6. நிஜ்ஜரஸுத்தவண்ணனா

106. ச²ட்டே² நிஜ்ஜரவத்தூ²னீதி நிஜ்ஜரகாரணானி. மிச்சா²தி³ட்டி² நிஜ்ஜிண்ணா ஹோதீதி அயம் ஹேட்டா² விபஸ்ஸனாயபி நிஜ்ஜிண்ணா ஏவ பஹீனா. கஸ்மா புன க³ஹிதாதி? அஸமுச்சி²ன்னத்தா. விபஸ்ஸனாய ஹி கிஞ்சாபி நிஜ்ஜிண்ணா, ந பன ஸமுச்சி²ன்னா. மக்³கோ³ பன உப்பஜ்ஜித்வா தம் ஸமுச்சி²ந்த³தி, ந புன வுட்டா²தும் தே³தி. தஸ்மா புன க³ஹிதா. ஏவம் ஸப்³ப³பதே³ஸு யோஜேதப்³போ³. ஏத்த² ச ஸம்மாவிமுத்திபச்சயா சதுஸட்டி² த⁴ம்மா பா⁴வனாபாரிபூரிம் க³ச்ச²ந்தி. கதமே சதுஸட்டி²? ஸோதாபத்திமக்³க³க்க²ணே அதி⁴மோக்க²ட்டே²ன ஸத்³தி⁴ந்த்³ரியம் பரிபூரதி, பக்³க³ஹட்டே²ன வீரியிந்த்³ரியம், உபட்டா²னட்டே²ன ஸதிந்த்³ரியம், அவிக்கே²பட்டே²ன ஸமாதி⁴ந்த்³ரியம், த³ஸ்ஸனட்டே²ன பஞ்ஞிந்த்³ரியம் பரிபூரேதி, விஜானனட்டே²ன மனிந்த்³ரியம், அபி⁴னந்த³னட்டே²ன ஸோமனஸ்ஸிந்த்³ரியம், பவத்தஸந்ததிஆதி⁴பதேய்யட்டே²ன ஜீவிதிந்த்³ரியம் பரிபூரதி…பே… அரஹத்தப²லக்க²ணே அதி⁴மோக்க²ட்டே²ன ஸத்³தி⁴ந்த்³ரியம்…பே… பவத்தஸந்ததிஆதி⁴பதேய்யட்டே²ன ஜீவிதிந்த்³ரியம் பரிபூரதீதி ஏவம் சதூஸு ச மக்³கே³ஸு சதூஸு ச ப²லேஸு அட்ட²ட்ட² ஹுத்வா சதுஸட்டி² த⁴ம்மா பாரிபூரிம் க³ச்ச²ந்தி.