5. உபஞ்ஞாதஸுத்தவண்ணனா

5. பஞ்சமே த்³வின்னாஹந்தி த்³வின்னம் அஹம். உபஞ்ஞாஸிந்தி உபக³ந்த்வா கு³ணம் அஞ்ஞாஸிம், ஜானிம் படிவிஜ்ஜி²ந்தி அத்தோ². இதா³னி தே த⁴ம்மே த³ஸ்ஸேந்தோ யா ச அஸந்துட்டி²தாதிஆதி³மாஹ. இமஞ்ஹி த⁴ம்மத்³வயம் நிஸ்ஸாய ஸத்தா² ஸப்³ப³ஞ்ஞுதம் பத்தோ, தஸ்மா தஸ்ஸானுபா⁴வம் த³ஸ்ஸேந்தோ ஏவமாஹ. தத்த² அஸந்துட்டி²தா குஸலேஸு த⁴ம்மேஸூதி இமினா இமம் தீ³பேதி – ‘‘அஹம் ஜா²னமத்தகேன வா ஓபா⁴ஸனிமித்தமத்தகேன வா அஸந்துட்டோ² ஹுத்வா அரஹத்தமக்³க³மேவ உப்பாதே³ஸிம். யாவ ஸோ ந உப்பஜ்ஜி, ந தாவாஹம் ஸந்துட்டோ² அஹோஸிம். பதா⁴னஸ்மிம் ச அனுக்கண்டி²தோ ஹுத்வா அனோஸக்கனாய ட²த்வாயேவ பதா⁴னகிரியம் அகாஸி’’ந்தி இமமத்த²ம் த³ஸ்ஸேந்தோ யா ச அப்படிவானிதாதிஆதி³மாஹ. தத்த² அப்படிவானிதாதி அப்படிக்கமனா அனோஸக்கனா. அப்படிவானீ ஸுதா³ஹம், பி⁴க்க²வே, பத³ஹாமீதி ஏத்த² ஸுத³ந்தி நிபாதமத்தம். அஹம், பி⁴க்க²வே, அனோஸக்கனாயம் டி²தோ போ³தி⁴ஸத்தகாலே ஸப்³ப³ஞ்ஞுதம் பத்தே²ந்தோ பதா⁴னமகாஸிந்தி அயமேத்த² அத்தோ².

இதா³னி யதா² தேன தம் பதா⁴னம் கதம், தம் த³ஸ்ஸேந்தோ காமம் தசோ சாதிஆதி³மாஹ. தத்த² பத்தப்³ப³ந்தி இமினா பத்தப்³ப³ம் கு³ணஜாதம் த³ஸ்ஸேதி. புரிஸதா²மேனாதிஆதி³னா புரிஸஸ்ஸ ஞாணதா²மோ ஞாணவீரியம் ஞாணபரக்கமோ ச கதி²தோ. ஸண்டா²னந்தி ட²பனா அப்பவத்தனா ஓஸக்கனா, படிப்பஸ்ஸத்³தீ⁴தி அத்தோ². ஏத்தாவதா தேன சதுரங்க³ஸமன்னாக³தம் வீரியாதி⁴ட்டா²னம் நாம கதி²தம். ஏத்த² ஹி காமம் தசோ சாதி ஏகம் அங்க³ம், ந்ஹாரு சாதி ஏகம், அட்டி² சாதி ஏகம், மம்ஸலோஹிதந்தி ஏகம், இமானி சத்தாரி அங்கா³னி. புரிஸதா²மேனாதிஆதீ³னி அதி⁴மத்தவீரியாதி⁴வசனானி. இதி புரிமேஹி சதூஹி அங்கே³ஹி ஸமன்னாக³தேன ஹுத்வா ஏவம் அதி⁴ட்டி²தம் வீரியம் சதுரங்க³ஸமன்னாக³தம் வீரியாதி⁴ட்டா²னம் நாமாதி வேதி³தப்³ப³ம். ஏத்தாவதா தேன போ³தி⁴பல்லங்கே அத்தனோ ஆக³மனீயபடிபதா³ கதி²தா.

இதா³னி தாய படிபதா³ய படிலத்³த⁴கு³ணம் கதே²தும் தஸ்ஸ மய்ஹம், பி⁴க்க²வேதிஆதி³மாஹ. தத்த² அப்பமாதா³தி⁴க³தாதி ஸதிஅவிப்பவாஸஸங்கா²தேன அப்பமாதே³ன அதி⁴க³தா, ந ஸுத்தப்பமத்தேன லத்³தா⁴. ஸம்போ³தீ⁴தி சதுமக்³க³ஞாணஞ்சேவ ஸப்³ப³ஞ்ஞுதஞ்ஞாணஞ்ச. ந ஹி ஸக்கா ஏதம் ஸுத்தப்பமத்தேன அதி⁴க³ந்துந்தி. தேனாஹ – ‘‘அப்பமாதா³தி⁴க³தா ஸம்போ³தீ⁴’’தி. அனுத்தரோ யோக³க்கே²மோதி ந கேவலம் போ³தி⁴யேவ, அரஹத்தப²லனிப்³பா³னஸங்கா²தோ அனுத்தரோ யோக³க்கே²மோபி அப்பமாதா³தி⁴க³தோவ.

இதா³னி அத்தனா படிலத்³த⁴கு³ணேஸு பி⁴க்கு²ஸங்க⁴ம் ஸமாத³பேந்தோ தும்ஹே சேபி பி⁴க்க²வேதிஆதி³மாஹ. தத்த² யஸ்ஸத்தா²யாதி யஸ்ஸ அத்தா²ய, யம் உபஸம்பஜ்ஜ விஹரிதுகாமா ஹுத்வாதி அத்தோ². தத³னுத்தரந்தி தம் அனுத்தரம். ப்³ரஹ்மசரியபரியோஸானந்தி மக்³க³ப்³ரஹ்மசரியஸ்ஸ பரியோஸானபூ⁴தம் அரியப²லம். அபி⁴ஞ்ஞா ஸச்சி²கத்வாதி அபி⁴ஞ்ஞாய உத்தமபஞ்ஞாய பச்சக்க²ம் கத்வா. உபஸம்பஜ்ஜ விஹரிஸ்ஸதா²தி படிலபி⁴த்வா பாபுணித்வா விஹரிஸ்ஸத². தஸ்மாதி யஸ்மா அப்படிவானபதா⁴னம் நாமேதம் ப³ஹூபகாரம் உத்தமத்த²ஸாத⁴கம், தஸ்மா. பஞ்சமம்.