6. பலோகஸுத்தவண்ணனா

57. ச²ட்டே² ஆசரியபாசரியானந்தி ஆசரியானஞ்சேவ ஆசரியாசரியானஞ்ச. அவீசி மஞ்ஞே பு²டோ அஹோஸீதி யதா² அவீசி மஹானிரயோ நிரந்தரபு²டோ நேரயிகஸத்தேஹி பரிபுண்ணோ, மனுஸ்ஸேஹி ஏவம் பரிபுண்ணோ ஹோதி. குக்குடஸம்பாதிகாதி ஏககா³மஸ்ஸ ச²த³னபிட்டி²தோ உப்பதித்வா இதரகா³மஸ்ஸ ச²த³னபிட்டே² பதனஸங்கா²தோ குக்குடஸம்பாதோ ஏதாஸு அத்தீ²தி குக்குடஸம்பாதிகா. குக்குடஸம்பாதி³காதிபி பாடோ², கா³மந்தரதோ கா³மந்தரம் குக்குடானம் பத³ஸா க³மனஸங்கா²தோ குக்குடஸம்பாதோ³ ஏதாஸு அத்தீ²தி அத்தோ². உப⁴யம்பேதம் க⁴னனிவாஸதம்யேவ தீ³பேதி. அத⁴ம்மராக³ரத்தாதி ராகோ³ நாம ஏகந்தேனேவ அத⁴ம்மோ, அத்தனோ பரிக்கா²ரேஸு பன உப்பஜ்ஜமானோ ந அத⁴ம்மராகோ³தி அதி⁴ப்பேதோ, பரபரிக்கா²ரேஸு உப்பஜ்ஜமானோவ அத⁴ம்மராகோ³தி. விஸமலோபா⁴பி⁴பூ⁴தாதி லோப⁴ஸ்ஸ ஸமகாலோ நாம நத்தி², ஏகந்தம் விஸமோவ ஏஸ. அத்தனா பரிக்³க³ஹிதவத்து²ம்ஹி பன உப்பஜ்ஜமானோ ஸமலோபோ⁴ நாம, பரபரிக்³க³ஹிதவத்து²ம்ஹி உப்பஜ்ஜமானோவ விஸமோதி அதி⁴ப்பேதோ. மிச்சா²த⁴ம்மபரேதாதி அவத்து²படிஸேவனஸங்கா²தேன மிச்சா²த⁴ம்மேன ஸமன்னாக³தா. தே³வோ ந ஸம்மா தா⁴ரம் அனுப்பவேச்ச²தீதி வஸ்ஸிதப்³ப³யுத்தே காலே வஸ்ஸம் ந வஸ்ஸதி. து³ப்³பி⁴க்க²ந்தி து³ல்லப⁴பி⁴க்க²ம். து³ஸ்ஸஸ்ஸந்தி விவித⁴ஸஸ்ஸானம் அஸம்பஜ்ஜனேன து³ஸ்ஸஸ்ஸம். ஸேதட்டி²கந்தி ஸஸ்ஸே ஸம்பஜ்ஜமானே பாணகா பதந்தி, தேஹி த³ட்ட²த்தா நிக்க²ந்தனிக்க²ந்தானி ஸாலிஸீஸானி ஸேதவண்ணானி ஹோந்தி நிஸ்ஸாரானி. தம் ஸந்தா⁴ய வுத்தம் ‘‘ஸேதட்டி²க’’ந்தி. ஸலாகாவுத்தந்தி வபிதம் வபிதம் ஸஸ்ஸம் ஸலாகாமத்தமேவ ஸம்பஜ்ஜதி, ப²லம் ந தே³தீதி அத்தோ². யக்கா²தி யக்கா²தி⁴பதினோ. வாளே அமனுஸ்ஸே ஓஸ்ஸஜ்ஜந்தீதி சண்ட³யக்கே² மனுஸ்ஸபதே² விஸ்ஸஜ்ஜேந்தி, தே லத்³தோ⁴காஸா மஹாஜனம் ஜீவிதக்க²யம் பாபேந்தி.