(2) லோகியது³கம்

1044. பஞ்சன்னம் க²ந்தா⁴னம் கதி லோகியா, கதி லோகுத்தரா? த்³வாத³ஸன்னம் ஆயதனானம் கதி லோகியா, கதி லோகுத்தரா? அட்டா²ரஸன்னம் தா⁴தூனம் கதி லோகியா, கதி லோகுத்தரா? சதுன்னம் ஸச்சானம் கதி லோகியா, கதி லோகுத்தரா…பே… ஸத்தன்னம் சித்தானம் கதி லோகியா, கதி லோகுத்தரா?

ரூபக்க²ந்தோ⁴ லோகியோ. சத்தாரோ க²ந்தா⁴ ஸியா லோகியா, ஸியா லோகுத்தரா. த³ஸாயதனா லோகியா. த்³வே ஆயதனா ஸியா லோகியா, ஸியா லோகுத்தரா. ஸோளஸ தா⁴துயோ லோகியா. த்³வே தா⁴துயோ ஸியா லோகியா, ஸியா லோகுத்தரா. த்³வே ஸச்சா லோகியா. த்³வே ஸச்சா லோகுத்தரா.

த³ஸிந்த்³ரியா லோகியா. தீணிந்த்³ரியா லோகுத்தரா. நவிந்த்³ரியா ஸியா லோகியா, ஸியா லோகுத்தரா. தயோ அகுஸலஹேதூ லோகியா. ச² ஹேதூ ஸியா லோகியா, ஸியா லோகுத்தரா. கப³ளீகாரோ ஆஹாரோ லோகியோ. தயோ ஆஹாரா ஸியா லோகியா, ஸியா லோகுத்தரா. ச² ப²ஸ்ஸா லோகியா. மனோவிஞ்ஞாணதா⁴துஸம்ப²ஸ்ஸோ ஸியா லோகியோ, ஸியா லோகுத்தரோ. ச² வேத³னா லோகியா. மனோவிஞ்ஞாணதா⁴துஸம்ப²ஸ்ஸஜா வேத³னா ஸியா லோகியா, ஸியா லோகுத்தரா. ச² ஸஞ்ஞா லோகியா. மனோவிஞ்ஞாணதா⁴துஸம்ப²ஸ்ஸஜா ஸஞ்ஞா ஸியா லோகியா, ஸியா லோகுத்தரா. ச² சேதனா லோகியா. மனோவிஞ்ஞாணதா⁴துஸம்ப²ஸ்ஸஜா சேதனா ஸியா லோகியா, ஸியா லோகுத்தரா. ச² சித்தா லோகியா. மனோவிஞ்ஞாணதா⁴து ஸியா லோகியா, ஸியா லோகுத்தராதி.

அபி⁴ஞ்ஞா த்³வே ஸாரம்மணா, தி³ட்டா² குஸலவேத³னா;

விபாகா ச உபாதி³ன்னா, விதக்கம் ரூபலோகியாதி.

த⁴ம்மஹத³யவிப⁴ங்கோ³ நிட்டி²தோ.

விப⁴ங்க³பகரணம் நிட்டி²தம்.