17. பஸாத³கரத⁴ம்மவக்³க³வண்ணனா

366. அத்³த⁴மித³ந்திஆதீ³ஸு அத்³த⁴ந்தி ஏகம்ஸாதி⁴வசனமேதம், அத்³தா⁴ இத³ம் லாபா⁴னம், ஏகம்ஸோ ஏஸ லாபா⁴னந்தி வுத்தம் ஹோதி. யதி³த³ம் ஆரஞ்ஞிகத்தந்தி யோ ஏஸ ஆரஞ்ஞிகபா⁴வோ. இத³ம் வுத்தம் ஹோதி – ஆரஞ்ஞிகபா⁴வோ நாம லாபா⁴னம் ஏகம்ஸோ அவஸ்ஸபா⁴விதா ந ஸக்கா ஆரஞ்ஞிகேன லாப⁴ம் ந லபி⁴துந்தி. ஆரஞ்ஞிகோ ஹி பி⁴க்கு² ‘‘அத்தனோ அரஞ்ஞவாஸஸ்ஸ அனுச்ச²விகம் கரிஸ்ஸாமீ’’தி பாபகம் நாம ந கரோதி, அத²ஸ்ஸ ‘‘ஆரஞ்ஞிகோ அயம் பி⁴க்கூ²’’தி ஸஞ்ஜாதகா³ரவோ மஹாஜனோ சதுபச்சயேன பூஜம் கரோதி. தேன வுத்தம் – ‘‘அத்³த⁴மித³ம், பி⁴க்க²வே, லாபா⁴னம் யதி³த³ம் ஆரஞ்ஞிகத்த’’ந்தி. ஸேஸபதே³ஸுபி ஏஸேவ நயோ. ஏத்த² பன பா³ஹுஸச்சந்தி ப³ஹுஸ்ஸுதபா⁴வோ. தா²வரேய்யந்தி சிரபப்³ப³ஜிதத்தா தா²வரப்பத்தபா⁴வோ. ஆகப்பஸம்பதா³தி சீவரக்³க³ஹணாதி³னோ ஆகப்பஸ்ஸ ஸம்பத்தி. பரிவாரஸம்பதா³தி ஸுசிபரிவாரதா. கோலபுத்தீதி குலபுத்தபா⁴வோ. வண்ணபோக்க²ரதாதி ஸம்பன்னரூபதா. கல்யாணவாக்கரணதாதி வசனகிரியாய மது⁴ரபா⁴வோ. அப்பாபா³த⁴தாதி ஆரோக்³யஸம்பத்தி. அரோகோ³ ஹி பி⁴க்கு² அத்தனோ ஸரீரகல்யாணதாய விபஸ்ஸனாது⁴ரே ச க³ந்த²து⁴ரே ச பரிபூரகாரீ ஹோதி, தேனஸ்ஸ லாபோ⁴ உப்பஜ்ஜதீதி.

ஸோளஸ பஸாத³கரத⁴ம்மா நிட்டி²தா.