1. அபி⁴த⁴ம்மபா⁴ஜனீயம்

219. பா³வீஸதிந்த்³ரியானி – சக்கு²ந்த்³ரியம், ஸோதிந்த்³ரியம், கா⁴னிந்த்³ரியம், ஜிவ்ஹிந்த்³ரியம், காயிந்த்³ரியம், மனிந்த்³ரியம், இத்தி²ந்த்³ரியம், புரிஸிந்த்³ரியம், ஜீவிதிந்த்³ரியம், ஸுகி²ந்த்³ரியம், து³க்கி²ந்த்³ரியம், ஸோமனஸ்ஸிந்த்³ரியம், தோ³மனஸ்ஸிந்த்³ரியம், உபேக்கி²ந்த்³ரியம், ஸத்³தி⁴ந்த்³ரியம், வீரியிந்த்³ரியம் [விரியிந்த்³ரியம் (ஸீ. ஸ்யா.)], ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம், அனஞ்ஞாதஞ்ஞஸ்ஸாமீதிந்த்³ரியம், அஞ்ஞிந்த்³ரியம், அஞ்ஞாதாவிந்த்³ரியம்.

220. தத்த² கதமம் சக்கு²ந்த்³ரியம்? யம் சக்கு² சதுன்னம் மஹாபூ⁴தானம் உபாதா³ய பஸாதோ³…பே… ஸுஞ்ஞோ கா³மோபேஸோ – இத³ம் வுச்சதி ‘‘சக்கு²ந்த்³ரியம்’’.

தத்த² கதமம் ஸோதிந்த்³ரியம்…பே… கா⁴னிந்த்³ரியம்…பே… ஜிவ்ஹிந்த்³ரியம்…பே… காயிந்த்³ரியம்? யோ காயோ சதுன்னம் மஹாபூ⁴தானம் உபாதா³ய பஸாதோ³…பே… ஸுஞ்ஞோ கா³மோபேஸோ – இத³ம் வுச்சதி ‘‘காயிந்த்³ரியம்’’.

தத்த² கதமம் மனிந்த்³ரியம்? ஏகவிதே⁴ன மனிந்த்³ரியம் – ப²ஸ்ஸஸம்பயுத்தம். து³விதே⁴ன மனிந்த்³ரியம் – அத்தி² ஸஹேதுகம், அத்தி² அஹேதுகம். திவிதே⁴ன மனிந்த்³ரியம் – அத்தி² குஸலம், அத்தி² அகுஸலம், அத்தி² அப்³யாகதம். சதுப்³பி³தே⁴ன மனிந்த்³ரியம் – அத்தி² காமாவசரம், அத்தி² ரூபாவசரம், அத்தி² அரூபாவசரம், அத்தி² அபரியாபன்னம். பஞ்சவிதே⁴ன மனிந்த்³ரியம் – அத்தி² ஸுகி²ந்த்³ரியஸம்பயுத்தம், அத்தி² து³க்கி²ந்த்³ரியஸம்பயுத்தம், அத்தி² ஸோமனஸ்ஸிந்த்³ரியஸம்பயுத்தம், அத்தி² தோ³மனஸ்ஸிந்த்³ரியஸம்பயுத்தம், அத்தி² உபேக்கி²ந்த்³ரியஸம்பயுத்தம். ச²ப்³பி³தே⁴ன மனிந்த்³ரியம் – சக்கு²விஞ்ஞாணம்…பே… மனோவிஞ்ஞாணம். ஏவம் ச²ப்³பி³தே⁴ன மனிந்த்³ரியம்.

ஸத்தவிதே⁴ன மனிந்த்³ரியம் – சக்கு²விஞ்ஞாணம்…பே… காயவிஞ்ஞாணம், மனோதா⁴து, மனோவிஞ்ஞாணதா⁴து. ஏவம் ஸத்தவிதே⁴ன மனிந்த்³ரியம்.

அட்ட²விதே⁴ன மனிந்த்³ரியம் – சக்கு²விஞ்ஞாணம்…பே… காயவிஞ்ஞாணம் அத்தி² ஸுக²ஸஹக³தம், அத்தி² து³க்க²ஸஹக³தம், மனோதா⁴து, மனோவிஞ்ஞாணதா⁴து. ஏவம் அட்ட²விதே⁴ன மனிந்த்³ரியம்.

நவவிதே⁴ன மனிந்த்³ரியம் – சக்கு²விஞ்ஞாணம்…பே… காயவிஞ்ஞாணம், மனோதா⁴து, மனோவிஞ்ஞாணதா⁴து அத்தி² குஸலா, அத்தி² அகுஸலா, அத்தி² அப்³யாகதா. ஏவம் நவவிதே⁴ன மனிந்த்³ரியம்.

த³ஸவிதே⁴ன மனிந்த்³ரியம் – சக்கு²விஞ்ஞாணம்…பே… காயவிஞ்ஞாணம் அத்தி² ஸுக²ஸஹக³தம், அத்தி² து³க்க²ஸஹக³தம், மனோதா⁴து, மனோவிஞ்ஞாணதா⁴து அத்தி² குஸலா, அத்தி² அகுஸலா, அத்தி² அப்³யாகதா. ஏவம் த³ஸவிதே⁴ன மனிந்த்³ரியம்…பே… ஏவம் ப³ஹுவிதே⁴ன மனிந்த்³ரியம். இத³ம் வுச்சதி ‘‘மனிந்த்³ரியம்’’.

தத்த² கதமம் இத்தி²ந்த்³ரியம்? யம் இத்தி²யா இத்தி²லிங்க³ம் இத்தி²னிமித்தம் இத்தி²குத்தம் இத்தா²கப்போ இத்த²த்தம் இத்தி²பா⁴வோ – இத³ம் வுச்சதி ‘‘இத்தி²ந்த்³ரியம்’’.

தத்த² கதமம் புரிஸிந்த்³ரியம்? யம் புரிஸஸ்ஸ புரிஸலிங்க³ம் புரிஸனிமித்தம் புரிஸகுத்தம் புரிஸாகப்போ புரிஸத்தம் புரிஸபா⁴வோ – இத³ம் வுச்சதி ‘‘புரிஸிந்த்³ரியம்’’.

தத்த² கதமம் ஜீவிதிந்த்³ரியம்? ஜீவிதிந்த்³ரியம் து³விதே⁴ன – அத்தி² ரூபஜீவிதிந்த்³ரியம், அத்தி² அரூபஜீவிதிந்த்³ரியம்.

தத்த² கதமம் ரூபஜீவிதிந்த்³ரியம்? யோ தேஸம் ரூபீனம் த⁴ம்மானம் ஆயு டி²தி யபனா யாபனா இரியனா வத்தனா பாலனா ஜீவிதம் ஜீவிதிந்த்³ரியம் – இத³ம் வுச்சதி ‘‘ரூபஜீவிதிந்த்³ரியம்’’.

தத்த² கதமம் அரூபஜீவிதிந்த்³ரியம்? யோ தேஸம் அரூபீனம் த⁴ம்மானம் ஆயு டி²தி யபனா யாபனா இரியனா வத்தனா பாலனா ஜீவிதம் ஜீவிதிந்த்³ரியம் – இத³ம் வுச்சதி ‘‘அரூபஜீவதிந்த்³ரியம்’’. இத³ம் வுச்சதி ‘‘ஜீவிதிந்த்³ரியம்’’.

தத்த² கதமம் ஸுகி²ந்த்³ரியம்? யம் காயிகம் ஸாதம் காயிகம் ஸுக²ம் காயஸம்ப²ஸ்ஸஜம் ஸாதம் ஸுக²ம் வேத³யிதம் காயஸம்ப²ஸ்ஸஜா ஸாதா ஸுகா² வேத³னா – இத³ம் வுச்சதி ‘‘ஸுகி²ந்த்³ரியம்’’.

தத்த² கதமம் து³க்கி²ந்த்³ரியம்? யம் காயிகம் அஸாதம் காயிகம் து³க்க²ம் காயஸம்ப²ஸ்ஸஜம் அஸாதம் து³க்க²ம் வேத³யிதம் காயஸம்ப²ஸ்ஸஜா அஸாதா து³க்கா² வேத³னா – இத³ம் வுச்சதி ‘‘து³க்கி²ந்த்³ரியம்’’.

தத்த² கதமம் ஸோமனஸ்ஸிந்த்³ரியம்? யம் சேதஸிகம் ஸாதம் சேதஸிகம் ஸுக²ம் சேதோஸம்ப²ஸ்ஸஜம் ஸாதம் ஸுக²ம் வேத³யிதம் சேதோஸம்ப²ஸ்ஸஜா ஸாதா ஸுகா² வேத³னா – இத³ம் வுச்சதி ‘‘ஸோமனஸ்ஸிந்த்³ரியம்’’.

தத்த² கதமம் தோ³மனஸ்ஸிந்த்³ரியம்? யம் சேதஸிகம் அஸாதம் சேதஸிகம் து³க்க²ம் சேதோஸம்ப²ஸ்ஸஜம் அஸாதம் து³க்க²ம் வேத³யிதம் சேதோஸம்ப²ஸ்ஸஜா அஸாதா து³க்கா² வேத³னா – இத³ம் வுச்சதி ‘‘தோ³மனஸ்ஸிந்த்³ரியம்’’.

தத்த² கதமம் உபேக்கி²ந்த்³ரியம்? யம் சேதஸிகம் நேவ ஸாதம் நாஸாதம் சேதோஸம்ப²ஸ்ஸஜம் அது³க்க²மஸுக²ம் வேத³யிதம் சேதோஸம்ப²ஸ்ஸஜா அது³க்க²மஸுகா² வேத³னா – இத³ம் வுச்சதி ‘‘உபேக்கி²ந்த்³ரியம்’’.

தத்த² கதமம் ஸத்³தி⁴ந்த்³ரியம்? யா ஸத்³தா⁴ ஸத்³த³ஹனா ஓகப்பனா அபி⁴ப்பஸாதோ³ ஸத்³தா⁴ ஸத்³தி⁴ந்த்³ரியம் ஸத்³தா⁴ப³லம் – இத³ம் வுச்சதி ‘‘ஸத்³தி⁴ந்த்³ரியம்’’.

தத்த² கதமம் வீரியிந்த்³ரியம்? யோ சேதஸிகோ வீரியாரம்போ⁴ நிக்கமோ பரக்கமோ உய்யாமோ வாயாமோ உஸ்ஸாஹோ உஸ்ஸோள்ஹீ தா²மோ டி²தி அஸிதி²லபரக்கமதா அனிக்கி²த்தச²ந்த³தா அனிக்கி²த்தது⁴ரதா து⁴ரஸம்பக்³கா³ஹோ வீரியம் வீரியிந்த்³ரியம் வீரியப³லம் – இத³ம் வுச்சதி ‘‘வீரியிந்த்³ரியம்’’.

தத்த² கதமம் ஸதிந்த்³ரியம்? யா ஸதி அனுஸ்ஸதி படிஸ்ஸதி ஸதி ஸரணதா தா⁴ரணதா அபிலாபனதா அஸம்முஸ்ஸனதா ஸதி ஸதிந்த்³ரியம் ஸதிப³லம் ஸம்மாஸதி – இத³ம் வுச்சதி ‘‘ஸதிந்த்³ரியம்’’.

தத்த² கதமம் ஸமாதி⁴ந்த்³ரியம்? யா சித்தஸ்ஸ டி²தி ஸண்டி²தி அவட்டி²தி அவிஸாஹாரோ அவிக்கே²போ அவிஸாஹடமானஸதா ஸமதோ² ஸமாதி⁴ந்த்³ரியம் ஸமாதி⁴ப³லம் ஸம்மாஸமாதி⁴ – இத³ம் வுச்சதி ‘‘ஸமாதி⁴ந்த்³ரியம்’’.

தத்த² கதமம் பஞ்ஞிந்த்³ரியம்? யா பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி² – இத³ம் வுச்சதி ‘‘பஞ்ஞிந்த்³ரியம்’’.

தத்த² கதமம் அனஞ்ஞாதஞ்ஞஸ்ஸாமீதிந்த்³ரியம்? யா தேஸம் த⁴ம்மானம் அனஞ்ஞாதானம் அதி³ட்டா²னம் அப்பத்தானம் அவிதி³தானம் அஸச்சி²கதானம் ஸச்சி²கிரியாய பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி² த⁴ம்மவிசயஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – இத³ம் வுச்சதி ‘‘அனஞ்ஞாதஞ்ஞஸ்ஸாமீதிந்த்³ரியம்’’.

தத்த² கதமம் அஞ்ஞிந்த்³ரியம்? யா தேஸம் த⁴ம்மானம் ஞாதானம் தி³ட்டா²னம் பத்தானம் விதி³தானம் ஸச்சி²கதானம் ஸச்சி²கிரியாய பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி² த⁴ம்மவிசயஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – இத³ம் வுச்சதி அஞ்ஞிந்த்³ரியம்.

தத்த² கதமம் அஞ்ஞாதாவிந்த்³ரியம்? யா தேஸம் த⁴ம்மானம் அஞ்ஞாதாவீனம் தி³ட்டா²னம் பத்தானம் விதி³தானம் ஸச்சி²கதானம் ஸச்சி²கிரியாய பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி² த⁴ம்மவிசயஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – இத³ம் வுச்சதி ‘‘அஞ்ஞாதாவிந்த்³ரியம்’’.

அபி⁴த⁴ம்மபா⁴ஜனீயம்.