5-6. ஸங்கா³ரவஸுத்தாதி³வண்ணனா

117-118. பஞ்சமே ஓரிமம் தீரந்தி லோகியம் ஓரிமதீரம். பாரிமம் தீரந்தி லோகுத்தரம் பாரிமதீரம். பாரகா³மினோதி நிப்³பா³னகா³மினோ. தீரமேவானுதா⁴வதீதி ஸக்காயதி³ட்டி²தீரம்யேவ அனுதா⁴வதி. த⁴ம்மே த⁴ம்மானுவத்தினோதி ஸம்மா அக்கா²தே நவவிதே⁴ லோகுத்தரத⁴ம்மே அனுத⁴ம்மவத்தினோ, தஸ்ஸ த⁴ம்மஸ்ஸானுச்ச²விகாய ஸஹஸீலாய புப்³ப³பா⁴க³படிபத்தியா பவத்தமானா. மச்சுதே⁴ய்யம் ஸுது³த்தரந்தி மச்சுனோ டா²னபூ⁴தம் தேபூ⁴மகவட்டம் ஸுது³த்தரம் தரித்வா. பாரமேஸ்ஸந்தீதி நிப்³பா³னம் பாபுணிஸ்ஸந்தி.

ஓகா அனோகமாக³ம்மாதி வட்டதோ விவட்டம் ஆக³ம்ம. விவேகே யத்த² தூ³ரமந்தி யஸ்மிம் காயசித்தஉபதி⁴விவேகே து³ரபி⁴ரமம், தத்ராபி⁴ரதிமிச்சே²ய்ய. ஹித்வா காமேதி து³விதே⁴பி காமே பஹாய. அகிஞ்சனோதி நிப்பலிபோ³தோ⁴. ஆதா³னபடினிஸ்ஸகே³தி க³ஹணபடினிஸ்ஸக்³க³ஸங்கா²தே நிப்³பா³னே. அனுபாதா³ய யே ரதாதி சதூஹி உபாதா³னேஹி கிஞ்சிபி அனுபாதி³யித்வா யே அபி⁴ரதா. பரினிப்³பு³தாதி தே அபச்சயபரினிப்³பா³னேன பரினிப்³பு³தா நாமாதி வேதி³தப்³பா³. ச²ட்ட²ம் பி⁴க்கூ²னம் தே³ஸிதம்.