6. கோகனுத³ஸுத்தவண்ணனா

96. ச²ட்டே² புப்³பா³பயமானோதி புப்³ப³ஸதி³ஸானி நிருத³கானி குருமானோ. க்வேத்த², ஆவுஸோதி கோ ஏத்த², ஆவுஸோ. யாவதா, ஆவுஸோ, தி³ட்டீ²தி யத்திகா த்³வாஸட்டி²விதா⁴பி தி³ட்டி² நாம அத்தி². யாவதா தி³ட்டி²ட்டா²னந்தி ‘‘க²ந்தா⁴பி தி³ட்டி²ட்டா²னம், அவிஜ்ஜாபி, ப²ஸ்ஸோபி, ஸஞ்ஞாபி, விதக்கோபி அயோனிஸோமனஸிகாரோபி, பாபமித்தோபி, பரதோகோ⁴ஸோபி தி³ட்டி²ட்டா²ன’’ந்தி ஏவம் யத்தகம் அட்ட²வித⁴ம்பி தி³ட்டி²ட்டா²னம் தி³ட்டி²காரணம் நாம அத்தி². தி³ட்டா²தி⁴ட்டா²னந்தி தி³ட்டீ²னம் அதி⁴ட்டா²னம், அதி⁴ட²த்வா அதி⁴ப⁴வித்வா பவத்தாய தி³ட்டி²யா ஏதம் நாமம். தி³ட்டி²பரியுட்டா²னந்தி ‘‘கதமானி அட்டா²ரஸ தி³ட்டி²பரியுட்டா²னானி? யா தி³ட்டி² தி³ட்டி²க³தம் தி³ட்டி²க³ஹனம் தி³ட்டி²கந்தாரம் தி³ட்டி²விஸூகம் தி³ட்டி²விப்ப²ந்தி³தம் தி³ட்டி²ஸம்யோஜனம் தி³ட்டி²ஸல்லம் தி³ட்டி²ஸம்பா³தோ⁴ தி³ட்டி²பலிபோ³தோ⁴ தி³ட்டி²ப³ந்த⁴னம் தி³ட்டி²பபாதோ தி³ட்டா²னுஸயோ தி³ட்டி²ஸந்தாபோ தி³ட்டி²பரிளாஹோ தி³ட்டி²க³ந்தோ² தி³ட்டு²பாதா³னம் தி³ட்டா²பி⁴னிவேஸோ தி³ட்டி²பராமாஸோ. இமானி அட்டா²ரஸ தி³ட்டி²பரியுட்டா²னானீ’’தி ஏவம் வுத்தம் தி³ட்டி²பரியுட்டா²னம். ஸமுட்டா²னந்தி தி³ட்டி²ட்டா²னஸ்ஸேவ வேவசனம். வுத்தஞ்ஹேதம் – ‘‘க²ந்தா⁴ பச்சயோ தி³ட்டீ²னம் உபாதா³ய ஸமுட்டா²னட்டே²னா’’தி (படி. ம. 1.124) ஸப்³ப³ம் வித்தா²ரேதப்³ப³ம். ஸோதாபத்திமக்³கோ³ பன தி³ட்டி²ஸமுக்³கா⁴தோ நாம ஸப்³ப³தி³ட்டீ²னம் ஸமுக்³கா⁴தகத்தா. தமஹந்தி தம் ஸப்³ப³ம் அஹம் ஜானாமி. க்யாஹம் வக்கா²மீதி கிம்காரணா அஹம் வக்கா²மி.