7. வச்ச²கோ³த்தஸுத்தவண்ணனா

58. ஸத்தமே மஹப்ப²லந்தி மஹாவிபாகம். த⁴ம்மஸ்ஸ சானுத⁴ம்மம் ப்³யாகரோந்தீதி ஏத்த² த⁴ம்மோ நாம கதி²தகதா², அனுத⁴ம்மோ நாம கதி²தஸ்ஸ படிகத²னம். ஸஹத⁴ம்மிகோதி ஸகாரணோ ஸஹேதுகோ. வாதா³னுபாதோதி வாத³ஸ்ஸ அனுபாதோ, அனுபதனம் பவத்தீதி அத்தோ². கா³ரய்ஹம் டா²னந்தி க³ரஹிதப்³ப³யுத்தம் காரணம். இத³ம் வுத்தம் ஹோதி – போ⁴தா கோ³தமேன வுத்தா ஸகாரணா வாத³ப்பவத்தி கிஞ்சிபி கா³ரய்ஹம் காரணம் ந ஆக³ச்ச²தீதி. அத² வா தேஹி பரேஹி வுத்தா ஸகாரணா வாத³ப்பவத்தி கிஞ்சி கா³ரய்ஹம் காரணம் ந ஆக³ச்ச²தீதி புச்ச²தி.

அந்தராயகரோ ஹோதீதி அந்தராயம் வினாஸம் கிச்ச²லாப⁴கம் விலோமகம் கரோதி. பாரிபந்தி²கோதி பந்த²தூ³ஹனசோரோ. க²தோ ச ஹோதீதி கு³ணக²னனேன க²தோ ஹோதி. உபஹதோதி கு³ணுபகா⁴தேனேவ உபஹதோ.

சந்த³னிகாயாதி அஸுசிகலலகூபே. ஓலிக³ல்லேதி நித்³த⁴மனகலலே. ஸோ சாதி ஸோ ஸீலவாதி வுத்தகீ²ணாஸவோ. ஸீலக்க²ந்தே⁴னாதி ஸீலராஸினா. ஸேஸபதே³ஸுபி ஏஸேவ நயோ. ஏத்த² ச விமுத்திஞாணத³ஸ்ஸனம் வுச்சதி பச்சவேக்க²ணஞாணம், தம் அஸேக்க²ஸ்ஸ பவத்தத்தா அஸேக்க²ந்தி வுத்தம். இதரானி ஸிக்கா²பரியோஸானப்பத்ததாய ஸயம்பி அஸேக்கா²னேவ. தானி ச பன லோகுத்தரானி, பச்சவேக்க²ணஞாணம் லோகியம்.

ரோஹிணீஸூதி ரத்தவண்ணாஸு. ஸரூபாஸூதி அத்தனோ வச்ச²கேஹி ஸமானரூபாஸு. பாரேவதாஸூதி கபோதவண்ணாஸு. த³ந்தோதி நிப்³பி³ஸேவனோ. புங்க³வோதி உஸபோ⁴. தோ⁴ரய்ஹோதி து⁴ரவாஹோ. கல்யாணஜவனிக்கமோதி கல்யாணேன உஜுனா ஜவேன க³ந்தா. நாஸ்ஸ வண்ணம் பரிக்க²ரேதி அஸ்ஸ கோ³ணஸ்ஸ ஸரீரவண்ணம் ந உபபரிக்க²ந்தி, து⁴ரவஹனகம்மமேவ பன உபபரிக்க²ந்தி. யஸ்மிம் கஸ்மிஞ்சி ஜாதியேதி யத்த² கத்த²சி குலஜாதே. யாஸு காஸுசி ஏதாஸூதி ஏதாஸு க²த்தியாதி³ப்பபே⁴தா³ஸு யாஸு காஸுசி ஜாதீஸு.

ப்³ரஹ்மசரியஸ்ஸ கேவலீதி ப்³ரஹ்மசரியஸ்ஸ கேவலேன ஸமன்னாக³தோ, பரிபுண்ணபா⁴வேன யுத்தோதி அத்தோ². கீ²ணாஸவோ ஹி ஸகலப்³ரஹ்மசாரீ நாம ஹோதி. தேனேதம் வுத்தம். பன்னபா⁴ரோதி ஓரோபிதபா⁴ரோ, க²ந்த⁴பா⁴ரம் கிலேஸபா⁴ரம் காமகு³ணபா⁴ரஞ்ச ஓரோபேத்வா டி²தோதி அத்தோ². கதகிச்சோதி சதூஹி மக்³கே³ஹி கிச்சம் கத்வா டி²தோ. பாரகூ³ ஸப்³ப³த⁴ம்மானந்தி ஸப்³ப³த⁴ம்மா வுச்சந்தி பஞ்சக்க²ந்தா⁴ த்³வாத³ஸாயதனானி அட்டா²ரஸ தா⁴துயோ, தேஸம் ஸப்³ப³த⁴ம்மானம் அபி⁴ஞ்ஞாபாரம், பரிஞ்ஞாபாரம், பஹானபாரம், பா⁴வனாபாரம், ஸச்சி²கிரியாபாரம், ஸமாபத்திபாரஞ்சாதி ச²ப்³பி³த⁴ம் பாரம் க³தத்தா பாரகூ³. அனுபாதா³யாதி அக்³க³ஹேத்வா. நிப்³பு³தோதி கிலேஸஸந்தாபரஹிதோ. விரஜேதி ராக³தோ³ஸமோஹரஜரஹிதே.

அவிஜானந்தாதி கே²த்தம் அஜானந்தா. து³ம்மேதா⁴தி நிப்பஞ்ஞா. அஸ்ஸுதாவினோதி கே²த்தவினிச்ச²யஸவனேன ரஹிதா. ப³ஹித்³தா⁴தி இமம்ஹா ஸாஸனா ப³ஹித்³தா⁴. ந ஹி ஸந்தே உபாஸரேதி பு³த்³த⁴பச்சேகபு³த்³த⁴கீ²ணாஸவே உத்தமபுரிஸே ந உபஸங்கமந்தி. தீ⁴ரஸம்மதேதி பண்டி³தேஹி ஸம்மதே ஸம்பா⁴விதே. மூலஜாதா பதிட்டி²தாதி இமினா ஸோதாபன்னஸ்ஸ ஸத்³த⁴ம் த³ஸ்ஸேதி. குலே வா இத⁴ ஜாயரேதி இத⁴ வா மனுஸ்ஸலோகே க²த்தியப்³ராஹ்மணவேஸ்ஸகுலே ஜாயந்தி. அயமேவ ஹி திவிதா⁴ குலஸம்பத்தி நாம. அனுபுப்³பே³ன நிப்³பா³னம், அதி⁴க³ச்ச²ந்தீதி ஸீலஸமாதி⁴பஞ்ஞாதி இமே கு³ணே பூரேத்வா அனுக்கமேன நிப்³பா³னம் அதி⁴க³ச்ச²ந்தீதி.