16. ஏகத⁴ம்மபாளி

(16) 1. ஏகத⁴ம்மபாளி-பட²மவக்³க³வண்ணனா

296. ஏகத⁴ம்மபாளியம் ஏகத⁴ம்மோதி ஏகஸபா⁴வோ. ஏகந்தனிப்³பி³தா³யாதி ஏகந்தேன வட்டே நிப்³பி³ந்த³னத்தா²ய உக்கண்ட²னத்தா²ய. விராகா³யாதி வட்டே விரஜ்ஜனத்தா²ய, ராகா³தீ³னம் வா கிலேஸானம் விரஜ்ஜனாய விக³மாய. நிரோதா⁴யாதி ராகா³தீ³னம் நிரோதா⁴ய அப்பவத்திகரணத்தா²ய, வட்டஸ்ஸேவ வா நிருஜ்ஜ²னத்தா²ய. உபஸமாயாதி கிலேஸவூபஸமனத்தா²ய, அபி⁴ஞ்ஞாயாதி அனிச்சாதி³வஸேன லக்க²ணத்தயம் ஆரோபேத்வா அபி⁴ஜானனத்தா²ய. ஸம்போ³தா⁴யாதி சதுன்னம் ஸச்சானம் பு³ஜ்ஜ²னத்தா²ய, ‘‘போ³தி⁴ வுச்சதி சதூஸு மக்³கே³ஸு ஞாண’’ந்தி (மஹானி. 191; சூளனி. க²க்³க³விஸாணஸுத்தனித்³தே³ஸோ 121) ஏவம் வுத்தஸ்ஸ வா சதுமக்³க³ஞாணஸ்ஸ படிவிஜ்ஜ²னத்தா²ய. நிப்³பா³னாயாதி அப்பச்சயனிப்³பா³னஸ்ஸ ஸச்சி²கரணத்தா²ய.

இதி ப⁴க³வா இமேஹி ஸத்தஹி பதே³ஹி பு³த்³தா⁴னுஸ்ஸதிகம்மட்டா²னஸ்ஸ வண்ணம் கதே²ஸி. கஸ்மா? மஹாஜனஸ்ஸ உஸ்ஸாஹஜனனத்த²ம் விஸகண்டகவாணிஜோ விய அத்தனோ பணியஸ்ஸ. விஸகண்டகவாணிஜோ நாம கு³ளவாணிஜோ வுச்சதி. ஸோ கிர கு³ளபா²ணிதக²ண்ட³ஸக்கராதீ³னி ஸகடேனாதா³ய பச்சந்தகா³மம் க³ந்த்வா ‘‘விஸகண்டகம் க³ண்ஹத², விஸகண்டகம் க³ண்ஹதா²’’தி உக்³கோ⁴ஸேஸி. தம் ஸுத்வா கா³மிகா ‘‘விஸம் நாம கக்க²ளம் கோ⁴ரம். யோ நம் கா²த³தி, ஸோ மரதி. கண்டகம்பி விஜ்ஜி²த்வா மாரேதி, உபோ⁴பேதே கக்க²ளா. கோ ஏத்த² ஆனிஸம்ஸோ’’தி கே³ஹத்³வாரானி த²கேஸும், தா³ரகே ச பலாபேஸும். தம் தி³ஸ்வா வாணிஜோ ‘அவோஹாரகுஸலா இமே கா³மிகா, ஹந்த³ நே உபாயேன கா³ஹாபேமீ’’தி ‘‘அதிமது⁴ரம் க³ண்ஹத², அதிஸாது³ம் க³ண்ஹத², கு³ளம் பா²ணிதம் ஸக்கரம் ஸமக்³க⁴ம் லப்³ப⁴தி, கூடமாஸககூடகஹாபணாதீ³ஹி வாபி லப்³ப⁴தீ’’தி உக்³கோ⁴ஸேஸி. தம் ஸுத்வா கா³மிகா துட்ட²பஹட்டா² வக்³க³வக்³கா³ க³ந்த்வா ப³ஹும்பி மூலம் த³த்வா அக்³க³ஹேஸும்.

தத்த² விஸகண்டகவாணிஜஸ்ஸ ‘‘விஸகண்டகம் க³ண்ஹதா²’’தி உக்³கோ⁴ஸனம் விய ப⁴க³வதோ பு³த்³தா⁴னுஸ்ஸதிகம்மட்டா²னகத²னம், விஸகண்டகே வண்ணம் கதே²த்வா தஸ்ஸ க³ஹணத்தா²ய மஹாஜனஸ்ஸ உஸ்ஸாஹகரணம் விய இமேஹி ஸத்தஹி பதே³ஹி பு³த்³தா⁴னுஸ்ஸதிகம்மட்டா²னஸ்ஸ வண்ணப⁴ணனேன தஸ்ஸ மஹாஜனஸ்ஸ உஸ்ஸாஹகரணம்.

கதமோ ஏகத⁴ம்மோதி கதே²துகம்யதாபுச்சா². பு³த்³தா⁴னுஸ்ஸதீதி பு³த்³த⁴ம் ஆரப்³ப⁴ உப்பன்னா அனுஸ்ஸதி, பு³த்³த⁴கு³ணாரம்மணாய ஸதியா ஏதம் அதி⁴வசனம். தம் பனேதம் பு³த்³தா⁴னுஸ்ஸதிகம்மட்டா²னம் து³வித⁴ம் ஹோதி சித்தஸம்பஹம்ஸனத்த²ஞ்சேவ விபஸ்ஸனத்த²ஞ்ச. கத²ம்? யதா³ ஹி அஸுபா⁴ரம்மணேஸு அஞ்ஞதரம் பா⁴வேந்தஸ்ஸ பி⁴க்கு²னோ சித்துப்பாதோ³ உபஹஞ்ஞதி உக்கண்ட²தி நிரஸ்ஸாதோ³ ஹோதி, வீதி²ம் நப்படிபஜ்ஜதி, கூடகோ³ணோ விய இதோ சிதோ ச விதா⁴வதி. தஸ்மிம் க²ணே ஏஸ மூலகம்மட்டா²னம் பஹாய ‘‘இதிபி ஸோ ப⁴க³வா’’திஆதி³னா நயேன ததா²க³தஸ்ஸ லோகியலோகுத்தரகு³ணே அனுஸ்ஸரதி. தஸ்ஸேவம் பு³த்³த⁴ம் அனுஸ்ஸரந்தஸ்ஸ சித்துப்பாதோ³ பஸீத³தி, வினீவரணோ ஹோதி. ஸோ தம் சித்தம் ஏவம் த³மேத்வா புன மூலகம்மட்டா²னம்யேவ மனஸி கரோதி. கத²ம்? யதா² நாம ப³லவா புரிஸோ கூடாகா³ரகண்ணிகத்தா²ய மஹாருக்க²ம் சி²ந்த³ந்தோ ஸாகா²பலாஸச்சே²த³னமத்தேனேவ ப²ரஸுதா⁴ராய விபன்னாய மஹாருக்க²ம் சி²ந்தி³தும் அஸக்கோந்தோபி து⁴ரனிக்கே²பம் அகத்வாவ கம்மாரஸாலம் க³ந்த்வா திகி²ணம் ப²ரஸும் காராபேத்வா புன தம் சி²ந்தே³ய்ய. ஏவம்ஸம்பத³மித³ம் த³ட்ட²ப்³ப³ம். ஸோ ஏவம் பு³த்³தா⁴னுஸ்ஸதிவஸேன சித்தம் பரித³மேத்வா புன மூலகம்மட்டா²னம் மனஸிகரோந்தோ அஸுபா⁴ரம்மணம் பட²மஜ்ஜா²னம் நிப்³ப³த்தேத்வா ஜா²னங்கா³னி ஸம்மஸித்வா அரியபூ⁴மிம் ஓக்கமதி. ஏவம் தாவ சித்தஸம்பஹம்ஸனத்த²ம் ஹோதி.

யதா³ பனேஸ பு³த்³தா⁴னுஸ்ஸதிம் அனுஸ்ஸரித்வா ‘‘கோ அயம் இதிபி ஸோ ப⁴க³வாதிஆதி³னா நயேன அனுஸ்ஸரி, இத்தி² நு கோ² புரிஸோ நு கோ² தே³வமனுஸ்ஸமாரப்³ரஹ்மானம் அஞ்ஞதரோ நு கோ²’’தி பரிக்³க³ண்ஹந்தோ ‘‘ந அஞ்ஞோ கோசி, ஸதிஸம்பயுத்தம் பன சித்தமேவ அனுஸ்ஸரீ’’தி தி³ஸ்வா ‘‘தம் கோ² பனேதம் சித்தம் க²ந்த⁴தோ விஞ்ஞாணக்க²ந்தோ⁴ ஹோதி, தேன ஸம்பயுத்தா வேத³னா வேத³னாக்க²ந்தோ⁴, தேன ஸம்பயுத்தா ஸஞ்ஞா ஸஞ்ஞாக்க²ந்தோ⁴, ஸஹஜாதா ப²ஸ்ஸாத³யோ ஸங்கா²ரக்க²ந்தோ⁴தி இமே சத்தாரோ அரூபக்க²ந்தா⁴ ஹோந்தீ’’தி அரூபஞ்ச வவத்த²பேத்வா தஸ்ஸ நிஸ்ஸயம் பரியேஸந்தோ ஹத³யவத்து²ம் தி³ஸ்வா தஸ்ஸ நிஸ்ஸயானி சத்தாரி மஹாபூ⁴தானி, தானி உபாதா³ய பவத்தானி ஸேஸஉபாதா³ரூபானி ச பரிக்³க³ஹேத்வா ‘‘ஸப்³ப³ம்பேதம் ரூபம் ரூபக்க²ந்தோ⁴’’தி வவத்த²பேத்வா ‘‘இத³ஞ்ச ரூபம் புரிமஞ்ச அரூப’’ந்தி ஸங்கே²பதோ ரூபாரூபம், பபே⁴த³தோ பஞ்சக்க²ந்தே⁴ புன ‘‘ஸங்கே²பதோ பஞ்சபேதே க²ந்தா⁴ து³க்க²ஸச்ச’’ந்தி து³க்க²ஸச்சம் வவத்த²பேத்வா ‘‘தஸ்ஸ பபா⁴விகா தண்ஹா ஸமுத³யஸச்சம், தஸ்ஸா நிரோதோ⁴ நிரோத⁴ஸச்சம், நிரோத⁴பஜானனா படிபதா³ மக்³க³ஸச்ச’’ந்தி ஏவம் புப்³ப³பா⁴கே³ சத்தாரி ச ஸச்சானி வவத்த²பேத்வா படிபாடியா அரியபூ⁴மிம் ஓக்கமதி. ததா³ஸ்ஸ இமம் கம்மட்டா²னம் விபஸ்ஸனத்த²ம் நாம ஹோதி. அயம் கோ²திஆதி³ அப்பனாவாரோ வுத்தனயேனேவ வேதி³தப்³போ³.

297. த⁴ம்மானுஸ்ஸதிஆதீ³ஸுபி ஏஸேவ நயோ. அயம் பனேத்த² வசனத்தோ² – த⁴ம்மம் ஆரப்³ப⁴ உப்பன்னா அனுஸ்ஸதி த⁴ம்மானுஸ்ஸதி, ஸ்வாக்கா²ததாதி³த⁴ம்மகு³ணாரம்மணாய ஸதியா ஏதம் அதி⁴வசனம். ஸங்க⁴ம் ஆரப்³ப⁴ உப்பன்னா அனுஸ்ஸதி ஸங்கா⁴னுஸ்ஸதி, ஸுப்படிபன்னதாதி³ஸங்க⁴கு³ணாரம்மணாய ஸதியா ஏதம் அதி⁴வசனம். ஸீலம் ஆரப்³ப⁴ உப்பன்னா அனுஸ்ஸதி ஸீலானுஸ்ஸதி, அக²ண்ட³தாதி³ஸீலகு³ணாரம்மணாய ஸதியா ஏதம் அதி⁴வசனம். சாக³ம் ஆரப்³ப⁴ உப்பன்னா அனுஸ்ஸதி சாகா³னுஸ்ஸதி, முத்தசாக³தாதி³சாக³கு³ணாரம்மணாய ஸதியா ஏதம் அதி⁴வசனம். தே³வதா ஆரப்³ப⁴ உப்பன்னா அனுஸ்ஸதி தே³வதானுஸ்ஸதி, தே³வதா ஸக்கி²ட்டா²னே ட²பேத்வா அத்தனோ ஸத்³தா⁴தி³கு³ணாரம்மணாய ஸதியா ஏதம் அதி⁴வசனம். ஆனாபானே ஆரப்³ப⁴ உப்பன்னா ஸதி ஆனாபானஸ்ஸதி, அஸ்ஸாஸபஸ்ஸாஸனிமித்தாரம்மணாய ஸதியா ஏதம் அதி⁴வசனம். மரணம் ஆரப்³ப⁴ உப்பன்னா ஸதி மரணஸ்ஸதி, ஜீவிதிந்த்³ரியுபச்சே²தா³ரம்மணாய ஸதியா ஏதம் அதி⁴வசனம். கேஸாதி³பே⁴த³ம் ரூபகாயம் க³தா, காயே வா க³தாதி காயக³தா, காயக³தா ச ஸா ஸதி சாதி காயக³தாஸதீதி வத்தப்³பே³ ரஸ்ஸம் அகத்வா காயக³தாஸதீதி வுத்தா. கேஸாதி³காயகோட்டா²ஸனிமித்தாரம்மணாய ஸதியா ஏதம் அதி⁴வசனம். உபஸமம் ஆரப்³ப⁴ உப்பன்னா அனுஸ்ஸதி உபஸமானுஸ்ஸதி, ஸப்³ப³து³க்கூ²பஸமாரம்மணாய ஸதியா ஏதம் அதி⁴வசனம். து³விதோ⁴ வா உபஸமோ அச்சந்தூபஸமோ ச க²யூபஸமோ ச. தத்த² அச்சந்தூபஸமோ நாம நிப்³பா³னம், க²யூபஸமோ நாம மக்³கோ³. ஏவமேதம் து³வித⁴ம்பி உபஸமம் அனுஸ்ஸரந்தஸ்ஸ உப்பன்னா ஸதி உபஸமானுஸ்ஸதீதி அயமேத்த² அத்தோ². இதி இமேஸு த³ஸஸு கம்மட்டா²னேஸு ஆனாபானஸ்ஸதி மரணஸ்ஸதி காயக³தாஸதீதி இமானி தீணி விபஸ்ஸனத்தா²னேவ ஹோந்தி, ஸேஸானி ஸத்த சித்தஸம்பஹம்ஸனத்தா²னிபி ஹோந்தீதி.

பட²மவக்³க³வண்ணனா.

16. ஏகத⁴ம்மபாளி

(16) 2. ஏகத⁴ம்மபாளி-து³தியவக்³க³வண்ணனா

298. து³தியே மிச்சா²தி³ட்டீ²தி த்³வாஸட்டி²விதா⁴யபி மிச்சா²தி³ட்டி²யா ஏதம் அதி⁴வசனம். மிச்சா²தி³ட்டி²கஸ்ஸாதி தாய தி³ட்டி²யா ஸமன்னாக³தஸ்ஸ.

299. ஸம்மாதி³ட்டீ²தி பஞ்சவிதா⁴யபி ஸம்மாதி³ட்டி²யா ஏதம் அதி⁴வசனம். ஸம்மாதி³ட்டி²கஸ்ஸாதி தாய தி³ட்டி²யா ஸமன்னாக³தஸ்ஸ.

302. அயோனிஸோ மனஸிகாரோதி அனுபாயமனஸிகாரோ.

303. யோனிஸோ மனஸிகாரோதி உபாயமனஸிகாரோ. தத்த² அயோனிஸோ மனஸிகரோதோ புப்³பே³ அனுப்பன்னா மிச்சா²தி³ட்டி² உப்பஜ்ஜதி, உப்பன்னா பன யாவ நியாமோக்கமனா பவட்³ட⁴தி. நியாமே ஓக்கந்தே வட்³டி⁴தா நாம ஹோதி. யோனிஸோ மனஸிகரோதோ புப்³பே³ அனுப்பன்னா ஸம்மாதி³ட்டி² உப்பஜ்ஜதி, உப்பன்னா பன யாவ அரஹத்தமக்³கா³ பவட்³ட⁴தி. அரஹத்தப²லே பத்தே வட்³டி⁴தா நாம ஹோதி.

304. மிச்சா²தி³ட்டி²யா, பி⁴க்க²வே, ஸமன்னாக³தா ஸத்தாதி ஏத்த² ஏகச்சா மிச்சா²தி³ட்டி² ஸக்³கா³வரணா சேவ ஹோதி மக்³கா³வரணா ச, ஏகச்சா மக்³கா³வரணாவ, ந ஸக்³கா³வரணா, ஏகச்சா நேவ ஸக்³கா³வரணா ந மக்³கா³வரணா. தத்த² அஹேதுகதி³ட்டி², அகிரியதி³ட்டி², நத்தி²கதி³ட்டீ²தி அயம் திவிதா⁴ ஸக்³கா³வரணா சேவ ஹோதி மக்³கா³வரணா ச. த³ஸவத்து²கா அந்தக்³கா³ஹிகா மிச்சா²தி³ட்டி² மக்³கா³வரணாவ ஹோதி ந ஸக்³கா³வரணா. வீஸதிவத்து²கா ஸக்காயதி³ட்டி² நேவ ஸக்³கா³வரணா ந மக்³கா³வரணா. இத³ம் பன விதா⁴னம் படிக்கி²பித்வா இமஸ்மிம் ஸுத்தே ‘‘மிச்சா²தி³ட்டி²யா, பி⁴க்க²வே, ஸமன்னாக³தா’’தி வசனதோ அந்தமஸோ வீஸதிவத்து²கம் ஸக்காயதி³ட்டி²ம் உபாதா³ய தி³ட்டி² நாம ஸக்³க³ம் உபனேதும் ஸமத்தா² நாம நத்தி², ஏகந்தம் நிரயஸ்மிம்யேவ நிமுஜ்ஜாபேதீதி வுத்தம். யதா² ஹி முக்³க³மாஸப்பமாணாபி பாஸாணஸக்க²ரா உத³கே பக்கி²த்தா உப்பிலவமானா நாம நத்தி², ஏகந்தம் ஹேட்டா²வ பவிஸதி, ஏவமேவம் அந்தமஸோ ஸக்காயதி³ட்டி²பி ஸக்³க³ம் உபனேதும் ஸமத்தா² நாம நத்தி², ஏகந்தம் அபாயேஸுயேவ நிமுஜ்ஜாபேதீதி.

305. ஸம்மாதி³ட்டி²யா ஸமன்னாக³தாதி ஏத்த² கம்மஸ்ஸகதஸம்மாதி³ட்டி², ஜா²னஸம்மாதி³ட்டி², விபஸ்ஸனாஸம்மாதி³ட்டி², மக்³க³ஸம்மாதி³ட்டி², ப²லஸம்மாதி³ட்டீ²தி பஞ்சவிதா⁴ ஸம்மாதி³ட்டி². தத்த² கம்மஸ்ஸகதஸம்மாதி³ட்டி² ஸம்பத்திப⁴வம் ஆகட்³ட⁴தி, ஜா²னஸம்மாதி³ட்டி² ரூபாரூபப⁴வே படிஸந்தி⁴ம் தே³தி, மக்³க³ஸம்மாதி³ட்டி² வட்டம் வித்³த⁴ம்ஸேதி, ப²லஸம்மாதி³ட்டி² ப⁴வம் படிபா³ஹதி. விபஸ்ஸனாஸம்மாதி³ட்டி² கிம் கரோதீதி? ஸாபி படிஸந்தி⁴ம் நாகட்³ட⁴தி. திபிடகசூளாப⁴யத்தே²ரோ பனாஹ ‘‘ஸசே விபஸ்ஸனாஸம்மாதி³ட்டி² பா⁴விதா தி³ட்டே²வ த⁴ம்மே அரஹத்தம் பாபேதும் ஸக்கோதி, இச்சேதம் குஸலம். ஸசே ந ஸக்கோதி, ஸத்த ப⁴வே தே³தி, ஆவுஸோ’’தி. ஏவமயம் லோகியலோகுத்தரா ஸம்மாதி³ட்டி² கதி²தா. இமஸ்மிம் பனத்தே² லோகிகா ப⁴வனிப்பா²தி³காவ வேதி³தப்³பா³.

306. யஞ்சேவ காயகம்மம் யதா²தி³ட்டி² ஸமத்தம் ஸமாதி³ன்னந்தி ஏத்த² யதா²தி³ட்டீ²தி யா யா தி³ட்டி², தஸ்ஸா தஸ்ஸா அனுரூபம். ஸமத்தந்தி பரிபுண்ணம். ஸமாதி³ன்னந்தி க³ஹிதம். ததே³தம் யதா²தி³ட்டி²யம் டி²தகாயகம்மம், தி³ட்டி²ஸஹஜாதம் காயகம்மம், தி³ட்டா²னுலோமிகம் காயகம்மந்தி திவித⁴ம் ஹோதி. தத்த² ‘‘பாணம் ஹனதோ அதி³ன்னம் ஆதி³யதோ மிச்சா²சாரம் சரதோ நத்தி² ததோனிதா³னம் பாபம், நத்தி² பாபஸ்ஸ ஆக³மோ’’தி யம் ஏவம்லத்³தி⁴கஸ்ஸ ஸதோ பாணாதிபாத-அதி³ன்னாதா³ன-மிச்சா²சாரஸங்கா²தம் காயகம்மம், இத³ம் யதா²தி³ட்டி²யம் டி²தகாயகம்மம் நாம. ‘‘பாணம் ஹனதோ அதி³ன்னம் ஆதி³யதோ மிச்சா²சாரம் சரதோ நத்தி² ததோனிதா³னம் பாபம், நத்தி² பாபஸ்ஸ ஆக³மோ’’தி இமாய பன லத்³தி⁴யா இமினா த³ஸ்ஸனேன ஸஹஜாதம் காயகம்மம் தி³ட்டி²ஸஹஜாதம் காயகம்மம் நாம. ததே³வ பன ஸமத்தம் ஸமாதி³ன்னம் க³ஹிதம் பராமட்ட²ம் தி³ட்டா²னுலோமிகம் காயகம்மம் நாம. வசீகம்மாதீ³ஸுபி ஏஸேவ நயோ. யதா² பனேத்த² ‘‘பாணம் ஹனதோ அதி³ன்னம் ஆதி³யதோ மிச்சா²சாரம் சரதோ நத்தி² ததோனிதா³னம் பாப’’ந்தி யோஜனா கதா, ஏவம் வசீகம்மமனோகம்மேஸு ‘‘முஸா ப⁴ணதோ, பிஸுணம் கதே²ந்தஸ்ஸ, ப²ருஸம் கதே²ந்தஸ்ஸ, ஸம்ப²ம் பலபந்தஸ்ஸ, அபி⁴ஜ்ஜா²லுனோ, ப்³யாபன்னசித்தஸ்ஸ, மிச்சா²தி³ட்டி²கஸ்ஸ ச ஸதோ நத்தி² ததோனிதா³னம் பாப’’ந்தி யோஜனா காதப்³பா³.

யா ச சேதனாதிஆதீ³ஸு தி³ட்டி²ஸஹஜாதாவ சேதனா சேதனா நாம, தி³ட்டி²ஸஹஜாதாவ பத்த²னா பத்த²னா நாம, சேதனாபத்த²னானம் வஸேன சித்தட்ட²பனா பணிதி⁴ நாம, தேஹி பன சேதனாதீ³ஹி ஸம்பயுத்தா ப²ஸ்ஸாத³யோ ஸங்கா²ரா நாம. தி³ட்டி² ஹிஸ்ஸ, பி⁴க்க²வே, பாபிகாதி யஸ்மா தஸ்ஸ புக்³க³லஸ்ஸ தி³ட்டி² பாபிகா லாமிகா. நிக்கி²த்தந்தி ரோபிதம். உபாதி³யதீதி க³ண்ஹாதி. கடுகத்தாயாதி இத³ம் புரிமஸ்ஸேவ வேவசனம்.

‘‘வண்ணக³ந்த⁴ரஸூபேதோ, அம்போ³யம் அஹுவா புரே;

தமேவ பூஜம் லப⁴மானோ, கேனம்போ³ கடுகப்ப²லோ.

‘‘புசிமந்த³பரிவாரோ, அம்போ³ தே த³தி⁴வாஹன;

மூலம் மூலேன ஸம்ஸட்ட²ம், ஸாகா² ஸாகா² நிஸேவரே;

அஸாதஸன்னிவாஸேன, தேனம்போ³ கடுகப்ப²லோ’’தி. (ஜா. 1.2.71-72) –

ஆக³தட்டா²னே விய ஹி இதா⁴பி கடுகந்தி தித்தகம் வேதி³தப்³ப³ம். அஸாதத்தாயாதி அமது⁴ரத்தாய.

இமஸ்மி பன பீ³ஜூபமஸுத்தே ‘‘தி³ட்டீ²தி நியதமிச்சா²தி³ட்டி² க³ஹிதா’’தி போராணகத்தே²ரா ஆஹம்ஸு. தம் பன படிக்கி²பித்வா ‘‘ஸப்³பா³னிபி த்³வாஸட்டி² தி³ட்டி²க³தானி க³ஹிதானீ’’தி வுத்தம். அனந்தரஸுத்தே ‘‘பாணாதிபாதா விரமந்தஸ்ஸ, அதி³ன்னாதா³னா விரமந்தஸ்ஸ, மிச்சா²சாரா விரமந்தஸ்ஸ நத்தி² ததோனிதா³னம் புஞ்ஞ’’ந்திஆதி³னா நயேன யதா²தி³ட்டி²யம் டி²தகாயகம்மாதீ³னி யோஜேத்வா வேதி³தப்³பா³னி. இத⁴ பன ஸம்மாதி³ட்டி²ஸஹஜாதா சித்தட்ட²பனாவ பத்த²னாதி வேதி³தப்³பா³. ஸம்மாதி³ட்டி² பனேத்த² லோகியலோகுத்தரா கதி²தா. ஸேஸம் ஸப்³ப³த்த² உத்தானத்த²மேவாதி.

து³தியவக்³க³வண்ணனா.

16. ஏகத⁴ம்மபாளி

(16) 3. ஏகத⁴ம்மபாளி-ததியவக்³க³வண்ணனா

308. ததியஸ்ஸ பட²மே மிச்சா²தி³ட்டி²கோதி அயாதா²வதி³ட்டி²கோ. விபரீதத³ஸ்ஸனோதி தாயேவ மிச்சா²தி³ட்டி²யா விபரீதத³ஸ்ஸனோ. ஸத்³த⁴ம்மா வுட்டா²பேத்வாதி த³ஸகுஸலகம்மபத²த⁴ம்மதோ வுட்டா²பேத்வா. அஸத்³த⁴ம்மே பதிட்டா²பேதீதி த³ஸஅகுஸலகம்மபத²ஸங்கா²தே அஸத்³த⁴ம்மே பதிட்டா²பேதி. ஏகபுக்³க³லோதி சேத்த² ச²ஹி ஸத்தா²ரேஹி ஸத்³தி⁴ம் தே³வத³த்தோ ச அஞ்ஞே ச ஏவரூபா வேதி³தப்³பா³.

309. து³தியே ஸம்மாதி³ட்டி²கோதி யாதா²வதி³ட்டி²கோ. அவிபரீதத³ஸ்ஸனோதி தாயேவ ஸம்மாதி³ட்டி²யா அவிபரீதத³ஸ்ஸனோ. அஸத்³த⁴ம்மாதி த³ஸஅகுஸலகம்மபத²தோ. ஸத்³த⁴ம்மேதி த³ஸகுஸலகம்மபத²ஸங்கா²தே ஸத்³த⁴ம்மே. ஏகபுக்³க³லோதி சேத்த² அனுப்பன்னே பு³த்³தே⁴ சக்கவத்தீ ராஜா ஸப்³ப³ஞ்ஞுபோ³தி⁴ஸத்தோதி ஏவமாத³யோ லப்³ப⁴ந்தி, உப்பன்னே பு³த்³தே⁴ பு³த்³தோ⁴ சேவ பு³த்³த⁴ஸாவகா ச.

310. ததியே மிச்சா²தி³ட்டி²பரமானீதி மிச்சா²தி³ட்டி² பரமா ஏதேஸந்தி மிச்சா²தி³ட்டி²பரமானி. பஞ்ச ஹி ஆனந்தரியகம்மானி மஹாஸாவஜ்ஜானி நாம, தேஹிபி மிச்சா²தி³ட்டி²யேவ மஹாஸாவஜ்ஜதராதி அதி⁴ப்பாயோ. கஸ்மா? தேஸஞ்ஹி பரிச்சே²தோ³ அத்தி². சத்தாரி ஹி ஆனந்தரியகம்மானி நிரயே நிப்³ப³த்தாபேந்தீதி வுத்தானி. ஸங்க⁴பே⁴த³கம்மம்பி நிரயே கப்பட்டி²திகமேவ ஹோதி. ஏவமேதேஸம் பரிச்சே²தோ³ அத்தி², கோடி பஞ்ஞாயதி. நியதமிச்சா²தி³ட்டி²யா பன பரிச்சே²தோ³ நத்தி². ஸா ஹி வட்டஸ்ஸ மூலம், தாய ஸமன்னாக³தஸ்ஸ ப⁴வதோ வுட்டா²னம் நத்தி². யே தஸ்ஸ ஸோதப்³ப³ம் மஞ்ஞந்தி, தேபி விப்படிபாதே³தி. தாய ச ஸமன்னாக³தஸ்ஸ நேவ ஸக்³கோ³ அத்தி² ந மக்³கோ³. கப்பவினாஸே மஹாஜனே ப்³ரஹ்மலோகே நிப்³ப³த்தேபி நியதமிச்சா²தி³ட்டி²கோ தத்த² அனிப்³ப³த்தித்வா பிட்டி²சக்கவாளே நிப்³ப³த்ததி. கிம் பன பிட்டி²சக்கவாளம் ந ஜா²யதீதி? ஜா²யதி, தஸ்மிம் ஜா²யமானேபி ஏஸ ஆகாஸே ஏகஸ்மிம் ஓகாஸே பச்சதியேவாதி வத³ந்தி.

311. சதுத்தே² மக்க²லீதி ‘‘மா க²லீ’’தி வசனம் உபாதா³ய ஏவம்லத்³த⁴னாமோ தித்த²கரோ. நதீ³முகே²தி த்³வின்னம் நதீ³னம் ஸமாக³தட்டா²னே. தே³ஸனாமத்தமேவேதம், த்³வின்னம் கந்த³ரானம், த்³வின்னம் உத³கானம், ஸமுத்³த³ஸ்ஸ ச, லோணியா ச, ஸமுத்³த³ஸ்ஸ ச நதி³யா சாதி ஏதேஸம்பி யஸ்ஸ கஸ்ஸசி ஸமாக³தட்டா²னம், அஞ்ஞம்பி ததா²ரூபம் உத³கம். கி²பந்தி குமினம். உட்³டே³ய்யாதி ஓட்³டே³ய்ய. மனுஸ்ஸா ஹி நளேஹி வா உச்சூ²ஹி வா வேளூஹி வா பலாஸந்திஸலாகாய வா ஏகம் த்³வே தயோ வா கும்பே⁴ க³ண்ஹனப்பமாணகுமினம் கத்வா முக²வட்டியா யோத்தேன ப³ந்தி⁴த்வா நதீ³முக²ம் நேத்வா த்³வீஸு பஸ்ஸேஸு கா²ணுகே கோட்டேத்வா யோத்தேஹி தத்த² ப³ந்த⁴ந்தி, தம் ஸந்தா⁴யேதம் வுத்தம். தஸ்மிஞ்ஹி பவிட்ட²ஸ்ஸ கு²த்³த³கஸ்ஸ மச்ச²ஸ்ஸாபி மோக்கோ² நத்தி². அனயாயாதி அவட்³டி⁴யா. ப்³யாஸனாயாதி வினாஸாய. மக்க²லி மோக⁴புரிஸோதி அயம் மக்க²லி கோ³ஸாலோ துச்ச²புரிஸோ. மனுஸ்ஸகி²ப்பம் மஞ்ஞே லோகே உப்பன்னோதி மஹாஜனஸ்ஸ ஸக்³க³மோக்க²க³மனமக்³கே³ தத்த² க³மனனிவாரணத்த²ம் மனுஸ்ஸகுமினம் விய லோகே உப்பன்னோ.

312. பஞ்சமாதீ³ஸு து³ரக்கா²தே, பி⁴க்க²வே, த⁴ம்மவினயேதி து³ரக்கா²தத⁴ம்மவினயோ நாம பா³ஹிரகஸாஸனம். தத்த² ஹி ஸத்தா²பி அஸப்³ப³ஞ்ஞூ ஹோதி, த⁴ம்மோபி து³ரக்கா²தோ, க³ணோபி து³ப்படிபன்னோ. யோ ச ஸமாத³பேதீதி யோ ஆசரியபுக்³க³லோ ஸமாத³பேதி. யஞ்ச ஸமாத³பேதீதி யம் அந்தேவாஸிகம் ஸமாத³பேதி. யோ ச ஸமாத³பிதோ தத²த்தாய படிபஜ்ஜதீதி யோ அந்தேவாஸிகோ ஆசரியேன ஸமாத³பிதோ தஸ்ஸ வசனம் கரோந்தோ ததா²பா⁴வாய படிபஜ்ஜதி. ப³ஹும் அபுஞ்ஞம் பஸவந்தீதி ஸமாத³பகோ ஹி பாணாதிபாதாதீ³ஸு ஜங்க⁴ஸதம் ஸமாத³பேந்தோ தேஸம் ஸப்³பே³ஸம்பி அகுஸலேன ஸமகமேவ அகுஸலம் பாபுணாதி. தேனாஹ – ‘‘ஸப்³பே³ தே ப³ஹும் அபுஞ்ஞம் பஸவந்தீ’’தி.

313. ஸ்வாக்கா²தேதி ஸுட்டு² அக்கா²தே ஸுதே³ஸிதே. ஏவரூபே ஹி த⁴ம்மவினயே ஸத்தா² ச ஸப்³ப³ஞ்ஞூ ஹோதி, த⁴ம்மோ ச ஸ்வாக்கா²தோ, க³ணோ ச ஸுப்படிபன்னோ. ஸப்³பே³ தே ப³ஹும் புஞ்ஞம் பஸவந்தீதி ஸமாத³பகோ ஹி பி⁴க்கூ² பிண்டா³ய பவிட்டே² தி³ஸ்வா யாகு³ப⁴த்தாதீ³னி ஸமாத³பேந்தோ ஸப்³பே³ஸம்பி தா³யகானம் குஸலேன ஸமகம் குஸலம் பாபுணாதி. தேன வுத்தம் – ‘‘ப³ஹும் புஞ்ஞம் பஸவந்தீ’’தி.

314. தா³யகேன மத்தா ஜானிதப்³பா³தி தா³யகபுக்³க³லேன பமாணம் ஜானிதப்³ப³ம், பமாணேன தா³தப்³ப³ம், பூரேத்வா அதிரேகம் ந தா³தப்³ப³ம். ந தா³தப்³ப³ந்தி ஹி அவத்வா பமாணவஸேன தோ²கம் தா³தப்³ப³ந்தி வுத்தம். கஸ்மா? பூரேத்வா அதிரேகே தி³ன்னேபி ஹி அதிரேகா மனுஸ்ஸஸம்பத்தி வா தி³ப்³ப³ஸம்பத்தி வா நிப்³பா³னஸம்பத்தி வா நத்தி². நோ படிக்³கா³ஹகேனாதி படிக்³கா³ஹகஸ்ஸ பன மத்தம் ஜானித்வா படிக்³க³ஹணகிச்சம் நாம நத்தி². கஸ்மா? தஸ்ஸ ஹி மத்தம் ஞத்வா பூரேதப்³பா³ மத்தபடிக்³க³ஹணமூலிகா அப்பிச்ச²படிபதா³ நாம நத்தி². யத்தகம் பன லப⁴தி, தத்தகம் க³ஹேதப்³ப³ம். அதிரேகக்³க³ஹணமூலம் ஹிஸ்ஸ புத்ததா³ரப⁴ரணம் ப⁴விஸ்ஸதி.

315. படிக்³கா³ஹகேன மத்தா ஜானிதப்³பா³தி படிக்³கா³ஹகபுக்³க³லேன பமாணம் ஜானிதப்³ப³ம். கத²ம்? தேன ஹி தா³யகஸ்ஸ வஸோ வேதி³தப்³போ³, தே³ய்யத⁴ம்மஸ்ஸ வஸோ வேதி³தப்³போ³, அத்தனோ தா²மோ வேதி³தப்³போ³. யதி³ ஹி தே³ய்யத⁴ம்மோ ப³ஹு ஹோதி, தா³யகோ அப்பம் தா³துகாமோ, தா³யகஸ்ஸ வஸேன அப்பம் க³ண்ஹிதப்³ப³ம். தே³ய்யத⁴ம்மோ அப்போ, தா³யகோ ப³ஹும் தா³துகாமோ, தே³ய்யத⁴ம்மஸ்ஸ வஸேன அப்பம் க³ண்ஹிதப்³ப³ம். தே³ய்யத⁴ம்மோபி ப³ஹு, தா³யகோபி ப³ஹும் தா³துகாமோ, அத்தனோ தா²மம் ஞத்வா பமாணேனேவ க³ண்ஹிதப்³ப³ம். ஏவம் மத்தம் ஞத்வா படிக்³க³ண்ஹந்தோ ஹி அப்பிச்ச²படிபத³ம் பூரேதி. அனுப்பன்னஸ்ஸ லாபோ⁴ உப்பஜ்ஜதி, உப்பன்னோ லாபோ⁴ தா²வரோவ ஹோதி. அப்பஸன்னா பஸீத³ந்தி, பஸன்னாபி பி⁴ய்யோ பஸாத³மாபஜ்ஜந்தி, மஹாஜனஸ்ஸ சக்கு²பூ⁴தோ ஹோதி, ஸாஸனம் சிரட்டி²திகம் கரோதி.

தத்ரிமானி வத்தூ²னி – ரோஹணஜனபதே³ கிர குடிம்பி³யவிஹாரே ஏகோ த³ஹரோ து³ப்³பி⁴க்க²ஸமயே தஸ்மிம் கா³மே ஏகஸ்ஸ கம்மகாரஸ்ஸ கே³ஹே பு⁴ஞ்ஜனத்தா²ய கடச்சு²ப⁴த்தம் க³ஹேத்வா க³மனத்தா²ய ச கடச்சு²ப⁴த்தமேவ லப⁴தி. ஸோ ஏகதி³வஸம் தஸ்மிம் கே³ஹே ஏகம் ஆக³ந்துகம் தி³ஸ்வா ஏகமேவ கடச்சு²ப⁴த்தம் க³ண்ஹி. அத²ஸ்ஸ ‘‘கேன காரணேனா’’தி வுத்தே தமத்த²ம் வத்வா ஸோ குலபுத்தோ பஸீதி³த்வா ‘‘அம்ஹாகம் குலூபகப⁴த³ந்தோ ஏவரூபோ நாமா’’தி ராஜத்³வாரே மித்தாமச்சானம் கதே²ஸி. தே ஸப்³பே³பி தஸ்ஸ அப்பிச்ச²கு³ணே பஸன்னா ஏகதி³வஸேனேவ ஸட்டி² து⁴ரப⁴த்தானி ட²பேஸும். ஏவம் அப்பிச்சோ² அனுப்பன்னலாப⁴ம் உப்பாதே³தி.

ஸத்³தா⁴திஸ்ஸமஹாராஜாபி சூளுபட்டா²கம் திஸ்ஸாமச்சம் வீமம்ஸித்வா தேன ஏகம் தித்திரம் பசாபேத்வா ஆஹராபேஸி. அத² பரிபோ⁴க³ஸமயே ‘‘அக்³க³ம் த³த்வா பரிபு⁴ஞ்ஜிஸ்ஸாமீ’’தி அட்ட²கஸாலபரிவேணே மஹாதே²ரஸ்ஸ ப⁴ண்ட³க்³கா³ஹஸாமணேரஸ்ஸ தித்திரமம்ஸம் தே³ந்தோ தஸ்மிம் தோ²கம்யேவ படிக்³க³ண்ஹந்தே தஸ்ஸ அப்பிச்ச²கு³ணே பஸீதி³த்வா ‘‘பஸன்னோஸ்மி, தாத, அட்ட² தே து⁴ரப⁴த்தானி தே³மீ’’தி ஆஹ. மஹாராஜ, உபஜ்ஜா²யஸ்ஸ தே³மீதி. அபரானிபி அட்ட² தே³மீதி. தானி அம்ஹாகம் ஆசரியஸ்ஸ தே³மீதி. அபரானிபி அட்ட² த³ம்மீதி. தானி ஸமானுபஜ்ஜா²யானம் த³ம்மீதி. அபரானிபி அட்ட² த³ம்மீதி. தானி பி⁴க்கு²ஸங்க⁴ஸ்ஸ த³ம்மீதி. அபரானிபி அட்ட² த³ம்மீதி. ஸாமணேரோ அதி⁴வாஸேஸி. ஏவமஸ்ஸ உப்பன்னோ லாபோ⁴ தா²வரோ ஹோதி.

அப்பஸன்னா பஸீத³ந்தீதி ஏத்த²பி – தீ³க⁴ப்³ராஹ்மணோ கிர ப்³ராஹ்மணே போ⁴ஜேந்தோ பஞ்ச பஞ்ச ப⁴த்தஸரகானி த³த்வா ஸந்தப்பேதும் நாஸக்கி². அதே²கதி³வஸம் ‘‘ஸமணா கிர நாம அப்பிச்சா²’’தி கத²ம் ஸுத்வா வீமம்ஸனத்தா²ய ப⁴த்தம் கா³ஹாபேத்வா பி⁴க்கு²ஸங்க⁴ஸ்ஸ ப⁴த்தகிச்சகரணவேலாய விஹாரம் க³ந்த்வா திம்ஸமத்தே பி⁴க்கூ² போ⁴ஜனஸாலாயம் பு⁴ஞ்ஜந்தே தி³ஸ்வா ஏகம் ப⁴த்தஸரகம் க³ஹேத்வா ஸங்க⁴த்தே²ரஸ்ஸ ஸந்திகம் அக³மாஸி. தே²ரோ அங்கு³லிம் சாலேத்வா தோ²கமேவ அக்³க³ஹேஸி. ஏதேனேவ நியாமேன ஏகம் ப⁴த்தஸரகம் ஸப்³பே³ஸம் ஸம்பாபுணி. ததோ ப்³ராஹ்மணோ ‘‘ஸச்சோயேவ ஏதேஸம் ஸமணானம் கு³ணோ’’தி அப்பிச்ச²தாய பஸன்னோ ஸஹஸ்ஸம் விஸ்ஸஜ்ஜேத்வா தஸ்மிம்யேவ விஹாரே சேதியம் காரேஸி. ஏவம் அப்பஸன்னா பஸீத³ந்தி.

பஸன்னா பி⁴ய்யோ பஸீத³ந்தீதி ஏத்த² வத்து²னா கிச்சம் நத்தி². பஸன்னானஞ்ஹி அப்பிச்ச²ம் தி³ஸ்வா பஸாதோ³ பி⁴ய்யோ வட்³ட⁴தியேவ.

மஜ்ஜ²ந்திகதிஸ்ஸத்தே²ரஸதி³ஸே பன அப்பிச்சே² தி³ஸ்வா மஹாஜனோ அப்பிச்சோ² ப⁴விதும் மஞ்ஞதீதி அப்பிச்சோ² மஹாஜனஸ்ஸ சக்கு²பூ⁴தோ நாம ஹோதி.

‘‘அப்பிச்ச²தா, பி⁴க்க²வே, ஸத்³த⁴ம்மஸ்ஸ டி²தியா அஸம்மோஸாய அனந்தரதா⁴னாய ஸம்வத்ததீ’’தி (அ. நி. 1.116-129) வசனதோ பன அப்பிச்சோ² ஸாஸனம் சிரட்டி²திகம் கரோதி நாம.

நோ தா³யகேனாதி ஸ்வாக்கா²தே த⁴ம்மவினயே பன தா³யகஸ்ஸ பமாணம் ஞத்வா தா³தப்³ப³கிச்சம் நாம நத்தி². யத்தகோ தே³ய்யத⁴ம்மோ அத்தி², தத்தகம் அவத்த²ரித்வா தா³தும் வட்டதி. அவத்த²ரித்வா தி³ன்னகாரணா ஹி ஏஸ மனுஸ்ஸஸம்பத்திம், தி³ப்³ப³ஸம்பத்திம், நிப்³பா³னஸம்பத்திஞ்ச அவத்த²ரித்வா உத்தருத்தரி பணீதபணீதமேவ லப⁴தி.

316. யோ ஆரத்³த⁴வீரியோ, ஸோ து³க்க²ம் விஹரதீதி பஞ்சாதபதப்பனமருப்பபாதபதனாதி³ச்சானுபரிவத்தன-உக்குடிகப்பதா⁴னாதீ³னி அனுயுஞ்ஜந்தோ தி³ட்டே² சேவ த⁴ம்மே து³க்க²ம் விஹரதி, தஸ்ஸேவ பா³ஹிரஸமயே ஸமாதி³ன்னஸ்ஸ தபசரணஸ்ஸ விபாகேன நிரயே உப்பஜ்ஜித்வா ஸம்பராயேபி து³க்க²ம் விஹரதி.

317. யோ குஸீதோ, ஸோ து³க்க²ம் விஹரதீதி அயம்பி தி³ட்டே² த⁴ம்மே சேவ ஸம்பராயே ச து³க்க²ம் விஹரதி. கத²ம்? யஸ்ஸ ஹி பப்³ப³ஜிதகாலதோ பட்டா²ய யோனிஸோ மனஸிகாரோ நத்தி², பு³த்³த⁴வசனம் ந உக்³க³ண்ஹாதி, ஆசரியுபஜ்ஜா²யவத்தம் ந கரோதி, சேதியங்க³ணபோ³தி⁴யங்க³ணவத்தம் ந கரோதி. ஜனஸ்ஸ பன ஸத்³தா⁴தே³ய்யம் அபச்சவேக்கி²தபரிபோ⁴கே³ன பரிபு⁴ஞ்ஜித்வா தி³வஸம் ஸேய்யஸுக²ம் பஸ்ஸஸுக²ம் அனுயுஞ்ஜித்வா பபு³த்³த⁴காலே தயோ விதக்கே விதக்கேதி. ஸோ கதிபாஹேனேவ பி⁴க்கு²பா⁴வா சவதி? ஏவம் தி³ட்ட²த⁴ம்மே ச து³க்க²ம் விஹரதி. பப்³ப³ஜித்வா பன ஸமணத⁴ம்மஸ்ஸ ஸம்மா அகதத்தா ச –

‘‘குஸோ யதா² து³க்³க³ஹிதோ, ஹத்த²மேவானுகந்ததி;

ஸாமஞ்ஞம் து³ப்பராமட்ட²ம், நிரயாயுபகட்³ட⁴தீ’’தி. (த⁴. ப. 311) –

அபாயஸ்மிம்யேவ படிஸந்தி⁴ம் க³ண்ஹதி. ஏவம் ஸம்பராயேபி து³க்க²ம் விஹரதி.

318. யோ குஸீதோ, ஸோ ஸுக²ம் விஹரதீதி காலேன காலம் வுத்தப்பகாரே தபசரணே கிஞ்சி கிஞ்சி தபசரணம் கத்வா காலேன காலம் ஓதா³தவத்த²வஸனோ மாலாக³ந்த⁴விலேபனத⁴ரோ மது⁴ரபோ⁴ஜனம் பு⁴ஞ்ஜந்தோ முது³காஸு ஸேய்யாஸு ஸயந்தோ தி³ட்டே² த⁴ம்மே சேவ ஸுக²ம் விஹரதி ஸம்பராயே ச. ஸோ ஹி தஸ்ஸ தபசரணஸ்ஸ கா³ள்ஹம் அக்³க³ஹிதத்தா நாதிப³ஹும் நிரயே து³க்க²ம் அனுப⁴வதி. தஸ்மா ஸம்பராயே ஸுக²ம் விஹரதி நாம.

319. யோ ஆரத்³த⁴வீரியோ, ஸோ ஸுக²ம் விஹரதீதி ஆரத்³த⁴வீரியோ ஹி பப்³ப³ஜிதகாலதோ பட்டா²ய வத்தேஸு பரிபூரகாரீ ஹோதி, பு³த்³த⁴வசனம் உக்³க³ண்ஹாதி, யோனிஸோ மனஸிகாரே கம்மம் கரோதி. அத²ஸ்ஸ வத்தபூரணஞ்சேவ உக்³க³ஹிதபு³த்³த⁴வசனஞ்ச ஸமணத⁴ம்மகிரியஞ்ச ஆவஜ்ஜேந்தஸ்ஸ சித்தம் பஸீத³தி. ஏவம் தி³ட்டே²வ த⁴ம்மே ஸுக²ம் விஹரதி. தி³ட்ட²த⁴ம்மே பன அரஹத்தம் பாபுணிதும் அஸக்கோந்தோ நிப்³ப³த்தப⁴வே கி²ப்பாபி⁴ஞ்ஞோ ஹோதீதி ஸம்பராயேபி ஸுக²ம் விஹரதி நாம.

320. ஸேய்யதா²பி, பி⁴க்க²வே, அப்பமத்தகோபி கூ³தோ² து³க்³க³ந்தோ⁴ ஹோதீதி இத³ம் ஸுத்தம் அட்டு²ப்பத்தியம் வுத்தம். கதரஅட்டு²ப்பத்தியந்தி? நவகனிபாதே (அ. நி. 9.12) ஸத்துப்பாத³ஸுத்த அட்டு²ப்பத்தியம். ததா²க³தோ ஹி தம் அத்த²ம் கதே²ந்தோ – ‘‘நவ புக்³க³லா நிரயதோ முத்தா, திரச்சா²னயோனிதோ முத்தா, பேத்திவிஸயதோ முத்தா’’தி கதே²ஸி. அத²ஸ்ஸ ஏதத³ஹோஸி – ‘‘ஸசே கோ² பன மே புத்தா இமம் த⁴ம்மதே³ஸனம் ஸுத்வா கீ²ணனிரயம்ஹா கீ²ணதிரச்சா²னயோனிகா கீ²ணபேத்திவிஸயா கீ²ணாபாயது³க்³க³திவினிபாதாதி மஞ்ஞமானா உபரிமக்³க³ப²லத்தா²ய வாயமிதும் ந மஞ்ஞேய்யும், தேஸம் ஸம்வேக³ம் ஜனேஸ்ஸாமீ’’தி ஸம்வேக³ஜனனத்த²ம் ‘‘ஸேய்யதா²பி, பி⁴க்க²வே’’தி இமம் ஸுத்தமாரபி⁴. தத்த² அப்பமத்தகோதி தோ²கமத்தகோ பரித்தப்பமாணோ, அந்தமஸோ குஸக்³கே³னபி க³ஹேத்வா உபஸிங்கி⁴யமானோ து³க்³க³ந்தோ⁴வ ஹோதி. அப்பமத்தகம்பி ப⁴வம் ந வண்ணேமீதி அப்பமத்தகம்பி காலம் ப⁴வே படிஸந்தி⁴ம் ந வண்ணயாமி. இதா³னிஸ்ஸ உபமம் த³ஸ்ஸேந்தோ ஆஹ – அந்தமஸோ அச்ச²ராஸங்கா⁴தமத்தம்பீதி. ஸப்³ப³ந்திமேன பரிச்சே²தே³ன த்³வே அங்கு³லியோ ஏகதோ கத்வா பஹரணமத்தம்பி காலந்தி வுத்தம் ஹோதி. ஸேஸம் ஸப்³ப³த்த² உத்தானத்த²மேவாதி.

ததியவக்³க³வண்ணனா.

16. ஏகத⁴ம்மபாளி

(16) 4. ஏகத⁴ம்மபாளி-சதுத்த²வக்³க³வண்ணனா

322. சதுத்த²வக்³க³ஸ்ஸ பட²மே ஜம்பு³தீ³பேதி ஜம்பு³யா பஞ்ஞாதோ பாகடோ தீ³போதி ஜம்பு³தீ³போ. இமஸ்ஸ கிர தீ³பஸ்ஸ ஸஞ்ஞாணபூ⁴தா யோஜனஸதுப்³பே³தா⁴ பண்ணாஸயோஜனஸாகா² பஞ்சத³ஸயோஜனாவட்டக்க²ந்தா⁴ ஹிமவந்தபப்³ப³தே ஜாதா கப்பட்டா²யினீ மஹாஜம்பூ³ நாம அத்தி², தாய அயம் தீ³போ ஜம்பு³தீ³போதி வுச்சதி. யதா² ச இமஸ்மிம் தீ³பே ஜம்பு³ருக்கோ² கப்பட்டா²யீ, ததா² அபரகோ³யானே கத³ம்ப³ருக்கோ², உத்தரகுரூஸு கப்பருக்கோ², புப்³ப³விதே³ஹே ஸிரீஸருக்கோ², அஸுரானம் சித்தபாடலிருக்கோ², ஸுபண்ணானம் ஸிம்ப³லிருக்கோ², தே³வானம் பாரிச்ச²த்தகோதி இமேபி கப்பட்டா²யினோவ.

‘‘பாடலீ ஸிம்ப³லீ ஜம்பூ³, தே³வானம் பாரிச்ச²த்தகோ;

கத³ம்போ³ கப்பருக்கோ² ச, ஸிரீஸோ ப⁴வதி ஸத்தமோ’’தி.

ஆராமராமணேய்யகந்தி புப்பா²ராமப²லாராமானம் ராமணேய்யகம் வேளுவன-ஜீவகம்ப³வன-ஜேதவனபுப்³பா³ராமஸதி³ஸம். தம் இமஸ்மிம் ஜம்பு³தீ³பே அப்பமத்தகம் பரித்தகம், ந ப³ஹுகந்தி அத்தோ². ஸேஸபதே³ஸுபி ஏஸேவ நயோ. ஏத்த² வனராமணேய்யகந்தி நாக³வனஸாலவனசம்பகவனாதி³ஸதி³ஸம் வங்கபப்³ப³தஹிமவந்தபப்³ப³தபதே³ஸாதீ³ஸு அரஞ்ஞவனம் வேதி³தப்³ப³ம். பூ⁴மிராமணேய்யகந்தி ஜேதவனவிஹாரமக³த⁴க்கே²த்தாதி³ஸதி³ஸம் ஸமம் பூ⁴மிட்டா²னம். போக்க²ரணிராமணேய்யகந்தி ஜேதவனபோக்க²ரணிக³க்³க³ராபோக்க²ரணிஸதி³ஸானம் வட்டசதுரஸ்ஸதீ³க⁴வங்காதி³ஸண்டா²னானம் போக்க²ரணீனம் ஸன்னிவேஸனட்டா²னம். உக்கூலவிகூலந்தி உக்கூலஞ்ச விகூலஞ்ச. தத்த² உக்கூலம் உன்னதட்டா²னம், விகூலம் நின்னட்டா²னம். நதீ³விது³க்³க³ந்தி நதீ³னம் பி⁴ன்னட்டா²னம் தம் து³க்³க³மத்தா நதீ³விது³க்³க³ந்தி வுச்சதி. கா²ணுகண்டகட்டா²னந்தி தத்த²ஜாதகானஞ்சேவ ஆஹரியமானானஞ்ச கா²ணுகண்டகாதீ³னம் பதிட்டா²னட்டா²னம். பப்³ப³தவிஸமந்தி கி³ரிவிஸமம். யே ஓத³காதி யே ச உத³கே ஜாயந்தி, தேயேவ ப³ஹுதரா. இதோ கிர ஸுவண்ணபூ⁴மி ஸத்தமத்தானி யோஜனஸதானி ஹோதி, ஏகேன வாதேன க³ச்ச²ந்தீ நாவா ஸத்தஹி அஹோரத்தேஹி க³ச்ச²தி. அதே²கஸ்மிம் ஸமயே ஏவம் க³ச்ச²ந்தீ நாவா ஸத்தாஹம்பி நந்தி³யாவட்டமச்ச²பிட்டே²னேவ க³தா. ஏவம் ஓத³கானம் ஸத்தானம் ப³ஹுபா⁴வோ வேதி³தப்³போ³.

அபிச த²லட்டா²னஸ்ஸ பரித்தபா⁴வேன உத³கஸ்ஸ ச ப³ஹுபா⁴வேனாபி அயமத்தோ² வேதி³தப்³போ³. யதா² ஹி மஹாதளாகே ஏகோவ உப்பலக³ச்சோ² அஸ்ஸ, தஸ்ஸ சத்தாரி ச பண்ணானி, மஜ்ஜே² ச ஏகம் உப்பலமகுலம் அஸ்ஸ. ஏவமேவம் சத்தாரி பண்ணானி விய சத்தாரோ தீ³பா, மஜ்ஜே² உப்பலமகுலம் விய ஸினேருபப்³ப³தோ, ஸேஸம் உத³கம் விய உத³கபரிக்கி²த்தோ ஓகாஸோ. தஸ்ஸ மஹந்தபா⁴வோ இத்³தி⁴மந்தானம் பாகடோ ஹோதி. தேஸஞ்ஹி ஆகாஸேன க³ச்ச²ந்தானம் சத்தாரோ மஹாதீ³பா சத்தாரி பண்ணானி விய உபட்ட²ஹந்தி, ஸினேருபப்³ப³தோ மஜ்ஜே² உப்பலமகுலம் விய, ஸேஸம் உத³கம் விய உத³கபரிக்கி²த்தோ ஓகாஸோ. ஏவம் மஹந்தே உத³கே ஜாதத்தா ஓத³காவ ப³ஹுதரா வேதி³தப்³பா³.

323. து³தியாதீ³ஸு அஞ்ஞத்ர மனுஸ்ஸேஹீதி இத⁴ சத்தாரோ அபாயா அஞ்ஞத்ர மனுஸ்ஸேஹீதி அதி⁴ப்பேதா.

மஜ்ஜி²மேஸு ஜனபதே³ஸூதி ‘‘புரத்தி²மாய தி³ஸாய க³ஜங்க³லம் நாம நிக³மோ, தஸ்ஸ பரேன மஹாஸாலா, ததோ பரா பச்சந்திமா ஜனபதா³, ஓரதோ மஜ்ஜே². புரத்தி²மத³க்கி²ணாய தி³ஸாய ஸல்லவதீ நாம நதீ³, ததோ பரா பச்சந்திமா ஜனபதா³, ஓரதோ மஜ்ஜே². த³க்கி²ணாய தி³ஸாய ஸேதகண்ணிகம் நாம நிக³மோ, ததோ பரா பச்சந்திமா ஜனபதா³, ஓரதோ மஜ்ஜே². பச்சி²மாய தி³ஸாய தூ²ணம் நாம ப்³ராஹ்மணகா³மோ, ததோ பரா பச்சந்திமா ஜனபதா³, ஓரதோ மஜ்ஜே². உத்தராய தி³ஸாய உஸீரத்³த⁴ஜோ நாம பப்³ப³தோ, ததோ பரா பச்சந்திமா ஜனபதா³, ஓரதோ மஜ்ஜே²’’தி (மஹாவ. 259) ஏவம் பரிச்சி²ன்னே ஜனபதே³தி அத்தோ². அயஞ்ஹி ஜனபதோ³ முதி³ங்க³ஸண்டா²னோ உஜுகேன கத்த²சி அஸீதியோஜனோ ஹோதி, கத்த²சி யோஜனஸதிகோ, கத்த²சி த்³வியோஜனஸதிகோ, மஜ்ஜே²ன பன தியோஜனஸதிகோ, பரியந்தபரிக்கே²பேன நவமத்தயோஜனஸதிகோ ஹோதி. ஏத்தகே டா²னே பு³த்³த⁴பச்சேகபு³த்³தா⁴ மஹாஸாவகா பு³த்³து⁴பட்டா²கா பு³த்³த⁴ஸாவகா பு³த்³த⁴மாதா பு³த்³த⁴பிதா சக்கவத்தீ ராஜாதி இமே ஸத்தா நிப்³ப³த்தந்தி. அபிச உபாதா³யுபாதா³யாபி மஜ்ஜி²மபதே³ஸோ லப்³ப⁴தி. ஸகலோபி ஹி ஜம்பு³தீ³போ மஜ்ஜி²மபதே³ஸோ நாம, ஸேஸதீ³பா பச்சந்திமா ஜனபதா³. தம்ப³பண்ணிதீ³பே அனுராத⁴புரம் மஜ்ஜி²மபதே³ஸோ நாம, ஸேஸோ பச்சந்தோதி ஏவம் நயோ வேதி³தப்³போ³.

324. பஞ்ஞவந்தோ அஜளா அனேளமூகா³தி ஏத்த² கம்மஸ்ஸகதபஞ்ஞா, ஜா²னபஞ்ஞா விபஸ்ஸனாபஞ்ஞா, மக்³க³பஞ்ஞா, ப²லபஞ்ஞாதி ஏதாஹி ஸமன்னாக³தா பஞ்ஞவந்தோ நாம, அமூள்ஹா அஜளா நாம. யேஸம் ஏளா முக²தோ ந க³லதி, தே அனேளமூகா³ நாம, அனேளமுகா² நித்³தோ³ஸமுகா²தி அத்தோ². படிப³லாதி ஸமத்தா², காயப³லேன சேவ ஞாணப³லேன ச ஸமன்னாக³தா. அத்த²மஞ்ஞாதுந்தி அத்தா²னத்த²ம் காரணாகாரணம் ஜானிதும். து³ப்பஞ்ஞாதி அப்பஞ்ஞா நிப்பஞ்ஞா. ஜளாதி மந்தா³ மோமூஹா.

325. அரியேன பஞ்ஞாசக்கு²னாதி ஸஹவிபஸ்ஸனேன மக்³கே³ன. அவிஜ்ஜாக³தாதி அவிஜ்ஜந்த⁴காரேன ஸமன்னாக³தா.

326. யே லப⁴ந்தி ததா²க³தம் த³ஸ்ஸனாயாதி யே ததா²க³தஸ்ஸ கு³ணே ஜானித்வா ததா²க³தம் சக்கு²விஞ்ஞாணேன பஸ்ஸிதும் லப⁴ந்தி.

327. ததா²க³தப்பவேதி³தந்தி ததா²க³தேன பவேதி³தம் பகாஸேத்வா கதி²தம். ஸவனாயாதி ஸோதவிஞ்ஞாணேன ஸோதும்.

328. தா⁴ரேந்தீதி ந பம்முஸ்ஸந்தி.

329. தா⁴தானம் த⁴ம்மானம் அத்த²ம் உபபரிக்க²ந்தீதி பகு³ணாய பாளியா அத்தா²னத்த²ம் உபபரிக்க²ந்தி.

330. அத்த²மஞ்ஞாய த⁴ம்மமஞ்ஞாயாதி அட்ட²கத²ஞ்ச பாளிஞ்ச ஜானித்வா. த⁴ம்மானுத⁴ம்மம் படிபஜ்ஜந்தீதி அனுலோமபடிபத³ம் பூரேந்தி.

331. ஸம்வேஜனீயேஸு டா²னேஸூதி ஸம்வேக³ஜனகேஸு காரணேஸு. ஸம்விஜ்ஜந்தீதி ஸம்வேக³ம் ஆபஜ்ஜந்தி.

332. யோனிஸோ பத³ஹந்தீதி உபாயேன பதா⁴னவீரியம் கரோந்தி.

333. வவஸ்ஸக்³கா³ரம்மணந்தி வவஸ்ஸக்³கோ³ வுச்சதி நிப்³பா³னம், தம் ஆரம்மணம் கரித்வாதி அத்தோ². லப⁴ந்தி ஸமாதி⁴ந்தி மக்³க³ஸமாதி⁴ஞ்ச ப²லஸமாதி⁴ஞ்ச பாபுணந்தி.

334. அன்னக்³க³ரஸக்³கா³னந்தி உத்தமன்னானஞ்ச உத்தமரஸானஞ்ச. உஞ்சே²ன கபாலாப⁴தேன யாபேந்தீதி உஞ்சா²சாரேன வனமூலப²லாப²லேன வா கபாலேன ஆப⁴தப⁴த்தேன வா யாபேந்தி. ஏத்த² ச யோ கஸ்ஸசிதே³வ கா²த³னீயஸ்ஸ போ⁴ஜனீயஸ்ஸ அத்தா²ய சித்தே உப்பன்னே தம்க²ணம்யேவ ந தம் லப⁴தி, அயம் அன்னக்³க³ரஸக்³கா³னம் ந லாபீ⁴ நாம. யஸ்ஸபி தம்க²ணம்யேவ லபி⁴த்வா ஓலோகேந்தஸ்ஸ வண்ணக³ந்த⁴ரஸா அமனாபா ஹோந்தி, அயம்பி அன்னக்³க³ரஸக்³கா³னம் ந லாபீ⁴ நாம. யஸ்ஸ பன வண்ணக³ந்த⁴ரஸா படிலப⁴ந்தி, மனாபா ஹோந்தி, அயம் அன்னக்³க³ரஸக்³கா³னம் லாபீ⁴ நாம. ஸோ உத்தமகோடியா சக்கவத்தீ ராஜா, ஹேட்டி²மகோடியா த⁴ம்மாஸோகோ வேதி³தப்³போ³. ஸங்கே²பதோ ஹி யஸ்ஸ ப⁴த்தஸ்ஸ ஏகபாதி ஸதஸஹஸ்ஸம் அக்³க⁴தி, இத³ம் அன்னக்³க³ரஸக்³க³ம் நாம. யம் பன பி⁴க்கு²ஸங்க⁴ம் பிண்டா³ய சரந்தம் தி³ஸ்வா மனுஸ்ஸா உத்தமபணீதம் ப⁴த்தம் தே³ந்தி, இத³ம் கிம் நாமாதி? இத³ம் உஞ்சே²ன கபாலாப⁴தேன யாபேந்தே உபாதா³ய அன்னக்³க³ரஸக்³க³ம் நாம வுச்சதீதி.

335. அத்த²ரஸஸ்ஸாதிஆதீ³ஸு அத்த²ரஸோ நாம சத்தாரி ஸாமஞ்ஞப²லானி, த⁴ம்மரஸோ நாம சத்தாரோ மக்³கா³, விமுத்திரஸோ நாம அமதனிப்³பா³னம். ஸேஸம் ஸப்³ப³த்த² உத்தானத்த²மேவாதி.

சதுத்த²வக்³க³வண்ணனா.

ஜம்பு³தீ³பபேய்யாலோ நிட்டி²தோ.