3. வினயபேய்யாலம்

201. த்³வேமே, பி⁴க்க²வே, அத்த²வஸே படிச்சாதி, பி⁴க்க²வே, த்³வே அத்தே² நிஸ்ஸாய த்³வே காரணானி ஸந்தா⁴ய. ஸிக்கா²பத³ம் பஞ்ஞத்தந்தி ஸிக்கா²கோட்டா²ஸோ ட²பிதோ. ஸங்க⁴ஸுட்டு²தாயாதி ஸங்க⁴ஸ்ஸ ஸுட்டு²பா⁴வாய, ‘‘ஸுட்டு², ப⁴ந்தே’’தி வத்வா ஸம்படிச்ச²னத்தா²யாதி அத்தோ². ஸங்க⁴பா²ஸுதாயாதி ஸங்க⁴ஸ்ஸ பா²ஸுவிஹாரத்தா²ய. து³ம்மங்கூனந்தி து³ஸ்ஸீலானம். பேஸலானந்தி பீயஸீலானம். தி³ட்ட²த⁴ம்மிகானம் ஆஸவானந்தி தி³ட்ட²த⁴ம்மே இமஸ்மிம்யேவ அத்தபா⁴வே வீதிக்கமபச்சயா படிலத்³த⁴ப்³பா³னம் வத⁴ப³ந்த⁴னாதி³து³க்க²த⁴ம்மஸங்கா²தானம் ஆஸவானம். ஸம்வராயாதி பித³ஹனத்தா²ய. ஸம்பராயிகானந்தி ததா²ரூபானம்யேவ அபாயது³க்க²ஸங்கா²தானம் ஸம்பராயே உப்பஜ்ஜனகஆஸவானம். படிகா⁴தாயாதி படிஸேத⁴னத்தா²ய. வேரானந்தி அகுஸலவேரானம்பி புக்³க³லவேரானம்பி. வஜ்ஜானந்தி தோ³ஸானம். தே ஏவ வா து³க்க²த⁴ம்மா வஜ்ஜனீயத்தா இத⁴ வஜ்ஜாதி அதி⁴ப்பேதா. ப⁴யானந்தி சித்துத்ராஸப⁴யானம்பி ப⁴யஹேதூனம் தேஸம்யேவ து³க்க²த⁴ம்மானம்பி. அகுஸலானந்தி அக்க²மட்டே²ன அகுஸலஸங்கா²தானம் து³க்க²த⁴ம்மானம். கி³ஹீனம் அனுகம்பாயாதி கி³ஹீஸு உஜ்ஜா²யந்தேஸு பஞ்ஞத்தஸிக்கா²பத³ம் கி³ஹீனம் அனுகம்பாய பஞ்ஞத்தம் நாம. பாபிச்சா²னம் பக்கு²பச்சே²தா³யாதி பாபிச்சா² பக்க²ம் நிஸ்ஸாய ஸங்க⁴ம் பி⁴ந்தே³ய்யுந்தி தேஸம் பக்கு²பச்சே²த³னத்தா²ய. அப்பஸன்னானம் பஸாதா³யாதி புப்³பே³ அப்பஸன்னானம்பி பண்டி³தமனுஸ்ஸானம் ஸிக்கா²பத³பஞ்ஞத்திஸம்பத³ம் தி³ஸ்வா பஸாது³ப்பத்திஅத்தா²ய. பஸன்னானம் பி⁴ய்யோபா⁴வாயாதி பஸன்னானம் உபரூபரிபஸாத³பா⁴வாய. ஸத்³த⁴ம்மட்டி²தியாதி ஸத்³த⁴ம்மஸ்ஸ சிரட்டி²தத்த²ம். வினயானுக்³க³ஹாயாதி பஞ்சவித⁴ஸ்ஸாபி வினயஸ்ஸ அனுக்³க³ண்ஹனத்தா²ய.

202-230. பாதிமோக்க²ம் பஞ்ஞத்தந்தி பி⁴க்கு²பாதிமோக்க²ம் பி⁴க்கு²னிபாதிமோக்க²ந்தி து³வித⁴ம் பாதிமோக்க²ம் பஞ்ஞத்தம். பாதிமோக்கு²த்³தே³ஸோதி பி⁴க்கூ²னம் பஞ்ச, பி⁴க்கு²னீனம் சத்தாரோதி நவ பாதிமோக்கு²த்³தே³ஸா பஞ்ஞத்தா. பாதிமோக்க²ட்ட²பனந்தி உபோஸத²ட்ட²பனம். பவாரணா பஞ்ஞத்தாதி சாதுத்³த³ஸிகா பன்னரஸிகாதி த்³வே பவாரணா பஞ்ஞத்தா. பவாரணட்ட²பனம் பஞ்ஞத்தந்தி ஸாபத்திகஸ்ஸ பி⁴க்கு²னோ பவாரணா உத்தியா வத்தமானாய பவாரணட்ட²பனம் பஞ்ஞத்தம். தஜ்ஜனீயகம்மாதீ³ஸு பி⁴க்கூ² வாசாஸத்தீஹி விதுத³ந்தானம் பண்டு³கலோஹிதகானம் பி⁴க்கூ²னம் தஜ்ஜனீயகம்மம் (சூளவ. 1 ஆத³யோ) பஞ்ஞத்தம். பா³லஸ்ஸ அப்³யத்தஸ்ஸ ஸேய்யஸகஸ்ஸ பி⁴க்கு²னோ நியஸ்ஸகம்மம் பஞ்ஞத்தம். குலதூ³ஸகே அஸ்ஸஜிபுனப்³ப³ஸுகே பி⁴க்கூ² ஆரப்³ப⁴ பப்³பா³ஜனீயகம்மம் (சூளவ. 21 ஆத³யோ) பஞ்ஞத்தம். கி³ஹீனம் அக்கோஸகஸ்ஸ ஸுத⁴ம்மத்தே²ரஸ்ஸ படிஸாரணீயகம்மம் (சூளவ. 33 ஆத³யோ) பஞ்ஞத்தம். ஆபத்தியா அத³ஸ்ஸனாதீ³ஸு உக்கே²பனீயகம்மம் பஞ்ஞத்தம். க³ருகாபத்திம் ஆபன்னஸ்ஸ படிச்ச²ன்னாய ஆபத்தியா பரிவாஸதா³னம் பஞ்ஞத்தம். பரிவாஸே அந்தராபத்திம் ஆபன்னஸ்ஸ மூலாய படிகஸ்ஸனம் பஞ்ஞத்தம். படிச்ச²ன்னாயபி அப்படிச்ச²ன்னாயபி ஆபத்தியா மானத்ததா³னம் பஞ்ஞத்தம். சிண்ணமானத்தஸ்ஸ அப்³பா⁴னம் பஞ்ஞத்தம். ஸம்மா வத்தந்தஸ்ஸ ஓஸாரணீயம் பஞ்ஞத்தம். அஸம்மாவத்தனாதீ³ஸு நிஸ்ஸாரணீயம் பஞ்ஞத்தம்.

ஏஹிபி⁴க்கூ²பஸம்பதா³ ஸரணக³மனூபஸம்பதா³ ஓவாதூ³பஸம்பதா³ பஞ்ஹாப்³யாகரணூபஸம்பதா³ ஞத்திசதுத்த²கம்மூபஸம்பதா³ க³ருத⁴ம்மூபஸம்பதா³ உப⁴தோஸங்கே⁴ உபஸம்பதா³ தூ³தேன உபஸம்பதா³தி அட்ட²விதா⁴ உபஸம்பதா³ பஞ்ஞத்தா. ஞத்திகம்மம் நவ டா²னானி க³ச்ச²தீதி ஏவம் நவட்டா²னிகம் ஞத்திகம்மம் பஞ்ஞத்தம். ஞத்திது³தியகம்மம் ஸத்த டா²னானி க³ச்ச²தீதி ஏவம் ஸத்தட்டா²னிகமேவ ஞத்திது³தியகம்மம் பஞ்ஞத்தம். ஞத்திசதுத்த²கம்மம் ஸத்த டா²னானி க³ச்ச²தீதி ஏவம் ஸத்தட்டா²னிகமேவ ஞத்திசதுத்த²கம்மம் பஞ்ஞத்தம். பட²மபாராஜிகாதீ³னம் பட²மபஞ்ஞத்தி அபஞ்ஞத்தே பஞ்ஞத்தம். தேஸம்யேவ அனுபஞ்ஞத்தி பஞ்ஞத்தே அனுபஞ்ஞத்தம். த⁴ம்மஸம்முக²தா வினயஸம்முக²தா ஸங்க⁴ஸம்முக²தா புக்³க³லஸம்முக²தாதி இமஸ்ஸ சதுப்³பி³த⁴ஸ்ஸ ஸம்முகீ²பா⁴வஸ்ஸ வஸேன ஸம்முகா²வினயோ பஞ்ஞத்தோ. ஸதிவேபுல்லப்பத்தஸ்ஸ கீ²ணாஸவஸ்ஸ அசோத³னத்தா²ய ஸதிவினயோ பஞ்ஞத்தோ. உம்மத்தகஸ்ஸ பி⁴க்கு²னோ அமூள்ஹவினயோ பஞ்ஞத்தோ. அப்படிஞ்ஞாய சுதி³தகஸ்ஸ ஆபத்தியா அதரணத்த²ம் படிஞ்ஞாதகரணம் பஞ்ஞத்தம். ப³ஹுதரானம் த⁴ம்மவாதீ³னம் லத்³தி⁴ம் க³ஹேத்வா அதி⁴கரணவூபஸமனத்த²ம். யேபு⁴ய்யஸிகா பஞ்ஞத்தா. பாபுஸ்ஸன்னஸ்ஸ புக்³க³லஸ்ஸ நிக்³க³ண்ஹனத்த²ம் தஸ்ஸபாபியஸிகா பஞ்ஞத்தா. ப⁴ண்ட³னாதி³வஸேன ப³ஹும் அஸ்ஸாமணகம் கத்வா ஆபத்திம் ஆபன்னானம் பி⁴க்கூ²னம் ட²பேத்வா து²ல்லவஜ்ஜம் ட²பேத்வா கி³ஹிபடிஸம்யுத்தஞ்ச அவஸேஸாபத்தீனம் வூபஸமனத்தா²ய திணவத்தா²ரகோ பஞ்ஞத்தோ.

வினயபேய்யாலம் நிட்டி²தம்.