5. மிக³ஸாலாஸுத்தவண்ணனா

75. பஞ்சமஸ்ஸ ஆதி³ம்ஹி தாவ யம் வத்தப்³ப³ம், தம் ச²க்கனிபாதே வுத்தமேவ. து³ஸ்ஸீலோ ஹோதீதிஆதீ³ஸு பன து³ஸ்ஸீலோதி நிஸ்ஸீலோ. சேதோவிமுத்திந்தி ப²லஸமாதி⁴ம். பஞ்ஞாவிமுத்திந்தி ப²லஞாணம். நப்பஜானாதீதி உக்³க³ஹபரிபுச்சா²வஸேன ந ஜானாதி. து³ஸ்ஸீல்யம் அபரிஸேஸம் நிருஜ்ஜ²தீதி ஏத்த² பஞ்ச து³ஸ்ஸீல்யானி தாவ ஸோதாபத்திமக்³கே³ன பஹீயந்தி, த³ஸ அரஹத்தமக்³கே³ன. ப²லக்க²ணே தானி பஹீனானி நாம ஹோந்தி. ப²லக்க²ணம் ஸந்தா⁴ய இத⁴ ‘‘நிருஜ்ஜ²தீ’’தி வுத்தம். புது²ஜ்ஜனஸ்ஸ ஸீலம் பஞ்சஹி காரணேஹி பி⁴ஜ்ஜதி பாராஜிகாபஜ்ஜனேன ஸிக்கா²பச்சக்கா²னேன தித்தி²யபக்க²ந்த³னேன அரஹத்தேன மரணேனாதி. தத்த² புரிமா தயோ பா⁴வனாபரிஹானாய ஸம்வத்தந்தி, சதுத்தோ² வட்³டி⁴யா, பஞ்சமோ நேவ ஹானாய ந வட்³டி⁴யா. கத²ம் பனேதம் அரஹத்தேன ஸீலம் பி⁴ஜ்ஜதீதி? புது²ஜ்ஜனஸ்ஸ ஹி ஸீலம் அச்சந்தகுஸலமேவ ஹோதி, அரஹத்தமக்³கோ³ ச குஸலாகுஸலகம்மக்க²யாய ஸம்வத்ததீதி ஏவம் தேன தம் பி⁴ஜ்ஜதி. ஸவனேனபி அகதம் ஹோதீதி ஸோதப்³ப³யுத்தகம் அஸ்ஸுதம் ஹோதி. பா³ஹுஸச்சேனபி அகதம் ஹோதீதி ஏத்த² பா³ஹுஸச்சந்தி வீரியம். வீரியேன கத்தப்³ப³யுத்தகம் அகதம் ஹோதி, தஸ்ஸ அகதத்தா ஸக்³க³தோபி மக்³க³தோபி பரிஹாயதி. தி³ட்டி²யாபி அப்படிவித்³த⁴ம் ஹோதீதி தி³ட்டி²யா படிவிஜ்ஜி²தப்³ப³ம் அப்படிவித்³த⁴ம் ஹோதி அபச்சக்க²கதம். ஸாமயிகம்பி விமுத்திம் ந லப⁴தீதி காலானுகாலம் த⁴ம்மஸ்ஸவனம் நிஸ்ஸாய பீதிபாமோஜ்ஜம் ந லப⁴தி. ஹானாய பரேதீதி ஹானாய பவத்ததி.

யதா²பூ⁴தம் பஜானாதீதி ‘‘ஸோதாபத்திப²லம் பத்வா பஞ்சவித⁴ம் து³ஸ்ஸீல்யம் அபரிஸேஸம் நிருஜ்ஜ²தீ’’தி உக்³க³ஹபரிபுச்சா²வஸேன ஜானாதி. தஸ்ஸ ஸவனேனபி கதம் ஹோதீதி ஸோதப்³ப³யுத்தகம் ஸுதம் ஹோதி. பா³ஹுஸச்சேனபி கதம் ஹோதீதி வீரியேன கத்தப்³ப³யுத்தகம் அந்தமஸோ து³ப்³ப³லவிபஸ்ஸனாமத்தகம்பி கதம் ஹோதி. தி³ட்டி²யாபி ஸுப்படிவித்³த⁴ம் ஹோதீதி அந்தமஸோ லோகியபஞ்ஞாயபி பச்சயபடிவேதோ⁴ கதோ ஹோதி. இமஸ்ஸ ஹி புக்³க³லஸ்ஸ பஞ்ஞா ஸீலம் பரிதோ⁴வதி, ஸோ பஞ்ஞாபரிதோ⁴தேன விஸேஸம் பாபுணாதி.

பமாணிகாதி புக்³க³லேஸு பமாணக்³கா³ஹகா. பமிணந்தீதி பமேதும் துலேதும் அரஹந்தி. ஏகோ ஹீனோதி ஏகோ கு³ணேஹி ஹீனோ. பணீதோதி ஏகோ கு³ணேஹி பணீதோ உத்தமோ. தம் ஹீதி தம் பமாணகரணம். அபி⁴க்கந்ததரோதி ஸுந்த³ரதரோ. பணீததரோதி உத்தமதரோ. த⁴ம்மஸோதோ நிப்³ப³ஹதீதி ஸூரம் ஹுத்வா பவத்தமானம் விபஸ்ஸனாஞாணம் நிப்³ப³ஹதி, அரியபூ⁴மிம் பாபேதி. தத³ந்தரம் கோ ஜானேய்யாதி தம் ஏவம் காரணம் கோ ஜானேய்ய. ஸீலவா ஹோதீதி லோகியஸீலேன ஸீலவா ஹோதி. யத்த²ஸ்ஸ தம் ஸீலந்தி அரஹத்தவிமுத்திம் பத்வா ஸீலம் அபரிஸேஸம்பி நிருஜ்ஜ²தி நாம, தத்த² யுத்தி வுத்தாயேவ. இதோ பரேஸு த்³வீஸு அங்கே³ஸு அனாகா³மிப²லம் விமுத்தி நாம, பஞ்சமே அரஹத்தமேவ. ஸேஸமேத்த² வுத்தனயானுஸாரேனேவ வேதி³தப்³ப³ம். ச²ட்ட²ம் உத்தானத்த²மேவ.