1. ஸுத்தந்தபா⁴ஜனீயம்

390. சத்தாரோ ஸம்மப்பதா⁴னா – இத⁴ பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி, உப்பன்னானம் பாபகானம் அகுஸலானம் த⁴ம்மானம் பஹானாய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி, அனுப்பன்னானம் குஸலானம் த⁴ம்மானம் உப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி, உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி.

391. கத²ஞ்ச பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி? தத்த² கதமே அனுப்பன்னா பாபகா அகுஸலா த⁴ம்மா? தீணி அகுஸலமூலானி – லோபோ⁴, தோ³ஸோ, மோஹோ. ததே³கட்டா² ச கிலேஸா. தம்ஸம்பயுத்தோ வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴, விஞ்ஞாணக்க²ந்தோ⁴, தம்ஸமுட்டா²னம் காயகம்மம் வசீகம்மம் மனோகம்மம் – இமே வுச்சந்தி ‘‘அனுப்பன்னா பாபகா அகுஸலா த⁴ம்மா’’. இதி இமேஸம் அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி.

392. ச²ந்த³ம் ஜனேதீதி. தத்த² கதமோ ச²ந்தோ³? யோ ச²ந்தோ³ ச²ந்தி³கதா [ச²ந்தீ³கதா (ஸ்யா.)] கத்துகம்யதா குஸலோ த⁴ம்மச்ச²ந்தோ³ – அயம் வுச்சதி ‘‘ச²ந்தோ³’’. இமம் ச²ந்த³ம் ஜனேதி ஸஞ்ஜனேதி உட்ட²பேதி ஸமுட்ட²பேதி [உட்டா²பேதி ஸமுட்டா²பேதி (ஸ்யா.) ஏவமுபரிபி] நிப்³ப³த்தேதி அபி⁴னிப்³ப³த்தேதி. தேன வுச்சதி ‘‘ச²ந்த³ம் ஜனேதீ’’தி.

393. வாயமதீதி. தத்த² கதமோ வாயாமோ? யோ சேதஸிகோ வீரியாரம்போ⁴…பே… ஸம்மாவாயாமோ – அயம் வுச்சதி ‘‘வாயாமோ’’. இமினா வாயாமேன உபேதோ ஹோதி ஸமுபேதோ உபாக³தோ ஸமுபாக³தோ உபபன்னோ ஸம்பன்னோ ஸமன்னாக³தோ. தேன வுச்சதி ‘‘வாயமதீ’’தி.

394. வீரியம் ஆரப⁴தீதி. தத்த² கதமம் வீரியம்? யோ சேதஸிகோ வீரியாரம்போ⁴…பே… ஸம்மாவாயாமோ – இத³ம் வுச்சதி ‘‘வீரியம்’’. இமம் வீரியம் ஆரப⁴தி ஸமாரப⁴தி ஆஸேவதி பா⁴வேதி ப³ஹுலீகரோதி. தேன வுச்சதி ‘‘வீரியம் ஆரப⁴தீ’’தி.

395. சித்தம் பக்³க³ண்ஹாதீதி. தத்த² கதமம் சித்தம்? யம் சித்தம் மனோ மானஸம்…பே… தஜ்ஜாமனோவிஞ்ஞாணதா⁴து – இத³ம் வுச்சதி ‘‘சித்தம்’’. இமம் சித்தம் பக்³க³ண்ஹாதி ஸம்பக்³க³ண்ஹாதி உபத்த²ம்பே⁴தி பச்சுபத்த²ம்பே⁴தி. தேன வுச்சதி ‘‘சித்தம் பக்³க³ண்ஹாதீ’’தி.

396. பத³ஹதீதி. தத்த² கதமம் பதா⁴னம்? யோ சேதஸிகோ வீரியாரம்போ⁴…பே… ஸம்மாவாயாமோ – இத³ம் வுச்சதி ‘‘பதா⁴னம்’’. இமினா பதா⁴னேன உபேதோ ஹோதி…பே… ஸமன்னாக³தோ. தேன வுச்சதி ‘‘பத³ஹதீ’’தி.

397. கத²ஞ்ச பி⁴க்கு² உப்பன்னானம் பாபகானம் அகுஸலானம் த⁴ம்மானம் பஹானாய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி? தத்த² கதமே உப்பன்னா பாபகா அகுஸலா த⁴ம்மா? தீணி அகுஸலமூலானி – லோபோ⁴, தோ³ஸோ, மோஹோ. ததே³கட்டா² ச கிலேஸா. தம்ஸம்பயுத்தோ வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴, விஞ்ஞாணக்க²ந்தோ⁴, தம்ஸமுட்டா²னம் காயகம்மம் வசீகம்மம் மனோகம்மம் – இமே வுச்சந்தி ‘‘உப்பன்னா பாபகா அகுஸலா த⁴ம்மா’’. இதி இமேஸம் உப்பன்னானம் பாபகானம் அகுஸலானம் த⁴ம்மானம் பஹானாய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி.

398. ச²ந்த³ம் ஜனேதீதி. தத்த² கதமோ ச²ந்தோ³? யோ ச²ந்தோ³ ச²ந்தி³கதா கத்துகம்யதா குஸலோ த⁴ம்மச்ச²ந்தோ³ – அயம் வுச்சதி ‘‘ச²ந்தோ³’’. இமம் ச²ந்த³ம் ஜனேதி ஸஞ்ஜனேதி உட்ட²பேதி ஸமுட்ட²பேதி நிப்³ப³த்தேதி அபி⁴னிப்³ப³த்தேதி. தேன வுச்சதி ‘‘ச²ந்த³ம் ஜனேதீ’’தி.

399. வாயமதீதி. தத்த² கதமோ வாயாமோ? யோ சேதஸிகோ வீரியாரம்போ⁴…பே… ஸம்மாவாயாமோ – அயம் வுச்சதி ‘‘வாயாமோ’’. இமினா வாயாமேன உபேதோ ஹோதி…பே… ஸமன்னாக³தோ. தேன வுச்சதி ‘‘வாயமதீ’’தி.

400. வீரியம் ஆரப⁴தீதி. தத்த² கதமம் வீரியம்? யோ சேதஸிகோ வீரியாரம்போ⁴…பே… ஸம்மாவாயாமோ – இத³ம் வுச்சதி ‘‘வீரியம்’’. இமம் வீரியம் ஆரப⁴தி ஸமாரப⁴தி ஆஸேவதி பா⁴வேதி ப³ஹுலீகரோதி. தேன வுச்சதி ‘‘வீரியம் ஆரப⁴தீ’’தி.

401. சித்தம் பக்³க³ண்ஹாதீதி. தத்த² கதமம் சித்தம்? யம் சித்தம் மனோ மானஸம்…பே… தஜ்ஜாமனோவிஞ்ஞாணதா⁴து – இத³ம் வுச்சதி ‘‘சித்தம்’’. இமம் சித்தம் பக்³க³ண்ஹாதி ஸம்பக்³க³ண்ஹாதி உபத்த²ம்பே⁴தி பச்சுபத்த²ம்பே⁴தி. தேன வுச்சதி ‘‘சித்தம் பக்³க³ண்ஹாதீ’’தி.

402. பத³ஹதீதி. தத்த² கதமம் பதா⁴னம்? யோ சேதஸிகோ வீரியாரம்போ⁴…பே… ஸம்மாவாயாமோ – இத³ம் வுச்சதி ‘‘பதா⁴னம்’’. இமினா பதா⁴னேன உபேதோ ஹோதி…பே… ஸமன்னாக³தோ. தேன வுச்சதி ‘‘பத³ஹதீ’’தி.

403. கத²ஞ்ச பி⁴க்கு² அனுப்பன்னானம் குஸலானம் த⁴ம்மானம் உப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி? தத்த² கதமே அனுப்பன்னா குஸலா த⁴ம்மா? தீணி குஸலமூலானி – அலோபோ⁴, அதோ³ஸோ, அமோஹோ. தம்ஸம்பயுத்தோ வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴, விஞ்ஞாணக்க²ந்தோ⁴. தம்ஸமுட்டா²னம் காயகம்மம், வசீகம்மம், மனோகம்மம் – இமே வுச்சந்தி ‘‘அனுப்பன்னா குஸலா த⁴ம்மா’’. இதி இமேஸம் அனுப்பன்னானம் குஸலானம் த⁴ம்மானம் உப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி.

404. ச²ந்த³ம் ஜனேதீதி…பே… வாயமதீதி…பே… வீரியம் ஆரப⁴தீதி…பே… சித்தம் பக்³க³ண்ஹாதீதி…பே… பத³ஹதீதி. தத்த² கதமம் பதா⁴னம்? யோ சேதஸிகோ வீரியாரம்போ⁴ …பே… ஸம்மாவாயாமோ – இத³ம் வுச்சதி ‘‘பதா⁴னம்’’. இமினா பதா⁴னேன உபேதோ ஹோதி…பே… ஸமன்னாக³தோ. தேன வுச்சதி ‘‘பத³ஹதீ’’தி.

405. கத²ஞ்ச பி⁴க்கு² உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி? தத்த² கதமே உப்பன்னா குஸலா த⁴ம்மா? தீணி குஸலமூலானி – அலோபோ⁴, அதோ³ஸோ, அமோஹோ. தம்ஸம்பயுத்தோ வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴, விஞ்ஞாணக்க²ந்தோ⁴, தம்ஸமுட்டா²னம் காயகம்மம் வசீகம்மம் மனோகம்மம் – இமே வுச்சந்தி ‘‘உப்பன்னா குஸலா த⁴ம்மா’’. இதி இமேஸம் உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி.

406. டி²தியாதி. யா டி²தி ஸோ அஸம்மோஸோ, யோ அஸம்மோஸோ ஸோ பி⁴ய்யோபா⁴வோ, யோ பி⁴ய்யோபா⁴வோ தம் வேபுல்லம், யம் வேபுல்லம் ஸா பா⁴வனா, யா பா⁴வனா ஸா பாரிபூரீ.

407. ச²ந்த³ம் ஜனேதீதி…பே… வாயமதீதி…பே… வீரியம் ஆரப⁴தீதி…பே… சித்தம் பக்³க³ண்ஹாதீதி…பே… பத³ஹதீதி. தத்த² கதமம் பதா⁴னம்? யோ சேதஸிகோ வீரியாரம்போ⁴…பே… ஸம்மாவாயாமோ – இத³ம் வுச்சதி ‘‘பதா⁴னம்’’. இமினா பதா⁴னேன உபேதோ ஹோதி…பே… ஸமன்னாக³தோ. தேன வுச்சதி ‘‘பத³ஹதீ’’தி.

ஸுத்தந்தபா⁴ஜனீயம்.