3. சித்தித்³தி⁴பாதோ³

438. கத²ஞ்ச பி⁴க்கு² சித்தஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி? சித்தம் சே பி⁴க்கு² அதி⁴பதிம் கரித்வா லப⁴தி ஸமாதி⁴ம் லப⁴தி சித்தஸ்ஸேகக்³க³தம் – அயம் வுச்சதி ‘‘சித்தஸமாதி⁴’’. ஸோ அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி, உப்பன்னானம் பாபகானம் அகுஸலானம் த⁴ம்மானம் பஹானாய…பே… அனுப்பன்னானம் குஸலானம் த⁴ம்மானம் உப்பாதா³ய…பே… உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. இமே வுச்சந்தி ‘‘பதா⁴னஸங்கா²ரா’’. இதி அயஞ்ச சித்தஸமாதி⁴, இமே ச பதா⁴னஸங்கா²ரா; ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா சித்தஸமாதி⁴பதா⁴னஸங்கா²ரோத்வேவ ஸங்க்²யம் க³ச்ச²தி.

439. தத்த² கதமம் சித்தம்? யம் சித்தம் மனோ மானஸம்…பே… தஜ்ஜாமனோவிஞ்ஞாணதா⁴து – இத³ம் வுச்சதி ‘‘சித்தம்’’.

தத்த² கதமோ ஸமாதி⁴? யா சித்தஸ்ஸ டி²தி ஸண்டி²தி…பே… ஸம்மாஸமாதி⁴ – அயம் வுச்சதி ‘‘ஸமாதி⁴’’.

தத்த² கதமோ பதா⁴னஸங்கா²ரோ? யோ சேதஸிகோ வீரியாரம்போ⁴…பே… ஸம்மாவாயாமோ – அயம் வுச்சதி ‘‘பதா⁴னஸங்கா²ரோ’’. இதி இமினா ச சித்தேன, இமினா ச ஸமாதி⁴னா, இமினா ச பதா⁴னஸங்கா²ரேன உபேதோ ஹோதி…பே… ஸமன்னாக³தோ. தேன வுச்சதி ‘‘சித்தஸமாதி⁴பதா⁴னஸங்கா²ரஸமன்னாக³தோ’’தி.

440. இத்³தீ⁴தி. யா தேஸம் த⁴ம்மானம் இத்³தி⁴ ஸமித்³தி⁴ இஜ்ஜ²னா ஸமிஜ்ஜ²னா லாபோ⁴ படிலாபோ⁴ பத்தி ஸம்பத்தி பு²ஸனா ஸச்சி²கிரியா உபஸம்பதா³.

இத்³தி⁴பாதோ³தி. ததா²பூ⁴தஸ்ஸ வேத³னாக்க²ந்தோ⁴…பே… விஞ்ஞாணக்க²ந்தோ⁴.

இத்³தி⁴பாத³ம் பா⁴வேதீதி. தே த⁴ம்மே ஆஸேவதி பா⁴வேதி ப³ஹுலீகரோதி. தேன வுச்சதி ‘‘இத்³தி⁴பாத³ம் பா⁴வேதீ’’தி.