4. வஜ்ஜியமாஹிதஸுத்தவண்ணனா

94. சதுத்தே² வஜ்ஜியமாஹிதோதி ஏவம்னாமகோ. ஸப்³ப³ம் தபந்தி ஸப்³ப³மேவ து³க்கரகாரிகம். ஸப்³ப³ம் தபஸ்ஸிந்தி ஸப்³ப³ம் தபனிஸ்ஸிதகம். லூகா²ஜீவிந்தி து³க்கரகாரிகஜீவிகானுயோக³ம் அனுயுத்தம். கா³ரய்ஹந்தி க³ரஹிதப்³ப³யுத்தகம். பஸம்ஸியந்தி பஸம்ஸிதப்³ப³யுத்தகம். வேனயிகோதி ஸயம் அவினீதோ அஞ்ஞேஹி வினேதப்³போ³. அபஞ்ஞத்திகோதி ந கிஞ்சி பஞ்ஞாபேதும் ஸக்கோதி. அத² வா வேனயிகோதி ஸத்தவினாஸகோ. அபஞ்ஞத்திகோதி அபச்சக்க²ம் நிப்³பா³னம் பஞ்ஞாபேதி, ஸயம்கதாதீ³ஸு கிஞ்சி பஞ்ஞாபேதும் ந ஸக்கோதி. ந ஸோ ப⁴க³வா வேனயிகோதி ஸோ ப⁴க³வா ஏவம் யாதா²வதோ ஞத்வா குஸலாகுஸலம் பஞ்ஞாபேந்தோ ந அஞ்ஞேன வினேதப்³போ³ ந அஞ்ஞஸிக்கி²தோ. யே ச த⁴ம்மே உபாதா³ய ஸத்தோ பஞ்ஞாபியதி, தேஸம் பஞ்ஞாபனதோ ந ஸத்தவினாஸகோ, ஸுவினீதோ ஸுஸிக்கி²தோ ஸத்தவினாயகோதி அத்தோ². தஸ்ஸ ச பஞ்ஞத்தியோ ஸபஞ்ஞத்தியோயேவாதி த³ஸ்ஸேதி. விமுத்திம் விமுச்சதோ அகுஸலா த⁴ம்மாதி மிச்சா²தி³ட்டி²ஸங்கா²தம் சித்தஸ்ஸ அதி⁴முத்திம் அதி⁴முச்சதோ அகுஸலா த⁴ம்மா வட்³ட⁴ந்தி நாம, தம் ஸந்தா⁴யேதம் வுத்தம். ஸாஸனே பன சித்தஸ்ஸ விமுத்திஸங்கா²தோ விமுத்தி குஸலானம்யேவ பச்சயோ ஹோதி.