி ந காலந்தரே கிச்சகாரிகா. ஏஹிபஸ்ஸிகாதி ‘‘ஏஹி பஸ்ஸா’’தி ஏவம் த³ஸ்ஸேதும் யுத்தா. ஓபனேய்யிகாதி உபனயே யுத்தா அல்லீயிதப்³ப³யுத்தா. பச்சத்தம் வேதி³தப்³பா³ விஞ்ஞூஹீதி பண்டி³தேஹி அத்தனோ அத்தனோ ஸந்தானேயேவ ஜானிதப்³பா³, பா³லேஹி பன து³ஜ்ஜானா. இதி ஸீலவஸேன த்³வே மக்³கா³, த்³வே ச ப²லானி கதி²தானி. ஸோதாபன்னஸகதா³கா³மினோ ஹி ஸீலேஸு பரிபூரகாரினோதி. விவிச்சேவ காமேஹீதிஆதி³காய பன ஸமாதி⁴ஸம்பதா³ய தயோ மக்³கா³, தீணி ச ப²லானி கதி²தானி. அனாகா³மீ அரியஸாவகோ ஹி ஸமாதி⁴ம்ஹி பரிபூரகாரீதி வுத்தோ. ஆஸவானம் க²யாதிஆதீ³ஹி அரஹத்தப²லம் கதி²தம். கேசி பன ஸீலஸமாத⁴யோபி அரஹத்தப²லஸம்பயுத்தாவ இத⁴ அதி⁴ப்பேதா. ஏகேகஸ்ஸ பன வஸேன படிபத்தித³ஸ்ஸனத்த²ம் விஸும் விஸும் தந்தி ஆரோபிதாதி.