1. பா³லவக்³கோ³

1. ப⁴யஸுத்தவண்ணனா

1. திகனிபாதஸ்ஸ பட²மே ப⁴யானீதிஆதீ³ஸு ப⁴யந்தி சித்துத்ராஸோ. உபத்³த³வோதி அனேகக்³க³தாகாரோ. உபஸக்³கோ³தி உபஸட்டா²காரோ தத்த² தத்த² லக்³க³னாகாரோ.

தேஸம் ஏவம் நானத்தம் வேதி³தப்³ப³ம் – பப்³ப³தவிஸமனிஸ்ஸிதா சோரா ஜனபத³வாஸீனம் பேஸேந்தி – ‘‘மயம் அஸுகதி³வஸே நாம தும்ஹாகம் கா³மம் பஹரிஸ்ஸாமா’’தி. தே தம் பவத்திம் ஸுதகாலதோ பட்டா²ய ப⁴யம் ஸந்தாஸம் ஆபஜ்ஜந்தி. அயம் சித்துத்ராஸோ நாம. ‘‘யதா² நோ தே சோரா குபிதா அனத்த²ம்பி ஆவஹேய்யு’’ந்தி ஹத்த²ஸாரம் க³ஹேத்வா த்³விபத³சதுப்பதே³ஹி ஸத்³தி⁴ம் அரஞ்ஞம் பவிஸித்வா தத்த² தத்த² பூ⁴மியம் நிபஜ்ஜந்தி ட³ம்ஸமகஸாதீ³ஹி க²ஜ்ஜமானா, கு³ம்ப³ந்தரானி பவிஸந்தா கா²ணுகண்டகே மத்³த³ந்தி. தேஸம் ஏவம் விசரந்தானம் விக்கி²த்தபா⁴வோ அனேகக்³க³தாகாரோ நாம. ததோ சோரேஸு யதா²வுத்தே தி³வஸே அனாக³ச்ச²ந்தேஸு ‘‘துச்ச²கஸாஸனம் ப⁴விஸ்ஸதி, கா³மம் பவிஸிஸ்ஸாமா’’தி ஸபரிக்கா²ரா கா³மம் பவிஸந்தி. அத² தேஸம் பவிட்ட²பா⁴வம் ஞத்வா கா³மம் பரிவாரேத்வா த்³வாரே அக்³கி³ம் த³த்வா மனுஸ்ஸே கா⁴தேத்வா சோரா ஸப்³ப³ம் விப⁴வம் விலும்பித்வா க³ச்ச²ந்தி. தேஸு கா⁴திதாவஸேஸா அக்³கி³ம் நிப்³பா³பேத்வா கோட்ட²கச்சா²யாபி⁴த்திச்சா²யாதீ³ஸு தத்த² தத்த² லக்³கி³த்வா நிஸீத³ந்தி நட்ட²ம் அனுஸோசமானா. அயம் உபஸட்டா²காரோ லக்³க³னாகாரோ நாம.

நளாகா³ராதி நளேஹி ச²ன்னபடிச்ச²ன்னஅகா³ரா. ஸேஸஸம்பா⁴ரா பனேத்த² ருக்க²மயா ஹோந்தி. திணாகா³ரேபி ஏஸேவ நயோ. கூடாகா³ரானீதி கூடஸங்க³ஹிதானி அகா³ரானி. உல்லித்தாவலித்தானீதி அந்தோ ச ப³ஹி ச லித்தானி. நிவாதானீதி நிவாரிதவாதப்பவேஸானி. பு²ஸிதக்³க³ளானீதி சே²கேஹி வட்³ட⁴கீஹி கதத்தா பிட்ட²ஸங்கா⁴டம்ஹி ஸுட்டு² பு²ஸிதகவாடானி. பிஹிதவாதபானானீதி யுத்தவாதபானானி. இமினா பத³த்³வயேன கவாடவாதபானானம் நிச்சபிஹிததம் அகதே²த்வா ஸம்பத்தியேவ கதி²தா. இச்சி²திச்சி²தக்க²ணே பன தானி பிதீ⁴யந்தி ச விவரீயந்தி ச.

பா³லதோ உப்பஜ்ஜந்தீதி பா³லமேவ நிஸ்ஸாய உப்பஜ்ஜந்தி. பா³லோ ஹி அபண்டி³தபுரிஸோ ரஜ்ஜம் வா ஓபரஜ்ஜம் வா அஞ்ஞம் வா பன மஹந்தம் டா²னம் பத்தே²ந்தோ கதிபயே அத்தனா ஸதி³ஸே வித⁴வபுத்தே மஹாது⁴த்தே க³ஹேத்வா ‘‘ஏத² அஹம் தும்ஹே இஸ்ஸரே கரிஸ்ஸாமீ’’தி பப்³ப³தக³ஹனாதீ³னி நிஸ்ஸாய அந்தமந்தே கா³மே பஹரந்தோ தா³மரிகபா⁴வம் ஜானாபேத்வா அனுபுப்³பே³ன நிக³மேபி ஜனபதே³பி பஹரதி. மனுஸ்ஸா கே³ஹானி ச²ட்³டே³த்வா கே²மட்டா²னம் பத்த²யமானா பக்கமந்தி. தே நிஸ்ஸாய வஸந்தா பி⁴க்கூ²பி பி⁴க்கு²னியோபி அத்தனோ அத்தனோ வஸனட்டா²னானி பஹாய பக்கமந்தி. க³தக³தட்டா²னே பி⁴க்கா²பி ஸேனாஸனம்பி து³ல்லப⁴ம் ஹோதி. ஏவம் சதுன்னம்பி பரிஸானம் ப⁴யம் ஆக³தமேவ ஹோதி. பப்³ப³ஜ்ஜிதேஸுபி த்³வே பா³லா பி⁴க்கூ² அஞ்ஞமஞ்ஞம் விவாத³ம் பட்ட²பேத்வா சோத³னம் ஆரப⁴ந்தி. இதி கோஸம்பி³வாஸிகானம் விய மஹாகலஹோ உப்பஜ்ஜதி. சதுன்னம் பரிஸானம் ப⁴யம் ஆக³தமேவ ஹோதீதி ஏவம் யானி கானிசி ப⁴யானி உப்பஜ்ஜந்தி, ஸப்³பா³னி தானி பா³லதோ உப்பஜ்ஜந்தீதி யதா²னுஸந்தி⁴னா தே³ஸனம் நிட்ட²பேஸி.

2. லக்க²ணஸுத்தவண்ணனா

2. து³தியே காயத்³வாராதி³பவத்தம் கம்மம் லக்க²ணம் ஸஞ்ஜானனகாரணம் அஸ்ஸாதி கம்மலக்க²ணோ. அபதா³னஸோப⁴னீ பஞ்ஞாதி யா பஞ்ஞா நாம அபதா³னேன ஸோப⁴தி, பா³லா ச பண்டி³தா ச அத்தனோ அத்தனோ சரிதேனேவ பாகடா ஹோந்தீதி அத்தோ². பா³லேன ஹி க³தமக்³கோ³ ருக்க²க³ச்ச²கா³மனிக³மாதீ³னி ஜா²பேத்வா க³ச்ச²ந்தஸ்ஸ இந்த³க்³கி³னோ க³தமக்³கோ³ விய ஹோதி, ஜா²மட்டா²னமத்தமேவ அங்கா³ரமஸிசா²ரிகாஸமாகுலம் பஞ்ஞாயதி. பண்டி³தேன க³தமக்³கோ³ குஸோப்³பா⁴த³யோ பூரேத்வா விவித⁴ஸஸ்ஸஸம்பத³ம் ஆவஹமானேன சதுதீ³பிகமேகே⁴ன க³தமக்³கோ³ விய ஹோதி. யதா² தேன க³தமக்³கே³ உத³கபூரானி சேவ விவித⁴ஸஸ்ஸப²லாப²லானி ச தானி தானி டா²னானி பஞ்ஞாயந்தி, ஏவம் பண்டி³தேன க³தமக்³கே³ ஸம்பத்தியோவ பஞ்ஞாயந்தி நோ விபத்தியோதி. ஸேஸமேத்த² உத்தானத்த²மேவ.

3. சிந்தீஸுத்தவண்ணனா

3. ததியே பா³லலக்க²ணானீதி ‘‘பா³லோ அய’’ந்தி ஏதேஹி லக்கீ²யதி ஞாயதீதி பா³லலக்க²ணானி. தானேவஸ்ஸ ஸஞ்ஜானனகாரணானீதி பா³லனிமித்தானி. பா³லாபதா³னானீதி பா³லஸ்ஸ அபதா³னானி. து³ச்சிந்திதசிந்தீதி சிந்தயந்தோ அபி⁴ஜ்ஜா²ப்³யாபாத³மிச்சா²த³ஸ்ஸனவஸேன து³ச்சிந்திதமேவ சிந்தேதி. து³ப்³பா⁴ஸிதபா⁴ஸீதி பா⁴ஸமானோபி முஸாவாதா³தி³பே⁴த³ம் து³ப்³பா⁴ஸிதமேவ பா⁴ஸதி. து³க்கடகம்மகாரீதி கரோந்தோபி பாணாதிபாதாதி³வஸேன து³க்கடகம்மமேவ கரோதி. பண்டி³தலக்க²ணானீதிஆதி³ வுத்தானுஸாரேனேவ வேதி³தப்³ப³ம். ஸுசிந்திதசிந்தீதிஆதீ³னி சேத்த² மனோஸுசரிதாதீ³னம் வஸேன யோஜேதப்³பா³னி.

4. அச்சயஸுத்தவண்ணனா

4. சதுத்தே² அச்சயம் அச்சயதோ ந பஸ்ஸதீதி அத்தனோ அபராத⁴ம் அபராத⁴தோ ந பஸ்ஸதி. அச்சயதோ தி³ஸ்வா யதா²த⁴ம்மம் நப்படிகரோதீதி ‘‘அபரத்³த⁴ம் மயா’’தி ஞத்வாபி யோ த⁴ம்மோ, தம் ந கரோதி, த³ண்ட³கம்மம் ஆஹரித்வா அச்சயம் ந தே³ஸேதி நக்க²மாபேதி. அச்சயம் தே³ஸேந்தஸ்ஸ யதா²த⁴ம்மம் நப்படிக்³க³ண்ஹாதீதி பரஸ்ஸ ‘‘விரத்³த⁴ம் மயா’’தி ஞத்வா த³ண்ட³கம்மம் ஆஹரித்வா க²மாபேந்தஸ்ஸ நக்க²மதி. ஸுக்கபக்கோ² வுத்தபடிபக்க²தோ வேதி³தப்³போ³.

5. அயோனிஸோஸுத்தவண்ணனா

5. பஞ்சமே அயோனிஸோ பஞ்ஹம் கத்தா ஹோதீதி ‘‘கதி நு கோ², உதா³யி, அனுஸ்ஸதிட்டா²னானீ’’தி வுத்தே ‘‘புப்³பே³னிவாஸோ அனுஸ்ஸதிட்டா²னம் ப⁴விஸ்ஸதீ’’தி சிந்தேத்வா லாளுதா³யித்தே²ரோ விய அனுபாயசிந்தாய அபஞ்ஹமேவ பஞ்ஹந்தி கத்தா ஹோதி. அயோனிஸோ பஞ்ஹம் விஸ்ஸஜ்ஜேதா ஹோதீதி ஏவம் சிந்திதம் பன பஞ்ஹம் விஸ்ஸஜ்ஜேந்தோபி ‘‘இத⁴, ப⁴ந்தே, பி⁴க்கு² அனேகவிஹிதம் புப்³பே³னிவாஸம் அனுஸ்ஸரதி. ஸேய்யதி²த³ம், ஏகம்பி ஜாதி’’ந்திஆதி³னா நயேன ஸோயேவ தே²ரோ விய அயோனிஸோ விஸ்ஸஜ்ஜேதா ஹோதி, அபஞ்ஹமேவ பஞ்ஹந்தி கதே²தி. பரிமண்ட³லேஹி பத³ப்³யஞ்ஜனேஹீதி ஏத்த² பத³மேவ அத்த²ஸ்ஸ ப்³யஞ்ஜனதோ பத³ப்³யஞ்ஜனம். தம் அக்க²ரபாரிபூரிம் கத்வா த³ஸவித⁴ம் ப்³யஞ்ஜனபு³த்³தி⁴ம் அபரிஹாபேத்வா வுத்தம் பரிமண்ட³லம் நாம ஹோதி, ஏவரூபேஹி பத³ப்³யஞ்ஜனேஹீதி அத்தோ². ஸிலிட்டே²ஹீதி பத³ஸிலிட்ட²தாய ஸிலிட்டே²ஹி. உபக³தேஹீதி அத்த²ஞ்ச காரணஞ்ச உபக³தேஹி. நாப்³ப⁴னுமோதி³தாதி ஏவம் யோனிஸோ ஸப்³ப³ம் காரணஸம்பன்னம் கத்வாபி விஸ்ஸஜ்ஜிதம் பரஸ்ஸ பஞ்ஹம் நாபி⁴னுமோத³தி நாபி⁴னந்த³தி ஸாரிபுத்தத்தே²ரஸ்ஸ பஞ்ஹம் லாளுதா³யித்தே²ரோ விய. யதா²ஹ –

‘‘அட்டா²னம் கோ² ஏதம், ஆவுஸோ ஸாரிபுத்த, அனவகாஸோ, யம் ஸோ அதிக்கம்மேவ கப³ளீகாராஹாரப⁴க்கா²னம் தே³வானம் ஸஹப்³யதம் அஞ்ஞதரம் மனோமயம் காயம் உபபன்னோ ஸஞ்ஞாவேத³யிதனிரோத⁴ம் ஸமாபஜ்ஜேய்யாபி வுட்ட²ஹேய்யாபி, நத்தே²தம் டா²ன’’ந்தி (அ. நி. 5.166).

யோனிஸோ பஞ்ஹம் கத்தாதிஆதீ³ஸு ஆனந்த³த்தே²ரோ விய யோனிஸோவ பஞ்ஹம் சிந்தேத்வா யோனிஸோ விஸ்ஸஜ்ஜிதா ஹோதி. தே²ரோ ஹி ‘‘கதி நு கோ², ஆனந்த³, அனுஸ்ஸதிட்டா²னானீ’’தி புச்சி²தோ ‘‘அயம் பஞ்ஹோ ப⁴விஸ்ஸதீ’’தி யோனிஸோ சிந்தேத்வா யோனிஸோ விஸ்ஸஜ்ஜேந்தோ ஆஹ – ‘‘இத⁴, ப⁴ந்தே, பி⁴க்கு² விவிச்சேவ காமேஹி…பே… சதுத்த²ஜ்ஜா²னம் உபஸம்பஜ்ஜ விஹரதி. இத³ம், ப⁴ந்தே, அனுஸ்ஸதிட்டா²னம் ஏவம்பா⁴விதம் ஏவம்ப³ஹுலீகதம் தி³ட்ட²த⁴ம்மஸுக²விஹாராய ஸம்வத்ததீ’’தி. அப்³ப⁴னுமோதி³தா ஹோதீதி ததா²க³தோ விய யோனிஸோ அப்³ப⁴னுமோதி³தா ஹோதி. ததா²க³தோ ஹி ஆனந்த³த்தே²ரேன பஞ்ஹே விஸ்ஸஜ்ஜிதே ‘‘ஸாது⁴ ஸாது⁴, ஆனந்த³, தேன ஹி த்வம், ஆனந்த³, இமம்பி ச²ட்ட²ம் அனுஸ்ஸதிட்டா²னம் தா⁴ரேஹி. இதா⁴னந்த³, பி⁴க்கு² ஸதோவ அபி⁴க்கமதி ஸதோவ படிக்கமதீ’’திஆதி³மாஹ. ச²ட்டா²தீ³னி உத்தானத்தா²னேவ.

9. க²தஸுத்தவண்ணனா

9. நவமே ஸுக்கபக்கோ² புப்³ப³பா⁴கே³ த³ஸஹிபி குஸலகம்மபதே²ஹி பரிச்சி²ன்னோ, உபரி யாவ அரஹத்தமக்³கா³ லப்³ப⁴தி. ப³ஹுஞ்ச புஞ்ஞம் பஸவதீதி ஏத்த² லோகியலோகுத்தரமிஸ்ஸகபுஞ்ஞம் கதி²தம்.

10. மலஸுத்தவண்ணனா

10. த³ஸமே து³ஸ்ஸீலபா⁴வோ து³ஸ்ஸீல்யம், து³ஸ்ஸீல்யமேவ மலம் து³ஸ்ஸீல்யமலம். கேனட்டே²ன மலந்தி? அனுத³ஹனட்டே²ன து³க்³க³ந்த⁴ட்டே²ன கிலிட்ட²கரணட்டே²ன ச. தஞ்ஹி நிரயாதீ³ஸு அபாயேஸு அனுத³ஹதீதி அனுத³ஹனட்டே²னபி மலம். தேன ஸமன்னாக³தோ புக்³க³லோ மாதாபிதூனம்பி ஸந்திகே பி⁴க்கு²ஸங்க⁴ஸ்ஸாபி அந்தரே போ³தி⁴சேதியட்டா²னேஸுபி ஜிகு³ச்ச²னீயோ ஹோதி, ஸப்³ப³தி³ஸாஸு சஸ்ஸ ‘‘ஏவரூபம் கிர தேன பாபகம்மம் கத’’ந்தி அவண்ணக³ந்தோ⁴ வாயதீதி து³க்³க³ந்த⁴ட்டே²னபி மலம். தேன ச ஸமன்னாக³தோ புக்³க³லோ க³தக³தட்டா²னே உபதாபஞ்சேவ லப⁴தி, காயகம்மாதீ³னி சஸ்ஸ அஸுசீனி ஹோந்தி அபப⁴ஸ்ஸரானீதி கிலிட்ட²கரணட்டே²னபி மலம். அபிச தம் தே³வமனுஸ்ஸஸம்பத்தியோ சேவ நிப்³பா³னஸம்பத்திஞ்ச மிலாபேதீதி மிலாபனட்டே²னபி மலந்தி வேதி³தப்³ப³ம். இஸ்ஸாமலமச்சே²ரமலேஸுபி ஏஸேவ நயோ.

பா³லவக்³கோ³ பட²மோ.