7. சதுமஹாராஜஸுத்தவண்ணனா

37. ஸத்தமே அமச்சா பாரிஸஜ்ஜாதி பரிசாரிகதே³வதா. இமம் லோகம் அனுவிசரந்தீதி அட்ட²மீதி³வஸே கிர ஸக்கோ தே³வராஜா சத்தாரோ மஹாராஜானோ ஆணாபேதி – ‘‘தாதா, அஜ்ஜ அட்ட²மீதி³வஸே மனுஸ்ஸலோகம் அனுவிசரித்வா புஞ்ஞானி கரோந்தானம் நாமகோ³த்தம் உக்³க³ண்ஹித்வா ஆக³ச்ச²தா²’’தி. தே க³ந்த்வா அத்தனோ பரிசாரகே பேஸேந்தி – ‘‘க³ச்ச²த², தாதா, மனுஸ்ஸலோகம் விசரித்வா புஞ்ஞகாரகானம் நாமகோ³த்தானி ஸுவண்ணபட்டே லிகி²த்வா ஆனேதா²’’தி. தே ததா² கரோந்தி. தேன வுத்தம் – ‘‘இமம் லோகம் அனுவிசரந்தீ’’தி. கச்சி ப³ஹூதிஆதி³ தேஸம் உபபரிக்கா²காரத³ஸ்ஸனத்த²ம் வுத்தம். ஏவம் உபபரிக்க²ந்தா ஹி தே அனுவிசரந்தி. தத்த² உபோஸத²ம் உபவஸந்தீதி மாஸஸ்ஸ அட்ட²வாரே உபோஸத²ங்கா³னி அதி⁴ட்ட²ஹந்தி. படிஜாக³ரோந்தீதி படிஜாக³ரஉபோஸத²கம்மம் நாம கரோந்தி. தம் கரோந்தா ஏகஸ்மிம் அத்³த⁴மாஸே சதுன்னம் உபோஸத²தி³வஸானம் பச்சுக்³க³மனானுக்³க³மனவஸேன கரோந்தி. பஞ்சமீஉபோஸத²ம் பச்சுக்³க³ச்ச²ந்தா சதுத்தி²யம் உபோஸதி²கா ஹோந்தி, அனுக³ச்ச²ந்தா ச²ட்டி²யம். அட்ட²மீஉபோஸத²ம் பச்சுக்³க³ச்ச²ந்தா ஸத்தமியம், அனுக³ச்ச²ந்தா நவமியம். சாதுத்³த³ஸிம் பச்சுக்³க³ச்ச²ந்தா தேரஸியம், பன்னரஸீஉபோஸத²ம் அனுக³ச்ச²ந்தா பாடிபதே³ உபோஸதி²கா ஹோந்தி. புஞ்ஞானி கரோந்தீதி ஸரணக³மனனிச்சஸீலபுப்ப²பூஜாத⁴ம்மஸ்ஸவனபதீ³பஸஹஸ்ஸஆரோபனவிஹாரகரணாதீ³னி நானப்பகாரானி புஞ்ஞானி கரோந்தி. தே ஏவம் அனுவிசரித்வா புஞ்ஞகம்மகாரகானம் நாமகோ³த்தானி ஸோவண்ணமயே பட்டே லிகி²த்வா ஆஹரித்வா சதுன்னம் மஹாராஜானம் தே³ந்தி. புத்தா இமம் லோகம் அனுவிசரந்தீதி சதூஹி மஹாராஜேஹி புரிமனயேனேவ பஹிதத்தா அனுவிசரந்தி. தத³ஹூதி தம்தி³வஸம். உபோஸதே²தி உபோஸத²தி³வஸே.

ஸசே, பி⁴க்க²வே, அப்பகா ஹோந்தீதி சதுன்னம் மஹாராஜானம் அமச்சா பாரிஸஜ்ஜா தா தா கா³மனிக³மராஜதா⁴னியோ உபஸங்கமந்தி, ததோ தம் உபனிஸ்ஸாய அதி⁴வத்தா² தே³வதா ‘‘மஹாராஜானம் அமச்சா ஆக³தா’’தி பண்ணாகாரம் க³ஹேத்வா தேஸம் ஸந்திகம் க³ச்ச²ந்தி. தே பண்ணாகாரம் க³ஹேத்வா ‘‘கச்சி நு கோ² மாரிஸா ப³ஹூ மனுஸ்ஸா மத்தேய்யா’’தி வுத்தனயேன மனுஸ்ஸானம் புஞ்ஞபடிபத்திம் புச்சி²த்வா ‘‘ஆம, மாரிஸ, இமஸ்மிம் கா³மே அஸுகோ ச அஸுகோ ச புஞ்ஞானி கரோந்தீ’’தி வுத்தே தேஸம் நாமகோ³த்தம் லிகி²த்வா அஞ்ஞத்த² க³ச்ச²ந்தி. அத² சாதுத்³த³ஸியம் சதுன்னம் மஹாராஜானம் புத்தாபி தமேவ ஸுவண்ணபட்டம் க³ஹேத்வா தேனேவ நயேன அனுவிசரந்தா நாமகோ³த்தானி லிக²ந்தி. தத³ஹுபோஸதே² பன்னரஸே சத்தாரோபி மஹாராஜானோ தேனேவ நயேன தஸ்மிம்யேவ ஸுவண்ணபட்டே நாமகோ³த்தானி லிக²ந்தி. தே ஸுவண்ணபட்டபரிமாணேனேவ – ‘‘இமஸ்மிம் காலே மனுஸ்ஸா அப்பகா, இமஸ்மிம் காலே ப³ஹுகா’’தி ஜானந்தி. தம் ஸந்தா⁴ய ‘‘ஸசே, பி⁴க்க²வே, அப்பகா ஹோந்தி மனுஸ்ஸா’’திஆதி³ வுத்தம். தே³வானம் தாவதிம்ஸானந்தி பட²மம் அபி⁴னிப்³ப³த்தே தேத்திம்ஸ தே³வபுத்தே உபாதா³ய ஏவம்லத்³த⁴னாமானம். தேஸம் பன உப்பத்திகதா² தீ³க⁴னிகாயே ஸக்கபஞ்ஹஸுத்தவண்ணனாய வித்தா²ரிதா. தேனாதி தேன ஆரோசனேன, தேன வா புஞ்ஞகாரகானம் அப்பகபா⁴வேன. தி³ப்³பா³ வத, போ⁴, காயா பரிஹாயிஸ்ஸந்தீதி நவனவானம் தே³வபுத்தானம் அபாதுபா⁴வேன தே³வகாயா பரிஹாயிஸ்ஸந்தி, ரமணீயம் த³ஸயோஜனஸஹஸ்ஸம் தே³வனக³ரம் ஸுஞ்ஞம் ப⁴விஸ்ஸதி. பரிபூரிஸ்ஸந்தி அஸுரகாயாதி சத்தாரோ அபாயா பரிபூரிஸ்ஸந்தி. இமினா ‘‘மயம் பரிபுண்ணே தே³வனக³ரே தே³வஸங்க⁴மஜ்ஜே² நக்க²த்தம் கீளிதும் ந லபி⁴ஸ்ஸாமா’’தி அனத்தமனா ஹோந்தி. ஸுக்கபக்கே²பி இமினாவ உபாயேன அத்தோ² வேதி³தப்³போ³.

பூ⁴தபுப்³ப³ம், பி⁴க்க²வே, ஸக்கோ தே³வானமிந்தோ³தி அத்தனோ ஸக்கதே³வராஜகாலம் ஸந்தா⁴ய கதே²தி. ஏகஸ்ஸ வா ஸக்கஸ்ஸ அஜ்ஜா²ஸயம் க³ஹேத்வா கதே²தீதி வுத்தம். அனுனயமானோதி அனுபோ³த⁴யமானோ. தாயம் வேலாயந்தி தஸ்மிம் காலே.

பாடிஹாரியபக்க²ஞ்சாதி ஏத்த² பாடிஹாரியபக்கோ² நாம அந்தோவஸ்ஸே தேமாஸம் நிப³த்³து⁴போஸதோ², தம் அஸக்கோந்தஸ்ஸ த்³வின்னம் பவாரணானம் அந்தரே ஏகமாஸம் நிப³த்³து⁴போஸதோ², தம்பி அஸக்கோந்தஸ்ஸ பட²மபவாரணதோ பட்டா²ய ஏகோ அத்³த⁴மாஸோ பாடிஹாரியபக்கோ²யேவ நாம. அட்ட²ங்க³ஸுஸமாக³தந்தி அட்ட²ஹி கு³ணங்கே³ஹி ஸமன்னாக³தம். யோபிஸ்ஸ மாதி³ஸோ நரோதி யோபி ஸத்தோ மாதி³ஸோ ப⁴வேய்ய. ஸக்கோபி கிர வுத்தப்பகாரஸ்ஸ உபோஸத²கம்மஸ்ஸ கு³ணம் ஜானித்வா த்³வே தே³வலோகஸம்பத்தியோ பஹாய மாஸஸ்ஸ அட்ட² வாரே உபோஸத²ம் உபவஸதி. தஸ்மா ஏவமாஹ. அபரோ நயோ – யோபிஸ்ஸ மாதி³ஸோ நரோதி யோபி ஸத்தோ மாதி³ஸோ அஸ்ஸ, மயா பத்தம் ஸம்பத்திம் பாபுணிதும் இச்சே²ய்யாதி அத்தோ². ஸக்கா ஹி ஏவரூபேன உபோஸத²கம்மேன ஸக்கஸம்பத்திம் பாபுணிதுந்தி அயமேத்த² அதி⁴ப்பாயோ.

வுஸிதவாதி வுத்த²வாஸோ. கதகரணீயோதி சதூஹி மக்³கே³ஹி கத்தப்³ப³கிச்சம் கத்வா டி²தோ. ஓஹிதபா⁴ரோதி க²ந்த⁴பா⁴ரகிலேஸபா⁴ரஅபி⁴ஸங்கா²ரபா⁴ரே ஓதாரேத்வா டி²தோ. அனுப்பத்தஸத³த்தோ²தி ஸத³த்தோ² வுச்சதி அரஹத்தம், தம் அனுப்பத்தோ. பரிக்கீ²ணப⁴வஸம்யோஜனோதி யேன ஸம்யோஜனேன ப³த்³தோ⁴ ப⁴வேஸு ஆகட்³டீ⁴யதி, தஸ்ஸ கீ²ணத்தா பரிக்கீ²ணப⁴வஸம்யோஜனோ. ஸம்மத³ஞ்ஞா விமுத்தோதி ஹேதுனா நயேன காரணேன ஜானித்வா விமுத்தோ. கல்லம் வசனாயாதி யுத்தம் வத்தும்.

யோபிஸ்ஸ மாதி³ஸோ நரோதி யோபி மாதி³ஸோ கீ²ணாஸவோ அஸ்ஸ, ஸோபி ஏவரூபம் உபோஸத²ம் உபவஸேய்யாதி உபோஸத²கம்மஸ்ஸ கு³ணம் ஜானந்தோ ஏவம் வதே³ய்ய. அபரோ நயோ யோபிஸ்ஸ மாதி³ஸோ நரோதி யோபி ஸத்தோ மாதி³ஸோ அஸ்ஸ, மயா பத்தம் ஸம்பத்திம் பாபுணிதும் இச்சே²ய்யாதி அத்தோ². ஸக்கா ஹி ஏவரூபேன உபோஸத²கம்மேன கீ²ணாஸவஸம்பத்திம் பாபுணிதுந்தி அயமேத்த² அதி⁴ப்பாயோ. அட்ட²மம் உத்தானத்த²மேவ.