5. பண்டி³தஸுத்தவண்ணனா

45. பஞ்சமே பண்டி³தபஞ்ஞத்தானீதி பண்டி³தேஹி பஞ்ஞத்தானி கதி²தானி பஸத்தா²னி. ஸப்புரிஸபஞ்ஞத்தானீதி ஸப்புரிஸேஹி மஹாபுரிஸேஹி பஞ்ஞத்தானி கதி²தானி பஸத்தா²னி. அஹிம்ஸாதி கருணா சேவ கருணாபுப்³ப³பா⁴கோ³ ச. ஸம்யமோதி ஸீலஸம்யமோ. த³மோதி இந்த்³ரியஸம்வரோ, உபோஸத²வஸேன வா அத்தத³மனம், புண்ணோவாதே³ (ம. நி. 3.395 ஆத³யோ; ஸம். நி. 4.88 ஆத³யோ) த³மோதி வுத்தா க²ந்திபி ஆளவகே (ஸம். நி. 1.246; ஸு. நி. 183 ஆத³யோ) வுத்தா பஞ்ஞாபி இமஸ்மிம் ஸுத்தே வட்டதியேவ. மாதாபிது உபட்டா²னந்தி மாதாபிதூனம் ரக்க²னம் கோ³பனம் படிஜக்³க³னம். ஸந்தானந்தி அஞ்ஞத்த² பு³த்³த⁴பச்சேகபு³த்³த⁴அரியஸாவகா ஸந்தோ நாம, இத⁴ பன மாதாபிதுஉபட்டா²கா அதி⁴ப்பேதா. தஸ்மா உத்தமட்டே²ன ஸந்தானம், ஸேட்ட²சரியட்டே²ன ப்³ரஹ்மசாரீனம். இத³ம் மாதாபிதுஉபட்டா²னம் ஸப்³பி⁴ உபஞ்ஞாதந்தி ஏவமேத்த² அத்தோ² த³ட்ட²ப்³போ³. ஸதம் ஏதானி டா²னானீதி ஸந்தானம் உத்தமபுரிஸானம் ஏதானி டா²னானி காரணானி. அரியோ த³ஸ்ஸனஸம்பன்னோதி இத⁴ இமேஸம்யேவ திண்ணம் டா²னானம் காரணேன அரியோ சேவ த³ஸ்ஸனஸம்பன்னோ ச வேதி³தப்³போ³, ந பு³த்³தா⁴த³யோ ந ஸோதாபன்னா. அத² வா ஸதம் ஏதானி டா²னானீதி மாதுபட்டா²னம் பிதுபட்டா²னந்தி ஏதானி டா²னானி ஸந்தானம் உத்தமபுரிஸானம் காரணானீதி ஏவம் மாதாபிதுஉபட்டா²கவஸேன இமிஸ்ஸா கா³தா²ய அத்தோ² வேதி³தப்³போ³. மாதாபிதுஉபட்டா²கோயேவ ஹி இத⁴ ‘‘அரியோ த³ஸ்ஸனஸம்பன்னோ’’தி வுத்தோ. ஸ லோகம் ப⁴ஜதே ஸிவந்தி ஸோ கே²மம் தே³வலோகம் க³ச்ச²தீதி.