(15) 2. அட்டா²னபாளி-து³தியவக்³க³வண்ணனா

278. அபுப்³ப³ம் அசரிமந்தி ஏத்த² சக்கரதனபாதுபா⁴வதோ புப்³பே³ புப்³ப³ம், தஸ்ஸேவ அந்தரதா⁴னதோ பச்சா² சரிமம். தத்த² த்³விதா⁴ சக்கரதனஸ்ஸ அந்தரதா⁴னம் ஹோதி சக்கவத்தினோ காலகிரியாய வா பப்³ப³ஜ்ஜாய வா. அந்தரதா⁴யமானஞ்ச பன தம் காலகிரியதோ வா பப்³ப³ஜ்ஜதோ வா ஸத்தமே தி³வஸே அந்தரதா⁴யதி, ததோ பரம் சக்கவத்தினோ பாதுபா⁴வோ அவாரிதோ.

கஸ்மா பன ஏகசக்கவாளே த்³வே சக்கவத்தினோ ந உப்பஜ்ஜந்தீதி? விவாது³பச்சே²த³தோ, அச்ச²ரியபா⁴வதோ, சக்கரதனஸ்ஸ மஹானுபா⁴வதோ ச. த்³வீஸு ஹி உப்பஜ்ஜந்தேஸு ‘‘அம்ஹாகம் ராஜா மஹந்தோ, அம்ஹாகம் ராஜா மஹந்தோ’’தி விவாதோ³ உப்பஜ்ஜேய்ய, ‘‘ஏகஸ்மிம் தீ³பே சக்கவத்தீ, ஏகஸ்மிம் தீ³பே சக்கவத்தீ’’தி ச அனச்ச²ரியோ ப⁴வேய்ய. யோ சாயம் சக்கரதனஸ்ஸ த்³விஸஹஸ்ஸதீ³பபரிவாரேஸு சதூஸு மஹாதீ³பேஸு இஸ்ஸரியானுப்பதா³னஸமத்தோ² மஹானுபா⁴வோ, ஸோபி பரிஹாயேத². இதி விவாது³பச்சே²த³தோ அச்ச²ரியபா⁴வதோ சக்கரதனஸ்ஸ மஹானுபா⁴வதோ ச ந ஏகசக்கவாளே த்³வே உப்பஜ்ஜந்தி.

279. யம் இத்தீ² அரஹம் அஸ்ஸ ஸம்மாஸம்பு³த்³தோ⁴தி ஏத்த² திட்ட²து தாவ ஸப்³ப³ஞ்ஞுகு³ணே நிப்³ப³த்தேத்வா லோகனித்த²ரணஸமத்தோ² பு³த்³த⁴பா⁴வோ, பணிதா⁴னமத்தம்பி இத்தி²யா ந ஸம்பஜ்ஜதி.

‘‘மனுஸ்ஸத்தம் லிங்க³ஸம்பத்தி, ஹேது ஸத்தா²ரத³ஸ்ஸனம்;

பப்³ப³ஜ்ஜா கு³ணஸம்பத்தி, அதி⁴காரோ ச ச²ந்த³தா;

அட்ட² த⁴ம்மஸமோதா⁴னா, அபி⁴னீஹாரோ ஸமிஜ்ஜ²தீ’’தி. (பு³. வம். 2.59) –

இமானி ஹி பணிதா⁴னஸம்பத்திகாரணானி. இதி பணிதா⁴னம்பி ஸம்பாதே³தும் அஸமத்தா²ய இத்தி²யா குதோ பு³த்³த⁴பா⁴வோதி. ‘‘அட்டா²னமேதம், பி⁴க்க²வே, அனவகாஸோ, யம் இத்தீ² அரஹம் அஸ்ஸ ஸம்மாஸம்பு³த்³தோ⁴’’தி வுத்தம். ஸப்³பா³காரபரிபூரோவ புஞ்ஞுஸ்ஸயோ ஸப்³பா³காரபரிபூரமேவ அத்தபா⁴வம் நிப்³ப³த்தேதீதி புரிஸோவ அரஹம் ஹோதி ஸம்மாஸம்பு³த்³தோ⁴, ந இத்தீ².

280. ராஜா அஸ்ஸ சக்கவத்தீதிஆதீ³ஸுபி யஸ்மா இத்தி²யா கோஸோஹிதவத்த²கு³ய்ஹதாதீ³னம் அபா⁴வேன லக்க²ணானி ந பரிபூரந்தி, இத்தி²ரதனாபா⁴வேன ஸத்தரதனஸமங்கி³தா ந ஸம்பஜ்ஜதி, ஸப்³ப³மனுஸ்ஸேஹி ச அதி⁴கோ அத்தபா⁴வோ ந ஹோதி. தஸ்மா ‘‘அட்டா²னமேதம், பி⁴க்க²வே, அனவகாஸோ யம் இத்தீ² ராஜா அஸ்ஸ சக்கவத்தீ’’தி வுத்தம்.

281. யஸ்மா ச ஸக்கத்தாதீ³னி தீணி டா²னானி உத்தமானி, இத்தி²லிங்க³ஞ்ச ஹீனம், தஸ்மா சஸ்ஸா ஸக்கத்தாதீ³னிபி படிஸித்³தா⁴னி.

நனு ச யதா² இத்தி²லிங்க³ம், ஏவம் புரிஸலிங்க³ம்பி ப்³ரஹ்மலோகே நத்தி². தஸ்மா ‘‘யம் புரிஸோ ப்³ரஹ்மத்தம் காரேய்ய, டா²னமேதம் விஜ்ஜதீ’’திபி ந வத்தப்³ப³ம் ஸியாதி. நோ ந வத்தப்³ப³ம். கஸ்மா? இத⁴ புரிஸஸ்ஸ தத்த² நிப்³ப³த்தனதோ. ப்³ரஹ்மத்தந்தி ஹி மஹாப்³ரஹ்மத்தம் அதி⁴ப்பேதம். இத்தீ² ச இத⁴ ஜா²னம் பா⁴வேத்வா காலம் கத்வா ப்³ரஹ்மபாரிஸஜ்ஜானம் ஸஹப்³யதம் உபபஜ்ஜதி, ந மஹாப்³ரஹ்மானம். புரிஸோ பன தத்த² நுப்பஜ்ஜதீதி ந வத்தப்³போ³. ஸமானேபி சேத்த² உப⁴யலிங்கா³பா⁴வே புரிஸஸண்டா²னாவ ப்³ரஹ்மானோ, ந இத்தி²ஸண்டா²னா. தஸ்மா ஸுவுத்தமேவேதம்.

284. காயது³ச்சரிதஸ்ஸாதிஆதீ³ஸு யதா² நிம்ப³பீ³ஜகோஸாதகிபீ³ஜாதீ³னி மது⁴ரம் ப²லம் ந நிப்³ப³த்தேந்தி, அஸாதம் அமது⁴ரமேவ நிப்³ப³த்தேந்தி, ஏவம் காயது³ச்சரிதாதீ³னி மது⁴ரம் விபாகம் ந நிப்³ப³த்தேந்தி, அமது⁴ரமேவ நிப்³ப³த்தேந்தி. யதா² ச உச்சு²பீ³ஜஸாலிபீ³ஜாதீ³னி மது⁴ரம் ஸாது³ரஸமேவ ப²லம் நிப்³ப³த்தேந்தி, ந அஸாதம் கடுகம். ஏவம் காயஸுசரிதாதீ³னி மது⁴ரமேவ விபாகம் நிப்³ப³த்தேந்தி, ந அமது⁴ரம். வுத்தம்பி சேதம் –

‘‘யாதி³ஸம் வபதே பீ³ஜம், தாதி³ஸம் ஹரதே ப²லம்;

கல்யாணகாரீ கல்யாணம், பாபகாரீ ச பாபக’’ந்தி. (ஸம். நி. 1.256);

தஸ்மா ‘‘அட்டா²னமேதம், பி⁴க்க²வே, அனவகாஸோ, யம் காயது³ச்சரிதஸ்ஸா’’திஆதி³ வுத்தம்.

290-295. காயது³ச்சரிதஸமங்கீ³திஆதீ³ஸு ஸமங்கீ³தி பஞ்சவிதா⁴ ஸமங்கி³தா – ஆயூஹனஸமங்கி³தா, சேதனாஸமங்கி³தா, கம்மஸமங்கி³தா, விபாகஸமங்கி³தா, உபட்டா²னஸமங்கி³தாதி. தத்த² குஸலாகுஸலகம்மாயூஹனக்க²ணே ஆயூஹனஸமங்கி³தாதி வுச்சதி. ததா² சேதனாஸமங்கி³தா. யாவ பன ஸத்தா அரஹத்தம் ந பாபுணந்தி, தாவ ஸப்³பே³பி ஸத்தா புப்³பே³ உபசிதசேதனாய ஸமங்கி³தாய சேதனாஸமங்கி³னோதி வுச்சந்தி. ஏஸா சேதனாஸமங்கி³தா. யாவ அரஹத்தம் ந பாபுணந்தி, தாவ ஸப்³பே³பி ஸத்தா புப்³பே³ உபசிதம் விபாகாரஹம் கம்மம் ஸந்தா⁴ய ‘‘கம்மஸமங்கி³னோ’’தி வுச்சந்தி. ஏஸா கம்மஸமங்கி³தா. விபாகஸமங்கி³தா விபாகக்க²ணேயேவ வேதி³தப்³பா³. யாவ பன ஸத்தா அரஹத்தம் ந பாபுணந்தி, தாவ தேஸம் ததோ ததோ சவித்வா நிரயே உப்பஜ்ஜமானானம் அக்³கி³ஜாலாலோஹகும்பி⁴ஆதீ³ஹி உபட்டா²னாகாரேஹி நிரயோ, க³ப்³ப⁴ஸேய்யகத்தம் ஆபஜ்ஜமானானம் மாதுகுச்சி², தே³வேஸு உப்பஜ்ஜமானானம் கப்பருக்க²விமானாதீ³ஹி உபட்டா²னாகாரேஹி தே³வலோகோதி ஏவம் உபபத்தினிமித்தம் உபட்டா²தி. இதி நேஸம் இமினா உபபத்தினிமித்தஉபட்டா²னேன அபரிமுத்ததா உபட்டா²னஸமங்கி³தா நாம. ஸா சலதி, ஸேஸா நிச்சலா. நிரயே ஹி உபட்டி²தேபி தே³வலோகோ உபட்டா²தி, தே³வலோகே உபட்டி²தேபி நிரயோ உபட்டா²தி, மனுஸ்ஸலோகே உபட்டி²தேபி திரச்சா²னயோனி உபட்டா²தி, திரச்சா²னயோனியா ச உபட்டி²தாயபி மனுஸ்ஸலோகோ உபட்டா²தியேவ.

தத்ரித³ம் வத்து² – ஸோணகி³ரிபாதே³ கிர அசேலவிஹாரே ஸோணத்தே²ரோ நாம ஏகோ த⁴ம்மகதி²கோ. தஸ்ஸ பிதா ஸுனக²வாஜிகோ நாம அஹோஸி, தே²ரோ தம் படிபா³ஹந்தோபி ஸம்வரே ட²பேதும் அஸக்கோந்தோ ‘‘மா நஸ்ஸி வராகோ’’தி மஹல்லககாலே அகாமகம் நம் பப்³பா³ஜேஸி. தஸ்ஸ கி³லானஸேய்யாய நிபன்னஸ்ஸ நிரயோ உபட்டா²ஸி. ஸோணகி³ரிபாத³தோ மஹந்தா ஸுனகா² ஆக³ந்த்வா கா²தி³துகாமா விய ஸம்பரிவாரேஸும். ஸோ மஹாப⁴யபீ⁴தோ ‘‘வாரேஹி, தாத ஸோண, வாரேஹி, தாத ஸோணா’’தி ஆஹ. கிம் மஹாதே²ராதி? ந பஸ்ஸஸி, தாதாதி தம் பவத்திம் ஆசிக்கி². ஸோணத்தே²ரோ ‘‘கத²ஞ்ஹி நாம மாதி³ஸஸ்ஸ பிதா நிரயே நிப்³ப³த்திஸ்ஸதி, பதிட்டா²ஸ்ஸ ப⁴விஸ்ஸாமீ’’தி ஸாமணேரேஹி நானாபுப்பா²னி ஆஹராபேத்வா சேதியங்க³ணபோ³தி⁴யங்க³ணேஸு தலஸந்த²ரணபூஜம் ஆஸனபூஜஞ்ச காரேத்வா பிதரம் மஞ்சகேன சேதியங்க³ணம் ஹரித்வா மஞ்சே நிஸீதா³பேத்வா ‘‘அயம், மஹாதே²ர, பூஜா தும்ஹாகம் அத்தா²ய கதா, ‘அயம் மே ப⁴க³வா து³க்³க³தபண்ணாகாரோ’தி வத்வா ப⁴க³வந்தம் வந்தி³த்வா சித்தம் பஸாதே³ஹீ’’தி ஆஹ. ஸா மஹாதே²ரோ பூஜம் தி³ஸ்வா ததா² கரோந்தோ சித்தம் பஸாதே³ஸி. தாவதே³வஸ்ஸ தே³வலோகோ உபட்டா²ஸி. நந்த³னவன-சித்தலதாவன-மிஸ்ஸகவன-பா²ருஸகவன-விமானானி சேவ தே³வனாடகானி ச பரிவாரேத்வா டி²தானி விய அஹேஸும். ஸோ ‘‘அபேத², ஸோண, அபேத², ஸோணா’’தி தே²ரம் ஆஹ. கிமித³ம், மஹாதே²ராதி? ஏதா தே மாதரோ ஆக³ச்ச²ந்தீதி. தே²ரோ ‘‘ஸக்³கோ³ உபட்டி²தோ மஹாதே²ரஸ்ஸா’’தி சிந்தேஸி. ஏவம் உபட்டா²னஸமங்கி³தா சலதீதி வேதி³தப்³பா³. ஏதாஸு ஸமங்கி³தாஸு இத⁴ ஆயூஹனசேதனாகம்ம-ஸமங்கி³தாவஸேன ‘‘காயது³ச்சரிதஸமங்கீ³’’திஆதி³ வுத்தம்.

தத்த² ஏகே ஆசரியா ‘‘யஸ்மிம் க²ணே கம்மம் ஆயூஹதி, தஸ்மிம்யேவ க²ணே தஸ்ஸ ஸக்³கோ³ வாரிதோ’’தி வத³ந்தி. அபரே பன ‘‘ஆயூஹிதகம்மம் நாம விபாகவாரம் லப⁴ந்தம்பி அத்தி² அலப⁴ந்தம்பி. தத்த² யதா³ கம்மம் விபாகவாரம் லப⁴தி, தஸ்மிம்யேவ காலே தஸ்ஸ ஸக்³கோ³ வாரிதோ’’தி வத³ந்தி. ஸேஸம் ஸப்³ப³த்த² உத்தானத்த²மேவாதி.

அட்டா²னபாளிவண்ணனா நிட்டி²தா.