14. அகுஸலமூலகவிபாகனித்³தே³ஸோ

350. கதமே த⁴ம்மா அப்³யாகதா? யஸ்மிம் ஸமயே அகுஸலஸ்ஸ கம்மஸ்ஸ கதத்தா உபசிதத்தா விபாகம் சக்கு²விஞ்ஞாணம் உப்பன்னம் ஹோதி உபேக்கா²ஸஹக³தம் ரூபாரம்மணம், தஸ்மிம் ஸமயே அகுஸலமூலபச்சயா ஸங்கா²ரோ, ஸங்கா²ரபச்சயா விஞ்ஞாணம், விஞ்ஞாணபச்சயா நாமம், நாமபச்சயா ச²ட்டா²யதனம், ச²ட்டா²யதனபச்சயா ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணம். ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.

351. தத்த² கதமோ அகுஸலமூலபச்சயா ஸங்கா²ரோ? யா சேதனா ஸஞ்சேதனா ஸஞ்சேதயிதத்தம் – அயம் வுச்சதி ‘‘அகுஸலமூலபச்சயா ஸங்கா²ரோ’’…பே… தேன வுச்சதி ‘‘ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீ’’தி.

352. கதமே த⁴ம்மா அப்³யாகதா? யஸ்மிம் ஸமயே அகுஸலஸ்ஸ கம்மஸ்ஸ கதத்தா உபசிதத்தா விபாகம் ஸோதவிஞ்ஞாணம் உப்பன்னம் ஹோதி உபேக்கா²ஸஹக³தம் ஸத்³தா³ரம்மணம்…பே… கா⁴னவிஞ்ஞாணம் உப்பன்னம் ஹோதி உபேக்கா²ஸஹக³தம் க³ந்தா⁴ரம்மணம்…பே… ஜிவ்ஹாவிஞ்ஞாணம் உப்பன்னம் ஹோதி உபேக்கா²ஸஹக³தம் ரஸாரம்மணம்…பே… காயவிஞ்ஞாணம் உப்பன்னம் ஹோதி து³க்க²ஸஹக³தம் போ²ட்ட²ப்³பா³ரம்மணம்…பே… மனோதா⁴து உப்பன்னா ஹோதி உபேக்கா²ஸஹக³தா ரூபாரம்மணா வா…பே… போ²ட்ட²ப்³பா³ரம்மணா வா யம் யம் வா பனாரப்³ப⁴, தஸ்மிம் ஸமயே அகுஸலமூலபச்சயா ஸங்கா²ரோ, ஸங்கா²ரபச்சயா விஞ்ஞாணம், விஞ்ஞாணபச்சயா நாமம், நாமபச்சயா ச²ட்டா²யதனம், ச²ட்டா²யதனபச்சயா ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா அதி⁴மோக்கோ², அதி⁴மோக்க²பச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணம். ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.

353. கதமே த⁴ம்மா அப்³யாகதா? யஸ்மிம் ஸமயே அகுஸலஸ்ஸ கம்மஸ்ஸ கதத்தா உபசிதத்தா விபாகா மனோவிஞ்ஞாணதா⁴து உப்பன்னா ஹோதி உபேக்கா²ஸஹக³தா ரூபாரம்மணா வா…பே… த⁴ம்மாரம்மணா வா யம் யம் வா பனாரப்³ப⁴, தஸ்மிம் ஸமயே அகுஸலமூலபச்சயா ஸங்கா²ரோ, ஸங்கா²ரபச்சயா விஞ்ஞாணம், விஞ்ஞாணபச்சயா நாமம், நாமபச்சயா ச²ட்டா²யதனம், ச²ட்டா²யதனபச்சயா ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா அதி⁴மோக்கோ², அதி⁴மோக்க²பச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணம். ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.

354. தத்த² கதமோ அகுஸலமூலபச்சயா ஸங்கா²ரோ? யா சேதனா ஸஞ்சேதனா ஸஞ்சேதயிதத்தம் – அயம் வுச்சதி ‘‘அகுஸலமூலபச்சயா ஸங்கா²ரோ’’.

தத்த² கதமம் ஸங்கா²ரபச்சயா விஞ்ஞாணம்? யம் சித்தம் மனோ மானஸம்…பே… தஜ்ஜாமனோவிஞ்ஞாணதா⁴து – இத³ம் வுச்சதி ‘‘ஸங்கா²ரபச்சயா விஞ்ஞாணம்’’.

தத்த² கதமம் விஞ்ஞாணபச்சயா நாமம்? வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴ – இத³ம் வுச்சதி ‘‘விஞ்ஞாணபச்சயா நாமம்’’.

தத்த² கதமம் நாமபச்சயா ச²ட்டா²யதனம்? யம் சித்தம் மனோ மானஸம்…பே… தஜ்ஜாமனோவிஞ்ஞாணதா⁴து – இத³ம் வுச்சதி ‘‘நாமபச்சயா ச²ட்டா²யதனம்’’.

தத்த² கதமோ ச²ட்டா²யதனபச்சயா ப²ஸ்ஸோ? யோ ப²ஸ்ஸோ பு²ஸனா ஸம்பு²ஸனா ஸம்பு²ஸிதத்தம் – அயம் வுச்சதி ‘‘ச²ட்டா²யதனபச்சயா ப²ஸ்ஸோ’’.

தத்த² கதமா ப²ஸ்ஸபச்சயா வேத³னா? யம் சேதஸிகம் நேவ ஸாதம் நாஸாதம் சேதோஸம்ப²ஸ்ஸஜம் அது³க்க²மஸுக²ம் வேத³யிதம் சேதோஸம்ப²ஸ்ஸஜா அது³க்க²மஸுகா² வேத³னா – அயம் வுச்சதி ‘‘ப²ஸ்ஸபச்சயா வேத³னா’’.

தத்த² கதமோ வேத³னாபச்சயா அதி⁴மோக்கோ²? யோ சித்தஸ்ஸ அதி⁴மோக்கோ² அதி⁴முச்சனா தத³தி⁴முத்ததா – அயம் வுச்சதி ‘‘வேத³னாபச்சயா அதி⁴மோக்கோ²’’.

தத்த² கதமோ அதி⁴மோக்க²பச்சயா ப⁴வோ? ட²பேத்வா அதி⁴மோக்க²ம், வேத³னாக்க²ந்தோ⁴ ஸஞ்ஞாக்க²ந்தோ⁴ ஸங்கா²ரக்க²ந்தோ⁴ விஞ்ஞாணக்க²ந்தோ⁴ – அயம் வுச்சதி ‘‘அதி⁴மோக்க²பச்சயா ப⁴வோ’’.

தத்த² கதமா ப⁴வபச்சயா ஜாதி? யா தேஸம் தேஸம் த⁴ம்மானம் ஜாதி ஸஞ்ஜாதி நிப்³ப³த்தி அபி⁴னிப்³ப³த்தி பாதுபா⁴வோ – அயம் வுச்சதி ‘‘ப⁴வபச்சயா ஜாதி’’.

தத்த² கதமம் ஜாதிபச்சயா ஜராமரணம்? அத்தி² ஜரா, அத்தி² மரணம். தத்த² கதமா ஜரா? யா தேஸம் தேஸம் த⁴ம்மானம் ஜரா ஜீரணதா ஆயுனோ ஸம்ஹானி – அயம் வுச்சதி ஜரா. தத்த² கதமம் மரணம்? யோ தேஸம் தேஸம் த⁴ம்மானம் க²யோ வயோ பே⁴தோ³ பரிபே⁴தோ³ அனிச்சதா அந்தரதா⁴னம் – இத³ம் வுச்சதி ‘‘மரணம்’’. இதி அயஞ்ச ஜரா, இத³ஞ்ச மரணம். இத³ம் வுச்சதி ‘‘ஜாதிபச்சயா ஜராமரணம்’’.

ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீதி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸங்க³தி ஹோதி, ஸமாக³மோ ஹோதி, ஸமோதா⁴னம் ஹோதி, பாதுபா⁴வோ ஹோதி. தேன வுச்சதி ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீ’’தி.

அகுஸலமூலகவிபாகனித்³தே³ஸோ.

அபி⁴த⁴ம்மபா⁴ஜனீயம்.

படிச்சஸமுப்பாத³விப⁴ங்கோ³ [பச்சயாகாரவிப⁴ங்கோ³ (ஸீ. ஸ்யா.)] நிட்டி²தோ.