(4) மூலமூலகனயோ

59. (க) யே கேசி குஸலா த⁴ம்மா, ஸப்³பே³ தே குஸலமூலமூலகாதி? ஆமந்தா.

(க²) யே வா பன குஸலமூலமூலகா, ஸப்³பே³ தே த⁴ம்மா குஸலாதி?

குஸலஸமுட்டா²னம் ரூபம் குஸலமூலமூலகம் ந குஸலம். குஸலம் குஸலமூலமூலகஞ்சேவ குஸலஞ்ச.

60. (க) யே கேசி குஸலா த⁴ம்மா, ஸப்³பே³ தே குஸலமூலேன ஏகமூலமூலகாதி? ஆமந்தா.

(க²) யே வா பன குஸலமூலேன ஏகமூலமூலகா, ஸப்³பே³ தே த⁴ம்மா குஸலாதி?

குஸலஸமுட்டா²னம் ரூபம் குஸலமூலேன ஏகமூலமூலகம், ந குஸலம். குஸலம் குஸலமூலேன ஏகமூலமூலகஞ்சேவ குஸலஞ்ச.

61. (க) யே கேசி குஸலமூலேன ஏகமூலமூலகா த⁴ம்மா, ஸப்³பே³ தே குஸலமூலேன அஞ்ஞமஞ்ஞமூலமூலகாதி?

மூலானி யானி ஏகதோ உப்பஜ்ஜந்தி குஸலமூலானி ஏகமூலமூலகானி சேவ அஞ்ஞமஞ்ஞமூலமூலகானி ச. அவஸேஸா குஸலமூலஸஹஜாதா த⁴ம்மா குஸலமூலேன ஏகமூலமூலகா, ந ச அஞ்ஞமஞ்ஞமூலமூலகா.

(க²) யே வா பன குஸலமூலேன அஞ்ஞமஞ்ஞமூலமூலகா, ஸப்³பே³ தே த⁴ம்மா குஸலாதி? ஆமந்தா.