9. உபாலிஸுத்தவண்ணனா
99. நவமே து³ரபி⁴ஸம்ப⁴வானீதி ஸம்ப⁴விதும் து³க்கா²னி து³ஸ்ஸஹானி, ந ஸக்கா அப்பேஸக்கே²ஹி அஜ்ஜோ²கா³ஹிதுந்தி வுத்தம் ஹோதி. அரஞ்ஞவனபத்தா²னீதி அரஞ்ஞானி ச வனபத்தா²னி ச. ஆரஞ்ஞகங்க³னிப்பா²த³னேன அரஞ்ஞானி, கா³மந்தம் அதிக்கமித்வா மனுஸ்ஸானம் அனுபசாரட்டா²னபா⁴வேன வனபத்தா²னி. பந்தானீதி பரியந்தானி அதிதூ³ரானி. து³க்கரம் பவிவேகந்தி காயவிவேகோ து³க்கரோ. து³ரபி⁴ரமந்தி அபி⁴ரமிதும் ந ஸுகரம். ஏகத்தேதி ஏகீபா⁴வே. கிம் த³ஸ்ஸேதி? காயவிவேகே கதேபி தத்த² சித்தம் அபி⁴ரமாபேதும் து³க்கரம். த்³வயம்த்³வயாராமோ ஹி அயம் லோகோதி. ஹரந்தி மஞ்ஞேதி ஹரந்தி விய க⁴ஸந்தி விய. மனோதி சித்தம். ஸமாதி⁴ம் அலப⁴மானஸ்ஸாதி உபசாரஸமாதி⁴ம் வா அப்பனாஸமாதி⁴ம் வா அலப⁴ந்தஸ்ஸ. கிம் த³ஸ்ஸேதி? ஈதி³ஸஸ்ஸ பி⁴க்கு²னோ திணபண்ணமிகா³தி³ஸத்³தே³ஹி விவிதே⁴ஹி ச பீ⁴ஸனகேஹி வனானி சித்தம் விக்கி²பந்தி மஞ்ஞேதி. ஸம்ஸீதி³ஸ்ஸதீதி காமவிதக்கேன ஸம்ஸீதி³ஸ்ஸதி. உப்லவிஸ்ஸதீதி ப்³யாபாத³விஹிம்ஸாவிதக்கேஹி உத்³த⁴ம் ப்லவிஸ்ஸதி.
கண்ணஸம்தோ⁴விகந்தி கண்ணே தோ⁴வந்தேன கீளிதப்³ப³ம். பிட்டி²ஸம்தோ⁴விகந்தி பிட்டி²ம் தோ⁴வந்தேன கீளிதப்³ப³ம். தத்த² உத³கம் ஸோண்டா³ய க³ஹேத்வா த்³வீஸு கண்ணேஸு ஆஸிஞ்சனம் கண்ணஸம்தோ⁴விகா நாம, பிட்டி²யம் ஆஸிஞ்சனம் பிட்டி²ஸம்தோ⁴விகா நாம. கா³த⁴ம் விந்த³தீதி பதிட்ட²ம் லப⁴தி. கோ சாஹம் கோ ச ஹத்தி²னாகோ³தி அஹம் கோ, ஹத்தி²னாகோ³ கோ, அஹம்பி திரச்சா²னக³தோ, அயம்பி, மய்ஹம்பி சத்தாரோ பாதா³, இமஸ்ஸபி, நனு உபோ⁴பி மயம் ஸமஸமாதி.
வங்ககந்தி குமாரகானம் கீளனகம் கு²த்³த³கனங்க³லம். க⁴டிகந்தி தீ³க⁴த³ண்ட³கேன ரஸ்ஸத³ண்ட³கம் பஹரணகீளம். மோக்க²சிகந்தி ஸம்பரிவத்தககீளம், ஆகாஸே த³ண்ட³கம் க³ஹேத்வா பூ⁴மியம் வா ஸீஸம் ட²பேத்வா ஹேட்டு²பரியபா⁴வேன பரிவத்தனகீளந்தி வுத்தம் ஹோதி. சிங்கு³லகந்தி தாலபண்ணாதீ³ஹி கதம் வாதப்பஹாரேன பரிப்³ப⁴மனசக்கம். பத்தாள்ஹகம் வுச்சதி பண்ணனாளி, தாய வாலுகாதீ³னி மினந்தா கீளந்தி. ரத²கந்தி கு²த்³த³கரத²ம். த⁴னுகந்தி கு²த்³த³கத⁴னுமேவ.
இத⁴ கோ² பன வோதி ஏத்த² வோதி நிபாதமத்தம், இத⁴ கோ² பனாதி அத்தோ². இங்க⁴ த்வம், உபாலி, ஸங்கே⁴ விஹராஹீதி ஏத்த² இங்கா⁴தி சோத³னத்தே² நிபாதோ. தேன தே²ரம் ஸங்க⁴மஜ்ஜே² விஹாரத்தா²ய சோதே³தி, நாஸ்ஸ அரஞ்ஞவாஸம் அனுஜானாதி. கஸ்மா? அரஞ்ஞஸேனாஸனே வஸதோ கிரஸ்ஸ வாஸது⁴ரமேவ பூரிஸ்ஸதி, ந க³ந்த²து⁴ரம். ஸங்க⁴மஜ்ஜே² வஸந்தோ பன த்³வே து⁴ரானி பூரேத்வா அரஹத்தம் பாபுணிஸ்ஸதி, வினயபிடகே ச பாமோக்கோ² ப⁴விஸ்ஸதி. அத²ஸ்ஸாஹம் பரிஸமஜ்ஜே² புப்³ப³பத்த²னம் புப்³பா³பி⁴னீஹாரஞ்ச கதே²த்வா இமம் பி⁴க்கு²ம் வினயத⁴ரானம் அக்³க³ட்டா²னே ட²பேஸ்ஸாமீதி இமமத்த²ம் பஸ்ஸமானோ ஸத்தா² தே²ரஸ்ஸ அரஞ்ஞவாஸம் நானுஜானீதி. த³ஸமம் உத்தானத்த²மேவாதி.
உபாலிவக்³கோ³ பஞ்சமோ.
து³தியபண்ணாஸகம் நிட்டி²தம்.