5-7. பட²மஸுக²ஸுத்தாதி³வண்ணனா

65-67. பஞ்சமே வட்டமூலகம் ஸுக²து³க்க²ம் புச்சி²தம், ச²ட்டே² ஸாஸனமூலகம். ஸத்தமே நளகபானந்தி அதீதே போ³தி⁴ஸத்தஸ்ஸ ஓவாதே³ ட²த்வா வானரயூதே²ன நளேஹி உத³கஸ்ஸ பீதட்டா²னே மாபிதத்தா ஏவம்லத்³த⁴னாமோ நிக³மோ. துண்ஹீபூ⁴தம் துண்ஹீபூ⁴தந்தி யம் யம் தி³ஸம் அனுவிலோகேதி, தத்த² தத்த² துண்ஹீபூ⁴தமேவ. அனுவிலோகேத்வாதி ததோ ததோ விலோகேத்வா. பிட்டி² மே ஆகி³லாயதீதி கஸ்மா ஆகி³லாயதி? ப⁴க³வதோ ஹி ச² வஸ்ஸானி மஹாபதா⁴னம் பத³ஹந்தஸ்ஸ மஹந்தம் காயது³க்க²ம் அஹோஸி, அத²ஸ்ஸ அபரபா⁴கே³ மஹல்லககாலே பிட்டி²வாதோ உப்பஜ்ஜி. உபாதி³ன்னகஸரீரஸ்ஸ டா²னனிஸஜ்ஜாதீ³ஹி அப்பமத்தகேன ஆபா³தே⁴ன ந ஸக்கா கேனசி ப⁴விதும். தம் க³ஹேத்வாபி தே²ரஸ்ஸ ஓகாஸகரணத்த²ம் ஏவமாஹ. ஸங்கா⁴டிம் பஞ்ஞாபேத்வா ஏகமந்தே பதிரூபட்டா²னே பஞ்ஞத்தஸ்ஸ கப்பியமஞ்சஸ்ஸ உபரி அத்த²ரித்வா.